viernes, 3 de marzo de 2017

Bermiego (Quirós) - L.lampaza - Pelitrón

21 de Xineru de 2017

Track: Bermiego (Quirós) - L.lampaza - Pelitrón


Estrenamos l'añu 2017 col GM Xuan de la Borrina con una ruta cenciella, pa qu'esos cuerpos vayan espulsando tola morralla de fartures de les fiestes navidiegues. Pa ello, ya andaba yo con ganes d'entamar daqué dende'l pueblu quirosanu de Bermiego.

Nomáu, pol so texu milenariu, aportamos a esti pueblu pel camín davezu dende Xixón, garrando l'autovía Y griega hasta Uviéu, onde siguimos pela A-64 hasta'l desvíu de los valles del Trubia, que tantes vegaes garré na mió vida pa dir esguilar y de monte.

Partimos de Bermiego (764 m)

Perpasaremos los conceyos d'Uviéu, Santu Adrianu, Pruaza y entraremos en Quirós pel banzáu de Valemurio, pasando del llau de pueblos como las Agüeras, Cortina, saliéndonos a l'altor de La Vigutierre nel desvíu a la manzorga que xube hasta'l nuesu destín: Bermiego.

Mudarémonos de ropa, a la solombra y con unes temperatures bien baxes, pa salir caleyando cuanto antes hacia la parte alta del pueblu, pero siempre empobinándonos a la manzorga. Ello, fadrános pasar pela Bobia y el Carneiro en tranquila xubida y per camín anchu hasta alcontranos un senderín a la manzorga pel que tendremos de salir, xustu nel Fandanal.

Caleyamos en sele descensu empobinándonos hacia'l Picu La L.lampaza

El senderu ye evidente y sabremos que vamos en bona direición, tan sólo con dir averándonos a la amplia canal pente La L.lampaza y la Pena L'Alba. Nun tien mayor pérdida, sicasí tenemos hasta h.itos y delles marques enantes de sentir una riega que baxa con bona agua.

Enantes de cruciala, bordiamos un pelín a la manzorga pente árboles pa perpasala penriba y vamos pegándonos a la manzorga de la canal, siempre a la gueta del meyor camín, anque realidá ta marcáu en tou momentu.

Superamos la canal con bona pendiente hasta L'Alberu

La canal, sacante dalgún pasín nel qu'apoyar les manes, sólo ties tarrén pindiu y esfrute total, polo guapo de l'ascensión y poles vistes destacando pel momentu, los cordales de Caranga y el del Gurrión que tan bonos momentos ficiéronmos pasar.

Aportaremos pali pali al colláu de L'Alberu (bona referencia de llugar de carga de ñeve) onde esperamos a reunificanos dempués d'un pasín pente un paré y una aguya preciosu. Llueu con vistes al macizu de Penubina ñevao y a la Pena L'Alba siguiremos al primer destín del día: el picu la L.lampaza.

Ascensión contina hacia'l picu La L.lampaza

La xente va gayolera y yo tamién, diba cola cosa del fríu, del posible xelu, pero por suerte na canal nun alcontramos ñeve y agora na L.lampaza (terrenu pindiu y cuestu) la ñeve caltiense en bon estáu y vamos superando desnivel ensin muncho esfuerzu.



Demientres voi abriendo buelga, echo una güeyada a los cumales d'enredeor como'l Gamoniteiru y sobretou, el Moncuevu, monte más guapu de L'Aramo. Ensin mayores dificultaes, namás que llevar el pasu y nun arimase muncho a los cortaos, aportaremos a los 1468 m de la L.lampaza.

Semeya de grupu nel picu La L.lampaza (1468 m)

Dempués de superar 300 m de desnivel dende L'Alberu y encumar, lo siguiente yera baxar un pocu más y crestiar hasta'l picu más altu de la xornada: El Pelitrón. Pero enantes, descendimos hasta'l colláu L'Ortigal y decidimos parar a xintar ya que tábemos nun momentu soleyeru y asitiaos nun prau, poro bien pagaba la pena aprovechar.

Descensu de la L.lampaza hasta'l mayáu L'Ortigal (1429 m)

Magar del descansu, tornaremos a caleyar con cierta galbana y ye que nun soi mui dao a facer descansos hasta dempués d'aportar normalmente al puntu más altu del día, pa llueu facer la baxada con calma, pero con esti día tan prestoso yera imposible nun dexase llevar.

Xubimos en fila hasta'l picu Pelitrón

Aún así, fuimos a calecer motores y con un pocu esfuerzu y dir alcontrando'l meyor camín pente un amiestu de peña y ñeve, caún al so ritmu fue faciendo esta otra llampa final hasta encumar los 1572 m del picu Pelitrón.

Cumal del Pelitrón (1572 m)

Con un día fríu pero espeutacular, despedímonos del cordal de L'Aramo y saludamos al pueblu de Bermiego qu'a vista de páxaru daba ganes de tener un parapente y baxar nun ratín. Pero como nun somos d'esos del traxe d'ales nin na asemeyáu, entamamos el descensu col tramu más abegosu del día, por mor del xelu nesta fastera norte del Pelitrón.

Descendemos pel Trichoriu hacia'l Cagal.luneiru

Pasáu'l descensu del Pelitrón, el tema meyoraba muncho y caminábase con tranquilidá pel Trichoriu pa finar descendiendo hasta'l Cagal.loneiru onde tendríemos a tiru'l colláu nel que restolar un senderín que nos baxare hacia les brañes d'enriba de Bermiego.

Restolamos pente la peña y el gorbizu los meyores senderos

Alcontrarémoslo como meyor podemos, anque aprovecharemos les fasteres más ñevaes pa baxar a pinchu per esta pindia faldera nomada como'l Moratín, desdexando quiciás dalgún sender más evidente que llevaríanos hasta la Braña de Llinares.

Con vistes a los picos recién visitaos desdendemos pela braña Les Canales

Como dixe, baxamos más a fueu y aportaremos a los praos d'enriba de la braña Les Canales, pa baxar per un fondu camín qu'enriégase primeru pa zarrase dempués, desviándonos la mayor parte'l grupu per un prau, cruciándolo hasta la pista que vien de Llinares.

Per pista cómodamente y con vistes guapísimes aportamos a Bermiego

Una vegada que temos na pista, nun tendremos mayores problemes qu'esfrutar de les vistes hacia'l macizu de Penubina destacando como non, la Pena Ruea, nun estáu de blancura perfeuta, anque nesti añu de ñeves escoses pocu-y diba durar.

En resume, ruta perfeuta pa forzar una preciosa ivernal si les condiciones fueren más estremes, pero a nós valiónos enforma pa que tol grupu pudiera tener un día fríu pero de sol y vistes ablucantes. Como pago... namás que 8,5 km, 900 m de desnivel acumuláu y 5 hores y media de caminar seliquino.

Camudando'l Camín nun sueñu fríu d'iviernu

No hay comentarios:

Publicar un comentario en la entrada