Track: Beyo (Ayer) - Cordal de Cotobeyo
A la vuelta de les vacaciones per Soria, tuve dellos díes intentando cuidame mentalmente ya físicamente, pero ya tocaba intentar buscar les miós llendes otra vegada. Poro, restolé pente les milenta rutes preparaes que siempre tengo nuna carpetina polo que pudiera pasar y saqué de paséu la que meyor veníame pa entrename un pocu corriendo cola mió perrina, Kíla.
Salimos entós, Kíla y yo, col coche hacia Ayer, faciendo'l camín davezu dende Xixón, pela autovía minera hasta Mieres del Camín y desviándonos de camín hacia L.lena pel corredor del Ayer, pasando pelos pueblos de Morea, L'Escuyu, Los Estrul.lones, Cabanaquinta y L.levinco onde tendremos el desvíu a la mandrecha pela Ae-4 hasta Beyo.
Partimos del pueblu de Beyo n'Ayer (505 m)
A les 10 en puntu, salgo per pates per una pista, a la mandrecha del ríu Beyo, que tien de llevame per dellos mayaos y brañes como les de Viescayana, El Cotayón, La Boza, Ferguerúa y Carreyana, onde faigo les caberes envueltes per pista hasta meteme nun prau enorme con una cabañona enmediu.
Salimos corriendo per pistes hacia la Carreyana
Travieso'l prau y sigo hasta una pista qu'arrodia'l prau penriba, pero qu'hacia la mandrecha pierde un pelín de continuidá. Son dellos escayos y matos que llíbrense medianamente bien hasta metenos saltar una valla y metenos nun camín pente praos que tien d'empobinanos nuna fastera más grande aún de praos, cruciaos per milenta restos de pistes.
Ye tarrén mineru y camiento qu'estes estraes pel monte, sedríen pa carretar el mineral, pero agora confunden un pelín cual tará menos zarráu o cual empobínanos meyor hacia'l nuesu destín: el Mayéu Renorios.
Pasamos pel Mayéu Renorios con bones vistes del conceyu d'Ayer
Diremos pelo qu'atalantamos dalgo meyor y acabaré garrando un pequeñu senderu qu'asciende per un espolón del Cuitu Piquinu dexándome nel mayéu Renorios, onde paro unos minutinos a mirar el paisaxe. Darréu, namái que queda tirar monte p'arriba hacia les antenes del picu Renorios, onde tomaremos un descansín por mor de los más de 800 m de desnivel ganaos en pocu más d'hora y media.
Monte Renorios (1333 m) nel cordal de Cotobeyo
Tirarémonos unos minutos nel cumal Kíla y yo, demientres compartimos una barrina enerxética y bebemos dalgo d'agua. Nel intre, tendremos pista pa fartucanos de correr, asina qu'un descansín vienmos bien enantes de siguir cordal de Cotobeyo alantre.
Toca conocer el cordal de Cotobeyo en tola so llargura
Ensin munchos miramientos, tiramos cordal alantre siguiendo la pista que percuerre tola cumera del cordal, faciendo les envueltes que nos vaya pidiendo ya intentando nun equivocanos de pista baxando más desnivel del necesariu.
Déxase facer bien y les baxaes son casi aneudótiques, cuando toca ponese'l monu de trabayu pa correr cuesta riba, los entepechos que vamos alcontrando pel camín. Dexaremos la esplotación minera de Cotobeyo a la manzorga y siguiremos camín col envís de bordiar l'altu La Teyera pela mandrecha.
Les vistes ábrense dende l'altu La Teyera (1557 m)
Con vistes al cordal de Carrocéu col so puntu más altu na Boya y al de Cuaña qu'acaba en L'Esturbín echo la última carrerina hasta los 1557 m del Altu La Teyera, onde ábrense toles vistes posibles del conceyu d'Ayer, destacando la Peña Mea... soleyera nel intre.
Pocu más de media horina dende Renorios hasta La Teyera y ye la una la tarde, decidiendo que voi bien de tiempu pa dir visitar a dellos collacios de la universidá que tan d'espicha nel Altu L'Escampleru, asína que tirámonos a tumba abierta pa Beyo otra vegada.
Descensu espres per pista cómoda pel cordal de Conforcos
Dicho y fecho, desciendo lo más apriesa posible esta vegada pol cordal de Conforcos, pasando pela Col.la del Cristu, el mayéu Fernando, pa embaxo la Col.laína desviame pela manzorga, per una pista enllena envueltes que fadráme pasar poles Vegones hasta aportar a la Cul.liscá onde facemos una llarga envuelta de dreches pa entrar en Beyo pel Trechuru.
En total, unos casi 20 km de percorríu y 1200 m de desnivel acumuláu, algamáu en 4 hores y 20 minutinos, corriendo, andando, parándome a esfrutar del paisaxe con Kíla... a la fín, tornando a sentime bien, a gustu, seguru.
Camudando'l Camín na meyor compaña
No hay comentarios:
Publicar un comentario