H.itu d'Escarandi (Cabrales) - Picu Valdemingueru

21 de Marzu de 2010

Track: H.itu d'Escarandi (Cabrales) - Picu Valdemingueru

Primer ruta nel macizu oriental de Picos d'Europa o Andara, y como non, diba ser colos nuesos collacios del Baskonia Mendi Taldea de Basauri, a los que-yos quiero agradecer dende l'entamu la so amistá y los bonos momentos que pasamos nesta, pol momentu, mi meyor ruta de montaña.

Ensín la so esperiencia de munchos años peles montañes, nin Diego Pangua nin yo, únicos miembros del GM Xuan de la Borrina que fuimos, fadríamos cume nun picu d'estes carauterístiques y menos cola cantidá de ñeve que tuvimos durante l'ascensión.

Gracies (Fernan, Tito, Vítor y sobretoo Josean y Bea) por rellumar ilusión na montaña y ser un exemplu pa nós en tou momentu.

Como yera d'esperar, el madrugón taba afitáu pola hora y cuartu de coche dende Xixón a Arenas de Cabrales, onde tomaríamos el cafetín de turnu. Como siempre, garramos l'autovía del Cantábricu hasta Posada de Llanes onde tomaremos direición a Cabrales al traviés del Altu d'Ortigueru, y ya baxar a los pueblos de Canales, Carreña, Poo y a la fin Arenas de Cabrales.

Partiendo del H.itu d'Escarandi

Dempués d'un desayunu, salimos hacia'l pueblu cabraliegu de Sotres, y travesámoslo pa siguir por una pista descarnada hasta la llende con Cantabria, el H.itu d'Escarandi a 1296 ms d'altor. Ellí, nel so parking, preparámonos pa una ruta llarga y cargada de ñeve, poro les polaínes y hasta unes raquetes taríen más que xustificáes. Anque nel nuesu casu, dibemos preparaos de crampones y piolé, pero non de raquetes, y nel miu en concretu, estrenaba botes nueves, a les que-yos debo muncho nesta ruta.

Un de les coses más prestoses d'esta ruta ye poder dividir claramente la ruta en 4 partes, que nos dan el descansu y posterior xubida de nivel de dificultá, según vamos faciendo una y llueu otra. La primera llévanos del H.itu hasta'l Refuxu d'Ándara tamién nomáu Casetón d'Ándara (1712 ms), tou ello, al traviés d'una pista bien marcada, qu'hasta con ñeve faise fácil de siguir.

Xubiendo al Refuxu d'Ándara

Darréu de xintar dalguna gochada montañera, siempre con chocolate, jeje, siguimos ya con un mantu ñeve, que fai imposible saber si hai pista o non, asína que dexámonos "guiyar" pol bon facer de los nuesos collacios vascos, y xubimos al colláu de l'Aldea, pa dempués emponinanos a la drecha metíendonos no que se noma'l Pozu d'Ándara.

Agüeyando les parés que nos rodeen nel Pozu d'Andara

Quedase embobáu güeyando les parés que mos arrodien nun ye nada difícil, asina que, con esa escusa, descansamos un pelín y siguimos andar, durante bon trechu, calteniendo l'altor pasando pola mayada del Redondal, xusto enantes d'entamar a xubir dexando'l Llagu de Valdemingueru a la nuesa mandrecha. Nesti momentu, tamos dando-y preste a lo que vien ser, la segunda parte de la ruta, la cual danos una vuelta tuerca de dureza, al tener qu'abrir buelga, hacia un colláu enriba de Los Valleh.ucos.

Abriendo buelga hacia'l colláu de los Valleh.ucos

Nesti colláu a 2008 ms d'altor tenemos qu'echar un tiempín camentando cuala ye la meyor ruta a siguir: si arrodiar la fondonada que tenemos ente nós y nuesu siguiente finxu, el colláu Valdemingueru, o baxar al h.ou Llerosu y xubir pola cara norte direutamente. Sinceramente, baxar nesti momentu, nun yera lo más prestoso, pero los argayos de ñeve, que teníemos que travesar nun yeren mui apetecibles tampoco.

Sufriendo un pelín más hacia'l colláu Valdemingueru

Finalmente, decidimos nun baxar al h.ou, y dir abriendo camín, poquín a pocu y con curiáu por tola lladera, ensín perder altor. Quiciás esta foi la parte más guapa de la ruta, teniendo qu'abrir buelga, comprobando los distintos tipos de ñeve, ya que por momentos, tenía capa xelu, y notros afondaba la pata hasta'l cadril. Tener la oportunidá de facer una ruta con xente esperimentada y deprender d'ellos ye un verdaderu placer.

Paez que l'oxetivu dexabase ver al fin

Particularmente tuvi'l "bon tastu" d'abrir parte de la xubida a ambos collaos y a pesar de la dureza, cuando llegues arriba frayáu, cualquier pallabra de gratitú y de bon trabayu, ye más de lo que necesítase, pa siguir hasta onde faiga falta.

Descansu cortu nel colláu Valdemingueru enantes d'entamar l'ascensión final

Una vegada que tamos al fin nel Colláu Valdemingueru (2140 ms), tenemos la cresta'l picu a los nuesos pies, poro ponémonos manos a la obra, anque la ñebla y el tiempu nun mos diese demasiada tregua, la verdá. De primeres pensamos en llibrar la paré frontal pola mandrecha, pero pisar pola ñeve de cerca les peñes nun yera lo más seguro, poro namái que vimos la oportunidá de trepar na roca, nun perdimos un segundu y ganamos-y pasín a pasu y man a man metros al picu Valdemingueru.

Trepando pela cresta hasta la cume con Fernan y Pangua

Los primeros en facer cume fuimos Fernan, Pangua y yo, viendo al pocu como'l nuesu Xuan de la Borrina, diba concedenos el cielu azul y les ablucantes vistes de tol Macizu d'Andara, y de los Urrieles, asína de poder sacar semeyes de los nuesos collacios na xubida a esti hermosu picu de 2271 ms.

Ablucante semeya de la cresta y los campos de Valdemingueru al fondu

Cuatru hores y media dempués, tábemos toos na cume, esfrutando de les meyores vistes que se puen tener, y na meyor compaña posible. Si digo que foi la meyor ruta que fice nunca, y cola que más feliz me pude sentir al llegar al coche, solo empaña, les ganes que tengo de siguir conociendo llugares, montañes, paisaxes y vistes, que superen lo d'esti día.

Semeya de grupu na cume del Valdemingueru (2271 ms)



Semeyes col día espeyáu a la fin:
Cuetu Teh.au, Campos de Valdemingueru, Macizu d'Andara y Los Urrieles

Dempués d'abriganos, ya qu'arriba facía rasca, ponémonos a baxar con xeitu ya que la baxada ye pelín complicada na parte de destrepe pola roca, tando esta pelín rota, poro estremar los agarres ye más que necesariu. Ya na ñeve, pue baxáse como tien de ser, o facer el gañán como un servidor, quiciás col xacíu de quita-y estrés a los momentos anteriores.

Como se debe descender y como non, jeje


Xintando col Valdemingueru enriba nuesa

Pocu más tengo que cuntar de la vuelta, ya que foi lo más rápidu posible, tando sollertes de les hores diurnes que nos quedaben, y que fízose pol mesmu camín, aprovechando la buelga abierta na ida. Simplemente dexo semeyes qu'amuesen la belleza de los paisaxes d'esti macizu d'Andara, el cual ye'l más encomendable pa foguease nos picos d'Europa.

Semeyes d'Andara durante la baxada

Finalmente, aportamos al H.itu de vuelta, poco más tarde de les 7 de la tarde, con casi 9 hores de camín, 14 kms y mediu andaos, 977 ms de desnivel direutu, y más de 1000 d'acumuláu contando tan solo l'ascensión, de la cual vos dexo'l track como siempre.

Voi dedicar esta entrada al mio collaciu Fernan, qu'aparte d'entrar nel nuesu Grupu Montaña Xuan de la Borrina, él foi quien propuso esta ruta y la fizo posible, como de xuru, va facer posible munches más en xuntanza astur-vasca. Gracies Fernan y afáyate nel grupu, que ye'l tuyu.

Camudando'l Camín con Fernan, nuevu miembru de GM Xuan de la Borrina

Nesta ruta di preste a un 2000 de Cabrales y a ún de los picos del club 111 de Picos: Picu Valdemingueru de 2271 ms.
Ver progresos en: Retos montañeros

Seroiro (Ibias) - Pico da Golada - Dolmen de Seroiro

14 de Marzu de 2010

Track: Ruta del Dolmen de Seroiro - Pico da Golada

Por primer vegada avérome a la fastera ocidental d'Asturies y más en concretu, a la llende pente los conceyos de Cangas del Narcea ya Ibias. Pa ello, madrugamos enforma y salimos de Xixón so les 7 y media de la mañana, arribando a Cangas dempués de facer ruta pola costa, hasta Sotu'l Barcu, onde nos salimos de l'autovía hacia Pravia, pa siguir hasta Cornellana, onde garraremos la carretera que nos empobinará hacia'l conceyu del Narcea.

Dempués d'hora y picu de conducir, paramos poco más alantre de la capital, pa mercar pan y tomar un cafetín na cafetería qu'hai na panadería del pueblu de Pinl.lés. Dicir qu'eiquí quedáramos Simón y yo, col otru miembru del grupu, Pangua, que fadría'l total de la escursión.

Con dalgo más de fuercies pa siguir, conducimos en direición al puertu del Pozu de las Muchieres Muertas que pocu o nada tien que ver con muyeres, como se puede ver nel so significáu toponímicu: ¿Muchieres Muertas? Paez graciosu, pero ye lo que tien castellanizar lo que nun se tien por qué?

Total, qu'otros 45 minutos de coche, pasando polos pueblos cangueses de La Riela, Yema, Veiga, Tremáu del Coutu, Auguera, Veigadhorru y Monesteriu hasta facer puertu, y entamar a baxar hasta'l cruce de Folgueiras da Viouga, un par de kms enantes de Seroiro, ya nel conceyu d'Ibias.

Entamu de la ruta col Chao del Rozo detrás

 

Como podéis agüeyar, dende Xixón ye un pelín de paliza llegar, pero paga la pena, porque nun día espeyáu como tuvimos, les vistes de los valles ocidentales son increibles, al igual que de les últimes estribaciones del cordal cantábricu. Asína, que dempués d'aparar el coche al llau de la pista que sal hacia Folgueiras y preparase pa la ñeve qu'acolumbrábemos nos altores, garramos esa mesma pista, pa visitar el pueblu semiabandonáu del regueiru da Viouga.

Folgueiras da Viouga

Ellí podremos, observar dellos horros con simboloxía inda bien cuidada y toles cases de teyáu de llosa de pizarra, fináos de forma peculiar zarrando a dos agües cruciando les lloses. Caleyaremos peles sos cais, hasta tornar a salir a la carretera, onde dempués de travesala, tomaremos una pista, que continúa l'ascensu que ya entamáremos na cota más baxa de la ruta, Folgueiras (582 ms).

Detalles del ocidente astur: Teyáu de pizarra y flores d'agua nos horros

Namái que vamos ganando altor, podemos esfrutar de mui bones vistes de los valles d'Ibias y de parte de Galiza más al fondu. Hai que dicir que tuvimos muncha suerte por momentos col día, ya que la ñevada de la nueche anterior, fizo muncho más divertida la ruta, viendo como al dir xubiendo de cota, alcontrábemos más ñeve nel camín.

Haxa Salú, col Valledor detrás

Siguimos pola pista ensín pérda, hasta llegar a la Fonte del Galo, que sigún diz la tradición: bien averáo alcontrábase la Fonte da Pita; manando agua frío de la primer fonte y de la segunda, agua calecio. Pocu dempués, tomamos ya direición a un colláu, xubiendo per un pedreru cuanto menos ablucante, pola so estensión, y nel nuesu casu, pola cantidá de ñeve que tenía.

Ablucante pedreru na xubida a la braña de Folgueiras

Hai que dicir, que nesti puntu, zarrósenos el día, y tábemos pasando un fríu perimportante, poro aumentamos pasu, y encomendámonos a Xuan de la Borrina, porque'l sol ya facía tiempu que nun lo veíamos. Darréu que llegamos al colláu, pudimos ver la braña de Folgueiras a unos 1300 ms d'altor y dempués de tomar dalgo d'alimentu y sacar dalguna semeyuca, aniciamos l'ascensión al Rozo, con ñeve abondo baxo los nuesos pies.

Cruce de caminos na Braña de Folgueiras


N'ascensión al Chao del Rozo

Sin mayor dificultá, que'l fríu y el desnivel que tábemos ganando, llegamos al Altu'l Rozo (1390 ms), onde tuvimos unes vistes privilexiáes de los Ancares, ya que teníemos suerte y taba abriendo'l día.

Nel Altu'l Rozo colos Ancares a nueses espaldes

D'equí al vértice xeodésicu que copa'l Pico da Golada, nun mos quedaba práuticamente res, poro xubimos a facer les semeyes de rigor y porque non, a pasar un pocu más de fríu, si cabía, que va ser que si. La cume nun ye más qu'otru pedreru, pero ta bien xubir, pa poder acolumbrar en redondu toles vistes bien merecíes: Los Puertos, valles de Cangas, Muniel.los, Tormaleo, Os Ancares,...

Papando bon fríu nel Pico da Golada (1420 ms)


Vistes del ocidente astur

Nesti momentu, decidimos, baxar un poco más na nuesa ruta, hasta atopar un sitín resguardáu pa xintar onde asoleyar un pelín, y alcontrámoslo, no que se llama la Fonte de Laméi, que fae cruce ente la nuesa baxada, y la pista que vien de la Braña Pedrosos. Dempués de la xinta, con pan de Pinl.lés, empobinámonos hacia'l final de la ruta, cola visita al pueblu de Seroiro y al so dolmen funerariu.

L'últimu alcontrámoslo dempués d'una baxada bien pindia, que nos dexa nuna viesca, na qu'hai qu'andase con curiáu pa nun perdese, y una vegada que la damos por cruciada, alcontraremos una pista con cartelu, que mos obliga a tomar un senderu hasta alcontrar el famosu dolmen.

Dolmen de Seroiro

Nun tengo muncho que comentar, porque nun entiendo demasiáu y tampoco ye que seya una cosa espeutacular, pero-y da un toque más d'atención a la ruta en sí, y fae que sea más interesante. Tornaremos pel mesmu camín, y garraremos la pista hacia Seroiro, pasando un calor importante, y cola sensación de pasar durante'l día, d'una nevera a un fornu, sigún xubimos per una vertiente del monte y baxamos pola otra.

Seroiro y detalle d'horru en Seroiro

Pocu más de caleyar mos quedaba hasta ver debaxo nuesa'l pueblu de Seroiro, el cual travesamos pente delles caleyes, que si non somos a escoyer bien, zamparemos carretera durante casi un par de kms cuesta riba hasta'l cruce onde dexáramos el coche.

Camudando'l Camín nel ocidente astur

En resumen, dicir que foi un gran placer visitar estos conceyos ocidentales, conocer los sos montes, pueblos y sobretou carreteres, jeje, y que nun va ser la cabera vegada que pisemos estes tierres asturianes. Al final, foron poco más de 4 hores de ruta en 14 kms, salvando un desnivel continuu de 835 ms, dende Folgueiras da Viouga y al Pico da Golada.

Nesta ruta ficimos ún de los vértices xeodésicos d'Ibias: Pico da Golada de 1420 ms.Ver progresos en: Retos montañeros

Poncebos (Cabrales) - Senda del Cares - Caín (Valdión)

7 de Marzu de 2010

Track: Senda del Cares (Poncebos - Caín)

Dempués d'un mes, d'inclemencies meteorolóxiques, con cicloxénesis engañosa (n'asturies) y too, a la fin pudimos facer una ruta, nesti casu de senderismu, pero qu'a la fin, camiento que foi bien prestosa y que sirvió pa recuperar delles sensaciones y munches idegues p'albidrar nueves rutes.

Esta vegada'l nuesu destín yera Poncebos en Cabrales, d'au sal la mítica Senda del Cares qu'aporta entre ablucantes parés, gargantes, caídes y sobretoo unes impresionantes vistes, al pueblu llionés de Caín. Pa ello, garramos bien prontín l'autovía del cantábricu, saliéndonos nel pueblu llaniscu de Posada, y d'él xubir al Altu d'Ortigueru, onde baxaremos ya pol conceyu de Cabrales, pa travesar los pueblos de Canales, Carreña, Poo y Arenas.

Semeya d'entamu de ruta en Poncebos

En Arenas, como non, paramos a tomar el típicu cafetín y pinchu nel café Cares, mui afayaizu pa la nuesa ruta, y nel que siempre ye un placer pol ambiente montañeru que respira. Ensín muncho parar, xubimos el pocu trechu qu'hai ente Arenas y Poncebos y dempués de preparanos, entamamos a caleyar poco enantes de les diez de la mañana.

En Los Collaos garrando ritmu y l'argayón d'esti iviernu

Ún de les coses que quiciás más nos prestó foi la llimpieza con que nos atopamos tola senda, al contrariu de les alcordances de dalgunos de nós siendo neños. Tará concenciándose la xente?? Espero que sí. El respetu pola ñatura ye dalgo imprescindible y el que nun lo crea asína, solo tien que ver les últimes catástrofes asocedíes, que dan a pensar nuna rebelión del propiu planeta.

Cola Peña'l H.ultayu detrás ya algamada por dalgunos

Dempués d'esta paya mental ecoloxista, dicir qu'otra cosa de la que pudimos esfrutar, foi de la propia tranquilidá, de non alcontrar más de 6 o 7 persones en tola ruta, de caleyar ensín perda, ensín tar atentos a la propia ruta, tan solo güeyando los picos enriba nuesa, o lo fondo del riu Cares debaxo nuesa o les parés que nos diben pretando o soltando sigún dibemos dando pasu.

Peña'l H.ultayu y Peñasanta de Castiella

Camiento que poques vegaes dalguien podrá facer esto nesta ruta, masificada pol branu, hasta'l puntu, de ser noticia un argayu en Los Collaos, el cual podría dexar ensín turismu (y sin perres) a muncha xente d'esti conceyu. Eso sí, en cinco díes taba amañáu con una escalerina de piedra y un montón de formigón, pa que la xente puea pasar en tacones y con carrinos de neñu.

Pangua y Simón cola garganta al fondu

Benditu turismu pal país asturianu. A ello nos empobinó la política "asturiana" durante tolos años que lleven nel poder. Ties dos opciones si vives nun pueblu oriental u ocidental: emigrar al centru d'Asturies o vivir del turismu. Tu escueyes, ya qu'interesa tenenos a toos bien apetiguñaos nel centru y dexar ermes les ales d'Asturies, escaeciendo'l mediu rural.

Un arcón na paré, caprichos de la naturaleza

Nesta primer parte de la ruta, ye onde xúbese dalgo de altitú pero nun ye casi nomable, namái una anéudota nun caleyar sele y fácil, qu'anima más a falar de les coses de la selmana de caún, que de la propia ruta y la so dificultá, lo cual de xemes en cuando ye un bien necesariu.

Ye lo que tien estes rutes, dan pa falar abondo

Poco más alantre fadremos un descansín, n'El Culiembru, onde hai pasu, hacia ambos macizos, xubiendo pal Cornión pola canal del Culiembru o hacia los Urrieles pola difícil canal del Agua con un preciosu pasu sol Cares, al traviés de la Ponte Vieya, la cual acolumbramos mui abaxo nuesa.

N'El Culiembru con ún de les poques persones qu'alcontramos


La ponte vieya, pasu hacia la canal del agua

Podríemos dicir qu'esta braña d'El Culiembru ye la metá de la ruta, y a partir d'eiquí entama a facese más arrequexada la ruta, coles parés más xuntes, pasos al traviés de furaos na peña, muncho más vistosos y pontes de fierru (ponte'l Bolín y los Robezos) que dan seguridá, pero que suponemos que les anteriores nun lo daríen tanto.

Siguimos camín pelos requexos de la senda

Una cosa enconmendable totalmente, si nun se tien vértigu, ye arimase, siempre con curiáu, y mirar pal fondu, la caída ye en dellos sitios respigante y l'agua azul-verdoso d'embaxu ye ún de les cosees más guapes y máxiques d'esta ruta.

Namái que pasamos la presuca, que sostién l'agua que lleva'l canal d'agües rápides hacia Poncebos, ábrensen les parés pa danos pasu al pueblu de Caín, llugar de nacencia d'un de los primeros paisanos que xubieron al Picu Urriellu, el Cainejo.

A la fin en Caín, dimpuestos a xintar

Con unes ganes más que xostificaes de xintar, ya que diéramos preste a tola senda en dalgo menos de 3 hores, dimos-y al bocata col ríu Cares al nuesu llao. Él ye'l cimeru protagonista de qu'esista esta senda, la so fuerza y puxu, ye la qu'esculpe les dures peñes dando forma a les parés que corten en dos macizos dixebraos al Cornion y los Urrieles.

El ríu Cares en Caín

Col tiempu dalgo amenazante, quitamos la fame rápidamente, ya que'l fríu entamaba a ser importante y con un cafetín nun albergue con mui bona pinta, garramos camín de vuelta a bon ritmu faciendo tola senda en tan solo 2 hores y cuartu, ya que la ñebla y probáblemente la ñeve taba baxando pocu a pocu.

Pocu más tengo que comentar d'esta perconocía ruta, el que nun la conoza ye más que recomendable, eso sí, con bon calzáu, playeros de trekking meyor que botes, y sobretou dir na dómina ivernal pa nun desvirtuar con demasiada xente lo que ye un paséu cola ñatura de compaña.