Track: Polvoreo (Valdeburón) - Peña Mora
Siguimos nesta primavera, o más bien iviernu tardíu, nel que nun tenemos casi nin dos díes siguíos de bon tiempu y nel qu'intentar trepar nun paré seco ta siendo una verdadera fazaña. Mesmamente, esti finde de mayu, colábemos pa Llión con doble intención: facer monte y esguilar na nueva escuela de Maraña.
P'aportar a Maraña, lo sensatu dende Xixón, sedría dir pel puertu Tarna, pero dempués del argayón d'Anzó y sin tener claro si taba en condiciones pa pasar, decidimos dir tranquilamente pel puirtu Braña, durmiendo en la Puebla de Liyo.
Partimos del pueblu de Polvoreo (1191 m)
Al día siguiente, de mañana, averámonos pel desfechu puertu Las Señales hasta l'albergue de Maraña pa echar un café y ver les distintes posibilidaes que'l tiempu ufreciános. Hasta ellí, nel día, xuniéronse a Pepa, Jose y a mí, Montse y Benjamín.
D'esti xeitu, nun quedaba otra que salir al monte sí o sí, anque amenazare torbón, orbayu o lo que fuera. Como non, Pepa y Jose, decidían intentar trepar o al menos, ya que nun teníen ganes de caleyar pa moyase.
Salimos caleyando pel camín de Pío hacia'l valle de Muñenes
El GM Xuan de la Borrina, reducíu a tres miembros namás, averámonos hasta'l pueblu de Polvoreo, pasando enantes per Llario., onde tendremos el puntu de partida de la ruta. Poro, preparámonos y salimos ensin perda pel camín de Pío, que faime alcordanza del paso pel pueblu, nel Trail de Sayambre.
El camín ye preciosu y el nivel de verdor de les praeres ye ablucante, nun ye d'estrañar col iviernu y la primavera lluviosa que sofrimos. Dempués d'un caminar cenciellu y sele, desviámonos hacia'l valle de Muñenes, garrando desnivel el nuesu andar y poniéndose'l día a orbayar, teniendo qu'abelluganos nuna guapa y cómoda cabaña.
Ascendemos hacia'l Cerru'l Porru ganando vistes de Ponga
Cuando vemos qu'asela la meteo, dimponémonos a continuar col primer ascensu del día hacia'l Cerru'l Porru y pa ello, viendo que la ruta nun ye mui esixente, ponémos-y el toque picantón ascendiendo per una canalina, que tienmos entreteníos con tramos d'amiestu de peña cuarcítica moyada, brezu baxo y dalguna pedrerina.
Ensín más, upámonos nos 1849 m del Cerru'l Porru y nel intre, entamaremos a crestiar, baxo un cielu tapecíu de ñubes, hacia la collada Valdemagán, eol envís d'averanos al que ye'l nuesu verdaderu oxetivu: la Peña Mora.
Facemos un pequeñu descensu y atacamos la Peña Mora
Travesaremos la collada onde ñaz hacia'l este la riega Troncea y al oeste la Carceo, pa entamar una entretenida ascensión travesando dalgún trabe y garrando una entretenida canal hasta'l cumal calizu (1874 m) de los dos que formen la Peña Mora.
Cumal de la Peña Mora (1874 m)
Xuntámonos los tres nel cumal, pudiendo acolumbrar un pelín tol valle de Zalambral que llega hasta Pío, asína como la mole del Niah.u y Pozalón que sigue na carpeta de pendientes, magar d'aquel finde con Charly nel que nun-y pudimos atacar magar del espeutacular día pela so redolada.
Conocemos les vistes d'Arcenoriu y baxamos hacia'l valle Carceo
Cola alcordanza daquel finde, averéme hasta'l cumal más llomberu y un pelín más altu de la Peña Mora (1879 m), teniendo meyores de vistes de tolos puertos d'Arcenoriu, quedándome con munches ganes de da-y más patéu a toda esta fastera de Ponga y Sayambre.
Magar d'un ratín de soledá mirando tol paisaxe, Kíla y yo, salimos de nuevu como tiros baxando pela arista sur del cumal Oeste de la Mora, xuntándome colos collacios pa descender tol valle del rigu Carceo hasta pasando per guapos llugares y quedando prendáu de la fonda viesca de les falderes de la xerra Carceo.
Siguimos camín d'Arcenoriu pelos praos de María
El restu del camín pel valle, sedrá perentreteníu y cómodu con vistes al macizu del Mampodre, cruciando'l rigu pelín enantes de tomar el desvíu pa nun continuar hacia'l pueblu de la Uña. Nós, pasaremos a conocer unos amplies praderes, les de María, onde pastiaben con total tranquilidá una bona caballada.
Aparte d'esti verdor, sigo ablucáu colos fayeos que tapecen totalmente los montes de Carceo y Nareo, siendo estos de tal fondura, que ya-yos gustaría al mesmísimu Tolkien pa les sos aventures del señor de los Anillos... Fangorn ye pocu comparáu con estos fayeos.
Verde y más verde de camín a Polvoreo
Con pocu más que siguir la pista pegaos a la riega L'Alguera, acabaremos por dar de nuevu nel pueblu de Polvoreo, onde travesamos les sos cais hasta finar la ruta nos coches, magar d'unes 5 hores y 25 min de camín y casi la totalidá de llibrada de moyanos pesie al negrén que dominó tol cielu.
En resume, un paséu pocu esixente pero mui guapu, que podríase ampliar con un pocu d'imaxinación y ganes de conocer más siendes y collaos, pero que nós preferímos nun abusar de la meteo, teniendo col percorríu de 16 km y 830 m de desnivel positivos más que suficiente pa completar un guapu día de monte.
Camudando'l Camín na Ponga menos conocía
No hay comentarios:
Publicar un comentario