jueves, 23 de agosto de 2018

Torre (Babia) - Las Verdes - Montigüeru - La Riera

13 Mayu de 2018

Track: Torre (Babia) - Las Verdes - Montigüeru - La Riera


Tamos nesti Mayu tan increyíblemente ivernal y si'l día anterior trepáramos con solete, pero con muncho frío en Rabanal, güei, demientres almorzamos en Güergas, vemos que la cosa nun pinta mui allá, ya que tenemos enfrente'l focicu, el nuesu oxetivu y vémoslo dafechu tapecíu pela ñube.

De sábadu, dempués de raxase'l restu del GM Xuan de la Borrina, decidiéramos restolar pente los oxetivos pendientes y viéramos una bona oportunidá d'atacar al picu Montigüeru. Nel intre, col cafetín na man, tan sólo apúranos a salir de la cafetería, la montonera montañeros que lleguen montando una bulla de tres pares.

Entamamos ruta en Torre (m) na Babia

Agobiámonos y envede tomar otru café, pa decidir qu'opciones tenemos, colamos ensin más, poniéndonos en mou fanáticu Ana y yo, diciendo que por güevos salimos al monte, mientres qu'a Jóse y Pepa cuésta-yos un triunfu decidise.

A la fín, casi a les 11, tamos arrancando dende'l pueblu de Torre col envís d'ascender pela nuesa parte al Montigüeru, demientres que Pepa y Jose, dicen de dar un paséu hasta la llaguna Las Verdes. A Torre dende Asturies, lo más intelixente sedría tirar pel Güerna pa desviase hacia Vil.lablino siguiendo la C-623 hasta entrar en Babia per Vil.lasecino y pocu más alantre de Güergas, desviamonos hacia Torre.

Esfrutamos del verdor del valle del rigu Torre

Preparaos, saldremos hacia'l norte, pudiendo salir per cualquier vera del rigu Torre. Nós, pillamos la manzorga pasando al llau d'una bona fonte, onde garramos agua y siguiremos ensin pérdida per un valle al que nun-y cabe más verdor... ye ablucante lo d'esti añu.

Durante'l nuesu camín, al altor de la Bárcena, desdexaremos dos pistes a la nuesa mandrecha, yendo la primera hacia'l valle del Roxu y la siguiente hacia'l valle de la Maxúa y el Congostu, xusto no baxo de peñes de renome, como la Pena Orniz y la Pena Calabazosa.

Averámonos a la mayada Las Verdes

La nuesa pista, sigue'l PR que tien de llevanos en primer momentu, a la mayada Las Verdes, xusto cuando pasamos a tol garrapiellu de montañeros, que siendo de toa triba, hailos qu'hasta cuésta-yos pasar la primer ceya de ñeve qu'alcuentren.

Ensin más, magar de saludar aténtamente, siguimos camín hacia'l colláu dende'l que teníemos de ver el primer finxu del día: La Llaguna Las Verdes. Hai que dicir que ye un llugar bien guapu, pero non sólo pela llaguna, ya que llevábemos embobaos va un ratín, coles muries que cayen dende La Espadaña, que ye un hombru del Montigüeru y dende les aguyes de Las Coloradas.

Perpasamos la llaguna Las Verdes y ascendemos per una amplia canal

Xusto pente estes peñes, tendremos nós, la nuesa canal de xubida, la cual pue llevanos a cualesquier de los dosmiles d'esti pequeñu pero mui interesante macizu. Como l'oxetivu ye'l de más altor y sabemos que tenémoslo penriba les muries de La Espadaña a la nuesa manzorga, diremos garrando altor y albidrando cual ye'l meyor corredor p'ascendelo.

La canal nun puede ser más prestosa, poro sacar semeyes a los collacios cola llaguna de fondu ye un non parar. Voi abriendo buelga con Ana detrás y la calidá y l'estaú de la ñeve ye perfeuta pa xubir con bota durina y nun tener por qué poner crampones... lo que nun quita que fueren mui d'encomendar.

Xubimos per un corredor amestáu pindiu enforma

Problema, el restu'l grupu, por zánganos nun los metieron. Dende equí un tirón d'oreyes a Pepa y Jóse, colos que pa nun desvirtuar l'apertura de buelga, nun puse los crampones y tiré tamién ensin ellos p'alcontrar les meyores condiciones pa una xubida non del tou segura.

Al final, ficimos el últimu corredor, que pa xente que dedícase a esto, suel ser el de baxada y según les guíes llega hasta'l 35 %. Nel ascensu, aparte de la verticalidá del tarrén tuvimos que dir xugando col amestáu de yerba xelao y peña pa nun metenos na ñeve xelada dafechu.

Tramu final con xelu hasta la cumera'l Montigüeru

Darréu del corredorín, aportamos a l'arista cimera y ya nun tarrén más cenciellu, si qu'alcontramos ñeve xelao y tuvimos qu'andar pegando pataes cola bota semirríxida pa poder facer una migayina de buelga y que los collacios fueren más tranquilos.

Con pocu más que dalgo de ventisca y fríu como pa xelase los bigotes a Kíla y Noah, siguimos l'ascensión hasta la cota máxima de 2186 m del picu Montigüeru, el cual nun pudo danos toles vistes que nos diba prestar pero si qu'ufreciónos una xubida ivernal y dalgo aventurera.

Cume ivernal al Montigüeru (2186 m)

La verdá ye que col día que presentábase que nos dexase facer el cumal ya nos da un bon tastu pal restu del día, nel que tolo demás diba saber muncho meyor si cabe. Empericotaos nel vértice xeodésicu, echamos un vistazu a les distintes baxaes posibles, alcordándonos de que nun teníemos track y que díbemos totalmente a lo que nos fuera xurdiendo.

Na xubida viéramos una canal anterior a la nuesa que tenía bona pinta pa baxar si llibrábemos los parés de la Espadaña pela so manzorga, aún así, tol primer tramu diba ser a l'aventura. Nel intre, descendimos hacia'l hombru sur con esa intención, pero de secute vimos una amplia canal hacia'l Sur que tenía pinta de baxable cenciello.

Pal descensu garramos la canal sur con final sorpresa

De primeres vamos seliquino, intentado dir pente l'amiestu yerberu y peñeru, pero cansamos y garramos tola canal ñevada pa descender lo más apriesa posible, xugándonos una posible resbariada hasta lo que paecía un envudu qu'esperábemos nun fuera un tabayón con corte.

Por suerte, según díbemos descendiendo díbemos viendo salida pel escobiu, el cual travesamos con curiáu ya que les ribayes entamáben a ser peligroses si teniemos dalguna ponte de ñeve pembaxo los pies.

Preciosa baxada hacia'l valle de la riega Corralines

Al pocu de salir del primer estrechamientu, siguimos descendiendo y cuando'l barrancu poníase más pindio y los cortes del ñeveru yeren más evidentes decidimos facer una amplia envuelta hacia la mandrecha pa metenos en tarrén rocosu.

Per esti, fuimos garrando delles vires en ziszas hasta aportar pembaxo del final de canalón, pudiendo ver que tendría na so parte final una muria d'unos 4 metros a destrepar. Poro, sin necesidá d'ello, salimos perbien hacia los praos inferiores, metiéndonos de lleno nel valle de la riega Corralines, que nos daba la gayola de ser un llugar de múltiples tabayones y verdor brutal.

Siguimos descendiendo hasta la Riera

Siguiremos descendendo valle abaxo, siempre per senderu hasta pasar a la mandrecha de la riega, onde garramos per primer vegada pista, que ya nun perderíemos hasta'l pueblu de la Riera, onde paramos un cuartín d'hora nun llavaderu remozáu a xintar daqué que ya yeren casi les 6 de la tarde.

De la Riera, saldrémos pela carretera hacia abaxo durante mediu kilómetru, pa desvianos pela Cerecina col envís d'acortar hacia la carretera que xube a Torre ensin baxar hasta'l crucie normal. Pero como siempre, dir de monte siempre da otru tramín a conocer guapu siguiendo enantes de dar a la carretera pera un camín que travesaba un fayéu bien guapu.

Averámonos poquín a pocu hacia Torre de nuevu

Travesaremos tol fayéu hasta dar coles primeres sebes de praos y dempués de bregar un puquiñín y ver que'l camín pasaba a sienda y perdíase, decidimos saltar una sebe y salir pelos praos hacia un pequeñu colláu onde ya veíamos camín hacia la casa de Cascarallán.

D'esti xalé o lo que seya, ya salimos a la carretera percerquino d'una ponte pela qu'entraremos a la Torre, per un camín bien prestosu al llau del rigu, pasando al llau de la Ilesia y aportando al centru'l pueblu onde teníemos les furgonetes aparcaínes.

En resume, ruta prestosísima de 15 kilómetros, mui caminables casi toos y con un tramu téunicu que-y da esi toque picante, pa que los 940 m de desnivel y les 8 hores y 25 min de duración, faíganse mui, pero que mui pocu pesaos y más si nun yes conocedor de tola comarca de Babia.
Camudando'l Camín en Babia

No hay comentarios:

Publicar un comentario