Oseya (Sayambre) - Picu H.ariu

28 d'Agostu de 2016

Track: Oseya (Sayambre) - Picu H.ariu

Siguimos en Sayambre y dempués de palizón de la vuelta al Niah.u, del día anterior, ta costándonos llevantar del sobre. Muncho tien que ver, que la nueche anterior, magar de la cena, lliáramosnos nun chigre tomando cerveces y chupitos y falando col dueñu hasta bien tarde.

Esa mesma nueche, ya decidiéramos que la xubida al Niah.u nun diba ser, porque la baxada pela pista dende Llaete fízosenos pesadísima. Asina, que suena'l despertador y al mal cuerpu súmase un borrín densu en tol valle que vemos dende la ventana l'habitación.

Partimos d'Oseya (753 m) en Sayambre

Decidimos siguir una horina más nel sobre y que l'ascensión definitiva sedría al H.ariu. A les 9 llevantámonos cola calma, almorzamos perbien nel Hostal la Cuna del Sella, onde'l tratu, l'ambiente y les habitaciones son maraviyoses, tando a les 10 dimpuestos a dar un paseín pa quitar la resaca.

Nun tenemos track y el día nun ta p'aventures, aún así intentaremos siguir la ruta de la Senda del Hayedo  col móvil y dir orientándonos col gps. Poro, saldremos dende Oseya hacia la Ermita de San Roque pa garrar la senda del Arcedianu hasta pocu dempués del crucie col ríu Busecu onde saldremos per un camín a la mandrecha.

Pasamos de la Senda L'Arcedianu a un camín hacia Barcantiz

Esti camín, llévanos ensin problemes hacia les cabañes de Barcantiz y d'equí la ruta debería tirar hacia Llabeñu per praos y senderinos, pero como nun vemos res, nin tenemos sienda marcada nos mapes, decidimos siguir per pista pasando por Fuentibañas, nuna enorme envuelta hasta topanos col camín qu'empobínase hacia Vegabañu.

Nesti crucie tiraremos a la mandrecha y pocu dempués otra vegada a la mandrecha pa pasando pelos Porros y la Regulera aportar a Llabeñu, magar d'aproximádamente 3,5 km y una hora perdida de percorríu. 

Aportamos a Llabeñu pa siguir hasta'l colláu Llabeñu (1415 m)

Dicir que nesti día, yera lo meyor que podíemos facer p'asegurar el cumal, pero encomiendo a los llectores a facer la variante qu'añado nel track, la cual ta perconocía de la baxada del Trail de Sayambre.

Esta tendría de llevanos pela senda L'Arcedianu a la escontra del nuesu sen, pa desvianos dempués pel camín vieyu a Valdión, pa tomar dempués camín hacia a la braña de H.ustidiosu primeru y a la de H.ucerratu dempués, aportando nunos 5,3 km al colláu Llabeñu.

Entamamos de Llabeñu la enorme panda hacia'l Picu H.ariu

A la escontra, nesti día borrinosu, nós ficimos 6,6 km de pestosa pista, con menos interés montañeru que la propongo como variante, quedando'l percorríu totalmente circular. Pero bono, ye lo qu'hai, saldremos de la h.orcada Llabeñu y negociando y restolando pente les siendes diremos superando desnivel como vamos pudiendo.

Poquín a pocu vamos avanzando camín, superando esos 500 m de desnivel que sepártenmos del cumal del H.ariu y p'agasayu pol esfuerzu, la testerona de siguir con borrín y les ganes d'aprovechar el día... el sol paez entamar a calecer y asoleyar con fuercia faciendo abrir el borrín con tan sólo 100m de desnivel sol cumal.

Siguimos la enorme panda cola recompensa brutal del cielu abiertu y vistes

Aportar a los 1913 m del H.ariu, con vistes pa les cotes más altes de Picos y de la redolada, con un mar de ñubes increyible nun tien preciu. El día y nós mesmos, por echanos unes rises de más la nueche anterior, nun tábemos pa folixes pero finalmente alcontramos un plizcu de suerte con semeyante final.

Nun tamos sólos nel cumal, ya qu'anden per ellí, un grupete pucelanu mui animosu col que charramos un ratín ya incluso faense semeyes con nós, lo cual presta, xente animosa, anque les nueses cares fuesen de meyor tábemos na cama, jeje.

Cumal del H.ariu (1913 m)

Fai sol, llevamos tol día moyaos, ayeri pegámonos una paliza xabaz na vuelta per Tolivia y Llué y de nueche rematamos con comedia, poro tirámonos nes peñes a tomar el sol y descansar, cuando los pucelanos colen y aporta otru grupín de montañeros pel este, sin que nos de tiempu a relaxanos del too.

Nesti casu la fala ye nuesa, son asturianos y en mediu de l'alderique entrúguenmos d'onde somos y que grupu, contestando de Xuan de la Borrina... sonándo-yos muncho más el blogue Camudando'l Camín... enterándome que taba en presencia del gran Viti Pisapraos.

Descensu pente'l borrín de nuevu

Mil rises, xinta, anéudotes, llingua y demás temes de que falar dempués, despedímonos porque'l borrín torna al ataque xubiendo d'esos 100 m de desnivel a unos 50 namái, asína que pa garrar bien el senderu de baxada ambos grupos despedímonos hasta la próxima quedando encantaos de conocenos.

Ellos tornaben hacia'l puertu de Panderruedas y nós descendíemos a Vegabañu dende la H.orcada Neón, pero ensin ver na, tampoco fuimos a garrar el camín más direutu que si qu'usamos nel Trail de Sayambre, a la vera la riega Turéganu.

Facemos descensu con calma hacia Vegabañu

Nel nuesu casu, desviámonos hacia la riega de Valdelafuente, la cual abandonaríemos ceo al alcontranos col camín que vien dende'l Puertu Dobres, empobinándonos ensín perdida denguna hacia'l guapu refuxu de Vegabañu, nel que tuviéramos nun va munchu tiempu na Travesera.

Con casi 5 hores y media de patéu, aportamos al refuxu onde tomámonos una cerveza bien fresquina la cual revitalízanos un pocu, al tiempu que'l día paez querer entamar a orpinar. Asína qu'apurámosla y siguimos camín pente los ablucantes fayeos de Vegabañu.

Los fayeos de Vegabañu enxamás deceicionan

El camín va llevanos durante 2 llarguísimes hores más y casi 9 km, faldeando tol monte H.ariu pasando penriba de Sotu hasta dir averándonos poquín a pocu a Oseya faciéndosenos treméndamente llargu tol patéu per pista, sobretou del crucie de baxada hacia Sotu n'adelantre, ya que piérdese un pelín esi toque a fayeu preciosu y la pista ábrese hacia'l valle con poques vistes nun día ta pestosu.

A la fín, damos colos nuesos güesos y pies n'Oseya dempués de pocu más de 7 hores y media de ruta, nos que percorrimos un total de 21.3 km y un desnivel acumulaú de 1725 m, lo cual da entender que la ruta nun ye tan cómoda nin cenciella como camentábemos.

Ta la próxima...

Camudando'l Camín con Viti Pisapraos