jueves, 30 de diciembre de 2021

L.lumaxu (L.laciana) - Picu Muxivén

12 d'Avientu de 2021

Track: L.lumaxu (L.laciana) - Picu Muxivén

Entamábemos temporada ivernal, recuperando una ruta que nun pudiéramos facer poles restriciones covidianes pente paises, del iviernu anterior, asina que tiramos con ganes hacia L.laciana, p'ascender el Picu Muxivén, el cuál fadrémoslu dende'l guapu pueblu de L.lumaxu.

Primer día de monte, magar de sofrir tres selmanes de temporal de continuu y llueu de marchar bastante de ñeve per semana, topámonos col pueblu llimpiu y la ñeve duro por mor de les temperatures. Asina, que desdexamos los marañones y preparamos el piolé y los crampones pa dir que seguridá.

Partimos del pueblín de L.lumaxu (1397 m) col Muxivén detrás

Saldremos del aparcaderu al final del pueblu, onde tenemos indicada una llarga y guapa ruta hasta'l Cornón y vamos facelo baxando hacia la riega la Mozarra la cual travesaremos, p'ascender hacia la cabaña la Polvorosa, per bon camín con restos de ñeve.

martes, 28 de diciembre de 2021

Catiusca (Valle Bah.u de Peñamellera)

6 d'Avientu de 2021

Continuamos enmediu del temporal, en plena ponte d'Avientu, poro, cualesquier ventanu de tiempu, fainos salir corriendo a facer actividá, ya seya correr pel monte per Llangréu o nesta ocasión, escapar hasta Panes nel Valle Bah.u de Peñamellera pa intentar esguilar un ratín.

El plan ye cenciellu, xubir enantes de que caiga la esbastiada qu'albidrábase y prebar les víes que nun tuvieren moyaes. Magar de 3 selmenaes de continuu lloviendo, yera una xera perdifícil, pero había qu'intentalo, alcontrando'l paré dafechu moyáu.

Averamientu curtiu hasta'l seutor Catiusca
 
Por suerte, había una vía, Chimo Bayo (7a), na que podíemos entretenernos tanto Anna como yo, mientres qu'Alvarín, a parte de facer series nella, podía probar medies víes, ya que la verdá ye que'l paré nun daba pa muncho más.
 
Tamos falando d'una covacha d'aspeutu non mui guapu y con ciertu toque a roca podre, pero que desploma tanto que por muncho que llueva, nun se mueya nin él esguilador nin l'asegurador, poro pa estos díes, ye de les meyores opciones.

Enchufando Chimo Bayo (7a) magar de tres pegues agónicos

Aún así, nunca viera'l paré tan moyáu Alvaro, asina que fuimos conocelu, nel pior de los estaos pa esguilar. Ensin más, fuimos turnándonos a dar pegues a lo que se podía, pudiendo facer Chimo Bayo, casi al flash, pero pringué tanto'l primer pegue, como'l segundu saliendo al xarru salvador.

El segundu fuéseme la mano d'un invertíu saliendo volando al aire... coses del desplome. La verdá ye que son d'estes víes físiques, que me faen agonizar trepando, pero que son necesaries pa ganar fuercia nestos estilos.

Alvaro probando dalgún proyeutín hasta onde se podía
 
Tamién Anna progresó muncho nos pegues, pero si a mí dáseme mal, a ella tamién faíse-y bola esti tipu d'esguilada y anque nun pudo llevásela, sí que marchó con una petada y bon entrentamientu brutal. Alvarín, va encantáu nel desplome y aparte de velu encadenala dos vegaes, pudimos agüeyalu prebando dos 7c que la verdá ye que teníen una pinta xenial.
 
Habrá que tornar cola roca seca pa da-y pegues a más víes y entrenar un pelín nos desplomes.

Panes (Seutores visitaos)

Croquis de la escuela d'escalada de Panes, por mor de la páxina del Pasoclave. Gracies y col so permisu.

jueves, 23 de diciembre de 2021

El Cadavíu (Llangréu) - El Cau - El Cugullu - Les Cruces - Rondiz - Cabaños

4 d'Avientu de 2021

Track: El Cadavíu (Llangréu) - El Cau - El Cugullu - Les Cruces - Rondiz - Cabaños

Fartucos de tres selmanes de mal tiempu, ensin poder salir de monte, ensin poder esguilar, metíos nel rocódromu entrenando, vimos una mañana de ventana de "bon tiempu". Dalgunos intentaron salir a esquiar a pista y yo que nun tenía material entá, decidime a tachar un techu de conceyu, preparando una circular per Llangréu.

La idega yera facela corriendo aprovechando esa ventanina y sumáronse a la idega, Iso, collaciu d'esguilaes varies y Jandro'l so hermanu, que nun ta de correr anguaño, pero dába-y duru a les carreres pel monte, asina que yera un bon equipu, contando como siempre con Kíla, motivada a muerte pa salir al monte.

Partimos d'El Cadavíu (244 m) a les puertes del ecomuséu del valle Samuño

Pelín enantes de les 11 la mañana, aparcaremos enfrente'l Ecomuseo del Valle Samuño, pa salir cuesta riba, per carretera pa garrar una pista a la manzorga, que tien que dir llevándonos hacia les cases de Trichuru, travesando siempre per pindios senderos y pistes hacia'l pueblín de la Peña Utiillu, ablucando colo guapo de la so dimposición en tola faldera y de lo calteníu y arregláu de toles cases.
 

viernes, 17 de diciembre de 2021

Robrigueru (Valle Bah.u de Peñamellera) - Cuñaba - Picu Torna Las Güertas

7 de Payares de 2021

Track: Robrigueru (Valle Bah.u de Peñamellera) - Cuñaba - Picu Torna Las Güertas

Continuamos cola temporada 2020-2021 del Grupu Montaña Xuan de la Borrina, garrando pa la ocasión una ruta propuesta por Carlos que nos diba llevar a conocer dellos caminos d'antaño pente los pueblos del Valle Bah.u de Peñamellera de Robriguer y Cuñaba.

Ye una ruta perfeuta pa temporada ivernal, ya que nun día espeyáu, cosa que nun tenemos, tendríemos unes vistes bien guapes de Picos d'Europa ñevaos. A la escontra, tocónos un día perfríu y pesie a conducir con bon tiempu pela mañana, aportamos a Robrigueru, teniendo una boina penriba l'Escobiu la Ermida que nun mos da muncha confianza de cara a tener grandes vistes.

Puntu de salida en Robrigueru (106 m)
 
Salimos del pueblu hacia la parte alta, para garrar al pocu una pista que dirá empobinándonos en direición a la Ermida y más en concretu hacia'l mayáu de Tresqueh.u, llugar nel que garraremos el primer de los senderos del día, el de Peñalba.

lunes, 13 de diciembre de 2021

Vil.lanueva (Teberga) - Val.lina Armada - Peña Troméu - Braña'l Rebel.lón

30 d'Ochobre de 2021

Track: Vil.lanueva (Teberga) - Val.lina Armada - Peña Troméu - Braña'l Rebel.lón

Hai díes que sales al monte con ilusión, ya que ties preparada una ruta de va tiempu y nun acabes d'alcontrar el momentu pa dir a por ella. Casualidaes, ficieron que nel puente de Tolosantos tuviera per Teberga esguilando, poro la oportunidá pa dir a patear y conocer la Val.lina Armada yera perfeuta.

Pero nun sólo yera patear, los que díbemos sabíemos que tocaba bregar, asina que Benjamín, Mario y Carlos, veníen preparaos pa ello dafechu. Dende que viera'l reportaxe de Javi Cienfuegos, tenía ganes de conocer la Val.lina Armada, pero camudando'l percorríu p'ascender a la Peña Troméu, con más interés montañeru al nuesu paecer.

Partimos de les cercaníes de Vil.lanueva (700 m)

Magar d'un almuerzu en Samartín, salimos direición Altu San L.lorienzu, pasando per Vil.lanueva, aparcando al llau de la carretera más menos un kilómetru más alantre. Nun hai muncho sitio, pero apañámonos pa dexar les furgonetes, preparámonos y descendemos de la carretera per camín hasta'l rigu Valdecárzana.

miércoles, 1 de diciembre de 2021

El Laboratoriu (Morcín)

21, 26 d'Ochobre de 2021

Continuábemos con una seronda seca pel momentu y aprovechábemos les últimes tardes enantes del cambeu d'hora pa salir a roca peles tardes, faciendo principalmente visites al Laboratoriu y a Arnea na Manzanea.

Pulga dando pegues d'encadene a la Roko's (su Rambla particular)

Siempre prestóme'l variar los tipos d'escalada, asína que tener proyeutinos de placa y de desplome en diferentes escueles, fai que puedas empatar díes siguíos d'escalada sin mayores problemes. Asiina que con tola motivación de la vuelta de Margalef, siguimos enfrascaos nel procesu d'encadenar víes.
 
Apretando en Roko's (7a+) de les últimes víes equipaes n'El Laboratoriu

Nesti casu, sigo col mió xeitu de llimpiar escueles, ensin saltar graos, poro metime a facer la Variante de Zihuatanejo, guapa vía de por sí, faciendo la primer parte de Zihuatanejo, vía que tuvo a Anna entretenida tamién, poro pudimos compartir pegues en parte, hasta que llevámonos los dos l'encadene de turnu.

Pegues a última hora col atapecer nel seutor

Nesi momentu, xurdió una via nueva a prebar, la Roko's, un 7a+ escaecíu nel que taba metíu'l Pulga, llimpiándola, sacando los pasos y motivándonos a otros munchos a probala. Una vía que nun tien na que ver col restu de víes del Laboratoriu, con pasos téunicos, movimientos y preses super fanátiques.

 
Ambientín munches tardes nel Laboratoriu

A la fin, enantes de la llegada de lluvies tamién pudímos llevala pal bolsiellu, faciendo nesti 2021 tres víes más del seutor, avanzando pali pali hacia graos más duros, pero siendo sinceros ye un seutor al que préstame dir dacuando y cuéstame motivar pa proyeutar, poro nun tengo priesa pa que vayan cayendo les víes poquín a pocu.

martes, 30 de noviembre de 2021

Tuíza Riba (L.lena) - Corrales - Prau L'Albu - Canalón Oscuru

24 d'Ochobre de 2021

Track: Tuíza Riba (L.lena) - Corrales - Prau L'Albo - Canalón Oscuru

Dempués de les vacaciones esguiladores per tierres catalanes, tornábemos a Asturies con ganes de dar dalgún pateín y continuar trepando lo más duro posible. Tamos al entamu de la temporada 2021-2022 y llueu de facer rutes más bien seliquines, vamos visitar una vegada más el macizu de Penubina, pa completar un cresteríu cenciellu pero coles meyores vistes de tol macizu.

La idega ye completar el cresteríu dende'l Fariñentu hasta'l Picu'l Canalón Oscuru, pero na realidá, como ya fice parte d'ello, nes rutes al Pie Ferreru y Prau L'Albu ya tengo na tiesta facer compañía a Benjamín y que'l restu'l grupu foguéese un pelín más y encume'l Fariñentu.

Tol grupu nel aparcaderu de Tuiza Riba (1225 m)

Saldremos a les diez de la mañana de Tuiza Riba, llueu de xuntanos casi toos en Campumanes pal cafetín de rigor. Esta vegada, tenemos nueva xente col grupu, Silvia que yera conocía de carreres pel monte y el so compañeru Pelayo, más dos perretes a sumar a Kíla, asina que travesaremos les cais de Tuiza un bon garrapiellu, hasta'l depósitu d'agua, onde garraremos senderu hacias Las Colgás.

miércoles, 24 de noviembre de 2021

Camarasa (Lleida)

Del 14 al 16 d'Ochobre de 2021

Llueu de pasar unos díes xeniales per Margalef, vimos que les fuercies ya nun daben pa más díes esguilando nesta escuela y decidimos finalizar les vacaciones, arrimándonos hasta Lleida y más en concretu a Camarasa, onde tenemos otra escuela enorme con milenta seutores.

Namái que tuviemos una tarde, na que pudimos dar unos peguinos nel seutor Túnel d'Aigubarreig, cola aventura de travesar túneles, portiar perros per una escalera de mano, etc... too ello, hasta que dixéronmos que podíemos bordiar un pelín y había camín sin problemes jaja... menuda liada la primer tarde.

El Pantá de Camarasa... un llugar con hestoria obrera ya industrial

La esguilada nesti seutor, pues física y de furacos al estilu Margalef, nes víes más dures pero con munchísimu sestu mediu onde los collacios pudieron esfrutar al másimu. Personalmente, nun par de tardes ficiera un 6c a vista (Epicontelitis), perbono pa calecer y llueu metiera un pegue fuerte a vista a Vaga de Fam, un 7a+ que casi faiga a vista cayéndome nun pasu pa dir a cadena... fue una pena, ya que paecía la última oportunidá de facer l'oxetivu del viaxe.

Al día siguiente de tarde, ficiérala poniendo cintes y probara un 7b a la manzorga, pero pringué nun pasu a metá de vía y nun tuvi tiempu a da-y un segundu pegue. La verdá ye qu'esti seutorín, dexó perbon tastu y a toos diba prestanos visitalu una prósima vegada.

Maia y Xavi esguilando caún a lo suyo

L'otru seutor que visitamos, fue Kuestelón la France, ún de les munches muries qu'hai al llau drechu del rigu Segre y onde pasamos un par de mañanes, nes que pude esfrutar d'un clásicu y duru 6c, la Fisura Garreta y al día siguiente por mor de la motivación que-y entró a Anna con un 7a+ atómicu (No Tatrinkis) volvimos pa da-y un peguín a vista.

A la fín, nun fue mal pegue, pero tovía tuve que da-y otros dos pegues pa encadenala al terceru, xustu igual qu'Anna que pudo llevásela al segundu, pringando arriba cuando ya paecía tar too fecho. Aún así, pagó la pena muncho tornar l'últimu día del viaxe d'escalada hasta Kuestelón pa encadenar esta vía, ya que fue un auténticu rutón plaqueru.

Un collaciu llocal en No Tatrinkis... vía que namorónos

Sacante del puru y duru mundiu esguilador, tuvimos el placer t'asitianos coles furgos na redolada de Sant Llorentç de Montgai, un pueblín más pequeñu que Camarasa, pero perguapu y onde atopamos un chigrín onde poder tomar dalgo ya inclusu cenar bien a gustu.
 
En resume, otra escuela, que bien paga la pena una visitina más intensa, conociendo más seutores y esfrutando de munchos estilos d'escalada, pudiendo plaquear de regletéu o tirar d'escalada física y furacos.

Llegó la muerte a Camarasa y la necesidá d'una ducha

Camarasa (Seutores visitaos)
 
Croquis de la escuela d'escalada de Camarasa, alcontraos pela rede. Gracies y col so permisu.
 --------------------------------------------------------------

lunes, 22 de noviembre de 2021

Margalef del Montsant (Tarragona) - Ermita de Sant Salvador

12 d'Ochobre de 2021

Track: Margalef del Montsant (Tarragona) - Ermita de Sant Salvador

Dempués de 3 díes d'esguilada intensa per Margalef tocaba facer un descansín y pa ello, al igual que n'otros viaxes, siempre llevo preparáu dalgo pa los díes descansu, col envís d'entrenar un pelín corriendo o simplemente dando un pateín tranquilu.

Ya saliera varios díes a correr pela mañana, a la gueta de circulares prestoses, pero siempre acababa enmediu d'un olivar y nengún camín llevárame a la parte alta de la xerra del Montsant, así que a lo llargo los siguientes díes preferí salir a correr per pista hasta Bisbal de Falset y vuelta ensin esmoleceme muncho más.

Partimos del aparcaderu de la Fonda Margalef (370 m)

Esta vegada, aprovechando qu'Almu tenía que colar de Margalef al terminase'l puente, fuimos Mario, Anna, Almu y yo a conocer el valle de Sant Salvador, pensando a posteriori en xintar daqué en Ca Vernet, pa despedinos y xubir a trepar un puquiñín de tarde.

martes, 16 de noviembre de 2021

El Campu (Casu) - El Pandu - El Piqueru

3 d'Ochobre de 2021

Track: El Campu (Casu) - El Pandu - El Piqueru

Magar d'un día perbono, con tolos collacios del GM Xuan de la Borrina, xubiendo al Cullargayos, xintando, pasando la tarde per Soto y cenando mui rico de vuelta nel Albergue Cantu L'Osu, despertamos na furgo dempués d'una nueche lluviosa.

Demientres almorzamos y aldericamos si arriesgar a facer daqué nesti domingu de ñubes y claros, veo que'l grupu nun ta pa munches hestories. Pente café y café, nun tengo mui claro si tirar pa Morcín a esguilar o salir a dar un patéu rápidu con Kila, decidiéndome polo último, aprovechando que toi en Reres.

Partimos d'El Campu (545 m), capital del conceyu casín

Nun sé mui bien, como ta d'animada Kíla y el día sigue amenazante, asina que déxola dar una vueltina pel aparcaderu de Soto y dempués d'un ratín, decidimos salir hacia El Campu, capital de Casu, onde tengo pendiente un monte cimeru d'Asturies dende cuantayá: el Monte Piqueru.

jueves, 11 de noviembre de 2021

Soto (Sobrescobiu) - Nozalín - Picu Cullargayos - Llaíñes (Sobrescobiu)

2 d'Ochobre de 2021

Track: Soto (Sobrescobiu) - Nozalín - Picu Cullargayos - Llaíñes (Sobrescobiu)

Continuamos cola vuelta al monte per Asturies, siendo esta un finde especial, ya que vamos facer una mini xuntanza por mor del XII Aniversariu del GM Xuan de la Borrina. De primeres, el númberu de participantes yera curiosu, pero pente la mala meteo y dellos problemes personales quedamos en poca xente, lo que nun quita que fuera un finde bien guapu.

El llugar escoyíu yera'l conceyu de Sobrescobiu y la Posada Cantu L'Osu fue'l nuesu campu base, durante tol finde. Dicir dende equí, que mil gracies pol tratu, poles cenes, los almuerzos, l'alderique montañeru y social y por tener comprensión coles baxes del grupu.

Partimos del aparcaderu de Soto (425 m)
 
Magar d'un almuerzu tan bono, como la cena del día anterior, presentámonos nel aparcaderu de Soto, con dellos planes nel bolsiellu, pero viendo'l día murniu y amenzante y que nun tenemos la meyor forma del mundiu pa lo que tenía pensáu, decidimos ascender al Picu Cullargayos, conociendo la foz de Nozalín.

miércoles, 10 de noviembre de 2021

Priañes (Uviéu)

4, 6 d'Ochobre de 2021

Casi un añu dempués, tornábemos per Priañes al seutor Principal, onde motívame dalgo más la esguilada. La verdá ye que la idega, yera aprovechar les tardes enantes del cambéu d'hora y dir llimpiando un pocu les víes más cencielles que díbemos probando.

Ensín más punxímonos manos a la obra y en dellos díes, pudimos dir tachando'l segundu llargu de Patos Salvajes (6b+) bastante perra pa esi grau, Casacas Azules (6c) del mesmu palu y una mui pocu visitada Pies Planos (7a)

 Seutor Principal de Priañes

Como non, tamién probamos delles víes más, dalgunes de primer llargu bloqueres como La Ley del Deseo, otres de segundu llargu como'l Vuelo del Alimoche o víes que nun me dieron más, como la Columna de Hercules que quedarán pa visites a posteriori.

Priañes (Seutores visitaos)   

Croquis de la escuela d'escalada de Priañes, por mor de Piratas Free. Gracies y col so permisu.

------------------------------------------------------------------ 

martes, 9 de noviembre de 2021

Las Xanas (Santu Adrianu) - Pedroveya (Quirós) - Peñarréi - Valdolayés

26 de Setiembre de 2021

Track: Las Xanas (Santu Adrianu) - Pedroveya (Quirós) - Peñarréi - Valdolayés


Entamamos temporada de monte 2021-2022 y había que facelo con ruta-fartura, asina que púnxeme a mirar que facer pela fastera central asturiana, dándome cuenta que dempués de la revisión de los Techos d'Asturies, quedárame pendiente l'ascensión a la Peñarréi en Santu Adrianu.

Partimos del aparcader de Las Xanas (182 m)

Ensín más, facemos quedada nel aparcaderu de Las Xanas, sobre les 9 la mañana, poro, vamos tener que reconocer l'escobiu Las Xanas p'acometer el nuesu oxetivu. Nun ta de más, ya que ya lloviera de la última vegada que lu ficiera, p'ascender a la Mostayal.