Urkiola (Durangaldea) - Anboto

11 d'Avientu de 2010 

Track: Urkiola (Bizkaia) - Anboto

 

Nun se mui bien como entamar esta entrada montañera, y ye que póngome a escribir, y namái que me xurden pallabres d'agradecimientu pa los nuesos collacios vascos, pol tratu, por ser tan bona xente, por... tou en xeneral. En setiembre del añu pasáu, conocíamonos Fernan y yo, al traviés d'esti blogue miu, poro d'ellí a anguaño, tanto nós mesmos, como los nuesos respeutivos collacios, fuimos algamando una amistá como si conocíesemonos de tola vida. 

 

Munches foron les rutes que ficimos xuntos na temporada montañera pasada, y pa esta debíamos-yos una visita a Euzkadi pa facer dalgo de monte pel so país y esfrutar de los sos paisaxes, montes y viesques pero sobretou de la so xente y d'un xeitu asemeyáu al astur na forma de sentir y tomáse la vida. Sacante d'esto, camiento qu'al contrariu de devolve-yos una visita, tenemos agora una deuda pergrande, por tolo que nos ficieron vivir nun fin de selmana cuanto menos difícil d'escaecer. Intentaremos prepara-yos dalgo que nun quede mui por embaxo del altor que nos pusieron, anque camiéntolo mui complicáu. 

 

 

Xuntanza astur-vasca nel puertu d'Urkiola (730 ms)

 

Asína pues, salimos de Xixón (a les 7 la mañana, más o menos), en dos coches Carlos, Simón, Cantarero, Pangua, Cesar (que ya ye miembru del GM Xuan de la Borrina) y yo. Teníemos por delantre un viaxe llargu, y como siempre dir en dos coches da pasu a torgues como perdese, distintos ritmos de pisá-y al pedal, parar a tomar dalgo más tiempu del debíu por culpa la camarera,... poro llegamos más bien pelín tarde. Así que los saludos de rigor foron rápidos, y garramos carretera pa empobinamos al puertu d'Urkiola, d'au entamará la ruta que sirvirá pa visitar ún de los montes más míticos d'Euzkadi, l'Anboto Mendi. 

 

A los ya conocíos astures, sumáronse na ruta, xente más que conocío por nós, como Fernan, Tito, Bittor, Juanan y nuevos collacios como la compañera de Juanan, Amaia y Germán, col que tuve falando durante un bon tiempín na ruta, aprovechando'l so valir montañeru y escalador. Magar les 11:30 entamamos a caleyar, partiendo del aparcaderu d'esti parque natural d'Urkiola, qu'a estes hores ya ta estráu de coches. Ye dalgo ablucante enforma'l sentir que tien el pueblu vascu cola montaña, y non solo ye qu'abulte sorprendente, sinon que da una envidia sana pergrande. Nós, un sábadu pela mañana, aparte de tar de resaca, de xuru que nun somos a quien xuntanos más de 2 persones pa dir al monte y eso teníendolo como gran afición. 

 

Con esto toi diciendo, que la sensación que me llevé, foi que los vascos van a la montaña por cultura de pueblu y eso ye preciosu. A lo meyor, el 90% de los qu'andaben esi día cola intención de xubir al Anboto, nun tienen un enfotu tan grande na xera montañera como yo, pero son capaces de quedar colos collacios pa xubir a dellos montes vascos, que con tal cantidá d'ascensiones nun día, tórnense en sagraos dafechu. 

 

 

Entamando a caleyar selemente

 

Pasín a pasu, vamos contaxiándonos d'esti espíritu, y ente'l día prestosu que facía, y falar de corríu colos collacios vascos, damos bona cuenta, per praos verdes, del primer finxu del día, el Urkiola Mendi de 1003 ms, el cual ye un mirador perfeutu del Anboto hacia'l norte y del Gorbeia (oxetivu del prósimu día) hacia'l Sur. 

 

 

Col Anboto detrás y una semeya perguapa de los valles d'Araba

 

   

Semeya grupu nel Urkiola Mendi

 

Unes semeyes dempués, Fernan entaínanos a siguir caleyando, ya que ta faciéndose tarde, asína que baxamos un pelín hacia la "Fonte l'Ortigal" ("asuntzeko iturria", como me lo curro eh!, Fernan, jaja), onde nos alcontraremos con un helicóteru de la Ertzaintza, que salúdanos pasándonos al rasu les tiestes. Ye lo que tien que nos xuntemos vascos y astures, que nos xixilen dende'l cielu... 

 

 

"Cola muerte nos calcaños" baxando del monte Urkiola

 

Pocu dempués xubiremos hacia un colláu (Anboto-Oste, literalmente parte trasera del Anboto) onde aniciaremos l'ascensu al traviés d'un fayéu ("Pago" ye faya) pelín abegosu, polos escalones de piedra, lo que fadrá d'esta fastera'l monte, la parte más difícil de la ruta, pero la que más sorprendíos dexónos, y ye que nun paramos en tola xubida d'atopanos xente y más xente baxando, y había tantes muyeres como homes,... inclusu esisten los grupos de muyeres soles nel monte,... jajaja. Alloriaos quedamos... 

 

 

Xubiendo pol fayéu ente bilordios y rises

 

Finalmente aportamos a la cresta l'Anboto en media hora llarga, por mor, d'una tranquilidá suprema na xubida, parar a ver como va la xente, falar primeru con unu, dempués con otru,... de xemes en cuando presta dir a la montaña a pasar el día, ensín tomalo como deporte dafechu, que ye quiciás la visión que más averase al mio pensar. 

 

 

Descansando na cresta enantes de la xubida final

 

Nel intre, quedábanos namái un pequeñu esfuerzu final, con poca cosa de trepe, que-y daba dalgo de diversión al propiu monte. Nesti casu, tol grupu menos Amaia, que quedóse con delles mochiles abaxo, xubimos aína, pa dar cumal a esti guapu monte de 1320 ms. 

 

 

Últimos pasos enantes del cumal del Anboto Mendi (1320 ms) 

 

Dos hores y 20 minutinos daben con nós, nesta mítica cume d'Euzkadi, na qu'esfrutamos más del bon rollu ente collacios, que de la propia montaña, asína pues, semeyina de conxuntu, y baxamos rápidu, pa xintar dalgo onde taben les mochiles y siguir falando de mil coses más. 

 

 

Semeya de grupu nel Anboto 

 

Darreu de la xinta, lo pensáo yera facer la cresta dende'l monte Anboto al Elgoin dando-y un puxu más a la ruta, pero Fernan, pensaba que yera tardísimu pa llegar al refuxu del Baskonia onde fadríamos nueche. Menos mal que Tito y German, tuvieron más testerones, y al final ficimos la cresta toos menos, Juanan y Amaia, Carlos que taba mancáu d'angüeñes y Cantarero y Cesar que tamién prefirieron baxar pol fayéu de xubida. 

 

 

Delles semeyes de la cresta del Anboto al Elgoin 

 

La cresta defechu, nun tuvo muncho de complexu, pero dalgún pasín aéreu, y dalgunu más de trepaduca, pusieron el toque final al preste de los cumales del Elgoin (1235 ms) y el Kurutzeta (1203 ms) como puntos más altos del crestéu. Apriesa, finamos la baxada p'alcontranos colos demás collacios, y ya per una pista forestal arrodiar de nueu'l monte Urkiola, hasta aportar al aparcaderu onde dexáremos los coches cuatro hores y media enantes. 

 

 

La verdá ye que los 11 kms de ruta foron suficientes pa un día, nel que nun paramos un segundu dende qu'a les 7 la mañana tábemos saliendo de Xixón. Poro, eses 4 hores y media de ruta, con 870 ms de desnivel acumuláu, diéronmos les ganes perfeutes pa tomar una merecía caña nel primer chigre qu'alcontrásemos dempués de mudanos de ropa. Magar del chigréu de turnu, y les despedíes de la xente que tenía que cumplir delles xeres familiares y nun venía pal refuxu, tornamos a garrar el coche, y empobinamos poles carreteres vasques, hacia'l refuxu del Baskonia en Iondokorta. 

 

 

Nel refuxu del Baskonia Mendi Taldea 

 

Equí, ya si que quedámonos ensín pallabres, pa coles istalaciones que tien el Baskonia, pero sobretou col recibimientu y la cena que nos tenía preparada Mariano, al cual entre este fin de selmana ya'l sofitu que diónos na Travesera de Picos, vamos tené-y que facer un monumentu dende'l GM Xuan de la Borrina. La tarde-nueche que pasamos nel refuxu, nun pudo ser meyor, en tan bona compaña, con una cena tan bona y con tan bon ambiente. 

 

Que menos que poner nós, un par de caxes de sidra, de les cuales una voló esa mesma nueche col bon facer de los convidaos... Aún así, fuimos bonos, y a la una tábemos toos nes lliteres pa intentar como siempre durmir cola sinfonía davezu nos refuxos, el ronquido en do mayor... Al día siguiente inda teníemos más y meyor... 

 

 

Camudando'l Camín dende l'Anboto