Santoña (Tresmiera) - Monte Bucieru - Caballo - Pescador - Mazu

1 de Mayu de 2024

Track: Santoña (Tresmiera) - Monte Bucieru - Ganzu - Caballu - Pescador - Mazu

Díes de vacaciones per Cantabria, tornando con tol gustu del mundu al valle del Riumiera, onde ya tuvieramos esguilando va tiempu, yendo esta vegada col envis, d'apalancanos tranquilamente nel camping Lunada, faciendo monte, esguilando y saliendo a andar en bici, en definitiva, a desconectar y descansar de munchos meses de trabayu.

Cola meteo, pelín repunante y llibrando más o menos como pudimos, hubo un día onde yera imposible esguilar ya que daba hasta ñeve pa Riumiera y decidimos baxar a la costa de Tresmiera, onde Silvia quería conocer Santoña pa xintar anchoes y yo de pasu, apetecíame patiar un pelín y facer un cumal cimeru del Cordal Cantábricu, independientemente del so baxo altor: la peña Ganzo.

 

Partimos de Santoña na sablera de San Martín (5 m)

Asina que plantámonos en Santoña, cola calma, aparcando la furgo na sablera de San Martín, baxo les muries del fuerte y saldremos per unes escaleres al alcuentru d'una sienda costera que da tola vuelta al monte Bucieru, pasando en primer llugar pel fuerte San Carlos, pa salir ya per senderu al propiu camín, col envís d'empobinanos hacia la punta'l Peón, onde algamaremos guapes vistes de la costa cántabra dende la boquera del Asón hasta l'Oriñón.

Iondokorta (Arratia-Nerbioi) - Baias Ubeguia - Gorbeia - Aldamiñape

21 d'Abril de 2024

Track: Iondokorta (Arratia-Nerbioi) - Baias - Gorbeia - Arimekorta

Continuamos al día siguiente de Xuntanza Asturvasca, llevantándonos pela mañana unos meyor qu'otros, ya que les raciones de llicores varios y la llarga partida de mus, pasaron factura al día siguiente, asina que con una resaca estupenda, enllenamos la barriga coles palmeres d'Unquera y café pa espabilar y ponémonos en marcha, pa facer una nueva ruta.

Esta vegada, díbemos repetir monte, col Gorbeia, que ya ficiera munchos años que lo xubiéramos, asina que garraremos la mochila y pesie al día soleyeru, ponemos tola ropa que tenemos, ya que nótase una mañana fresca, entamando a caleyar a les 9 la mañana col envís de que dénos tiempu a facer la ruta y aportar pa tomar dalgo tranquilamente enantes de la xinta.

 

Preparativos nel refuxu del Baskonia coles banderes correspondientes

Saldremos caleyando pegaos a la muria del banzáu de Mendizabal, esfrutando de los primeros pasos pel fayéu de Iondokorta saliendo xusto al crucie cola pista que xube hacia Arimekorta, desdexándo ésta y yéndonos de frente nesti casu, pa garrar una pista maderera, que va llevanos pente pinos y fayes, hacia la faldera del Aldamin, qu'ascendiéramos hacia años xunto al propio Gorbeia.

Bentalta (Bilboaldea) - Pastorekorta - Ganekogorta - Pagasarri

20 d'Abril de 2024

Track: Bentalta (Bilboaldea) - Pastorekorta - Ganekogorta - Pagasarri

Tornábemos a facer xuntanza Asturvasca, dende cuantayá, ye más, dende 2018 pasando penmediu, temporaes mui correnderes nel nuesu grupu, perdiendo un pocu esa capacidá y motivación montañera y tamién, una pandemia que fízonos perder un par d'años o más pudiendo a la fín, xuntanos de nuevu, anque ya tuviéramos pel Pirinéu con Fernan y visitáremos a la vuelta a dellos collacios en Basauri.

Esta vegada, vamos averanos por milenta motivos, namái que 4 miembros del GM Xuan de la Borrina, madrugando como siempre dende Asturies, p'aportar a Basauri so les 10 de la mañana, onde tan esperándonos p'almorzar dalgo, teniendo que movenos mui pocu esti añu, p'averanos al puntu de partida en Bentalta, bien cerquina de Basauri.

Partimos de Bentalta (180 m) nun día preciosu

Con un garrapiellu de vascos y otru d'asturianos, vamos salir caleyando col monte Malmasín, tres de nueso, pa salir caminando per pista, siempre con cartelos indicativos de tola fastera, bordiando pela mandrecha una enorme cantera de piedra, hasta desvianos per una trialera a la manzorga, pa quitanos d'enmediu un bon tramu de pista nel nuesu caminar hasta l'area recreativa de Pastorekorta.

Cantu La Sierra (Morcín)

19 d'Abril de 2024

Dempués d'una temporada intensa d'equipamientu y esguilada nel nuesu pequeñu xuguete, como ye'l Cantu La Sierra, esti añu tornamos pel seutor dellos díes, a ver que tal portóse l'iviernu col pié de vía y coles víes en xeneral, alcontrándolo nun estáu estupendo, nun teniendo que trabayar res, enantes de ponenos a esguilar nuévamente.

 

Becky prebrando Refalfiu Postureru (7b)

Dexara pendiente Refalfiu Postureru, la última vía qu'equipara, asina que metímonos al lío, montándola ensin moveme per ella y pudiendo compartir pegues, tanto col Pulga qu'intentó repetila, asina como con Dani y Becky que nun la probaran entá y pudieron sentir lo fanática y bloquera de la ruta, pudiendo Dani facela nel día, colos "conseyos pulgueros", anque nel primer pegue nun entendió res de los movimientos.

Dalguna semeya nos intentos d'encadene

A Becky nun-y fué tan bien, por mor, de dellos pasos que-y mancaben na man tocada y yo resolví, de nuevu tolos movimientos, alcordándome de mis métodos, dando'l meyor pegue hasta la fecha, cayéndome, como puede vese nel vidiu d'abaxo, nel caberu movimientu duru, por mor de la petada y de nun poder chapar e intentar saltámela nesi pegue.

 

Pringando la salida final del bloque de Refalfiu Postureru

Al final, xubiera un par de díes más pa poder encadenala, teniendo claro, que quedó un 7b duro, duro y más si dalguien intenta repetir mi métodu, ya que les infames preses en compresión que tengo que garrar pa moveme, avérase más bien al 7b+, pero bono, al nun poder facelo col métodu p'altos o con otros métodos de bloqueros, pues toca apretar ensin xacíu a mi manera.

 

Díes tranquilos dando pegues nel Cantu La Sierra

A partir d'equí, pasamos pantalla y abrimos nuevos proyeutos, coles tres víes más dures que me queden por facer con Te Rompo la Cara (7b+) y los dos proyeutos pal branu (No I Cantu Be Free y Muyerada Nui) que según los collacios que les ficieron, rondarán ambes al 7c+, asina que tenemos trabayu pa esti branu.

---------------------------------

Balmonte (Miranda) - Tabláu - Matacaliáu - Meruxal

13 d'Abril de 2024

Track: Balmonte (Miranda) - Tabláu - Matacaliáu - Meruxal

Una vegada más, teníemos ruta del GM Xuan de la Borrina y como siempre, tengo que preparar dalgo casi sobre la marcha pa facer una mañanera afayaiza, ya que varios son compromisos de la xente implicada, dándome cuenta que va tiempu que tenía na tiesta facer el picu Matacaliáu, dende Balmonte, capital del conceyu de Miranda.

Esti picu, asitiáu a la vera'l míticu camín rial de la Mesa, diba ser la cuenta, asina que quedamos con calma en Balmonte, pa tomar un cafetín y so les 9 y media la mañana, ya tábemos preparaos pa cruciar el rigu Pigüeña, travesando delles caleyes de Balmonte, hasta garrar la pista, angüaño asfaltada, hasta'l pueblín de Tabláu.

Partimos de Balmonte al llau del rigu Pigüeña

Dacuando, prepares rutes sol mapa y pasa esto, qu'atopes carreteres, pero nesti casu, nun son munchos kilómetros, asína que nin siquiera faise pesáu y vamos algamando desnivel cómodamente, demientres echamos un vistazu a la desfecha xerra de Bixega, estrada dafechu d'eólicos y que percorriéremos va dellos años, ensin remenbrances gayoleres.