lunes, 28 de diciembre de 2015

Puertu Tarna (Casu) - Picu Celispardi - Vega Baxu - Pendones (Casu)

12 d'Avientu de 2015

Track: Puertu Tarna (Casu) - Picu Celispardi - Vega Baxu - Pendones (Casu)



Tornamos al monte, magar d'unes minivacaciones de puente en Soria, onde aparte de fartucame merienda tres merienda y parrillada tres parrillada, tuve'l bon facer de salir a correr tolos díes un ratín colos perros y trepar otru en Valdenebro. Asina que con dellos torreznos más nel cuerpu, preparamos ruta pal parque de Reres, col envís d'andar n'arba pente los conceyos de Casu y Ponga.

La ruta, propuesta por César que vuelve a patiar per Asturies dempués d'un par de meses per Sudamérica, sedrá salir del Puertu Tarna y facer una guapísima travesía hasta'l pueblu casín de Pendones, como non, xubiendo dalgún qu'otru monte pel camín.

Como ye vezu vamos salir de Xixón pela minera hasta'l desvíu al corredor del Nalón onde travesaremos los conceyos de Llangréu, Samartín del Rei Aurelio y Llaviana, entando en Sobrescobiu p'almorzar en Rusecu, onde aparte del cafetín llevéme pal bolsiellu un llibru de cumales de Casu, el escrito va pocu pol blogueru MonteJuan.

N'El Puertu Tarna (1493 m)

viernes, 18 de diciembre de 2015

La Foceicha (Teberga) - Picu Las Piedras

29 de Payares de 2015

Track: La Foceicha (Teberga) - Picu Las Piedras



Ayeri anduviéramos Pau y yo de monte con dellos collacios blogueros d'Asturies y Llión y nel día de güei, tocaba dir col GM Xuan de la Borrina a la ruta escoyida pa esti añu por Zori, llevándonos esta vegada a tierres teberganes. Los nuesos pasos tienen de llevanos a conocer parte de les maraviyoses brañes teberganes peles que cuerren dellos PRs asturianos.

Poro, saldremos de Xixón pel camín davezu hacia'l valle del Trubia, primeru pela autovía Y griega, garrando n'Uviéu l'autovía que va pa la Espina, saliéndonos nel desvíu hacia'l Trubia, travesando los conceyos de Santu Adrianu y Proaza, siendo nel pueblu de Caranga Baxu, onde tomamos direición a Teberga entrando n'él pol pueblu d'Entragu, hasta parar na capital tebergana de La Plaza.

Magar del almuerzu n'Aladino como siempre, siguiremos hacia'l puertu Ventana pasando pelos pueblos teberganos de Las Veigas, Riel.lu, El L.lanu y Parmu onde debemos salir a la mandrecha hacia'l guapu y fríu pueblu de La Foceicha. 

Puntu de partida en La Foceicha (1078 m)

domingo, 13 de diciembre de 2015

Puertu d'Aral.la (L.luna) - Cerru Pedrosu

28 de Payares de 2015

Track: Puertu d'Aral.la (L.luna) - Cerru Pedrosu



Tamos ante un finde montañeru enforma ya que'l sábadu presentámonos na primer xuntanza de Blogs de Monte d'Asturies y Llión. El placer d'esti alcuentru debémoslo a los pa mí desconocíos hasta'l momentu blogueros de Cotoya Pindia.

Nun soi mui avezáu a estes reuniones, ye más, malpenes caltengo un contautu continuu a través de comentarios nos blogues de Monchu, Cienfuegos y Los de las Claras sobretou y nestos años de xera montañera namái que conozo personalmente a Monchu en mediu d'una travesera.

Asina qu'una gran oportunidá yera esta pa conocer un pelín más a otros blogueros de monte como los organizadores de Cotoya Pindia, Mareando la Perdíz, el amigu Xistras de Montaña en Libertad, Rutas de Montaña Asturias, Montaña para Dos, Pindio Pindio y Sebastián Bravo.

Falten munchos blogues de los que siempre tengo dalgo que deprender como'l nomáu Cienfuegos y Los de las Claras, pero viénenme a la tiesta xente como JFCamina, MonteJuan, Al Filo de la Navaja..., Nuestras Montañas y munchos más qu'en menor o mayor medía fuí siguiendo nestos años a la gueta d'info d'una ruta o d'otra y qu'acaben siendo como conocidos de tola vida.

Semeya de grupu nel Puertu d'Aral.la (1546 m)

jueves, 3 de diciembre de 2015

Orllé (Casu) - La Becerrera

8 de Payares de 2015

Track: Orllé (Casu) - La Becerrera



Güei vamos facer una ruta que debería tar en cualesquier axenda d'un bon montañeru asturianu. El so percorríu, los llugares a conocer, el cumal qu'ascenderemos, les increyibles vistes... tou ye merecíu de conocer y caltener na memoria durante munchos años.

Nel nuesu casu, esta ruta fue propuesta por mí l'añu pasáu y hasta esta seronda, quiciás demasiáu entrada ya poles poques hores de lluz, nun tuviemos la oportunidá de facela. Pa ello, aportaremos al conceyu de Casu y más en concretu, al pueblu d'Orllé, anque na realidá dexemos el coche nel barriu de Nozaleda.

Como siempre, el nuesu camín dira dende Xixón garrando la autovía minera, pa tomar en Llangréu, el corredor del Nalón travesando los conceyos de Llangréu, Samartín del Rei Aurelio, Llaviana y  Sobrescobiu, pasando'l banzáu de Rusecu y el de Tañes hasta llegar al fin a El Campu, onde siguimos pela carretera hacia L'Infiestu hasta Orllé.

Partimos del barriu de Nozaleda n'Orllé (645 m)

martes, 24 de noviembre de 2015

Tuíza Riba (L.lena) - Pie Ferreru - Fariñentu - Pena L.lana

17 d'Ochobre de 2015

Track: Tuíza Riba (L.lena) - Pie Ferreru - Fariñentu - Pena L.lana



Tornamos al nuesu campu base favoritu, Tuíza Riba nos alpes tuízos jeje, asína que tendremos d'averanos hasta esti guapu pueblu como ye davezu saliendo de Xixón y garrando l'autovía minera hasta Mieres del Camín, onde siguiremos hasta'l pueblu de Campumanes en L.lena.

Magar del almuerzu, tiramos pela carretera 8 de L.lena, pasando pelos pueblos de Sotiel.lo, Espineo, Los Pontones, Teyeo, Rospaso, Tuíza Baxo y a la fin entramos en Tuíza Riba, onde aparcamos el coche con un día pelín más murniu de lo que teníemos en mente.

Partimos de Tuíza Riba (1207 m) como tantes vegaes

sábado, 21 de noviembre de 2015

Vega de Cien (Amieva) - Picu Carriá

10 d'Ochobre de 2015

Track: Vega de Cien (Amieva) - Picu Carriá



Esti añu, nes miós rutes seleicionables nin quise escoyer rutes complexes nin casi tampocu rutes d'un altor descomanáu, poro intenté garrar montes que tuvieran un toque especial poles sos vistes y pol so percorríu... el primer d'ellos que tuvimos ocasión de facer fue'l Picu Carriá nel conceyu d'Amieva.

P'arribar, como siempre, aportaremos a Cangues d'Onís pela autovía'l Cantábricu y la N-625, desayunando nel chigre de la Huera, pa siguir pela N-625, pasando pelos pueblos de Cañu y Tornín, cruciando la ponte Dobra entrando nel conceyu d'Amieva. Nesti conceyu, travesaremos los pueblos de Miyares, Corigos, Pervís, La Vega Pervís onde topámonos col ríu Ponga nesti casu, y siguimos camín pasando per Santiyán, Precendi, Les Vegues, Campurriondi y Vega de Cien onde dexamos el coche y preparámonos pal traxín.


Partimos de la ponte sol ríu Seya en Vega de Cien (201 m)

lunes, 16 de noviembre de 2015

La Uña (Acebéu) - Peña Ten

27 de Setiembre de 2015

Track: La Uña (Acebéu) - Peña Ten



Cuarta vegada que voi a pola Peña Ten y cómo nun querer facer esta maraviya de monte les vegaes que toque. La primera acabáremos con fartura y reventaos de fozar na ñeve y la segunda tamién acabáremos reventaos pero por xuntar Ten y Pileñes, ese par de peñes que dieron pié a la semeya de portada de Camudando'l Camín.

La tercer vegada había que camudar un plizcu la ruta asina que fuimos hasta la Uña pa xubila pela fastera llionesa, pero nel puertu Tarna taba ñevando y la opción fué conocer el Tabayón del Mongallu, poro la cuarta sí que fuimos con un día preciosu hasta La Uña. La pena fué nun dir nes meyores condiciones magar de durmir nel coche tres d'esfrutar del Seronda Fest de cerveza artesano en Rusecu.

Puntu de partida na redolada de La Uña (1198 m)

miércoles, 11 de noviembre de 2015

Vega Urriellu (Cabrales) - Areneras - Neverón d'Albu - Sotres (Cabrales)

24 de Setiembre de 2015

Track: Vega Urriellu (Cabrales) - Areneras - Neverón d'Albu - Sotres (Cabrales)



Un día más, alborecemos nel refuxu de la Vega Urriellu, al que si nun sabéis como aportar tenéislo desplicadín bien curiosu equí. Güei ye un día completamente distintu al d'ayeri cuando alboreciéramos. El día ta soleyeru dende'l riscar y hai ambiente de nerviosismu nel refuxu... ye claro que muncha xente va poder facer esos planes o al menos intentalos.

La nueche fuera tan bona como l'anterior, durmiendo estupéndamente, gracies tamién a los chupitinos de oruxu de sidra dulce que xubiera Jandro nuna pequeña cantimplora. Estes caxigalines presten enforma nos refuxos y nestos detalles Jandrín ye'l meyor. Ayeri xubiera a la Vega Urriellu a fueu xuntándose a nós pa la cena y por supuestu pa la ruta d'esti tercer y últimu día nos Urrieles.

El menú del día ye'l platu fuerte pa estos díes: la intentona a la integral d'Areneras-Albos. Ésta ye una xera abegosa, per tarrén complicáu y que ya tuviéramos percorriendo en parte l'añu pasáu teniendo que conformanos con una primer visita pa conocer per onde entrar y per onde salir lo que ya fuera abondo.

Partimos de la Vega Urriellu (1954 m) nel alborecer

martes, 3 de noviembre de 2015

Vega Urriellu (Cabrales) - Picos de Santana

24 de Setiembre de 2015

Track: Sotres (Cabrales) - Cuchallón de Villasobrada - Vega Urriellu (Cabrales)



Espertamos nel refuxu de la Vega Urriellu (ya sabéis como llegar) bien ceo y nun somos los únicos. Hai gayola por salir caún a les sos actividaes pero de sopitu, asomamos el focicu pela puerta y la moral baxa a los suelos viendo l'estáu de la meteo.

La borrina ta metía bien fonda y l'orpín per momentos pasa a ser orbayu y lo pior ye que nun somos a albidrar el sol pente les ñubes. Pinta feu y paez que nun ta con ganes d'abrir nes próximes hores, poro sentámonos con calma y almorzamos col envís de que pasen los minutos y tengamos una oportunidá de salir al monte.

La tarde-nueche anterior, entamáremos conversación con una pareya de mallorquinos que tímidamente entrugaren pola Sur Directa al Picu Urriellu. La cara de plasmu d'ellos al ver la meteo, animónos a convidalos a facer monte si nun meyoraba como pa xubir al Picu.

Salimos de la Vega Urriellu (1945 m) con un día murniu enforma

domingo, 1 de noviembre de 2015

Sotres (Cabrales) - Cuchallón de Villasobrada - Vega Urriellu (Cabrales)

23 de Setiembre de 2015

Track: Sotres (Cabrales) - Cuchallón de Villasobrada - Vega Urriellu (Cabrales)


Un cambiu de trabayu va dame dellos díes de llibertá semipagao, poro falo con Fernan y colamos pa Picos a facer actividaes interesantes. Lloñe de peganos xataes ensín xacíu, camentamos que lo meyor ye intentar actividaes quiciás más complexes téunicamente pero que nun obliguen a percorríos escesívamente llargos.

D'esti xeitu, vamos escoyer la calidá envede la cantidá nes rutes a la gueta d'esos Ortzamendiren Sua,esos montes que tienen un picor pal montañeru, una atraición imposible d'aparar hasta que nun seyas a algamalos.

Otru añu más, escoyeremos de campu base la Vega Urriellu, contando con que nesta dómina del añu, el refuxu tará menos masificáu y podremos esfrutar de mayor comodidá qu'en meses estivales. Pero enantes d'aportar al refuxu vamos facer de camín la nuesa primer ruta, que tien de llevanos a conocer un cumal pelín escaecíu nel macizu central: El Cuchallón de Villasobrada.

Partimos de la curvona de Sotres (937 m)

viernes, 30 de octubre de 2015

Molín de Salce (Cangas del Narcea ) - Picu Tunón - Monesteriu (Cangas del Narcea)

20 de Setiembre de 2015

Track: Molín de Salce (Cangas del Narcea ) - Picu Tunón - Monesteriu (Cangas del Narcea)


Nueva temporada de monte ya intentaremos entamar pa la fastera suroccidental, onde asítiense Rebe y Pangua. Van ser pas, complicándose'l tema pa dir de monte, hasta dientru d'una bona temporada jeje. Poro, vamos facer una ruta de Pangua que teníemos escaecida dende la temporada pasada: El picu Tunón.

Pa ello, saldremos dende Xixón, pel camín davezu hacia Cangas del Narcea, ye dicir autovía Y griega, pa siguir pela de La Espina, hasta'l final nes cercaníes de Curniana. Llueu siguiremos pela As-15 hasta Cangas del Narcea, pa parar pocu más alantre a tomar un cafetín na panadería del pueblu de Pinl.lés.

Partimos de Salce (570 m) pente Veigadorriu y Monesteriu

lunes, 26 de octubre de 2015

Vega d'Enol (Cangues d'Onís) - Pelabarda - Cordal de Cuadonga - San Vicenti - Ponte Dobra (Cangues d'Onís)

30 d'Agostu de 2015

Track: Vega d'Enol (Cangues d'Onís) - Ponte Dobra (Cangues d'Onís)


Espertamos nel refuxu de Pastores de la Vega d'Enol, magar d'una nueche increyible na que tuviemos na mesade fuera charrando hasta más allá de les doce de la nueche, pa dempués durmir sólos los tres nuna habitación, teniendo tol espaciu del mundiu nes lliteres.

Con calma, recoyemos y preparamos la mochila pa una nueva xornada montañera. Nun sabemos lo que nos espera, ya que llevamos un plan d'entamu y varios planes B, tanto ye así, que fuimos previsores y dexamos ya otru coche nuna posible salida mui lloñe del nuesu destín nel Restañu, onde quedara'l mió coche'l día anterior.

Salimos del refuxu pastores de Vega d'Enol (1092 m)

lunes, 19 de octubre de 2015

El Restañu (Amieva) - Canalón del Texéu - Cotalba - Vegarrionda - Vega d'Enol (Cangues d'Onís)

29 d'Agostu de 2015

Track: El Restañu (Amieva) - Vega d'Enol (Cangues d'Onís)


El monte, la escalada y la vida en xeneral, llévase alantre al traviés del algame de delles llinees qu'entren nel nuesu maxín. Esto ye asína, sólo ties que tar nun puntu, nun llugar y acolumbrar una nueva llinea a trazar como siguiente destín.

Ésto, pasónos cola muria que xube dende'l Dobra hacia les cotes occidentales del Cornión. Nun soi a alcordame en qué ruta, tuviemos embobaos mirando pa esi amiestu de caliza y yerba a parte iguales nes que destacaben dos llinees.

Eses llinees nun son otres que'l valle d'Ozania y el Canalón del Texéu, casi siempre a la solombra durante l'añu. Per elles, quisimos conocer un pelín eses ayalgues montañeres de Picos, que sólo la esperiencia y la motivación son el bonus pa metése neses "siendes" de pastores de Picos.

Na ponte'l Restañu (695 m) col picor de les grandes actividaes

lunes, 12 de octubre de 2015

Sotres (Cabrales) - Tiros Navarro y Santiago

26 de Xunetu de 2015

Track: Caín (Valdión) - Camarmeña (Cabrales)


Día sueltu agostizu nel que tamos sólos Kíla y yo, poro quedar en casa nun yera una opción, tirando pa Picos col envís de saludar a los amantes del vivac (Pangua, Raúl, César y Haritz). Madrugamos enforma, plantándonos en Sotres pel camín davezu a les 7 y media de la mañana.

Esta vegada, magar del viaxe de coche dende Xixón a Posada, la xubida hasta H.ortigueru y la travesía de pueblos cabraliegos per Canales, Poo, Carreña y Arenas, nun tuvimos almuerzu y siguí con Kíla hasta la curvona de Sotres, saliendo al trote hasta las Vegas de Sotres en menos de media horina.

Corremos con L'Escamelláu de fondu dende Sotres (933 m)

martes, 6 de octubre de 2015

Caín (Valdión) - Culiembru - Ostón - La Raya - Camarmeña (Cabrales)

7 de Xunetu de 2015

Track: Caín (Valdión) - Camarmeña (Cabrales)


Últimu día de travesera y los cuerpos ya sí que nun tan pa munches hestories. De los cuatru que llevamos tolos díes, Bittor ta mui cansáu del día anterior, Fernan tamién acabó tocáu de la espalda y César y yo tenemos dellos problemes de pies. Poro, pa nun torgar la posibilidá de fartura, vamos facer un plan B o C, que tenía en mente, conocer les canales de Culiembru y la Raya siguiendo Cares alantre.

Saldremos de Caín, magar del típicu almuerzu de refuxu. Esti añu quedé un pocu fartucu del albergue por mor de l'actitú de los dueños, los cuales punxéronse repunantes porque yéremos unu menos de los d'aniciu, cosa que nun pues retrucar ante una llesión y pa más queríen meter a cuatru montañeros fedientos y cansaos con una probe familia con una neña pequeña cuando taba l'albergue vacíu.

Un añu más partimos la última xornada dende'l Cares (450 m)

miércoles, 30 de septiembre de 2015

Colláu H.ermosu (Valdión) - Traviesas del Llaz - Mueñu - Caín (Valdión)

6 de Xunetu de 2015

Track: Colláu H.ermosu (Valdión) - Caín (Valdión)


Tercer estaya de la Travesera 2014 - 2015 siendo ésta la más esperada por mí, la que más estudié y la que más respetu dábame y nun fueron ensin xacíu los mios esmolecimientos, anque non por mí, sinon pol restu de los collacios de ruta.

Alborecemos nel Colláu H.ermosu a 2067 m y si'l día anterior anduve restolando ramples nomaes torres pol so desplome so les canales como las de las Colladinas, nel día de güei ascendemos unos pocos metros pa facer la semeya d'entamu de ruta na Torre H.ermosu (2117 m)

Partimos de la Torre H.ermosu (2117 m)

miércoles, 16 de septiembre de 2015

La Terenosa (Cabrales) - Vega Urriellu - H.orcaos Roh.os - Tiru Casares - Colláu H.ermosu (Valdión)

5 de Xunetu de 2015

Track: Arenas (Cabrales) - La Terenosa (Cabrales)


Tamos na segunda estaya de la Travesera 2014 - 2015 y el panorama que tenemos nel grupu ye pelín murniu, ya qu'aparte de los abandonos ya programaos nel fin de selmana, ún de los collacios que diba facer la travesera entera, Alberto, tien qu'escapar col restu del grupu por mor d'unes molesties na rodieya.

Los demás que continuamos, Fernan, Bittor, César y yo, pel momentu vamos bien, anque yo ya albidro los mesmos síntomes de frayadura nes plantes de los pies, que tuviera l'añu pasáu y que tardara en recuperar más d'un mes.

Partimos del refuxu de la Terenosa (1298 m)