viernes, 22 de junio de 2018

Espinaréu (Piloña) - Picu Sopiedra

11 de Marzu de 2018

Track: Espinaréu (Piloña) - Picu Sopiedra


Nos últimos tiempos, tengo un enfotu especial por conocer tolos valles perdíos del conceyu de Piloña y ye que considero qu'esti conceyu, ta quiciás dalgo tapecíu pelos conceyos d'alredore (Casu, Ponga,...), pertenecientes a dellos parques naturales.

Por embargu, tenemos milenta opciones pa facer montes, milenta riegues, foces, crestones, xerros que conocer, pasos por alcontrar, siendes por redescubrir usaes pelos pastores de Piloña. Tán sólo, hai que garrar el mapa ya intentar trazar una ruta afayaiza pal nuesu envís del día.

Salimos de ruta dende Espinaréu (241 m)

Nesti casu, saldremos dende Espinaréu, al qu'aportaremos magar del viaxe dende Xixón pela minera empatando cola autovía'l Cantábricu del ramal d'Uviéu,hasta salir nel emplame de Nava. Na nacional N-634, travesaremos el conceyu de Nava entrando nel de Piloña hasta parar na capital, L'Infiestu onde almorzaremos tranquilamente.

Llueu del cafetín, salimos de L'Infiestu pela PI-4 hasta aportar a Espinaréu, onde aparcamos los coches na plaza la ilesia al llau del máxicu texu. El día amenazaba gafu pa munches fasteres d'Asturies, llibrando un pelín meyor pol centru y costa, poro decidimos facer una ruta curtia que llévenos a conocer el picu Sopiedra.

Averámonos per carretera a Porciles pa siguir hacia'l Tablazu

Pa ello, saldremos un grupín d'averaos al GM Xuan de la Borrina y los pocos miembros qu'animámonos esta vegada, per carretera en direición al pueblu de Porciles. Nesti tramín tropezámonos con dalguna paisana dando un paseín mañaneru y bien ceo saldremos penriba'l pueblu per una cómoda pista que tien de llevanos hasta'l colláu Tayada (611 m).

Les vistes ábrense de camín hacia'l picu Sopiedra

Siguiremos pista alantre pel Tablazu, compartiendo camín col GR-105, pa pocu dempués abandonar la pista, pasándonos a caleyar per una enorme campera, hasta facer l'ascensión final, per tarrén quemáu de los pasaos incendios, dando colos 929 m del picu Sopiedra.

Cume ventosa nel picu Sopiedra (929 m)

Como daben les previsiones, acertamos viniendo a estes cotes centrales, ya qu'aparte d'un vientu xabaz, vemos como tola fastera sur ta asolombrecía per una boina de ñubes baxes. Quedámonos coles vistes pal norte y tenemos que colar del Sopiedra porque tíranos embaxo'l vendabal.

Descendemos hacia'l colláu Pendeor (742 m)

Continuaremos el paseín descendiendo pela arista E del Sopiedra, col envís d'empatar col Gr-105 de nuevu, aportando al colláu Pendeor (742 m) onde descansamos un pocu del gafu vientu. Equí fadremos una clara envuelta, escaeciendo'l camín de los Peregrinos (GR-105) y vamos conocer el valle La Castañal.

Facemos un guapu descensu per pista pel valle la Castañal

La pista que garramos baxa sele, pente exemplares fermosos de faya, castañal,... alcontrándonos con dalguna vallina que baxa dende'l Sopiedra sorprendentemente guapa. El nuesu andar, despreocupáu, como'l que va al entierru d'otru, fadrános pasar per Carricea pa siguir descendiendo hasta'l Sobanéu, onde ascenderemos al Pandu L'Osil a la gueta d'un pocu más d'emoción.

En Sobanéu desviámonos hacia'l Cantu Pandu

Digo d'emoción y tamién d'allargar la ruta, ya que si siguiéremos pista abaxo acabaríemos en Raicéu y llueu na ponte la Cruz pa siguir per carretera hasta Espinaréu. Nós, preferimos ascender hacia'l Cantu Pando, onde podremos garrar un guapu senderu colgáu sol valle Espinaréu y anque dalgo tomáu nel entamu, nos llevará a pasar pela fonte Tronquiellos y a posteriori dexarános nel guapu mayáu de la Escosura.

Un guapu senderín colgáu fadrános aportar a la Escosura

Pasáu'l mayáu, podríemos baxar casi dende la propia forcada que fai la Peña cola Peñerina hacia Espinaréu dando per camín hasta la carretera a l'altor del barriu de Sotu o siguir la pista que va penriba'l Praón, averándose a la riega la Vallina y aportando de nuevu a la carretera que vien de Porciles, pela que saliéramos va delles hores.

Al igual que pela mañana, un pequeñu paséu pel asfaltu dexarános n'Espinaréu, magar de llevar caminaos casi 14 cómodos kilómetros, durante 5 hores y 15 min, superando un desnivel positivu de 835 m lo que vien a ser una ruta mui afayaiza pa los díes curtios del iviernu.

Camudando'l Camín nel valle piloñés d'Espinaréu

1 comentario:

  1. Perguapu percorríu que conocemos y préstamos a esgaya. ¡Unes semeyes precioses!

    ResponderEliminar