martes, 12 de junio de 2018

Bo (Ayer) - Cordal de Ranero

18 de Febreru de 2018

Track: Bo (Ayer) - Cordal de Ranero



Dempués de la soba fozando pela ñeve del día anterior, n'ascensión a la Carba Valsecu, tocaba salir col GM Xuan de la Borrina y teniendo mui claro, qu'otra bregada nun me diba salir barata, decidí buscar dalgo más sele, teniendo en cuenta que'l día nun lo daben mui afayaizu.

Poro, eché un vistazu a dalgún cordal central y alcontréme col del Ranero, pente los valles del Caudal y del rigu Ayer. Pa ello, decidimos quedar en Morea d'Ayer p'almorzar, dempués del típicu viaxe en coche dende Xixón, pela minera hasta Mieres del Camín, siguiendo hasta'l corredor del Ayer onde metémonos hasta Morea.

Salimos del pueblu ayerán de Bo (420 m)

Magar del almuerzu, garramos los coches y na ponte nel centru de Morea, garramos la carreterina que tien de facenos pasar per L.lavayos, demientres ponse a orbayar, enantes d'aportar a Bo. Ellí, con un sentir más bien gafu nel cuerpu, mudámonos de ropa y salimos a caleyar hacia'l pueblu de Bustiyé.

Caleyaremos dellos cientos de metros per carretera y namás pasar Bustiyé, saldremos hacia una amplia pista nel barriu del Barrial. A vegaes nun esperes muncho de ciertos llugares, pero tola ascensión de la pista, lloñe de facese pesáu, paecióme guapu, con praos bien cuidaos y sebes de maera en perfeutu estáu.

Pasaremos pel barriu de Bustiyé siempre n'ascensión hacia la Vegona

La pista, con bon desnivel, facíenos xubir per una llarguísima llomba la cual nun puntu, entamaba a facer envueltes, cola sorpresa de travesar una prestosa viesca de faya, saliendo delles envueltes más enriba a la Vegona, perbien cuidada, con cabaña de llábana en perfeutes condiciones al igual que tol cierre.

Penriba d'esti llugar, tocará siguir patiando per pista, pero pali pali, diremos alcontrando ñeve y dificultando'l nuesu pasu, camudando al empar el xeitu de la pista de ganadera a minera con un paisaxe más abiertu y ermu de vexetación.

Col algame d'altor, nes brañes, vamos topándonos con dalguna ceya de ñeve

Pasaremos llugares como Pozuvieyu nel nuesu caminar, hasta facer los dos últimes envueltes, pa colocanos embaxo del primer de los nuesos oxetivos: l'Altu La Cerra. La verdá ye que diba tan entreteníu pensando en que bon cordal pa entrenar carreres pel monte, que nin siquiera taba apeteciéndome facer cumal jeje.

Picu La Cerrá (1294 m)


Sicasí, saldrémonos de la pista y ascenderemos los malpenes cien metros, que sepártenmos dende la pista hasta l'allugamientu del vértice xeodésicu de la Cerra a 1294 m. Pocu más que bregar un pocu cola broza y nun perder el senderín y taremos nesti piquín, que sorpréndenos cola so xabaz cayida hacia'l val.le de Valbona.


Percorreremos tol cordal de Ranero con guapes vistes

Nel intre, nun ta'l día pa muncho más, pero al menos nun llueve, así que descendemos magar d'echar un vistazu a la continuidá del cordal hacia'l Pic Pedro García, pasando pel Quentu la Robliga, que tendrá que quedar pa otra incursión.

Coles mesmes, plantámonos de nuevu na pista, onde tendremos el tramu con más ñeve del día y apriesa vamos perdiendo desnivel, hasta aportar al Quentu Las Crucies, onde tenemos a bien, echar un vistazu pa ver el antiguu castru y dólmen.

Pasamos pel mayéu y el altu Espines con vistes a L'Aramo

Ensín más baxaremos a pinchu hacia'l Mayéu Espines, quiciás ún de los llugares más guapos de la ruta, con unes vistes ablucantes del macizu de Penubina y de L'Aramo, anque les ñubes apegaes so los 1700 m nun dexaben esfrutar del too del paisaxe.

Nós, siguimos cordal alantre, ascendiendo lo primeru al Altu Espines onde contando col momentín de de meyor temperatura paramos a picar dalgo, pa de secute, siguir hacia'l siguiente finxu del día como nun yera otru, qu'ascender al picu Ranero (1095 m).

Facemos la penúltima ascensión al picu Ranero (1095 m)

Llueu del Ranero, picu que da nome al tol cordal, ya díbemos tocando a retirada, descendiendo de nuevu a la pista, qu'abandonáremos nel mayéu Espines pa crestiar un pocu. Esta vegada, pocu tenía que ver colo que garráremos p'ascender, siendo abondo monótona, con envueltes aburríes hasta un crucie de caminos nos que podíes tirar lo mesmu pa Xixón como pa Llión... increyible jeje.

Averámonos nun ratín al Cuitu Ramón (712 m)

Parte del grupu, decide garrar camín hacia Bo, puesto que ya nun había muncho que rascar ya na ruta, pero personalmente, tenía que facer otru vértice xeodésicu, como yera'l del Cuitu Ramón. Montse y yo, animámonos a conocerlo y verlo, lo que se diz ver, nun lo vimos, pero tuvimos enriba d'él, embaxo y arrodiámoslo per tolos llaos, pero velo... va ser que non.

Restolamos el meyor camín posible pa descender hacia Bo de nuevu

Llueu descubrí que ta esbarrumbáu va unos años, pero tar, tuve que tar enriba según el gps y de pasu, ascendimos al propiu Cuitu Ramón (712 m) y conocimos un altar horrorosu d'una virxe pembaxo'l picu, lo que sí fizo que fuxéremos d'ellí hacia Bo, comiéndonos nel trayeutu, pente camín y camín un auténticu barrizal infumable.

Ensin ser, una grandiosa ruta, al menos a mín, dióme pa conocer un cordalín d'estos, que si nun yes testerón como yo, quiciás enxamás méteste a conocelu. Pa ello, el patéu llevónos 6 hores y 50 minutinos superando un desnivel acumuláu positivu de 1115 m y un percorríu de casi 18 km.

Lladrando pa Camudar el Camín

No hay comentarios:

Publicar un comentario