viernes, 24 de febrero de 2017

Castañeru Trail (Sobrescobiu)

15 de Xineru de 2017

Track: Castañeru Trail (Sobrescobiu)



Web del Trail: Castañeru Trail (Sobrescobiu)

Clasificaciones: Clasificaciones 2016  


Tornamos a les carreres magar de les folixes y fartures navidiegues y que meyor que tirar pa Sobrescobiu nel parque de Reres. Una vegada más, al igual que na Reres Trail, l'ayuntamientu d'esti conceyu y el pueblu de Rusecu vuélcase con otra carrera pel monte, faciendo perfácil esfrutar d'esti deporte.

Al igual qu'en tolos deportes al aire llibre, vas conociendo xente, primeru de vista y llueu ye mui prestoso alcontrase de carrera en carrera con ellos. Ye un deporte en plenu espoxigue y nun sabemos bien hasta onde podrá llegar, siempre y cuando, respéstese la ñatura que ye per onde nos movemos.

Toni na so primer carrera y Rubén del Asgaya Team

Pel momentu, tenemos carreres pa tolos gustos y dalgo mui importante, hai munches carreres de kilometraxe baxo que dan pié a que la xente pueda probar y enganchase. Nel día de güei, probaben con nosotros Toni que fizo perbona carrera y tamién Montse y Carlos, anque Montse ya ficiera carreres enantes.

De los de siempre, tenemos al Asgaya Team que ya son grupu formáu y llegalizáu con indumentaria propia y mui bon rollu nel equipu, colos que siempre ye un placer echar una cerveza dempués de cada carrera.

Alberto, yo y Miguel na parte alta onde esfrutamos de la ñeve

Tamién ye un placer alcontrase con Miguel, col que nes últimes carreres vamos coincidiendo y siempre ye un crack posando pa los fotógrafos. Nós, aparte de Toni y su debut, volvimos a ser Alberto y yo, faciendo caún la so carrera como ye vezu.

En cuanto a la carrera, pues comentar que ye una carrera guapísima siempre per viesca, pistes y senderos mui correnderos, con una xubida pindia pero apretable, poro ye'l ritmu'l que te va marcar el nivel de sufrimientu.

Illán del Asgaya Team y Montse y Carlos tamién probando esto de correr pel monte

Como en toles carreres curties d'estos tiempos, el ritmu inicial pasóme factura y sufrí en tola xubida al altu, pasándome muncha xente y llegando con males sensaciones. Llueu, recuperé na parte alta y na baxada pude tirar fuerte adelantando dalgunes d'eses posiciones.

Al final puestu 43, que si deprendiera a regulame nestos entamos de carrera pudiera meyorar, ya que que la carrera yera mui, mui correndera pero a la vegada con un toque montañeru xenial, lo cual ye mui d'agradecer anque seya tan cortina.

Camudando'l Camín a fueu pel agua

Como siempre, dar gracies a organizadores, voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Castañeru Redes Trail, Agus Camino, MV Foto, Capitán Pola....)

miércoles, 22 de febrero de 2017

Carcarosa (Mieres) - Picu Polio

14 de Xineru de 2017

Track: Carcarosa (Mieres) - Picu Polio


Un vienres cualesquiera a una hora cualesquiera, por exemplu a los dos de la mañana y con tres pintes de cerveza mínimu, decidimos Haritz y yo, salir a dar un paséu y pisar un pocu de ñeve, poro a eses hores de la madrugada póngome a buscar pa onde tirar.

Ya va tiempu que tenía pendiente xubir al Picu Polio en Mieres y sabiendo que pela fastera norte ye una mina a cielu abiertu, que meyor qu'aprovechar la ñevada pa ver esti monte estrozáu un pelín más guapu.

Partimos de Carcarosa (684 m) col día mediu orbayando

martes, 21 de febrero de 2017

Arnedillo (La Rioxa)

6 de Xineru de 2017

Segundu día de viaxe pela Rioxa, dempués del intensu primer día nel que conocimos Recuevas en Palenciay siguiéramos camín hasta Ezkarái, onde taríemos de vinos y dando una vueltina con unes temperatures realmente xélides.

Aportamos a Arnedillo onde'l Frontón llama con fuercia l'atención

Al día siguiente, madrugamos un pelín y metémonos una kilometrada fina, pa tar a primer hora n'Arnedo onde tenemos la maraviyosa idega d'entrar nel primer día de rebaxes nel Más por Menos, o lo que ye lo mesmu metese na boca'l llobu.

Averámonos al seutor del Colláu a facer dalguna viuca por pasar la tarde

Con tola mañana perdida pente mercar ropa montuna, playeros y demás, llegaremos a Arnedillo, col tiempu xustu de xubir a conocer la escuela enantes de que'l sol un día más escápese y les temperatures caigan pembaxo los 0 graos.

El sol cola ceo y nun queda otra qu'escapar d'ellí por mor del fríu

Xubiremos hasta'l Collado, onde malamente facemos unes 3 víes por dicir que tuviemos na escuela, baxando con abonda desgana a conocer les agües termales. Nun alarde de valentía, ponémonos el bañador y metémonos nes poces onde adormecemos nel calorín, espertando de sopitu namás que sacabes cualesquier parte del cuerpu del agua.

Camudando'l Camín caleciendo nes agües termales d'Arnedillo

Un día más, colamos con ganes de tar más tiempu nes escueles, pero bono ye lo qu'hai, los viaxes programaos de visites, dalgo de folixa y escalada dan pa lo que dan y en plenu iviernu, quédase un pelín curtiu.

Tiempu tendremos a preparar otru viaxe más calmao...

Arnedillo (Seutores visitaos)
Croquis modificaos por mi de la escuela d'escalada d'Arnedillo, por mor de Escalada en la Rioja II onde tan actualizaos seutores y croquis... les modificaciones va sobre'l primer llibru que podíase alcontrar pela rede. Munches gracies pol trabayu y col so permisu.

Recuevas (Palencia)

6 de Xineru de 2017

Con un tiempu fríu como casi nun m'alcuerdo, decidimos dir pasar el finde hasta Ezkarái. Ellí, tenemos agospiu por cuenta del collaciu Haritz, asina que día de reis, peros somos republicanos, día de fríu, pero esisten los plumes... tiramos p'alantre.

Pueblu de Gama... cola escuela homónima detrás y cola perguapa capiya

Como hai una tirada llarga hasta la Rioxa, ficimos una paradina en Palencia y más en concreto, en Gama, un pueblín, mui guapu hai que dicilo, cerquina de Aguilar de Campoó, onde faen les galletes y eses coses.

Caleyando hacia la foz col camín xeláu dafechu

Almorzaríemos con calma enantes en Reinosa, onde les cais taben dafechu xelaes y dempués ya tiramos hasta Gama. Esti pueblu, pequeñu pero con ciertu encantu y una capiya románica perinteresante, tien dos escueles d'escalada pegaes, Gama y Recuevas.

Hai llugares guapos pa esguilar y pasar el día y llueu ta esta foz

Nós, decidímonos por Recuevas y desficimos camín, un kilómetru hasta'l crucie onde sal la pista hacia la foz de Recuevas. El camín taba xeláu enforma, por mor de los -2 graos qu'habría a la solombra, menos mal qu'al solín tovía podía aguantase.

Toles orientaciones posibles... sol y solombra dependiendo la dómina del añu

Según vamos caleyando baxo los milenta seutores que tien esta escuela, vamos ablucando, ya que'l llugar ye guapísimu, tan sólo dar un paseín per esta foz ya paga la pena. Aún así, díbemos con ganes d'escalar un puquiñín, sin grandes pretensiones pero un puquiñín sí.

Zori y Richar dende riba... apretando un pocu

Al final, tiramos pal seutor Cuartos, onde efectivamente hai munchos cuartos, anque la roca como suel pasar nes foces formaes per ríos, ye un pocu pulída y pocu adherente y el grau ta pelín apretón, lo que nun quitó pa que toos esguilásemos hasta que la solombra nos alcanzó y nun había quien parara.

Y Richar dende baxo apretando munchísimu más jeje

Salimos a escape pa los parés d'enfrente onde sol tardaba menos en colar y ellí, nel seutor Sol de Invierno, tuvimos a gustu una horina más aproximáu, faciendo dos o tres víes más. La verdá ye que quedamos con munches ganes de pasar un día con más calma así qu'habrá que volver porque como mínimu el llugar ye precioso.

Recuevas
Croquis modificaos por mi de la escuela d'escalada de Recuevas, por mor de David Villegas y la Diputación de Palencia .Munches gracies pol trabayu y col so permisu.

sábado, 18 de febrero de 2017

Berodia (Cabrales)

26 d'Avientu de 2016

Finales d'añu... media raspia de bon tiempu y saliemos corriendo pa onde se pueda... y esta vegada podíase en Cabrales... y más en concretu... prestábanos tornar per Berodia. Namái que tuviera nesta escuela un día y cayéranos un tormentón pa colar pal coche y aún así prestar un montón.

Zori nel so primer quintu y un alemán esguilando cual Hobbit

Esta segunda vegada, apaecimos coles mesmes intenciones de siempre, siguir trabayando la escuela poquín a pocu de víes más cencielles a más complexes pero siempre cola tranquilidá de que munches visites tienen que venir nun futuru.

Orlando trepando col grupín del Xuan de la Borrina

A la fín, cayeron dalgunos quintos, dalgun sestu baxu y anduvimos apretando hasta'l 6b+ nos que siempre con una entrada durina, llueu había de navegase peles plaques y lluchales hasta'l final, quedando con un tastu a grandes víes en cotes un pelín más altes y con munches ganes de probar tolo que nos dea'l nuesu nivel.

Berodia (Seutores visitaos)

Croquis modificaos por mi de la escuela d'escalada de Cuevas de Mar, por mor del blogue  Entretenimiento Vertical. Gracies y col so permisu.



 -------------------------------------------------------------------------
 

jueves, 16 de febrero de 2017

Trail Villaviciosa (Villaviciosa) - Santolaya (Cabranes)

18 d'Avientu de 2016

Track: Trail Villaviciosa (Villaviciosa) - Santolaya (Cabranes)


Web del Trail: Trail Villaviciosa - Santolaya

Clasificaciones: Clasificaciones 2016  


Última carrera del añu, la cual afrontábemos nun estáu de forma estupendu, dempués de pasar poles Seronda Trails y la Blincapeñes de Suarías con mui bonos resultaos. Pa finar, tocaba quemar carbonilla nuna carrerina, que lloñe de nun tener que sufrise ya que tamos falando d'otra media maratón, ye con desniveles seles y la plizca d'emoción ponenla los ritmos.

A eso fuimos y namás entamar, salimos neutralizaos peles cais de la Villa, llevándonos el coche de la llocal a puntu de morrer pa los que somos de combustible diesel. Dicir que de los 23 km, los primeros 5 casi son pente carretera y bon camín llanos, corriéndose a unos ritmos altos.


Baxando hacia Peña Cabrera

Llueu, meterémonos hacia los molinos del Profundu, onde'l barru y un tarrén más quebrapates, va llevanos gayoléramente hacia la parte final del percorríu, onde xubiremos el desnivel a ganar pelos montes de Cabranes, con delles xubides pindies, alternándose con rápides baxaes.

Pasaré pelos avituallamientos pa garrar agua y siguiré disfrutando como nunca d'esta carrerina, mui, mui corrible y na que dempués de dexar a Alberto, namás que pasaré a otru corredor y ya tiraré tol tiempu solu, lo cual cada día préstame más, ya qu'agóbiame les carreres nes que vamos toos en grupu.

Bertín siempre saludando y poniendo bona cara

Namái que soi alcontrame con dalgún corredor más cerca de Peña Cabrera, pero nun soi a pillalo en dengún momentu y la verdá ye que dame pena, porque voi como nunca y quiciás esperé demasiáu tiempu pa tirar fuerte p'alantre... pero bono ye lo qu'hai, nun tolos díes se ta igual, nin tolos díes acertamos col plantegamientu.

Ensín más, voi averándome a Santolaya, pasando a dellos compañeros de la carrera curtia y entro nesti guapu pueblín, baxo los aplausos de los pocos habitantes que dignáronse a salir de casa. La verdá ye que da un pocu de penina ver el pueblu tan vacíu con un día soleyeru como taba.

Gus y Manu aguantando'l tirón estupendamente

Al final, entro na posición 15 que ye un resultáu brutal pa finar l'añu, anque quédome cola sensación de correr los 23 km a un ritmu de 5:39 y llegar a meta fresquín, pasándolo xenial, esfrutando de les viesques de Cabranes, de los molinos del Profundu y de tola carrera en xeneral.

Pa fin de folixa, unes cerveces, sidre y una xinta a cargo de la organización con fabada y arroz con llechi que taba de restallu. Asína, con una carrera tan prestosa, nun faltaré añu tres añu col envís de terminar corriendo a fueu y descansar unes selmanes. 

miércoles, 15 de febrero de 2017

Bueida (Quirós) - Puertu Güeria - La Cigacha - Puertu Ventana - Torbaniel.lu

11 d'Avientu de 2016

Track: Bueida (Quirós) - Puertu Güeria - Cigal.la - Puertu Ventana - Torbaniel.lu


Última ruta del añu 2016 del GM Xuan de la Borrina, pero por dalgún motivu cayóse de la convocatoria mediu mundiu y pensándolo bien, pa esta ruta qu'escoyimos en cuestión, casi que nos xuntamos muncha más xente... nun sé como podría acabar la cosa.

A la fín, allá que fuímos Haritz y yo, más Pepa y Jóse que tan finando tolos dosmiles del macizu de Penubina y venía-yos al pelo acompañamos a esta ruta. Ye más, Pepa posiblemente seya la primer muyer que faiga los 58 dosmiles lo que presta más tovía.

Digo que salimos de Bueida en Quirós, pero na realidá xubiremos colos coches dos kms alantre pela pista qu'aporta al Puertu Ventana pasando per Torbaniel.lu, hasta una curva a la mandrecha onde hai bon sitiu p'aparcar y que nómase Les Garrafes.

Salimos dende Les Garrafes (922 m) cerquina de Bueida

viernes, 10 de febrero de 2017

Pel.luno (Ayer)

5, 10 d'Avientu de 2016

Andamos pela puente d'Avientu d'escuela en escuela, con un tiempu que mete mieu y un par de díes decidimos tirar pa la fastera ayerana y pa la so escuela más conocía: Pel.luno. Toles vegaes qu'anduviera esguilando nella tuviera pa los Bloques y ya diba siendo hora de dir al paré cimeru.

Dende'l pueblu vese aina qu'aquello tien de ser una llocura por mor de la cantidá de víes equipaes y por dalgo-y llamen Oceano Sin Límite al seutor más baxo, porque abarca tola estensión de la muria que lo mesmu llega hasta los 400 m de llargura.

Ablucante'l seutor principal de Pel.luno
El primer día xuntámonos Haritz, Marie y yo, a los que súmense Vicen, Conchi y Celso que nun veía cuantayá, por mor d'una llesión de rodiella del guah.e esquiando, de la que ta totalmente recuperáu, pero vaya mala suerte a esa edá, con toles coses guapes que dómina: esquí, surf, escalada...

Entamamos polos quintinos de la manzorga y alcuéntrome qu'hai una reunión robada en Paradise, así qu'apúntome a la llibreta pa mercar material. Dicir qu'estes cosines, nun son gratis, la xente-yos pon del so dineru na mayoría los casos, asína que nun seáis tan fios de puta y respetái lo que ye pal bien de toos.

Marie apretando y yo con cuidadín col pié... nun vaya fadiame más

Equí hasta los quintinos son duros y ye qu'hai qu'apretar en toes, colo que mui cómodu nun toi col dolor del pié, asína que toca tomalo con calma y trepar lo que se pueda pero sin forzar. Vicen y Haritz, van sacando lo que-yos dexa la cabeza y el físicu y Marie va a su bola mientres l'aseguramos.

La máquina alemana, mira la llibreta, escueye, apunta y dispara, enchufando tolo que se-y pon per delantre. Da gusto vela trepar, con un grau tan asentáu, col que métese ensin mieu no que considera que debería sacar a vista y así lo fai con 6b+, 6c y siempre apretando y siempre motivada... un placer.

Reencuentru con Vicen y Marie a lo suyo... vaya titana

Al día siguiente, vamos preparaos más pa trabayar que pa trepar y dempués de tar tamién en Oceano Sin Límite, esguilando un par de quintinos, punxímonos a montar una reunión del V defenestráu per dalgún anormal.



Kíla esfrutando del paisaxe

Perdimos más tiempu que la hostia, porque nun había manera roscar bien el bolt, pero al final, fuimos a ello, a guelpe de maza (piedra) hasta que'l bolt esistente garró la rosca y apretó en condiciones la nueva chapa con argoya.


Nes vies cencielles de Oceano Sin Límite

Llueu disfrutamos d'unos cuantos 6a+, dalguno mui, mui potente y prestosu como Truhán y otros pelín más gafos, con pasos llargos de placa nos qu'hai qu'andar finu de pies. Fadríemos otres tres víes, quedando con ganes de meteme en graos más apretones porque la pinta de les víes son brutales, pero el pié nun me daba pa más... apoyos duros y sufrir dolor.

Xintáremos con calma y decidimos xubir a acabar el trabayu, hasta'l seutor Janis, que yo nun conocía y que dalguien marchara tamién con una reunión que facía imposible d'escalar tres víes de 6a. Paez ser que siempre-yos da por robar nos graos facilinos... ya podíen andar quitando descuelgues nos octavos.

Seutor Janis... guapu, guapu tamién

En fin, magar de trepar la vía con too colgando, reunión, llave y demás, a pesar del pasu bloqueru, aportamos a la reu y pudimos trabayar cola calma y dexar una reunión de cadena con argoya estupenda, pal usu y disfrute de tol mundiu y del mió bolsiellu... asína que nun vos pille robando perende que lo mesmu zampáis la llave del 10.

Hala... a trepar y a respetar

Pel.luno
Croquis modificaos por mi de la escuela d'escalada de Pel.luno, por mor de Piratas Free. Gracies y col so permisu.


-----------------------------------------------------------------------------------------------------------------