10 de Setiembre de 2021
Track: Linza (Chacetania) - Meseta d'Os Treis Reis - Paquiza
Abandonábemos el Ball de Benás, magar de l'ascensión a la Tuca Salbaguardia y de cuatru díes siguíos d'actividá, a la gueta de bon tiempu, faciendo viaxe tranquilu hacia los Valles Occientales del Pirinéu. El nuesu destín diba ser el valle d'Ansó, averándonos hasta'l refuxu de Linza onde ficiéramos un picotéu en forma de cena, enantes de dir a durmir pal día siguiente almorzar y ponenos n'aición col envís d'ascender a la Meseta d'Os Tres Reis.
La verdá ye que Fernan, escoyó perbien les posibles opciones, cuando truncósenos l'ascensión a la Tuca d'Aneto y tanto'l Salbaguardia p'aprovechar l'últimu día en Benás, como'l viaxe pa conocer más valles del Pirinéu, taben encantándonos, asina qu'alborecimos con ganes de conocer un pocu más d'estos Valles Occidentales que ya nos facíen sentir más cerquina de casa con una vexetación más atlántica.
Nuna mañana pelín fresca, preparámos y salimos del aparcaderu de Linza, onde hai movimientu montañeru, tanto p'ascender a la Meseta d'Os Tres Reis, como pa continuar hacia les distintes estayes de la nomada Senda de Camille.
Entamaremos a patiar pel Sobrante de Linza, siempre con un cómodu senderu p'ascender hacia la fuente del Cubillar de Petrechema, siguiendo dempués hacia los collaos de Linza, onde vamos ganando vistes hacia prestosos montes como tol cordal d'Alano, Ezkaurre y milenta montes calizos más, con una pinta tremenda que Fernan conoce perbien.
Cola vista puesta nel llaberintu calizu pente la Meseta d'Os Tres Reis y el Petretxema pasamos pel colláu de Linza y descendemos hacia la Hoya de la Solana, pa siguir camín hacia la Hoya del Portillo de Larra, onde diremos averándonos hacia'l mundiu calizu y hacia una borrina que ya veremos que tal permítenos avanzar.
El camín sigue siendo cenciello, anque la presencia del borrín, paez que fae pensáselo dos vegaes a dalgunos grupos, los cuales vamos dexando atrás. Ensín remediu, metémonos dafechu nel borrín, quiciás na parte más interesante de l'ascensión que nos fai perder les vistes hacia la fastera del Acherito, lo cual ye una verdadera pena.
Enmediu'l borrín, negociamos los últimos pasos, con dalgún pequeñu trepe y aportamos a los 2440 m del monte más altu d'Euskal Herria: Hiru Erregeen Mahai n'euskera o Meseta d'Os Tres Reis n'aragonés, onde se supón que reuníense los reis de Navarra, Aragón y Francia y onde como non, llantaron un buzón de cume en forma de castiellu que sobrepasa tolo aceptable pal mió gustu jeje.
Col día repunantón y frescu por mor del borrín, nun tenemos munches ganes de pasar fríu, asína que descendemos cola mesma, ganando dalgo más de vistes hacia la Hoya la Solana, puntu nel que decidiremos si facemos dalgo más o tornamos al refuxu de Linza.
Cola inercia del descensu y viendo que paecía dexanos ver más paisaxe hacia Larra, decidimos continar xubiendo la llomba qu'accede a la Paquiza Linzola, mientres Fernan adelántase hacia'l refuxu pa dase una duchina d'agua caliente y descansar al sol.
Mario, Dani y yo, xubimos engañaos pola apertura de les ñubes y a metá de llomba, tornando a metese'l borrín, aportando a l'arista de la Paquiza Linzola casi a palpu, dando con una primer antecume y col cumal de 2112 m marcáu por un palu namái, a lo postrero.
Ensin más, garramos l'arista oeste y según vamos baxando hacia Aztaparreta, dexamos el fríu y el borrín atrás, asoleyando y caleciendo con unos rayinos de sol que son una maraviya, mientres ganamos vistes hacia Linza a un llau y hacia Belagua al otru.
Aportaremos al colláu de Aztaparreta, enmediu ya d'un guapu fayéu, nel qu'esfrutaremos d'una cómoda y preciosa baxada hasta'l refuxu de Linza, onde Fernan, xarra de birra en mano, ta esperándonos ducháu nuna mesina de merenderu.
No hay comentarios:
Publicar un comentario