Bentalta (Bilboaldea) - Pastorekorta - Ganekogorta - Pagasarri

20 d'Abril de 2024

Track: Bentalta (Bilboaldea) - Pastorekorta - Ganekogorta - Pagasarri

Tornábemos a facer xuntanza Asturvasca, dende cuantayá, ye más, dende 2018 pasando penmediu, temporaes mui correnderes nel nuesu grupu, perdiendo un pocu esa capacidá y motivación montañera y tamién, una pandemia que fízonos perder un par d'años o más pudiendo a la fín, xuntanos de nuevu, anque ya tuviéramos pel Pirinéu con Fernan y visitáremos a la vuelta a dellos collacios en Basauri.

Esta vegada, vamos averanos por milenta motivos, namái que 4 miembros del GM Xuan de la Borrina, madrugando como siempre dende Asturies, p'aportar a Basauri so les 10 de la mañana, onde tan esperándonos p'almorzar dalgo, teniendo que movenos mui pocu esti añu, p'averanos al puntu de partida en Bentalta, bien cerquina de Basauri.

Partimos de Bentalta (180 m) nun día preciosu

Con un garrapiellu de vascos y otru d'asturianos, vamos salir caleyando col monte Malmasín, tres de nueso, pa salir caminando per pista, siempre con cartelos indicativos de tola fastera, bordiando pela mandrecha una enorme cantera de piedra, hasta desvianos per una trialera a la manzorga, pa quitanos d'enmediu un bon tramu de pista nel nuesu caminar hasta l'area recreativa de Pastorekorta.

Caleyamos per bon camín hacia Pastorekorta

Fadremos el pindiu senderu pa salir a la amplia y guapa area de Pastorekorta, onde los collacios entamen a dicinos mil opciones d'entrenu per dellos montes, pero los nuesos oxetivos son claros, asina que faldearemos el Pagasarri pel Sur y averámonos hacia Ganekondo, onde a la fin, vamos entamar el llargu cresteríu hacia'l Ganekogorta.

Día preciosu de sol y vistes pa tola fastera central d'Euzkadi

Esti monte, con vistes non sólo a Bilbo, sinon a tola provincia de Bizkaia, Araba y hasta Gipuzkoa, tien una allargada crestería, qu'entra dende Munagan, onde evitamos la fea visión de les torres llétriques apretando'l pasu, hasta'l cumal del Gallarraga, anque nel nuesu casu, vamos dir namái, hasta'l cumal del Ganekogorta, puntu de más altor del cordal.

Prestosa crestería al Ganekogorta pasando pel Biderdi

La verdá ye que tamos nun monte bien guapu, esfrutando de vieyos conocíos, que voi descubriendo a los collacios astures, baxo l'atenta mirada de los montañeros vascos, nun vaya ser que meta la pata, pero non, los montes son bien conocíos dende'l Ungino hacia l'occidente, Gorbeia enfrente y Anboto, Udalatx hacia l'oriente, col Aizkorri más llonxano ya en Gipuzkoa.

Aportamos al cumal del Ganekogorta (999 m)

Nesti alderique animáu, vamos faciendo camín, aportando a una antecume del Ganekogorta, el Biderdi, onde sacamos semeya de grupu y siguiremos nesti día soleyeru esfrutando de la cómoda y verde arista hasta los 999 m del Ganekogorta, monte imprescindible d'Euskal Herria y cimeru del Cordal Cantábricu, teniendo vistes hasta del Sistema Ibéricu a lo lloñe, col San Millán y San Lorenzo.

Descendemos per Kurtziaga pa siguir tola faldera sur del Ganekogorta

Magar d'un pequeñu picotéu, baxo'l cumal del Ganekogorta, vamos descender pela mandrecha'l cumal pa baxar per mayaos bien guapos hacia la fastera de Kurtziaga, onde atoparemos una senda a mediu altor, que va llevanos a percorrer tola faza Sur, travesando varies riegues (Kruzeta, Anibarri, Bentako) qu'amestaranse a les agües del Nerbioi.

Pasamos per Ganekondo de nuevu pa siguir hacia'l Pagasarri

Fadremos tol faldéu, parando nuna fonte a echar un triagu y de visita nuna cabaña increyíblemente bien pensada dende'l respetu pa los montañeros, pa tornar a Ganekondo, onde esta vegada sí, vamos averanos hasta les ñeveres de Tapin, onde allugábase'l xelu antaño pa la xente de Bilbo, pa siguir pelos mayaos del Pagasarri, onde aparte de vaques pastiando, pudimos ver a bastante xente, pasando'l día xintando'l bocadiellu con vistes a Bilbo.

Cumal del Pagasarri (671 m)

Col trabayu bien fechu y la semeya de rigor nel Pagasarri, esfrutamos un ratín de tranquilidá, separtaos del buzón, onde nun fai más que pasar xente a sacar semeyes y paramos a mirar la ría de Bilbo, pela que pocos díes enantes, diérase un paséu la gabarra del Athletic, llueu de ganar la copa de fútbol, contándonos Fernan, tol percorríu que ficiera y la cantidá de xente qu'asistiera, con colexos y empreses zarraes dafechu, lo que déxanos alloriaos a los de fuera y ye que l'Athletic ye otra hestoria y otru futbol.

Descendemos hacia Pastorekorta y a Bentalta per pista

Descenderemos del Pagasarri pela arista oriental hasta Pastorekorta, onde ya vamos a retomar la pista pela qu'ascenderíemos al entamu de la ruta, pa siguir descendiendo ya con calma, charrando de mil hestories en pequeños grupos, hasta aportar a Bentalta onde teníemos aguardando les furgonetes y ropa pa mudanos un pelín.

Mudaos de ropa, vamos garrar los coches pa tomar dalgo n'Orozco, onde sentarémonos a tomar unes cerveces y cellebrar esti entamu de xuntanza y la ruta que ficiéramos durante casi 6 hores, con un percorríu de casi 18 km y un desnivel acumuláu de +/- 940 m.

Camudando'l Camín tuteando en Iondokorta