El Pedrosu (Piloña) - Peña Niañu - Valle Llarañes

 2 d'Abril de 2022

Track: El Pedrosu (Piloña) - Peña Niañu - Valle Llarañes

Ivernada clásica primaveral que déxanos ensin posiblidaes de facer dalgo más curioso, tanto nel monte, como esquiando y sobretou esguilando. Asina qu'aprovechando que taba'l nuesu collaciu vascu Fernan per Asturies de monte con Nel, preparamos una ruta esprés viendo que'l sábadu pudiera aguantar un pelín la meteo.

A la llamada montuna, diben apuntase tamién Charly, Benjamín y Anna, asína que xuntámonos un grupín en L'Infiestu, col envís de conocer un pelín más, el conceyu de Piloña, que tantes bones rutes lleva dándonos nestos años.

Partimos del pueblín d'El Pedrosu (445 m)

Magar del almuerzu de rigor, siguimos camín en coche hacia'l valle d'Espinaréu, saliendo al pocu del pueblu del mesmu nome per una pista que tien depositanos n'El Pedrosu, llugarín onde aparcaremos delantre d'unos apartamentos rurales y prepararémonos pa entamar a caleyar.

 

Salimos d'El Pedrosu pel valle de la riega Felguerina

Sorprende l'estáu y lo estrechu de la carreterina p'acceder al pueblu, col turismu rural esistente nel mesmu, pero bono, más tranquilu pal que venga hasta'l Pedrosu. Nós, preparamos bota pa ñeve y polaina y salimos per pista, pegaos al rigu la Felguerina en direición al de Brañanueva.

Pasamos peles cabañes de Pereda

La pista ye cómoda y el paisaxe mui guapu, poro demientres aldericamos en grupos aportamos a les cabañes de Pereda, onde la ñeve entama a ser protagonista. Llueu de perpasar la última cabaña, entamaremos l'ascensu hacia'l colláu Niañu, onde una maraviyosa capa de ñeve polvu va facer les delicies de les nueses pisaes.

Aportamos al colláu Niañu con ñeve polvu recién cayía

El día, ta pelín xuguetón, pasándonos ñubes prietes penriba ñevisquiándonos, pa de secute abrir y calecer asoleyando hasta la siguiente ñube. Aportaremos al colláu Niañu (874 m), onde les vistes abriríense hacia l'oriente, con tolos montes casinos, ponguetos ya inclusu Picos, pero tenemos la ñube metida y malpenes somos a ver el vecín picu Les Vízcares. 

Grupu nel colláu Niañu onde les vistes abriríense enforma

Taremos un ratín nel colláu, poniendo ropa, ya que la ñube esta vegada metióse del tou y entamaos l'ascensión a la Peña Niañu, a la que malpenes sepáranmos 200 m de desnivel. Pente tarrén, reciéntemente quemáu y restolando pente la ñeve, diremos alcontrando'l senderu que llévenos hasta'l cumal de 1075 m.

Ascendemos a la Peña Niañu pente la ñeve y tierra quemada

Pali, pali, aportaremos tol grupu a la peña Niañu, onde permanecemos un ratín, ya que vemos dalgún clarin pente la ñube blanquecina. Dicho y fecho, al pocu tornamos a sintir el solete na nuesa piel, poro picamos dalgunos frutos secos y facemos un semeya de cume más lluminosa que minutos enantes.

Cume nos 1075 m de la Peña Niañu

Al norte ábrense les vistes, faciéndome alcordanza de la soba que metiéramonos Kilina y yo, el día de reis del añu anterior, cola ascensión al Picu Torre dende'l valle contiguu del rigu Color. Ensin más, entamamos el descensu pela arista noreste hasta un peñón evidente, onde ya camudamos el sen pa facer baxada hasta la Collada Llarañes.

Baxamos dende'l Niañu a la collada Llarañes

 

Nesta collada camentamos la posiblidá de siguir hacia'l siguiente Pandu pa continuar ruta hacia'l Picu Sopiedra, pero'l grupu convien que ya tuvimos bastante suerte col día y les ñubes siguen amenazantes, poro buscamos descensu sobre la marcha, alcontrando un senderu "evidente" pente más tarrén quemáu, siempre pela mandrecha del valle Llarañes.

Faldeamos tol valle Llarañes pela so mandrecha

Dempués del primer tramu más de navegar, aportaremos a un claru camín, que va llevanos nun par de llargues y cómodes envueltes, hasta'l centru valle Llarañes, con vistes a la fastera contraria del valle Espinaréu, onde destaca la xerra'l Sellón que ya conociéramos unos años enantes.

Descendemos el tramu final del valle Llarañes de nuevu hasta El Pedrosu

Con pocu más esfuerzu, damos a los restos d'un antiguu mayáu, supongo que'l de Llarañes y ya cruciaremos la riega, pa facer el tramu final de descensu a pela manzorga, alcontrándonos ya con praos bien cuidaos que llévenmos de nuevu hasta El Pedrosu, zarrando la circular.

 

En resume, ruta mañanera de 3 hores y media, con +/-625 m de desnivel y un percorríu de 7.6 km que bien valiónos pa pasar la mañana, charrar animádamente baxo la ñeve y el sol y facer l'esfuerzu necesariu pa merecenos un vermú nos chigres del valle Espinaréu.

 

Camudando'l Camín en Piloña