martes, 6 de octubre de 2015

Caín (Valdión) - Culiembru - Ostón - La Raya - Camarmeña (Cabrales)

7 de Xunetu de 2015

Track: Caín (Valdión) - Camarmeña (Cabrales)


Últimu día de travesera y los cuerpos ya sí que nun tan pa munches hestories. De los cuatru que llevamos tolos díes, Bittor ta mui cansáu del día anterior, Fernan tamién acabó tocáu de la espalda y César y yo tenemos dellos problemes de pies. Poro, pa nun torgar la posibilidá de fartura, vamos facer un plan B o C, que tenía en mente, conocer les canales de Culiembru y la Raya siguiendo Cares alantre.

Saldremos de Caín, magar del típicu almuerzu de refuxu. Esti añu quedé un pocu fartucu del albergue por mor de l'actitú de los dueños, los cuales punxéronse repunantes porque yéremos unu menos de los d'aniciu, cosa que nun pues retrucar ante una llesión y pa más queríen meter a cuatru montañeros fedientos y cansaos con una probe familia con una neña pequeña cuando taba l'albergue vacíu.

Un añu más partimos la última xornada dende'l Cares (450 m)

Estes coses faente camentar como lleva la xente los sos negocios, dándo-y más importancia al trabayu propiu qu'a tener a los clientes contentos y cómodos. De llimpiar una habitación a dos nun me paez que seya pa morise y más meter a cuatru desconocíos con una familia. En fin, falámoslo y de mala gana camudáronmos d'habitación, teniendo tamién los nuesos más y menos pa cola hora del almuerzu.

Ye bien guapu dir d'albergue montañeru pa meter a tolos clientes a les doce nes sos habitaciones pero llueu querer dar el desayunu más allá de les 8 y media. Como ye lo qu'hai y ya son varios años ellí, pasamos del tema y aportamos al albergue 5 minutinos enantes del cierre, jeje y ye que dábemos por terminada casi la travesera y tuviemos de cachondeu de bar en bar per Caín.

Travesamos la parte afuracada hacia'l ponte Bolín

Alcordando col caineh.u, la mió promesa de dir ver el Cuetu Ciegu ya qu'esti home taba perende de día, de nueche y de mañana bien ceu, salimos de Caín pal Cares, col envís de dar un paséu tranquilu. Asina lo fadremos, entreteniéndonos en mirar pa toles entraes de les canales qu'un día percorrimos o qu'entá quédenmos por conocer.

Siempre destaca Dobresengros, a la que prestaríame volver dientru pocu y tamién paramos un ratín a ver los seos que dan pasu a otres canales como la de Raíz y Ría qu'a lo postreru tien d'empobinase hacia la canal del Agua, que tan bones alcordances nos trae a Fernan y a mí.

Alcontrámonos cola igua de la Madama la Güertona hacia Culiembru

Otru puntu prestosu del día ye pasar pol pasu de la Madama la Güertona, peñón que cayera va un añu y picu y tovía nun tuviera la oportunidá de conocer la pasarela d'igua del argayu. Magar de la semeya de turnu, col vacíu a los nuesos pies, siguimos caleyando viendo que'l día pinta tan calurosu como los anteriores.

Nun ye que seya tarde, pero apuramos p'aportar a Culiembru, onde César y yo, vamos separanos de Fernan y Bittor pa conocer la canal de Culiembru, demientres ellos siguirán con calma Cares alantre, ya que deciden que ya tuvieron abondo nesta edición.

Xubimos la guapa canal de Culiembru hasta la mah.ada d'Ostón

Despedímonos hasta la xinta y tiramos p'arriba con ánimu. Llevamos munchos kilómetros nes pates y sobretou muncho desnivel acumuláu, pero a la escontra de lo que pudiera paecer, vamos cada vegada más finos muscularmente y facemos los 550 m dende Culiembru hasta Ostón nuna hora.

Paez increyible, pero con una mochilona de travesía, fuimos a xubir a un ritmu tan bonu, lo que nun quitó pa esfrutar d'una canal preciosa, cómoda d'ascender y con delles ayalgues nel camín, como la cueva Posadoriu.

Esfrutamos de la calma d'Ostón enantes de baxar hacia'l Cares

N'Ostón... pegámonos un merecíu descansu a la solombra d'una espinera. Miramos el reló y tampoco tenemos tanta priesa (son les doce) o eso creyíamos, así que paramos a beber agua y xintar daqué de frutos secos y chocolate. Nel descansu, nun paramos de charrar César y yo, viendo qu'esta travesera se me fué un pelín de les manes, ya que la mayoría los participantes, acabaron lesionaos  o mui, mui cansaos en dalguna de les estayes.

Nestos camientos, aniciamos el descensu hacia'l Cares de nuevu. Fadrémoslu baxando d'Ostón al sen contrariu pel que xubimos, empobinándonos hacia la canal de la Raya, la cuál entama sele pelos praos d'Ostón, pa empindiase enforma nun senderu bien marcáu pel contrafuerte a la mandrecha de la canal. Ésto ye un clásicu de les canales en Picos, siendo casi siempre seos pelos parés los que nos faen avanzar pela canal.

Damos conocencia a la pindia canal de la Raya... mui disfrutona

Asina sedrá tamién na Raya, la cuál sorprendiónos pola guapura del percorríu, pindiu, pero siempre bien marcáu y con poques opciones de perda. Baxaremos entós, faciendo envueltes pente pedreros, árboles y pasos más o menos altos a mou d'escaleru hasta garrar sienda hacia la canal propiamente dicha.

Dientru d'ella, ya sólo nos queda baxar tola llarga pedrera, tando sollertes a nun tirar denguna piedra hacia'l Cares, ya que la sienda pasa pembaxo nueso y podemos golpiar a dalgún caleyeru provocando un accidente.

Garramos la sienda'l Cares... hasta l'enguedeyu d'accesu a Camarmeña

Aportaremos a la sienda, baxo l'atenta mirada de los numerosos senderistes y sin mayor problema que da-y zapatu, vamos faciendo kilómetros hasta'l siguiente puntu onde deberíemos desvianos hacia Camarmeña. Equí, entamaron tolos nuesos problemes, ya que Fernan y Bittor adelantáronse a conocer esa antigua sienda que más alantre de los Collaos sal hacia Camarmeña.

Nel desvíu, alcontrámonos César y yo un papel diciendo que nun lo tomásemos y asina lo ficimos, pero enantes d'aportar a Poncebos, vimos un cartelu que marcaba la Fuentina, chigre onde teníemos reservada la xinta final de Travesera y como, díbemos mui animaos, tirámonos p'arriba ensin albidrar que Fernan y Bittor díbenmos tar esperando en Poncebos.

El resultáu... pues xubir per un camín dafechu desaniciáu. Más-yos valía quitar esi cartelu a los del bar, nun vaya ser que dalguien tenga un accidente, ya que magar de pasar per una guapa ponte, tendremos de facer un pasu llateral con cable guía, p'averanos al pueblu pente un senderu mui perdíu, nel que la broza fae que lu perdamos, metíendonos en dellos marrones, enantes de tornar de vuelta y garrar la sienda bona hacia'l pueblu.

Camín esaniciáu hacia Camarmeña

La verdá ye que dexo'l track con esta ascensión a Camarmeña, pero nun paga la pena metese, sobretou cuando llegues al chigre y ves que ties a los collacios en Poncebos. Nin puta gracia me fizo tener que baxar corriendo pela carretera hasta la entrada del Cares, lo que supondría un esfuerzu que nun tenía por qué sofrir a estos altores de travesera, cuando ya crees que finó too.

Llueu con calma, con unes cerveces que me quitaren la deshidratación, contáronmos que perdieran tamién ellos, l'otru camín que dende los Collaos venía pa Camarmeña, así que paez ser que nesti pueblu decidieron que la carretera ye la única forma de llegar porque ta too perdíu. Aún así, quedé con ganes de conocer esi otru camín, ya que dende'l nuesu sí que vimos como venía'l senderu dende una h.orcadina penriba d'una imponente aguh.a, a la que xubió Fernan viendo'l pueblu al otru llau y denguna baxada posible.

En resume, ruta enllena d'erros nel so final, pero na que conocí personalmente un par de canales a les que-y tenía ganes: Culiembru y la Raya. Pa ello, César y yo, ficimos un total de 13,5 km, 1130 m d'ascensión acumulada y 1215 m de descensu en 5 hores y 20 min, que col calor ficiéronse más dures de lo que son na rialidá.

Camudando'l Camín na fartura final col Picu

No hay comentarios:

Publicar un comentario