viernes, 17 de diciembre de 2010

Rocódromu de Llugones (Siero)

Nun soi nengún espertu nesto de la escalada, pero bono, pa entamar esti ye'l primer rocódromu qu'esguilé nel pocu tiempu que llevo nesto. Aparte, ye'l sitiu onde entreno tolos díes práuticamente, ye dicir 4 díes a mediudía por selmana. Aprovechando eses dos hores que m'endiñen de hora de xinta, pues una vegada ya avezáu a ello, pues nun queda otra qu'intentar facer daqué nestes hores, colo que voi de llunes a xueves a esguilar nel búlder de Llugones, ya que los vienres suelo dexalos pa garrar fuercies pa una tarde insufrible nel trabayu, jeje. 

Esti bulder tien 13,5 metros d'anchu y 3,20 d'altor y ye completamente desplomáu colo que pa entrenar y garrar téunica ye perfeutu, anque pa dalguien qu'entame ye abondo duro. Ta partíu no que se pue llamar tres fasteres: la primera más sele con dalgo de desplome, la segunda con más desplome inda, y la tercera ya tien techo y continúa con un desplome importante.

Rocódromu de Llugones
 
Pa mi, ye muncho más entreteníu entrenar nesti tipu de rocódromu ya que pue esguilase ensín la necesidá de material de cuerdes, arnés y demás ferramientes, que faen falta pa uno que seya en altor. Nesti, les posibilidaes de víes a intentar son munches y gárrase téunica más fácil que si hubiese que tar engancháu, cola facilidá de saltar símplemente cuando nun se llegue a una presa escoyida inicialmente o cuando nun se puea más, y caer n'una colchoneta ensín problemes. Namái dicir, que la escalada deportiva ye un bon entretenimientu, y qu'una vegada que se preba suel tener muncho d'adictivu pa una persona que-y preste'l deporte con un toque d'aventura. 
 
Anováu (Avientu 2010) Ya son tres temporaes yendo a esguilar a esti roco, y pueu decir qu'esta ye la meyor, la que más preparáu, entrenáu y finu en xeneral ando, asína que dir a entrenar con mis collacios, Silvia y Vicen, pues ye un continuu pegáse con coses cada día más prestoses y difíciles. Dalguna semeyuca d'amuesa: 
 
 
Entamando a calecer deos y en xeneral
 
 
Metíos nel desplome
 
  
Trabayando nos techos 
 
 
Un pocu posturéu nos pegues finales
 
   
Otru dia peléandome con Vicen
 
   
Camudando'l Camín y les víes tamíen

miércoles, 15 de diciembre de 2010

Soto (Sobrescobiu) - Picu Corbellosu

4 d'Avientu de 2010

Track: Soto (Sobrescobiu) - Picu Corbellosu



Dempués de la primer ñevadona del iviernu, intentamos acolumbrar que posibilidaes "riales" tenemos, de facer montaña y viendo que les nueses rutes pa esti mes, nun yeren afayaices, alcontramos pente les d'esti añu, el picu Corbellosu de 1282 ms, nel nuesu queríu parque de Redes.

Nun restolamos más, y el sábadu partimos como siempre dende Xixón, pola autovía minera, que tien dalgo ñeve pelos llaterales, hacia'l corredor del Nalón, onde na primer retonda, los picolos párenmos a soplar, pero al venos al estilu montañeru, déxenmos tirar p'alantre. Asína que ya sabéis, cuando vayáis pedo, poneros un forru'l decatlón, y ventiláu, jaja. Ye broma....

Garramos corredor, onde la carretera ta llimpia, pero da pelín de mal rollu'l posible xelu, así que travesamos con curiáu los conceyos de Llangréu, Samartín del Rei Aurelio y Llaviana, p'aportar finalmente na entrada al parque de Redes, Sobrescobiu.


El Crespón dende Rusecu (Sobrescobiu)

Na so capital, Rusecu, vamos parar un bon ratu, a calecer con un cafetín y un pinchu tortiella, demientres charro con dalgún montañeru más (como Miguel, gran montañeru y deportista) y asperamos un tiempín, pa que Vicen, collaciu col qu'entamé a esguilar nel roco fai 3 años, axúntese a nós pa facer la ruta.

Ta faciéndose tarde y salimos pela carretera xelada hacia'l pueblu de Soto, pasando enantes pelos pueblos de La Polina y Villamoréi. Nel so aparcaderu, dempués de facer el pih.u col coche y el xelu, mudámonos de ropa y cuando a la fin tamos toos (dalgo tarde ya), ponémonos a caleyar pel pueblu pa garrar la pista de la ruta L'Alba. Taba pensando n'escaecer el viaxe que metióse Pangua nel xelu, pero fízonos entamar a caleyar con una sorrisa a pesar del fríu que facía.


Aparcaderu de Soto (433 ms)

Magar de que se llevantáse, cruciamos el pueblu, con muncho curiáu ya que taben toles cais xelaes, hasta empatar col entamu de ruta L'Alba, la cual al tener dalgo más de ñeve, podíase avanzar con menos peligru. Pocu hai que dicir d'esta parte, namái que vamos falando de mil hestories demientres pasamos pol praón y el regueru hasta ver les istalaciones de la piscifactoria, pa siguir, ya col riu Alba más encaxonáu, polos pasos del Picu Les Plunes y el Xierrón de Xarfoz, hasta aportar al Pontón del Retorturiu, onde garraremos una pista en xubida a la nuesa mandrecha.


Caleyando pela pista xelada del Alba

Darréu de garrar la pista, les condiciones del día, foron ameyorando enforma..., el soliquín calecíanos y sobraben capes, y el nuesu caleyar facíase más prestosu col soníu de la ñeve pisao, siendo esta bien reciente. Dalgunos de nós, equipaos con raquetes aprovecharon pa usales, ya que la capa ñeve yera abondo pa ello.


Primeres cuestes pela pista con muncha ñeve ya

Los demás, sufríamos pelín más, pero nun-y dábemos muncha importancia, ya que'l paisaxe yera ablucante. D'amuesa, teníamos al picu Retriñón, que regalábanos de xemes en cuando, una semeya rellumante y con ciertu aire de gran montaña, col vientu azotando la so cresta y llevantando-y el blancor ivernal.


El Retriñón amosábase impresionante en tol camín

Poquín a pocu, con esfuerzu (nel intre, paecíanos ya muncha ñeve na pista), fuimos avanzando faciendo les revueltes de la pista hasta ponenos nes cabañes de la Trapa, dempués de pasar pola cuesta'l Pando y L'argumusu enantes.


Siguía espoxigando l'altor de la ñeve

Equí teníemos unes vistes de los demás picos del Crespón (Cogullu, Guanalón,...) precioses, y tábemos a la gueta visual del nuesu destín, el Corbellosu, y ye qu'hai que dicir, que nun tenía mui nidio cuala yera la so forma y si nin siquiera yera posible xubilu con tal cantidá de ñeve.


El Cogullu y el Corbellosu

Dos hores y pocu, poníamos nel mayor altor de la ruta, 960 ms, hasta'l pasu dao, y cola ñeve pela rodiella, vamos abriendo buelga, teniendo na mente, una prósima perda d'altor y una cresta del Corbellosu, que nos glayaba a les clares, que la xera nun diba ser cenciella.

Asína pues, baxamos como podemos pente una viesca y travesando dalgún argayu ñeve del Cantu Texera, hasta la riega Carballosa (870 ms), onde tenemos enfrente nós, l'entamu l'ataque al picu Corbellosu, con un desnivel de más de 400 ms.


Nos praos de la Trapa y cruciando la riega Carballosa

La hora tampoco acompanga demasiáu, ye casi la una la tarde (taba penalizándonos salir tan tarde), y avanzamos llentu como ye d'asperar con tanta ñeve. Aún así, el día ye perfeutu pa pegáse con ella. Ye Vicen quien toma la tiesta, y coles raquetes abre como pue un camín, pente les cotolles, piedres,... y los demás vamos siguiendo la so estela, en ciszas.


Primera parte de l'ascensión faciéndose dura

Quiciábes, nestos momentos mirar el gps, pa ver per onde va'l track sería intelixente, pero nun fue asína, los nuesos pasos llevábenmos simplemente per onde se podía, ensín poder escoyer demasiaes alternatives. De xuru, que la "llinea marcada", como diz el cantar de tonada, empobinaríanos al colláu, pero nós averámonos selemente hacia la cresta'l picu.

A dicir verdá, como díbemos dalgo llentos coles raquetes de Vicen, púseme a abrir yo, a degüeyu y fuimos avanzando muncho más rapidu, pero sin saber por qué, fui metíendome de llenu na cresta, onde la ruta diba tornáse ca pasu más y más difícil. Agora mesmu, ya solu quedábemos cuatru, ya que Carlos y Raúl, abandonaren enantes de metése nos tramos más complicaos. Claramente tuvieron más vista que nós, que poquín a pocu díbemos metiendonos nuna "entamada fina", pente les roques y la ñeve.


Pasos mui duros cola ñeve altísima

Dempués d'un ratu nel que me relevó Vicen otra vegada, la situación taba tornándose abegosa, y más cuando llega'l final de lo que paecía la cresta y diz que'l cumal ta a tomar pol culu inda. La verdá ye que yera asína, taba lloñe, lloñe, y yeren les dos y cuartu de la tarde. Falamos un ratín, y arriendes dello, póngome los guantes de ñeve (facía tiempu que nun sentía les manes ya), y póngome a tirar más col pensamientu de qu'otra ruta más diba tener que dame la vuelta.


Perguapa semeya na cresta'l Corbellosu

El casu foi que siguí xubiendo, dándo-y vueltes al erru d'averáse al crestéu, envede tirar al colláu, y cola pallabra de qu'a les 3 tuviéramos onde tuviéramos se baxaba. Ye más, camiento, que tiré p'arriba pensando en baxar pela parte del colláu.


Semeya de la dureza d'abrir buelga nestes condiciones

Pasan los minutos y bas de fozar na ñeve a cuatru pates, sigo abriendo buelga, y poquín a pocu vamos viendo más cerquino'l cumal. Nun tengo más que pallabres d'agradecimientu a los mios collacios, qu'en nengún momentu amosáronse esmolecios, ye más les espresiones de: "vamos a morrer" o "menuda entamada", ente rises, daban tranquilidá pa metése la xatada que me taba metiendo.


Últimos esfuerzos p'algamar l'arista final

4 hores y media, de mui duru trabayu cola ñeve pel cadril y en munchos pasos enterráu pol pechu, facíanos arribar al cumal del Picu Corbellosu de 1282, y digo bien, mildoscientos metros, que resultó ser la mayor y más dura xera montañera no que llevo lluchando cola montaña. Camiento que nunca ví con tan bonos güeyos los pinchos d'una cotolla, asomando ente'l blancu, ya valía p'albidrar un pasu sobre dalgo medianamente sólido onde pisar, jeje.


Nel cumal del Picu Corbellosu (1282 ms)

Yeren les 3 menos venti, cuando ficimos cume, poro, tocaba xintar dalgo de chocolate, barrines, sacar dalguna semeya que dexara costancia de que tuviemos los coyones a xubir, y entamar una baxada, qu'al final diba ser pela mesma buelga qu'abriéramos p'ascender. Yera nidiu qu'al menes sabríemos onde tábemos pisando. Dotramiente dende'l cumal, vimos lo pindiu del tarrén dende'l colláu, y duldamos munchísimu que pudiera xubise dende ellí, con tala cantidá de ñeve.


Baxando del Corbellosu y con él detrás dempués d'algamalu

La baxada en xeneral, foi de lo más agradable y ablucántemente rápida, y el sentimientu de trunfu que teníemos na tiesta, al menos yo, fízome sentíme gayoleru en tol tiempu que nos llevó aportar a la ruta L'Alba, onde xintamos el bocata en 5 min, y siguimos en llama hacia'l pueblu, al alcuentru colos nuesos collacios, que taben ya esmolecíos por nós y de non mui bon humor, pola espera de dos hores ensín contautu, jeje.

Bordiando les 6 de la tarde, y por tanto l'atapecer, arribamos a Soto, dempués de 7 hores y media de ruta ivernal, nos qu'algamamos esti picu Corbellosu, pal que tuviemos que llibrar 1645 ms d'ascensión acumulada y 16 kms de ruta en total, polo que camiento que nun la escaeceré fácilmente.


Camudando'l Camín, satisfechu nel Corbellosu

jueves, 2 de diciembre de 2010

El Rollu (Mieres) - L'Escobín - Picu Gúa

28 de Payares de 2010

Track: El Rollu (Mieres) - L'Escobín - Picu Gúa



Nuevu día de montaña, nel que como ye vezu, dependemos dafechu del tiempu, poro ficimos lo que pudimos. La nuesa intención yera tirar pa Casu, a facer Peña Crespa, pero'l parte meteorolóxicu facíenos camudar de planes, ya que nun yera la primer vegada qu'esti monte facíanos dar la vuelta, y toi cansáu de que me torguen les mios intenciones.

Asína que dexámonos de preparativos, y nun cuartu d'hora (mientres trabayo) alcuentro una rutina, qu'a pesar de la cota de 300 ms de ñeve qu'albidraben, dibemos poder facer buelga con facilidá y ensín esmoliciones pol temporal. Pa ello, namái teníemos qu'averanos al traviés de l'autovía minera hasta Mieres del Camín, onde desayunamos con tranquilidá, ya que la ruta nun diba ser llarga y hasta dábanos tiempu a tornar a Xixón y xintar en casina.


Partiendo del Repitaneo

Magar del cafetín tiramos col coche a pillar la retonda, que nos diba meter na As-242 en direición al pueblu de La Rebollá, el cual travesamos siempre en xubida, pa dempués pasar pol Correor, Repitaneo y aparcaremos el coche en El Rollu. Nesti pueblu, vamos preparanos y baxar un ratín pela carretera hasta'l Repitaneo, onde tomaremos una pista a la manzorga.

Dicir que na entrada a la pista, tuviemos mirando si dexar o non el coche, pero la señal de prohibíu, pudo más que tol espaciu qu'habia. En fin, sacante d'esto entamamos a caleyar a 288 ms, y quiciás una decena de metros más arriba, apaecen pel cielu, los primeros trapos en cayer. Aciertu total de los metereólogos.


Primeros trapos que poquín a pocu diben a más

Como ya sabíemos a lo que veníemos, nun-y damos importancia, ye más dába-y guapura a la ruta, poro siguimos a bon pasu xubiendo pola pista, ganando-y altor a esta xerra de Fayéu, nes sos primeres cuestes.


Con ñeve abondo pel Acebal

Como yera d'asperar, cuanto más altor, más ñeve, colo que'l monte presta ainda más a cada pasu, y como nun fai fríu, un forru y un chubasqueru ye más que soficiente, pa dir selemente esfrutando de la ñeve recién cayíu embaxo los nuesos pies.

Una de les frases del día fue: ¡Tu antes molabas!, al ver que m'enfundaba cola ñeve'l gore tex que merqué fai pocu. Será que toi faciendome vieyu, pero h.odeme de fríu, con una "nevica yonki" na Cabeza Llombreras, fízome reflexionar... y me dixe hai que mercar daqué bono. Eso sí, yo poles térmiques nun pasu, sobretou cuando ties una caxón enteru enllenu camisetes d'algodón de marques montañeres como... white label, barceló, mahou,... Nun vamos cuspiar p'arriba...


Semeya ivernal bien guapa

Nestes rutes, da muncho pa falar de cualquier estupidez, asína que van pasando los kms baxo la nieve, hasta que daste cuenta que tas na parte cimera del monte, y toca entos entre antenes, cánceres producíes por elles, y demás milongues, crestiar de llomba en llomba, hasta la más alta, el picu L'Escobín de 713 ms y mayor cota del Conceyu d'Uviéu.


Picu L'Escobín (713 ms)

Nesti momentu, en tola ruta, ye la primera vegada, que pasamos fríu de verdá, ya que'l vientu daba una sensación térmica mui baxa, así qu'un pelín de turrón achocolatáu, dos traguinos d'augua y p'abaxo que nun s'aguantaba ellí. La verdá ye que yera tou positivu, hasta taba abriendo dalgo'l día, y entamábemos a ver dalguna vista d'Asturies ñeváo.

Quiciás dalgo en mi, picábame por dentro, ya que'l track que garrara pela rede siguía pel crestéu hasta dalguna llomba más alló. Sería'l friu'l que nun me fizo pensar, pero llevo tola selmana dando-y vueltes y güei púseme a buscar y caro, cien metros más alantre, tenía la segunda mayor cota d'Uviéu, el picu Berrubia o Peña Salve. Demientres toi escribiendo toi mordíendome la llingua, porque esto faime tornar a esta xerra de Fayéu, a finar mi última cota del conceyu carbayón. En fin, rabia..... por facer les rutes de priesa y corriendo y nun mirar los oxetivos y preparar la ruta como tien de ser. Tornaré... pero en bici meyor y dende otru valle, pa que paeza menos forzáu, jeje.


Tornando so los nuesos pasos

Escaeciendo les mios desgracies a lo postreru, baxamos de L'Escobín, y tornamos pelos nuesos pasos, demientres echamos una güeyada a la ñeve posao nel Aramo y demás vistes pa los conceyos de Mieres, Ayer, Casu, Llaviana,...


Paez que diba abriendo dalgo'l día

Asína pues, daremos vuelta pol mesmu camín pasando pola Campa'l Trave hasta aportar a un picachín enllenu d'antenes y una caseta de telecomunicaciones, el picu Picacho, y detrás garraremos un senderu en direición al caberu finxu del día, el Picu la Gúa.

Pasaremos pegaos al picu Piedras, nome que-y vien porque tien de cumal una montonera piedres, jeje, y lu veremos al fondu, con una ascensión bien cenciella, hasta qu'aportamos xusto delantre d'él, y vese un argayón impresionante qu'hubo. Una opción ye xubise con curiáu al traviés de l'argayu, con pies y manes de plomu, ya que menéase tou, como yo fice o da-y la vuelta al picu per una pista, hasta alcontrar la xubida pola otra cara.


Xubida al Picu La Gúa (663 ms)

Lo más normal y seguru, ye da-y la vuelta, lo cual ficieron tolos demás, demientres yo les esperaba nel vértice xeodésicu que-y da dalgo d'importancia a esta llomba de 663 ms. Sacamos la semeya de rigor, col temporal otra vegada enriba, y metémonos priesa pa baxar pol mesmu camín al El Rollu, onde dempués d'adecentanos un pelín, baxamos a Mieres a echar unes cañes merecíes.


Camudando'l Camín dende L'Escobín con turrón de chocolate y fríu

Nesta ruta ficimos un vértice xeodésicu de Llangréu y másima cota d'Uviéu: Picu L'Escobín (713 ms) y la tercer cota y vértice xeodésicu de Mieres: Picu Gúa (663 ms)

Ver progresos en: Retos montañeros