jueves, 30 de agosto de 2018

Polvoreo (Valdeburón) - Peña Mora

26 Mayu de 2018

Track: Polvoreo (Valdeburón) - Peña Mora


Siguimos nesta primavera, o más bien iviernu tardíu, nel que nun tenemos casi nin dos díes siguíos de bon tiempu y nel qu'intentar trepar nun paré seco ta siendo una verdadera fazaña. Mesmamente, esti finde de mayu, colábemos pa Llión con doble intención: facer monte y esguilar na nueva escuela de Maraña.

P'aportar a Maraña, lo sensatu dende Xixón, sedría dir pel puertu Tarna, pero dempués del argayón d'Anzó y sin tener claro si taba en condiciones pa pasar, decidimos dir tranquilamente pel puirtu Braña, durmiendo en la Puebla de Liyo.

Partimos del pueblu de Polvoreo (1191 m)

lunes, 27 de agosto de 2018

Trail Altu Ayer (Ayer)

29 d'Abril de 2018

Track: Trail Altu Ayer Curtiu (Ayer)


Web del Trail: Trail Altu Ayer

Clasificaciones: Clasificaciones 2018  


Si m'alcuerdo bien, paezme que nun corriera denguna carrera nel conceyu d'Ayer y hai que dicir que ye'l conceyu perfeutu pa les carreres de monte, con amplies pistes de tramos correnderos y montes de dosmil metros con grandes desniveles, asína como tarrenes téunicos al traviés de senderos montunos.

Poro, teníemos que dir correr per Ayer y teníemos en mente'l retu del añu, col envís de tirar a Nembra a pola segunda maratón de monte na mió vida, pero mi estáu físicu con costantes problemes musculares dixéronme que meyor dedicábame a carreres curties.




Averándonos hacia les Foces del Pino

Asina qu'apuntéme a la curtia del Altu Ayer, col envís d'apretar tolo posible dende l'entamu. De primeres salí tranqui con Alberto, pero cuando entamó la xubida hacia les Foces del Pino, seguí tirando, ganando posiciones poquín a pocu, hasta entrar nel tramu más duru de la preba.

Y ye que como nun quier la cosa, tendremos de superar un desnivel perimportante hacia la base de la Pena Reonda, pel val.le Fondil. Conozo perbien la xubida, pero ye que los ritmos de carrera y d'una ruta sele de monte, nun tienen na que ver y si sumamos el calorón que facía, cosa que llevo permal, llegué sufriendo abondo a la cumera del percorríu de la carrera.


Tramu peles Foces del Pino


Dende equí, recupero rápido y na baxada hacia Palmián, véome fuerte, poro nin siquiera paro nel avituallamientu, garrando un tramu increyible de carrera crestiando tol Quentu Texíu, hasta descender hacia la viesca baxa del Val.le Caniel.la.

Llueu, namái que diba quedanos salir a caminos empedraos primeru per Cuevas y más tarde nas Campas, garraremos de nuevu les Foces del Pino pa facer en llama tola baxada per pista hacia'l Pino y Felechosa posteriormente.

Aportando a la parte alta del percorríu

En resume, carrera curtia, pero con una xubida durina y un tramu téunicu increyible,faciéndose quiciás un pocu pesáu repetir el mesmu tramu de les Foces, pero ye un mínimu detalle dientro d'una carrera preciosa, rápida y con unes vistes de primera.

A la fín, ficiéramos bona carrera, quedando'l 21 de la xeneral lo que danme a entender dos coses, siendo la primera que dáseme bien la carrera curtia, prestándome pola vida poder llevar ritmos altos durante tola carrera, forzando la maquinaria y segunda.... nun sé regular y acabo con problemes en carrera llarga, sobretou si nunca entrenamos jaja... ye lo qu'hai... acéptase y puntu.

Camudando'l Camín a fueu

jueves, 23 de agosto de 2018

Torre (Babia) - Las Verdes - Montigüeru - La Riera

13 Mayu de 2018

Track: Torre (Babia) - Las Verdes - Montigüeru - La Riera


Tamos nesti Mayu tan increyíblemente ivernal y si'l día anterior trepáramos con solete, pero con muncho frío en Rabanal, güei, demientres almorzamos en Güergas, vemos que la cosa nun pinta mui allá, ya que tenemos enfrente'l focicu, el nuesu oxetivu y vémoslo dafechu tapecíu pela ñube.

De sábadu, dempués de raxase'l restu del GM Xuan de la Borrina, decidiéramos restolar pente los oxetivos pendientes y viéramos una bona oportunidá d'atacar al picu Montigüeru. Nel intre, col cafetín na man, tan sólo apúranos a salir de la cafetería, la montonera montañeros que lleguen montando una bulla de tres pares.

Entamamos ruta en Torre (m) na Babia

miércoles, 22 de agosto de 2018

Rabanal (L.luna)

12 de Mayu de 2018

Acabárase l'iviernu y menudu iviernu tuvimos na fastera cantábrica, pero la primavera tovía venía con ganes de comedia y regalábanos más y más ñevaes en plenu Mayu. Lo d'esti finde yera mediu de risa y tábemos per Teberga con non munches ganes d'esguilar y sobretou teniendo que xubir hasta Murotecho, lo cual dábame galbana enforma.

Así que cuntando con que Pepa y Jóse andaben per Llión y teníemos monte de domingu nel pueblu llionés de La Cueta, salimos Ana y yo pa Llión, direutos hacia la Cueta, aportando con solín hasta Vega de Vieyos y según vamos metiéndonos hacia La Cueta una ñube blanquecina atrápanos cayendo una trapiada épica.

Ñevando na Cueta... con sol en Rabanal... brutal la primavera

Cuando aportamos a la Cueta, muertos de risa, salen de la furgo Pepa y Jose flipando tamién, decidiendo ir a tomar el vermú hasta'l chigre Picos Blancos, onde siempre nos traten de luxu cada día que vamos.

Un par de cerveces, ñube con ñeve, sol, ñube con ñeve y sol otra vegada y decidimos retiranos hacia'l sur, al menos p'aprovechar la tarde. De camín hacia una escuela soleyera, el restu del grupu montaña ráxase pal día siguiente por mor de la previsión, teniendo entós total llibertá de decisión.

Jose y Pepa na maraviyosa caliza llionesa

De la que pasamos per Rabanal el solín llucía gayoleru, colo qu'aparamos les furgonetes y tiramos a esguilar en dalguna plaquina caliente. Como les plaques ya les tenemos más menos toos fusilaes, decidimos tirar hasta'l seutor Mandrágora que personalmente nun lo conocía.

Nun yera mui ceo y sabíemos que cuando marcháse'l sol, ellí nun habría que parara de fríu, colo qu'apuramos y entamamos a facer víes de la manzorga a la mandrecha. Facer víes, con gorru d'iviernu, térmica y otra camiseta enriba nunca me pasó na mió vida, asina que taríemos esguilando a unos 7 graos como muncho.

Que bien que se taba al solete, abrigáu pero al solete

Aún así dió pa facer los 3 sextinos de la manzorga, del que salía un segundu llargu, mui llargu, nel que metime allégremente, dándome la sensación de salir más menos de 6b aproximadamente. Eso sí, mui alpinu y perguapu, teniendo que superar dellos techinos con travesíes y dalgo d'alegría nos chapaxes.

Lo dicho, disfrutón enforma y paezme que rondaría los 38 metros, ya que nun m'alcuerdo que sobrase muncho más de 2 metrinos de cuerda. La verdá ye que paezme un gran aciertu esi segundu llarguín pa rematar tres víes de placa curties.

Pié de vía comodísimu tamién nel seutor Mandrágora
Con otru par de quintinos más a la mandrecha ya tocó colar d'ellí, que col día atapeciendo baxaba la temperatura per momentos. Como siempre, el tercer tiempu, dió pa munchísimu, buscando oxetivos pal día siguiente, ya que tocaba patiar y nun teníemos nin idega de pa onde tirar... pero esa ye otra hestoria.

Rabanal (Seutores visitaos)
 
Croquis modificaos por mi de la escuela d'escalada de Rabanal de L.luna, por mor del El Maquis. Gracies y col so permisu.

---------------------------------------------------------------------------

viernes, 17 de agosto de 2018

Iondokorta (Arratia-Nerbioi) - Monte Azero

22 Abril de 2018

Track: Iondokorta (Arratia-Nerbioi) - Monte Azero


Una vegada más llevantámonos nel refuxu del Baskonia Mendi Taldea en Iondokorta, con cierto clavel por mor de les bébores llocales y foriates que traximos. Hubo cachondéu la nueche anterior y l'encargáu del refuxu tuvo que mandanos a dormir casi cola guiyada.

Pero una mañana más, almorzamos, tomamos dellos cafés y tamos dimpuestos a dar un paseín pela redolada del parque natural del Gorbeia. Esti añu, el paséu sedrá más relaxáu si cabe y ye que camiento nun queden demasiaes opciones pa dende'l refuxu facer dalgún montucu pa enantes de la xinta final de la Xuntanza Asturvasca 2017 - 2018.

Puntu de salida en Iondokorta (720 m)

jueves, 16 de agosto de 2018

Madaria (Áraba) - Ungino

21 Abril de 2018

Track: Madaria (Áraba) - Ungino


Tamos participando un añu más na Xuntanza Asturvasca 2017-2018, quedando a una hora moderada en Basauri, anque pa cuando llegamos toca colar hacia'l nuesu puntu de partida de la primer ruta del finde montuno.

El llugar de salida sedrá Madaria, na provincia d'Áraba, poro tendremos un entreteníu viaxe en milenta coches, alcontrándonos sobretou con munchísimu ciclista y ye que'l día taba pa ello. Aportaremos a Madaria y taremos en dimposición de salir a caleyar sobre les 11 y media, sicasí la ruta nun ye sea llarga precísamente.

Partimos de Madaria (453 m)

viernes, 10 de agosto de 2018

Xuntanza Asturvasca 2017 - 2018

21, 22 Abril de 2018

Un añu más, aportando Abril, preparámonos pa la Xuntanza Asturvasca (Eusko-Astur Biltzarra) y esti añu, llegamos a la conclusión de que tamos peragustos nel refuxu del Baskonia Mendi Taldea y poro, aceptamos el convite de cellebrar la Xuntanza, dos años siguios nes sos instalaciones.

Tamos falando de la octava xuntanza y segunda consecutiva n'Euskal Herria, teniendo añu tres añu, xente nuevo nestes hestories, tanto pela parte asturiana como pela parte vasca. De toes formes, siempre acabamos xuntándonos un bon garrapiellu de montañeros con ganes de conocer monte seya onde seya y eso ye lo que cuenta.

Preparaos pa la primer actividá de la Xuntanza en Madaria