Track: Carcarosa (Mieres) - Picu Polio
Un vienres cualesquiera a una hora cualesquiera, por exemplu a los dos de la mañana y con tres pintes de cerveza mínimu, decidimos Haritz y yo, salir a dar un paséu y pisar un pocu de ñeve, poro a eses hores de la madrugada póngome a buscar pa onde tirar.
Ya va tiempu que tenía pendiente xubir al Picu Polio en Mieres y sabiendo que pela fastera norte ye una mina a cielu abiertu, que meyor qu'aprovechar la ñevada pa ver esti monte estrozáu un pelín más guapu.
Partimos de Carcarosa (684 m) col día mediu orbayando
D'esti xeitu, con dalgo de resaca, plantámonos con Kíla en Carcarosa pocu enantes de les diez de la mañana. Aportaremos a esti pueblu dende Xixón, col camín davezu pela minera hasta Mieres del Camín, pa siguir per Figareo hacia'l Val.le Turón, pasando pelos pueblos de Peñule, Cortina, Cauxal, Turón, El Llegu y La Rebaldana onde desviámonos hasta Carcarosa.
Ponémonos les botes de ñeve, sacamos a Kilina qu'andaba nerviosona nel coche y pa cuando tamos preparaos pa echar a andar pela carretera, avérasenos un paisanu y entrúganos si vamos pal Polio, empobinándonos per dellos caleyos del pueblu y diciendo que si siguimos esos caminos nun raspiamos res d'asfaltu.
Avanzamos per guapos caminos qu'ameyoren cola ñeve recién cayía
Facémos-y casu y salimos per unes escaleruques, pasando per estreches caleyes hasta salir a la parte alta'l pueblu, onde garramos una amplia pista la cual va tapecíendose según vamos ganando altor con un mantu blancu de ñeve reciente.
El día ta murniu y salimos casi orbayando de Carcarosa, pero nun tira l'aire y el fríu aguántase perbien, poro facemos camín apriesa pente'l barru y la ñeve sorprendiéndonos la guapu del camín que vamos conociendo trespasando una viesca autótona.
Siguimos esfrutando del atristayáu paisaxe demientres ñévanos penriba
Pocu a pocu vamos vamos dexando tolos caminos que tiren a la mandrecha y cuando nos damos cuenta tamos cerquino de la carretera, poro garramos un senderín p'alloñanos del asfaltu y alcontrarémonos con uno de los tramos más guapos del día, trapiando ensin xacíu demientres caleyamos hacia la Candanosa.
Kíla va esfrutando como poques vegaes ya que nunca nun viera ñevar en direutu y nós vamos que nun entramos en nós de la suerte que tenemos, pudiendo esfrutar d'una guapa ñevada que cubre árboles, cabañes, sebes, muries y tolo que vamos alcontrando nel nuesu pasu.
Salimos de la viesca pa facer el tramu final hasta'l Picu Polio
Cuando queremos danos cuenta, salimos de la viesca y tamos en tarrén de monte baxu, con tola faldera del picu Polio enllena de cotoyes. Con esti panorama, intentamos siguir la sienda más visible, anque ello llévonos a entrá-y al cumal pela mandrecha envede pela manzorga que yera la nuesa intención.
Cume nel Picu Polio (1052 m)
Nun-y damos mayor importancia y aportamos al colláu baxo'l picu'l Gumial, p'averanos a unos pinos y facer l'últimu tramu con ñeve pelos todiellos hasta los 1052 m del picu Polio, onde taremos un ratín esperando a ver si acaba d'amagar les ñubes y abre pa tener dalguna vista.
Nun va ser así y un vientu xeláu anímanos a escapar del Polio, si nun queremos acabar como'l vértice xeodésicu, poro siguimos camín hacia'l colláu del que viniéramos, col envís de siguir alantre hasta'l picu La Faya, onde buscaremos descensu hacia'l norte.
Descendemos del Polio hacia Carcarosa con calma
Alcontrarémoslo per unos praos, ya si siquimos de frente tendremos dellos cortes de mina y muncha cotoya. Magar de descender tolos praos con bona capa de ñeve, finamos por topar una pista de la mina pela qu'avanzaremos sin problemes hasta'l colláu de la Mofosa, onde decidimos descender hacia Carcarosa de nuevu.
Pasamos peles cabañes de Felgueres saludando a dellos collacios
Teníemnos pensáu siguir caleyando un pocu más pa conocer dalgún montuco más y tachar dalgún vértice pero la ñube métese enforma y quítanos les ganes de siguir alantre, contando amás que pa lo malo que taba casi nun tábemos nin moyaos... yera hora de colar.
Siguiremos el cartelo qu'anuncia camín hacia Carcarosa y dempués de pasar peles cabañes de Felgueres, alcontrarémonos penriba de Carcarosa en tres cuartos d'hora y baxo una lluvia pelín más gafienta, lo qu'amuésanos qu'al menos acertamos colo de cortar la ruta nel momentu xustu.
Tornamos de vuelta a Carcarosa
Pocos minutos más tarde de les doce de la mañana tábemos de vuelta nel coche dempués de caleyar durante malpenes 2 hores y media, faciendo unos 6,7 km y superando 465 m de desnivel acumuláu, qu'anque nun fué pa morise d'esfuerzu, dionos pa salir a dar una vueltina, esfrutar del paisaxe ñevao y ver a Kíla pasarlo en grande.
Amás... ficímos ganes pa dir tomar el vermú per Xixón... así qu'ensín pensalo colamos de Carcarosa sin que nos dieran la yerba en Polio y sin casanos, pero con ganes de volver pa entrenar un pocu ya que vi mui afayaizos estos caleyos y montes pa correr.
Camudando'l Camín revolcándose en Mieres
No hay comentarios:
Publicar un comentario