lunes, 13 de diciembre de 2021

Vil.lanueva (Teberga) - Val.lina Armada - Peña Troméu - Braña'l Rebel.lón

30 d'Ochobre de 2021

Track: Vil.lanueva (Teberga) - Val.lina Armada - Peña Troméu - Braña'l Rebel.lón

Hai díes que sales al monte con ilusión, ya que ties preparada una ruta de va tiempu y nun acabes d'alcontrar el momentu pa dir a por ella. Casualidaes, ficieron que nel puente de Tolosantos tuviera per Teberga esguilando, poro la oportunidá pa dir a patear y conocer la Val.lina Armada yera perfeuta.

Pero nun sólo yera patear, los que díbemos sabíemos que tocaba bregar, asina que Benjamín, Mario y Carlos, veníen preparaos pa ello dafechu. Dende que viera'l reportaxe de Javi Cienfuegos, tenía ganes de conocer la Val.lina Armada, pero camudando'l percorríu p'ascender a la Peña Troméu, con más interés montañeru al nuesu paecer.

Partimos de les cercaníes de Vil.lanueva (700 m)

Magar d'un almuerzu en Samartín, salimos direición Altu San L.lorienzu, pasando per Vil.lanueva, aparcando al llau de la carretera más menos un kilómetru más alantre. Nun hai muncho sitio, pero apañámonos pa dexar les furgonetes, preparámonos y descendemos de la carretera per camín hasta'l rigu Valdecárzana.
Ascendemos hasta'l Cantu La Era (780 m), crucie de caminos

Cruciaremos el rigu per una ponte, pelín a puntu fundir y ascenderemos per camín hasta'l Cantu la Era, onde tenemos dellos crucies de caminos, según querramos conocer la Val.lina Armada o ascender hasta la Braña'l Rebel.lón.
 
Averámonos hacia la Val.lina Armada per bon camín anque mui tomáu
 
Nós, tomaremos el camín transversal, pocu marcáu, alcontrándonos con una bona caxa, armada, pero mui tomada de cotoyes y escayos, que durante mediu kilómetru llevarános hacia'l rigu Bayu, el cual va ser nuesu compañeru y guía durante delles hores de bregada continua.

Aportamos al rigu Bayu y los llugares de belleza entaman a ser de continuu
 
Magar d'esta primer bregada, aportaremos al rigu Bayu y entamaremos nun mundiu increyible, de pequeños saltos d'agua, requexos cubiertos de fueya serondiega y tolos collores que podamos imaxinar. Siempre pensamos, na necesidá de llimpieza d'estos caminos, amplios nel so día y que tan perdiéndose, pero tamién camentamos qu'a camín marcáu y llimpiu, sígue-y una posible masificación... la eterna y fina llínea de la sostenibilidá ambiental.

Primeros saltos d'agua y pasos amables pel rigu Bayu

Avanzaremos na parte baxa del rigu Bayu, mediánamente bien, aportando a los primeros tabayones de cierta importancia, siempre esfrutando de pasos colgaos a la mandrecha'l rigu. Hai que dicir q'hasta estos primeros saltos d'agua, el camín ye bastante factible y sería un bon atractivu pal conceyu de Teberga polo guapu del llugar.

Toca buscase la vida saliendo monte arriba siempre a la madrecha'l rigu
 
Nun puntu, alcontrámonos con un guapu tabayón y un champán penriba d'él, que cubrirá hasta la cintura y que nun da pasu penriba d'él, poro tenemos que dar la vuelta y ascender monte arriba, pegaos a un paré, agarrándonos a les escobes hasta'l ancontrar penriba la peña un senderu d'animales que vien d'arriba, que va devolvenos a la parte alta del tabayón.

Perpasamos a la fastera esquierda del escobiu pa continar camín

La bregada fue enorme y paez que pasamos pela ducha, ya que'l día anterior llovió abondo y tamos llevándonos tol agua de la vexetación. Darréu, cruciaremos el rigu y vamos siguir avanzando pela manzorga, dacuando pegaínos al rigu y otros un pelín más altos, siempre alcontrando llugares de grandísima belleza.

Nun damos a sacar semeyes y alloriar colo guapu y xabez de la Val.lina Armada

Nun sabemos nin cuantes vegaes avanzamos pel rigu nin cuantes ascendemos pel monte, pero siempre vamos alcontrando dalguna traza animal y cuando nun podemos siguir pol rigu, pel monte, travesando arandaneres baxo les fayes, vamos dando camín pali pali.

Más y más llugares de gran belleza... un agasayu pa la bregada que tamos faciendo

La verdá ye que nestes rutes, pudiera comentar munches coses, pasos y milenta detalles, pero nin les semeyes, nin los comentarios, van facer xusticia de la guapa garganta onde tamos metíos. Simplemente, miramos, buscamos la meyor opción y avanzamos siempre adelantre y siempre bregando, poro garrar de referencia les semeyes y facer un mínimu casu al track, ya que la señal va pegando botes por mor del escobiu onde tamos metíos.

Salimos a la fin a la parte alta del rigu Bayu llibrando l'últimu tabayón
 
Dempués de llibrar un bon ratu pela parte media'l monte, baxaremos al rigu onde alcontramos la última dificultá, de la cual teníemos confirmación con un sustu que tuviera un compañeru de Cienfuegos, poro mientres yo averéme a ver el pasu y sacar semeya, los collacios alcontraron pasu pel monte, saliendo per una forcadina a la parte alta d'una peña, onde tenemos grandes vistes del nuesu destín: La Peña Troméu.

Caleyamos sele pela parte alta del escobiu del rigu Bayu per tarrén más cenciellu

Una vegada que llibramos esti últimu saltu, ya tendremos la parte más sele y cenciella del escobiu del rigu Bayu, asina que diremos esfrutando al alla del rigu, alcontrando dalgún saltín guapu y avanzando hacia la mecederu del rigu Bayu cola riega las Matiel.las, llugar de salida de la Val.lina Armada.

Salimos a la fin de la Val.lina Armada o escobiu del rigu Bayu

Magar de 4 hores de pura bregrada, escayaos, moyaos y pelín afamiáos, vamos facer l'últimu esfuerciu, pa encumar la Peña Troméu, asina que tiramos per praos hacia la col.lá Troméu, primeru y llueu tendremos d'avanzar per delles llambrias hasta la parte alta, onde crestiaremos con dellos xube-baxa hasta'l puntu cimeru de la Peña Troméu de 1341 m.

Algamamos el cumal de la Peña Troméu (1341 m)

Tamos a la fin na Peña Troméu, el meyor mirador de tol tarrén d'aventura pel que nos acabamos de mover y el meyor regalu que recibimos ye'l sol, pudiendo quitar el calzáu, secar dalgo la ropa y relaxanos xintando y casi quedándonos atontaos siesteando.

Semeya del grupín aventureru na Peña Troméu (1341 m)

Llueu d'una media hora tranquilina, vamos espabilando, facemos la semeya de rigor y presentamos los nuesos respetos a Carlos "Cabralitos", gran montañeru que pude conocer va años en compañía de Sito nun día de calor horrible na Vega d'Ariu y qu'un accidente nel monte, llevóselo dexando un pocu güerfanos a munchos compañeros montañeros.

Descendemos a la Braña'l Rebel.lón imprescindible braña tebergana

Tornamos sol nuesu camín hacia la col.lá Troméu y vamos descender per bon camín hasta la Braña'l Rebel.lón, otru guapu llugar teberganu que bien paga la pena visitar. Equí, vamos descender hacia una de les viesques más guapes que topé nos últimos tiempos, percorriéndola per bon camín, col suelu tapecíu de fueya y los colores de la seronda pelín tardía tovía mui verderones.

Esfrutando del caleyar tranquilu per una viesca increyible

La verdá ye que nun esperábemos dalgo tan guapu, asina que facemos mil semeyes y charramos allégremente de lo completa que queda la ruta, anque tenemos claro que la xubida pela Val.lina Armada, nun ye pa tolos públicos nin muncho menos, pero pa nós, esta baxada ta siendo una ayalga pa los nuesos cuerpos cansaos.

Saldremos per pista forestal hacia'l rigu Valdecárzana

Dempués de travesar tola viesca, pasaremos peles cabañes del Llanón y saldremos d'ella, decidiendo non baxar hacia'l Cantu La Era, ya que sabemos que'l camín pue tar zarráu d'escobes y ya bregamos bastante, poro tiraremos hacia'l rigu Valdecárzana per amplia pista forestal, cruciando'l rigu nuna ponte y accediendo a la carretera que baxa hacia Vil.lanueva.

Faciendo camín per carretera hasta les furgonetes de nuevu

La verdá ye qu'agradecimos esta decisión, aportando a la carretera bien aína, teniendo que facer malpenes mediu kilómetru de nuevu hasta les furgonetes, onde cansaos pero mui satisfechos de la ruta, mudámonos de ropa y empobinámonos hacia unes cerveces más que merecíes.

En resume, los 9 km y +/- 775 m de desnivel acumuláu, nun dicen res de la dificultá de la ruta, ya que nun son munches vegaes les que toca trabayar, orientase, lluchar y bregar cola vexetación p'albidrar y progresar per dambos llaos del rigu Bayu que ye una auténtica ayalga montañera.

Camudando'l Camín no más xabaz de Teberga

2 comentarios:

  1. Terren xabaz como nun pise otru igual. Préstame que te prestare. Yo esfrutelo asgaya en su día, con sustu y tou. También ye guapo ver el buzón de Carlos como aguanta nel Troméu. Tiempu va que-y debo una visita. La última vegada prometiera-yla con ñeve. A ver.
    Un saludu

    ResponderEliminar
    Respuestas
    1. Bregamos pero pasámoslo podre... ye un llugar increyible. Mil gracies pol regalín

      Eliminar