Trail Pisada'l Diantre (Colunga)

24 d'Abril de 2022

Track: Trail Pisada'l Diantre (Colunga)

Web del Trail: Trail Pisada'l Diantre

Clasificaciones: Clasificaciones 2018   

La vuelta a les Carreres pel Monte sigue'l so cursu, sumando kilómetros n'entrenos y en carrera, intentando nun engorilame nos ritmos, tema perdifícil cuando sientes que pues dar más. Esto, sobromanera si tornes a correr penriba de la media maratón, onde saber dosificar ye lo más importante, pero seyamos serios, siguen prestándome les carreres onde tirar a fueu tolos kilómetros posibles y llegar a meta sintiendo que dístelo too.

Asina llantámonos na primer carrera "seria" de la temporada en cuanto a kilómetros y dureza, na Pisada'l Diantre, onde los 30 km, con un primer terciu mui correnderu pela costa de Colunga y Caravia, debería tomámelo con calma, pero los ritmos llévenme y tiro más fuerte de lo que debiera hacia la baxera'l Sueve.

Tornábemos a correr pela costa de Colunga

D'esti xeitu, siguiera a bon ritmu, na primer parte de la xubida hacia'l Pienzu, siendo esta vegada, pel picu Babú, pa crestiar con unes vistes ablucantes hacia Picos, Ponga, Casu y tola mariña centru oriental astur. A dicir verdá, nun hai una carrera más guapa qu'esti Trail del Sueve, poro vuelvo a dar les gracies a Cesar Pina y tola so compaña, por siguir investigando caminos y por facer d'esta carrera un referente total de percorríu correnderu y montañeru, pero sobretou un agasayu pa los güeyos coles vistes.  

Mar y monte presentes durante tola carrera

Na crestería pente'l Cuetu Les Duernes y el Picu Pienzu, entamo a sentir molesties y ciertos avisos en forma de calambres y ya veo, que voi tener que regular mui muncho, si nun quiero pasalo mal. Per delantre, quedaba una llarga baxada na que cualesquier resbarión, pue faceme pasar penuries hasta la meta, asina que baxamos vueltes y descendemos cola calma.

Increyibles les semeyes qu'apurriéronmos los fotógrafos durante la carrera

Per delantre, los "pros", Alberto y Carlinos, van como postes, faciendo un carrerón, notándose muncho que tómenselo mui en seriu y los sos entrenos costantes tan furrulando pero bien. Per detrás, Gus y Miguel, van tirando con puxu tamién faciendo un carrerón increyible, sufriendo colos pies el mió hermanu y llegando con mui bona cara Miguel, que de xuru pudiera forciar un pocu más.

Equipu motiváu durante tola carrera

De Silvia, nun se nada, ya que sin querer na primer parte ya escapé a mi bola, pero espero que-y vaya meyor que n'otres carreres llargues onde suel atragantase colos kilómetros, ya que de momentu, ye más de mecha corta y tien el so puntu fuerte nes baxaes y pa eso hai que llegar cola maquinaria ensin problemes.

Venga.... ta la prósima vegada pel Sueve

Van pasando los kilómetros de baxada col frenu manu echáu, lo que faime petar de cuadriceps y los xemelos ya nin pienso nellos, porque va muncho kilómetros que tan como piedres. Pasen los avituallamientos y nin paro, ya que nun voi nin cansáu, pero llevar les pates así, nun me dexa esfrutar como quisiera nin forzar una migayina pa nun perder posiciones na baxada.

Esfrutando munchísimu a tramos mui correnderos

Turno posiciones con dellos collacios colos que voi falando de les sensaciones y lo duro de la carrera y alcuéntrome con qu'un anormal espríntame a la entrada de meta, cuando nun lo viera en tola carrera. En fin, toi tan cansáu, que nin soi a enfadame, asina que charro un ratín con Sonia, que ficiera'l Diantrín esfrutándolo y forzándose más de lo que quisiera jeje y esperamos pol restu del equipu.

Felicidaes a Silvia pol carrerón... brutal

La élite del grupu, ya taben duchándose, raspiando les 3 hores y media de carrera, baxando yo de les 4 hores por un par de minutos y aportando a meta dempués pocos minutos dempués Miguel, pa siguir llueu Silvia y Gus nunos tiempos mui asemeyaos.

 

Nun pueu más que resaltar la carrera de Silvia, que per primer vegada facía podiu femenín na xeneral, quedando tercera femenín y segunda de la so categoría, lo qu'amuesa a les clares la so progresión y el potencial xabaz que tíen pa les Carreres pel Monte.

Camudando'l Camín nel Diantre un añu más

Como siempre, dar les gracies a la organización, voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos

Somosierra (Sierra Norte) - Cebollera Vieja - Cascada de los Litueros

16 d'Abril de 2022

Track: Somosierra (Sierra Norte) - Cebollera Vieja - Cascada de los Litueros

Una selmana santa más, magar d'un viaxe esguilador per Cuenca averámonos hasta'l pueblín en Soria, pa pasar dellos díes cola familia, centrándome más en correr pel pueblu y en salir a facer dalgún dosmil del Sistema Ibérico o del Central, como nesti casu, averándonos esta vegada hasta Somosierra en Madrí, p'ascender la Cebollera Vieja o pico Tres Provincias (Madrí, Segovia y Guadalajara).

Ensin matanos a madrugar muncho, dempués d'un dia de fartures continues, aportamos al pueblu de Somosierra a les 11 menos cuartu la mañana, llueu de pocu más d'una hora de carretera dende Recuerda, más menos, el mesmu camín que llévanos dir hasta la fastera del Urbión, así que les opciones son bayuroses pa facer monte.

Salimos de Somosierra (1443 m)

Con un día fresquín por mor del vientu, salimos a caleyar per una pista, PR-23 (Camino de los Pinillas), que llevarános con una pendiente cómoda hasta'l Prado Antón, onde tendremos delles envueltes más pindies hasta abandonar el PR y continuar per una pista a la manzorga pela que llanearemos con tranquilidá.

Esfrutamos d'un día soleyeru y de la cómoda pista del camino de las Pinillas

Magar d'un ratín de prestosu llanéu al solete, aportaremos a un puntu, nel qu'un fitu, indícanos que ye'l momentu pa garrar un pindiu senderín que tien de llevanos a la cimera'l cordal de Cebollera. Otra opción sedría continuar pel PR 23 pa garrar tola cordelera dende la Cebollera Nueva a la Vieja, pero viendo lo ventosu del día, na parte alta, meyor tar menos tiempu espuestu.

Aportamos al cordal y siguiremos la pista que llévanos casi hasta'l cumal

Dexaremos el senderu atrás, arribando hasta una pista que percorre tol cordal y ya, con tola ropa que tenemos diremos a bon ritmu hacia la Cebollera Vieja, siempre con vistes hacia'l Pico Lobo, qu'entá caltién, sobromanera na so fastera norte, ñeve abondo.

Miguel nos 2115 m de la Cebollera Vieja / Tres Provincias

Con pocu más, ascenderemos hasta'l vértice xeodésicu de la Cebollera Vieja (2215 m), onde alcontramos a varios montañeros abellugaos del fríu vientu. Nós, fadremos dalguna semeya y entamaremos el descensu, tamién per bona pista, a tramos andando y a tramos corriendo, hasta engorilanos a correr na so mayor parte, demientres esfrutamos de vistes hacia Guadarrama y Peñalara.

Baxada rapídisima corriendo hasta averanos al Chorro

Corriendo baxaremos tola pista hasta tener que siguir per un ampliu cortafueos que va dexanos finalmente, nun tramín de senderu, ya mui cerquina de la riega'l Chorro. Equí correremos otru tramín guapu de viesca y pegaos a la riega, ya va tocar andar sollerte pa siguir el senderu, siempre con tendencia a la mandrecha, siendo un de los tramos más guapos de tola ruta.

Baxamos averaos a la riega'l Chorro pa conocer la cascada de Litueros

Baxaremos hasta la mesma riega del Chorro pa destrepar xunto a la Peña del Chorro, dándo-y vuelta y pudiendo acolumbrar tola belleza a la vuelta la peña, de la cascada de Litueros, onde ya topamos un garrapiellu turistes y dalgún grupín de barranquistes esfrutando d'esti día soleyeru, anque ventosu pa nós, en tola parte alta del cordal de Cebollera.

Abandonaremos al turistéu y con malpenes un kilómetru de carretera ya aportaremos de nuevo a Somosierra, zarrando esta circular de casi 15 km, en malpenes 3 hores de camín, faciendo un total de +/-800 m de desnivel acumuláu.

Camudando'l Camín dende la Sierra Norte madrilana

Cueva Cabrera (Morcín)

6 d'Abril de 2022

Aficionáu como soi, a conocer tolos seutores y escueles perdíes n'Asturies, fueron años viendo la Cueva Cabrera dende l'averamientu a Figares, poro, va más d'un añu, un día ensin ganes d'esguilar, decidimos Anna y yo, dar un paseín hasta ellí coles perrones y de pasu conocer esta increyible cuevona, perfonda y perguapa en tola so estensión.

Daquella, namái que fuéramos de paséu y abrir camín ya que taba casi imposible de xubir por mor de la vexetación, enllena de felechos y ortigues y malpenes veíase per onde percorría'l senderu de xubida. Esta segunda vegada, llueu de sentir que llevaba tiempu xente yendo a esguilar per ellí, ente ellos el míticu Andrada, averéme per ellí con Alvarín.

Cueva Cabrera en plena xubida

Col croquis de PiratasFree de va milenta años, que tenía guardáu pel ordenador, aportamos al seutor con una bona sudada, llueu pasar per primer vegada hasta dempués del segundu túnel cola furgo y caleyar el tramín de pista y senderu pindiu que veíase munchu más marcáu.

 

Magar de facer una pequeña visitina a la cueva, alcontrándonos con víes montaes a mou de proyeutu, ponémonos a esguilar, faciendo yo'l 6a+ de la manzorga (Osito Blanco) pa rodar un pelín y de pasu montar la siguiente, lo que ponía como 7a+ nel croquis vieyu.

Dende dientru'l cuevón... preciosa

Dicir que'l 6a+ lloñe de ser la típica vía metida a calzador nun seutor de grau duro, ye bastante guapa y hai que ñavegar pa que salga cenciella. D'equí pasámonos a la preba de la siguiente vía, la que según croquis vieyos ponía 7a+, metiéndose Alvarín y viendo que ye un bloque perduro.

Saca más menos, los pasos, pero sabiendo qu'al segundu pegue difícilemnte diba salir y diciendo que menos mal que puse les cintes, porque'l pasu ye perduro y poner la cinta del pasu ye bien complicáu. Tócame'l turnu y aporto al pasu, el cuál véolo mui, mui duro pa un 7a+, asína que salgo como pueu p'arriba alloriando col bloque y cola plaquina d'arriba qu'hai que matizala y quiciás, ya ye 7a de por sí sola.

Kíla nel pie de vía nesta tarde primaveral

 

D'esti xeitu, damos otru pegue caún, avanzando un pelín nos pasos y colamos a tomar una birra, alloriando pola dureza de la vía pa ser 7a+. Nesto, alcuérdome que tengo la guía d'Esaú en casa, mirando al día siguiente y viendo que nesta guía, la vía que probáremos ta de 7b+ lo que cuádranos a los dos y a la mesma vegada, aporta motivación pa metese nella con más ganes.

Cueva Cabrera

Croquis modificaos por mi de la escuela d'escalada de Cueva Cabrer a, por mor de la pàxina de PiratasFree y con graos actualizaos de la guía de Escalada Deportiva Asturias. Gracies y col so permisu.

------------------------------------------------------------------

El Pedrosu (Piloña) - Peña Niañu - Valle Llarañes

 2 d'Abril de 2022

Track: El Pedrosu (Piloña) - Peña Niañu - Valle Llarañes

Ivernada clásica primaveral que déxanos ensin posiblidaes de facer dalgo más curioso, tanto nel monte, como esquiando y sobretou esguilando. Asina qu'aprovechando que taba'l nuesu collaciu vascu Fernan per Asturies de monte con Nel, preparamos una ruta esprés viendo que'l sábadu pudiera aguantar un pelín la meteo.

A la llamada montuna, diben apuntase tamién Charly, Benjamín y Anna, asína que xuntámonos un grupín en L'Infiestu, col envís de conocer un pelín más, el conceyu de Piloña, que tantes bones rutes lleva dándonos nestos años.

Partimos del pueblín d'El Pedrosu (445 m)

Magar del almuerzu de rigor, siguimos camín en coche hacia'l valle d'Espinaréu, saliendo al pocu del pueblu del mesmu nome per una pista que tien depositanos n'El Pedrosu, llugarín onde aparcaremos delantre d'unos apartamentos rurales y prepararémonos pa entamar a caleyar.