miércoles, 19 de octubre de 2016

Cobarcil (Sayambre) - Tolivia - Llué - Llaete - Ribota

27 d'Agostu de 2016

Track: Cobarcil (Sayambre) - Tolivia - Llué - Llaete - Ribota


Munches vegaes si restolamos pente'l mundiu blogueru de monte, vemos como ta entrándose nuna especie de profesionalización de los blogues de la xente. Ya nun entro si queremos sacar perres o non, si la nuesa afición acaba convirtiéndose nun trabayu o en daqué monetariu, eso ya caún tien qu'estudiar si-y renta o non.

Cuantes vegaes dixéronme, que por qué nun escribía en castellán, que diba tener milenta visites más y de xuru que yera ricu y famosu. Pues non, esti blogue ye mi pequeñu requexu pa contar lo que me peta pel alma y cuéntolo n'asturiano o al menos nel asturiano más curiosu que pueu ufrecer, que nun tuve la oportunidá d'estudialu nel cole y tampoco mamalo en casa... que mi Pa ye soriano y mi ma d'Ortigueira en Cuaña y ellí fálase l'eonaviego.

Con too esto, quiero remembrar y destacar, qu'esta ruta que ficimos el mió collaciu Charly y yo, ta clavada, calcada y copiada de la que ficieron dos de los blogues que sigo con más enfotu: Los de las Claras y Caleyando con Cienfuegos.

Tamos en momentos cafiantes pa los blogues que llevamos bien d'años (dende'l 2 de Xineru de 2009 nesta xera), con cambeos en blogger, con cierre de portales onde aloxar semeyes y con ciertu cansanciu d'escribir y nel casu del collaciu Cienfuegos ver como otros "profesionales" con llibros a cuestes, cópiente'l trabayu que'l nuesu tiempu nos lleva y nada de perres nos da.

Asina, qu'en tiempos de falta d'orixinalidá na conceición de rutes, muncha profesionalidá y llistaos de los meyores blogues en fala hispana, d'aventures o la de su madre en calzonciellos, quiero dedicá-yos y da-yos les gracies fonderes a Jonatan y Cienfuegos... porque son munches les rutes que-yos copié y llueu conté a la mió manera, pero que siempre puse d'au venía'l trabayu y búsqueda de percorríos.

Un abrazu collacios... espero conoceros dalgún día en presona, que tien coyones la cosa dempués de tantos años, a Monchu cola so biblioteca d'ascensiones que tien por blogue, ya tuvi la suerte unes cuantes vegaes... así que vémonos pronto espero.

Partimos de Cobarcil (503 m) nos Beyos

Son les 9 la mañana y tamos en Cobarcil, no que podría nomase la salida del desfiladeru los Beyos y onde va ser la nuesa salida tamién. Pa ellos, pues tiradona en coche pela Autovía'l Cantábricu hasta Lloviu, llueu nacional hasta Cangues d'Onís pasando per Les Arriondes, p'almorzar como siempre, na Huera.

Llueu N-625, travesando los conceyos de Cangues d'Onís, Amieva y Ponga hasta topanos con un cartel que diz que salimos d'Asturies, pero sigue paeciendo Asturies y les agües siguen baxando p'Asturies, asína que nunca lo entenderé... Sayambre Asturiana YA!! y sinon entrugá-y la xente d'Oseya.

Baxamos pela carretera hasta'l PK 128 aproximáu

El casu ye que tamos plantaos embaxo les muries que baxen del Niah.u y penriba'l ríu Cares, empobinándonos carretera abaxo durante pocu más de 2 kms, pero hai que dicir, que son entreteníos mirando tolo que cae entrambos llaos de los Beyos y sobretou si arrimámonos a los quitamieos de piedra, ver como'l Cares encaxónase dellos metros p'abaxo.

Aportaremos al PK 128 aproximádamente y vemos una marca de PR nuna señal, saliendo a la manzorga un senderu en pindiu descensu hasta topanos cola ponte Vaguardo, en perbon estáu, la cual cruciamos pa salir n'ascensu per un senderu que traviesa la faldera de la canal de las Rumiadas, hasta topanos col ríu Moh.izu.

Esti ríu crúciase per otra ponte, nesti casu metálica, con munchos metros d'altor sol ríu y ye que'l valle del ríu Moh.izu o Llué, ye dafechu imprauticable pa montañeros, hai que llevar material de barranquismu pa conocelo... asína que dexarémoslu pa un futuru y bien preparaos nestes xeres.

Increyible'l camín hasta Tolivia... bien guapu

Cruciamos la ponte, magar de mirar p'abaxo un ratín y siguiremos pel increyible camín hacia'l pueblu ponguetu de Tolivia. Camín que por ciertu, alcontrámoslu bien señalizáu, llimpiu y con una guapura que sólu Ponga pué ufrecenos.

Vamos esfrutando como si na, aldericando que si hai que trayer al grupu hasta Tolivia, que si mira que guapu, que si allá alantrones ta la Peña'l Toru... y cuando dámonos cuenta topámonos colos restos de la ermita de Tolivia y vamos descubriendo restu de casa a restu de casa.

De sorpresa alcontrámonos habitantes nel pueblu... delles vaques taben metíes nuna casa y llevamos un bon sustu, asína que'l pueblu al menos tien dalgo de vida... animal pero vida a la fín. Como diz Cienfuegos, paez talamente que colaron d'ellí apriesa, dexando les coses tiraes, botelles, ferramienta... pero falando con xente d'Oseya, con unos chupitos na mano, cuntáronmos que pal setenta y pocu, tovía quedaba xente viviendo en Tolivia.. años perduros tuvieron de ser.

Percorreremos Tolivia y siguiremos el PR que va hacia la collada Granceno

Siguimos de casa en casa hasta cruciar la riega Les Cruces, que tamién se desciende en barranquismu, xuntándose col Mohizu, pa empobinanos siguiendo les marques del PR que tiraría hasta la collada Grancenu na viesca de Peloñu.

Esti PR tien de facenos ascender per camín empedráu d'entamu, pa cruciar una preciosa viesca, siempre n'ascensu, hacia'l colláu Cociyón (820 m). Dempués, siguiremos más seliquino travesando'l valle Trexéu, onde abandonaremos el PR, quedándonos con ganes nesi momentu de saber hasta onde diba llevanos.

Como siempre, a lo postreru, busques y alcuentre, sabiendo que lleva hasta'l colláu Grancenu, con posible xubida al Sen de los Mulos, pero esa pudiera ser otra hestoria y nós, faldiamos un pelín escaeciendo'l PR hasta averanos per senderu menos marcáu a la collada Reces. 

Aportamos a la collada Reces (980 m)

Dende los casi mil metros de la collada Reces ya aportamos a ver lo que nos espera, que ye baxar de nuevu casi 400 ms hasta'l ríu Llué. Llueu de conocer Tolivia, l'otru retu yera conocer la casería de Llué, onde ye perconocía la hestoria de Martinón, que perdió a la so muyer y tuvo que caltenela na ñeve y dientru casa, pa que nun la devoraren los llobos, hasta que pudo xubir con ella al llombu hasta Tolivia.

Pa más información, echá-y una güeyada al blogue de Monchu Calvo, gran fotógrafu y gran recopilador d'hestories y en particular a esta entrada na que podéis ver el caserío de Llué y dalguna anéudota más de lo que yera un paisanu de 1893: Martinón de Llué.

Baxamos de Reces hasta la vega de Llué

Con ciertu respetu, entamamos el descensu hacia Llué, camentando como pudo esi paisanu xubir al llombu per esta pindia viesca'l cuerpu de la so muyer con una ñevada brutal. El casu ye que vamos en silenciu y dempués d'un tramu de camín, con bona caxa, qu'avanza paralela como si s'empobinara hacia'l Valle Tolivia y d'ellí al colláu Viancé, entamamos a baxar viendo que tenemos marques marielles nos árboles.

Nun sabemos bien si cuando los nuesos collacios blogueros pasaren per ellí, taba marcáu'l camín d'árbol n'árbol, pero bono, ye d'agradacer que s'intente retomar vieyos senderos y aún así fuimos perdiéndolo, ya que'l pindiu tarrén mándate dir pelo meyor qu'alcuentres.

Aportamos al caserío de Llué y el sitiu ye ablucante

Una vegada que descendemos el mayor desnivel podemos alcontrar restos de camín pente dalguna muria, pero a la mesma vegada cuando metémonos na vega de Llué, los felechos, escayos y demás broza tapez cualesquier tipu de senderu, colo qu'avanzamos inclusu penriba d'una muria hasta topanos colos restos del cabañón de Llué.

Son llugares que tienen dalgo, tamos nuna vega enorme, enllena de vida polos ríos Ruaguín y Canalina qu'axúntense nel ríu Llué o Moh.izu más alantre, asína que tendría de ser un allugamientu fértil enforma pa la vida, pero lloñe de cualesquier salida cenciella ante dalgún problema.

Siguimos camín cruciando'l ríu Llué hacia'l valle del ríu Ruaguín

Tamos nuna ruta ensin ascensiones que suel ser lo nueso, pero llevamos una bona soba, arribando a la vera'l ríu Llué, con 3 hores y media andaes y baxo un calor p'alloquecer. Con esto, dicir que ya ventilamos muncha del agua que llevábemos asina que decidimos facer como Martinón y garrar agua del mesmu ríu Ruaguín.

Hai que dicir que les agües cuerríen con fuercia y taben bien fresques, cosa que sentí perbien cuando tuve que quitar les botes pa crucialo. Llueu de secáme, siguimos camín n'ascensu pel valle Ruaguín, internándonos nuna incómoda pedrera que vamos ganando pasín a pasu per onde más pisáu alcontramos.

Salida del Valle Ruaguín y saltu'l Carneru

Lleronearemos durante bon ratu, alcontrando dalgún h.itu mui de xemes en cuando y dempués de pasar un par de resaltes herbosos, les llombes d'Espineres, que baxen dende'l Niah.u, vamos descender hasta'l ríu Ruaguín pa ver si somos a caleyar dalgo más curiosu, alcontrándonos con un andar a la solombra y más llevaderu.

El valle ye llarguísimu y escápaseme la vista cada pocu hacia una posible entrada a la canal de la H.oyosa, pero la mirada de Charly, diz que nin se pase pela tiesta intentar el Niah.u güei. Pa otra quedará y siguimos camín parando a xintar dalgo al llau del ríu, pa siguir a la fín hacia la so salida, alcontrándonos de frente col Saltu'l Carneru, onde corta'l ríu Ruaguín.

Metémonos na foz de Llaete onde toca lluchar un pelín

Con tolo que llevamos andáu, hai que dicir que nesti puntu onde abandonamos el ríu Ruaguín hacia la Foz de Llaete, tenemos ante nós, el pior tramu con diferencia. Pente grandes fayes, tenemos praos de felechos más altos que nós, teniendo que pegar bastonazos ensín xacíu p'algamar a salir d'aquel infiernu.

Con muncha llucha, salimos de la broza y metémonos na propia foz onde pasamos de los felechos a les ortigues y escayos, que faen que tengamos que dir xubiendo per onde meyor podemos, con dalgún pasín nel que toca superar dalgún bloque nel ríu.

Salimos de la Foz de Llaete con ciertu cansanciu

A la fín salimos d'esa foz, que tuvo dalgún tramín pindiu y mui pesáu alcontrándonos con una vega onde notábase la presencia de ganáu, pa salir per un pasu pente dos peñes, a tarrén abiertu, tomando delles pistes mineres hacia una cabaña usada per un grupu espeleologu va dellos años atrás, que tuvieron faciendo trabayu nun sumideru pel que pasáremos na salida de la foz de Llaete.



Xubiendo hacia'l colláu y mayáu de Llaete


Esti últimu tramu, dexónos un pocu fartucos de lluchar colos ellementos, ye dicir, col Paraísu Matorral y allegrámonos de caleyar a bon ritmu per pista, saliendo aina hacia'l colláu Llaete onde queda dalgún restu de cabaña na mayada de Llaete.

Nos 1405 m del colláu, tirámonos un ratín a descansar y col día poniéndose feuco, tiramos pista abaxo sin mayores contemplaciones y dándo-y vueltes a tolo que me prestaría conocer d'esta fastera pongueta-sayambriega y lo lloñe que nos queda... asína qu'habrá que preparar más findes.

Pista pesadísima con vistes a Picos, el H.ariu y la Pica Ten

De la pista, pocu que dicir namái que nun puede ser más cansina, descendiéndola col meyor de los humores y decidiendo pal mió interior que'l plan de mañana nun se diba sostener. La baxada per equí al día siguiente nun diba facer denguna gracia.

Nuestros pasos llevaránmos pasando pelos llugares de las Varallas, Cuetu Castiellu y nel Corón, onde alcontrámonos con una antena telefónica, baxaremos per un prau a garrar otru camín pelín más guapu per un fayéu, que dexarános nel pueblu de Ribota cruciando'l ríu Seya.

Descendemos hasta Ribota y dende elli a Cobarcil per un guapu camín  al llau del Seya

En Ribota entrugamos per un bar pa echar una birra pero pesie a lo amable de la xente, nun teníen, anque a cambiu alcontramos un cartelín que ponía Cobarcil y que salvónos la vida, porque nun contábemos con un camín a la vera'l ríu Seya hasta onde teníemos el coche aparcáu.

Con esti recorte quitámonos xubir a la carretera y andar les milenta revueltes hasta Cobarcil, colo que nos quedó una ruta de 17,5 km de percorríu, con desnivel positivu de 2085 m nun total de 9 hores y 25 min... parando lo que se diz parar mui pocu.

Y con esto... ya pueu sentíme un montañeru completu... porque falando con un paisanu nel Trisquel al que Ramón taba contándo-y mis andances montañeres, entrugóme si tuviera en Llué a lo que contesté que non... y miróme con cara... rapaz nun ties nin puta idega... siempre hai dalguien que sabe más que tú jejeje.

4 comentarios:

  1. Berto, gracies pol detalle de nomame, pero nun fai falta. Idegues sacamos toos de tolos llaos. Pero si que ye verdá una cosa que dices y bien que ye. Que los blogs tan evolucionando asgalla y nun siempre pa lo que más me preste. Los nuevos, muy guapos, ye verdá, pero nun ye por ello con más información o con delles rutes orixinales. La mayor parte de la xente quédase agora con poner unes semeyes nel Facebook y alón. Los años pasen y pesen. El miu blog entamó allá pol 2008 y ya voy cansando. Publico menos coses, les que me parecen más guapes por el percorriu o por les semeyes, pero menos a la fin. Y se que ye pena. Les postures de según que xente que se aprovechen del trabayu dun, nun ayuda, eso fijo. Nun se. De too cansamos. Menos tiempu o menos ganes. Pero el casu ye que si toos facieramos igual, nadie sabría dellos caminos perguapos que tan perdiéndose y bien pena que ye. Como esti percorriu tuyu de güei que nosotros copiamos-yos a Sito y Carlos. Y nada, a ver si ye verdá y vémonos dalguna vegada pol monte y si non habrá que facer por vese y entamar alguna, que pa dir al monte ganes sí que les hay siempre.
    Un saludu

    ResponderEliminar
  2. Cuenta con ello, compañeru. Un abrazu

    ResponderEliminar
  3. Gracias por la mención Xuan. Todos aprendemos unos de otros, unas veces copiote a ti, otres a Cienfuegos, otres a Monchu y así conocemos y enseñamos este monte desconocio a la xente. El trabajo ye duro e ingrato como ya te comenté la vez que nos vimos, con los años (yo como Cienfuegos llevo desde el 2008) van quitandoseme las ganes y cada vez publico menos. Pero se agradece tus palabras mucho. Animo a ti y a Cienfuegos y a seguir con el trabayo.

    ResponderEliminar
    Respuestas
    1. A ver si en Setiembre píllolo con ganes... porque toi bastante cansáu tamién. Saludos

      Eliminar