jueves, 27 de febrero de 2020

Trail de Deva (Xixón)

16 de Febreru de 2020

Track: Trail de Deva (Xixón)


Web del Trail: Trail de Deva (Xixón)
 
Clasificaciones: Clasificaciones 2020  
 


Siguimos intentando garrar ritmu y dempués de les carreres curties de final y entamu d'añu, quería facer más kilómetros correnderos y ver como díbemos respondiendo, pero, un mal vuelu esguilando nun proyeutu, fízome llevar un mes resintiéndome del tobillu.

Salida correndera como siempre en Deva

Como siempre, nun lo miré na, pensé que con reposu y dexando un pocu de correr diría curando pero dolióme un día yendo de monte y nun dexó de doler nel restu de la selmana anterior a la carrera. La semeya d'abaxo nel kilómetru 5 diz a les clares, que diba esmolecíu por tener qu'aguantar media maratón col tobillu hincháu y con dolores.

Tramu más duru de xubida y barru nel que díbemos sufriendo un pelín

La verdá ye que sólo xubiendo caminando, podía forzar y dir fuerte, pero per tarrén inestable y sobretou les baxaes, diba sufriendo un montón, anque bono, conociéndome se que tengo muncho aguante al dolor, asína que decidí siguir pesie a esfrutar res en munchos tramos.

Paez que somos a recuperar nos tramos casi últimos de xubida

Ya pasaren 4 años de la última vegada que corriera per Deva, anque suel ser llugar de munchos entrenos faciendo kilómetros per Xixón. Ensín más decidí continuar en carrera y los kilómetros fueron pasando, hasta'l 15 onde ya decidí que diba terminar sí o sí.

El tobillu nun me dexa dir esfrutando nos tramos más correnderos

El tema ye que diba bien per tarrenes más quebrapates onde pudiera cambiar la pisada pero cuando tocó tirar de baxada más contina, ya viera que nun yera a caltener nin mediu ritmu decente, pasándome muncha xente siendo dalgo que se me da bastante bien y eso te va minando poquín a pocu.

Muncho dolor nes baxaes tendíes

Ensín más, faigo la segunda pasada pel observatoriu y ya intento dar lo másimu col envís, d'aportar de bon humor y con sensación d'al menos facer un entrenu curiosu, pero la baxada más teúnica faíseme un infiernu con muncho dolor y quien diba decímelo a mí, cuando al fín aporto al asfaltu, soi a disfrutar de pisar firme aportando a la meta con sensaciones de facer lo que pude al menos, pero coxeando claramente a los 30 segundos de parar.

Feliz de pisar en llanu y finar el trail

Menos mal que tenía a mi compi de carreres Montse, pa echame un cable, una sorrisa y un pescozón diciéndome que toi chifláu por correr así. A la fín, terminamos un trail de 26 km col ligamentu deltoideo rotu, asina qu'a ver si somos a recuperar a tiempu pa la siguiente que tenía na tiesta... el trail de Peñamayor.

Como siempre, mil gracies a los fotógrafos pol so llabor y a voluntarios y organización que siempre dan ánimos anque te vean dir con mala cara
-------------------------------------------------------------------------

miércoles, 26 de febrero de 2020

Trail Afuega'l Pitu (Morcín)

19 de Xineru de 2020

Track: Trail Afuega'l Pitu (Morcín)


Web del Trail: corriendoxmorcin.com

Clasificaciones: Clasificaciones 2020 


Una vegada más tornamos a correr en Morcín na clásica xubida al Monsacru. Tol mundiu que-y gusta esto del trail, tien claro qu'antes o dempués pases pela mítica canal d'Otura, que tanto nos sirve pa entrenar, yendo casi siempre más rápido nos propios entrenos que na carrera.

Cola calma pela canal p'arriba

Cosa que ye bien normal, ya que la gran afluencia de participantes fae que se faigan coles y seya imposible casi, perpasar a naide en tola ascensión pela canal y los caleyos anteriores. Aún así, si lo tomes con un pelín de calma, disfrutarás d'un ambiente de corredores montunos y d'una xubida con rises y bon rollu.

A bon ritmu pel tramu más guapa mirando pa L'Aramu

Llueu cuando'l tema afloxa ya toca caún garrar so ritmu y tirar fuerte na parte cimera del Monsacru onde senderos bien guapos y dellos xube-baxa en tarrén de monte preciosu, fai que la carrera garre un puxu más competitivu.

Baxada final hacia la Foz

Como siempre, dempués de facer una xubida cómoda, apreté na parte intermedia hasta qu'entamó la baxada onde ví que nun podía dalo too colos playeros casi nidios que gasto y tocó baxar ritmu pa intentar nun zampar un fogón como nel Villacabra Trail.

Aportando a meta

Al final, carrera na que pintaba fatal la meteo, pero tuviemos suerte y sin demasiáu fríu pudimos esfrutar del monte y si nun m'equivoco de la mio meyor participación nesta carrera en cuanto a posición y tiempos... y como dixe me lo tomé pelín tranquilu, poro habrá que dir a fueu un añu d'estos.

Mil gracies a los fotógrafos, a los voluntarios y a los organizadores por esta carrerina tan prestosa.

viernes, 21 de febrero de 2020

VillaCabra Trail (Villaviciosa - Cabranes)

16 d'Avientu de 2019

Track: Trail Villaviciosa (Villaviciosa) - Santolaya (Cabranes)


Web del Trail: Trail Villaviciosa - Santolaya

Clasificaciones: Clasificaciones 2019  


Arrancada la temporada col debú en Tierras Pésicas y cola decisión de participara nuna carrera al mes, vuelvo dempués d'un par d'años al VillaCabra Trail, que como siempre trespasa los conceyos de Villaviciosa y Cabranes xuniendo les dos capitales de conceyu.

Salimos caleciendo patuques de Santolaya

Esti añu, la carrera diba al revés, saliendo de Santolaya y arribando a la Villa, onde tamién como tolos años, teníemos la mítica fabadona pa tolos participantes. Como siempre, de diez la organización y como tolos años, de díez el nivel de barru de la prueba, increyible totalmente.... una llocura.

El barru y los tramos rápidos un clásicu nesta carrera

Siempre hai barru enforma nesta prueba, pero dos meses siguíos lloviendo, ponía les condiciones de la carrera bien dures, ya que sigue siendo una carrera rápida, con pocu desnivel y dir a altos ritmos per llamargues y caleyos dafechu tomaos d'agua y barru, ficiéronla perdura.

Munchísimu barru nos caberos kilómetros


Esti añu, competía nel trail cortu, el cual prestóme, quitando muncha carbonilla y pudiendo dir al máximu durante munchos tramos de la carrera, anque fáltenme más carreres y un pocu más de físicu, anque pa ser la segunda carrera en dos años, un puestu 44 (23 de mi categoría) de 194 participantes, déxame nel llugar nel que debo moveme en tol añu colos entrenos inesistentes que faigo jajaja.

La próxima más y meyor...

------------------------------------------------------------------

miércoles, 19 de febrero de 2020

Trail Tierras Pésicas (Cangas del Narcea)

17 de Payares de 2019

Track: Tierras Pésicas (Cangas del Narcea)


Web del Trail: Trail Tierras Pésicas

Clasificaciones: Clasificaciones 2017 


Tornábemos a les carreres dempués d'añu y mediu por lesión y la idega yera nos primeros meses dir garrando puxu y fondu, con carreres más curties, asína que Montse y yo decidimos correr en relevos faciendo la primer parte ella y la segunda pa min.

Esnalando venía la collacia de relevos

Daben un día dafechu horrible, pero aún así averámonos hasta tierres pésiques, almorzando cola calma en Cangas del Narcea y preparándonos por turnos pa correr. Montse con menos tiempu, prepárase y ensin saber como va sentise sale con toles ganes.

Salimos fuertes dende'l primer momentu

Corro pa calecer los 2 kms que separen Cangas de Courias y toca esperar pol relevu, contando 2 pareyes mestaes, que van per delantre nuesa. Camiento, que si vien Montse nesta posición hai que dalo too y ye asína, que llega al relevu, apúrreme la pulsera y salgo como un avión nel mió tramu de carrera.

Nel Alto L'Acebo tocaba tastiar la ñeve

Voi garrando ritmu y bien ceo, va sobrándome'l cortavientos, ya que'l finu orbayu nun molesta tanto y yendo a fueu como voi nin lo noto. Los kilómetros van pasando y l'ascensión hacia l'Acebo va pasando, siguiendo ganando puxu y esfrutando munchísimo nel patéu pela ñeve y en tola baxada onde soi a pasar al segundu clasificáu de relevos.

Tramu final de la carrera na que finé sorprendentemente mui fuerte

Llueu vendría un tramu, de xube baxa nel que me relaxo pa nun tener calambres ya que llevaba muncho ensin correr y déxome dir, pasándome de nuevu'l segundu clasificáu que dase cuenta de la situación y ponse a baxar ensin xacíu, pensando en pasar de siguilu, pero veóme bien y defechu sigo a una distancia prudente por si-y da baxón, lo cual pasó nel tramu de senda pegáu al rigu Narcea y sobretou na entrada a mete, cola cuesta Arrastraculos que pue tumbar al más pintáu.

Aportamos a la meta pelín fundíos por mor d'unos kms a fueu

A la fín, aportamos a la meta segundos clasificaos en relevos mestos y con una patatada increyible por culpa del pique final de los otros participantes. La verdá ye que corro por esfrutar del monte, por veme fuerte pero nun tengo esa competitividá y siendo sinceros a falta de 3 km, costóme tener la motivación p'apretar ya intentar ganar esa posición... pero que coño, l'esfuerzu nel relevu de Montse bien lo merecía.

Camudano'l Camín col primer podiu correnderu

Como siempre, dar gracies a organizadores, voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Pedro Pablo Heres, Marisol Azkárate, Asociación Cultural de Mual, Mariaw...) 
---------------------------------------------------------------------

19 de Payares de 2017

Track: Tierras Pésicas (Cangas del Narcea)


Web del Trail: Trail Tierras Pésicas

Clasificaciones: Clasificaciones 2017 


Magar del descansu, más que necesariu, d'un par de mesinos llueu de correr la maratón de Güeyinos del Diablu, tornábamos a l'aición en tierras pésicas, ye dicir, en tierres de los antiguos pobladores del suroccidente astur.

Madrugaremos un güevu, Carlinos y yo, conduciendo pente rises y temperatures baxísimes hasta la capital del vinu del país. Asomaremos el focicu fuera'l coche y de retrucu, quítense les ganes de too, pero sobretou de pensar en ponese pantalón curtiu y correr los 26 km con 3100 m de desnivel que tien el trail.

Esperando al últimu momentu pa mudanos de ropa... vaya rasca

Dempués de garrar el dorsal, tomar un cafetín y remolonear pa nun dir a mudase la ropa y quitar el plumes y el gorru, preparámonos nel coche y axuntámonos tolos corredores, pente saltinos y calecer de manes na meta.

Como tamos en tierra de pólvora, tenemos la cuenta atrás a base de voladores y salimos peles cais de Cangas baxando hacia la puente sol ríu Naviego y entamaremos l'ascensu hacia la capiya del Pandu, pa descender dempués peles viñes, lo que da un toque bien prestosu al correr.

Dende los primeros kilómetros mui correndera

Tocará pasar de nuevu per Cangas, col entepechu de la cai Arrastraculos hacia la meta y dempués d'echar un tragu y xintar dalgo, siguimos avance hacia la gran ascensión del día, que nun ye otro que los casi 800 m de desnivel hasta L'Acebu.

Ye un tarrén de tramu pindiu al entamu, pa llueu pasar a pistes correnderes cruciando en dellos puntos cola carretera, pitándonos y animándonos los coches que xuben a animar hasta riba. Tamién, fue un puntazu la descarga de salida pal trail cortu... equí si qu'echaron el restu jajaja... vaya tronada de voladores.

Xubides pindies pal Acebo y llegando a Cangas

La parte final hasta'l santuariu ye al traviés d'un cortafueos con una pendiente totalmente continua ensin descansu que pone a preba l'estáu físicu de los corredores. Nesti puntu, alcuéntrome con Wifre, un collaciu que ye un titán corriendo ultras charrando un ratín xuntos pa siguir caún el so camín.

Aporto al avituallamientu, onde xinto daqué y toca tirase cuesta abaxo, a lo xole per cortafueos pa pasar a una pista rapidísima, alternando con dalgún tramu más téunicu pegaos a la riega de los Fondones hasta aportar al Pontón.

Descensos rápidos y cenciellos na so mayor parte

Equí, ya tocará facer l'ascensión final, mui pindia, que pon les pates a fundir hasta enllazar na ermita de Santana col mesmu camín pel que baxáremos nel otru pasu per Cangas. Como non, l'últimu tramu de caleyéu cola ascensión pela Arrastraculos faise pelín infernal pa dempués de 25 km y unos ritmos de 6 min y mediu'l kilómetru.

A la fín, posición 41 na xeneral y 24 en senior, lo cual diz que fue bona carrera, anque como se ve nos ritmos ye mui correndera pal mió estilu, lo que nun quite que me prestara munchísimu'l percorríu y el bon ambiente y organización.


Final con un solín bien prestosu y munchu tiempu pa vermutiar

Pa nota, aparte del tema organizativu, con duchina caliente, abundancia nos avituallamientos, voluntarios animando tol tiempu... dicir que cada día presta más quedase a xintar tolos corredores y compartir mesa entre rises y cares de cansanciu.

Como siempre, dar gracies a organizadores, voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Pedro Pablo Heres, Marisol Azkárate, Asociación Cultural de Mual, Mariaw...) 

viernes, 7 de febrero de 2020

Villanueva del Rosario (Málaga)

Nadal 2019

Siguimos per tierres andaluces y más en concretu, malagueñes, yéndonos esta vegada hasta Villanueva del Rosario, onde alcuéntrase ún de les escueles más nomaes a nivel internacional, cola cueva de Chilam Balam, onde asítiense dellos novenos de dificultá.

Vista del paré del Corral en Villanueva

Del más que turísticu Chorro, col caminito del Rey, atopámonos nun pueblu más grande, con dellos servicios y polo que pudimos ver muncha más vida diaria. La pena, l'intensu fríu nesta dómina del añu, ya que tamos a unos 700 m d'altor y caen unes xelaes na nueche que faen pelín dura la vida furgonetera.

Guapa escalada nesti seutor de caliza gris

A dicir verdá, hasta que nun salía un pelín el sol nun había quien parase y pa esguilar namás que podía facese al sol, así que nin tan siquiera fuimos a conocer la cueva nomada de la Chilam Balam, poro trepamos un par de díes nun seutor soleyeru col nome del Corral.

Kíla esfrutando del paisaxe malagueñu

Asina que, tomamos esti seutor como'l tarrén de xuegu pa trepar y caún tuvo nel so grau munches y variaes víes pa trabayar. Personalmente, fice un par de 6cs a vista bien prestosos y nun sé mui bien el motivu, pero enfrasquéme nuna llucha con un 7a+, nomáu Pan y Circo.

Gelo y Orlando apretando en delles víes

El primer día montelu dempués de calecer nun 6c y gustóme tanto su tastu regleteru y plaqueru con un par de desplomes finales de regalín que tuve dándo-y un par de pegues esi día y al siguiente volví a da-y otros dos pa encadenala y terminar el viaxe con un puntín de motivación pa la vuelta a los proyeutos n'Asturies.

Camudando'l Camín en Villanueva del Rosario

Villanueva_del_Rosario (Seutores visitaos)

Croquis modificaos por mi de la escuela d'escalada por mor de delles páxines pela rede. Gracies y col so permisu.

----------------------------------------------------

miércoles, 5 de febrero de 2020

El Chorro (Malaga)

Nadal 2019

Al igual que l'añu anterior en Cuenca tornamos a colar d'Asturies pa facer un viaxe d'escalada na dómina ivernal del añu. Lo normal n'Asturies ye colar a la gueta de calorín y por eso decidimos averanos hasta Málaga, qu'hai que dicir que pilla lloñe de coyones, pero bono ye lo que tocaba nesti viaxe... gastar perres en chofa.

La primer parte del viaxe dedicámoslo a conocer la fastera del Chorro, que pudiera dixebrase en dos grandes escueles como ye Desplomilandia y el propiu Chorro. Los dos primeros díes tuviéramos en Desplomilandia qu'a lo postreru, a lo menos pa mí, fue'l llugar nel que más disfruté tanto esguilando como yendo a entrenar corriendo.

El llugar al pie del enorme banzáu, les escueles a la solombra pesie al calor, fae que seya un bon llugar, camiento que pa la primavera ya que n'iviernu la falta de sol faiga que seya pelín penosa la escalada. A destacar de la escalada, lo entreteníu, con pasos de bloque y descansu continos, asemeyándose un pelín a Cuenca, pola escalada de furacos sobretou.

Llugar máxicu l'entornu de Desplomilandia nel Chorro

Dicir que paecióme una escalada cenciella de dir a vista flash, ya que personalmente nun tenía dengún 7a/+ al flash y nel primer día me llevé'l primeru, lo que nun quita que la vía (El chupacabras) fuera bien guapa.

Al siguiente día, movímonos un pelín a la mandrecha, pa pasar de Como la vida misma al seutor Buena Sombra, onde collacios ya tuviera va unos años y pudieron recomendame, la propia Buena Sombra (6b+) y Yogur de Coco (6c), llevándome tamién otru 7a al flash como ye Viejos y Puretas.

Andrea trepando nel Chorro en vía llarga y curtia


Al siguiente día desplazaríemonos hasta'l Chorro, onde dempués de garrar sitiu furgoneteru xubimos hasta'l seutor Suizo, onde camudamos la escalada de furacos, pola placa más asemeyada a un Quirós, al menos na mandrecha'l seutor.

Ellí, ficiera un 6b llarguísimu y pasaría dempués a pegamos dos con otros dos más curtios pembaxo de la parte más desplomada del seutor. Estes dos víes curties, perres enforma, pasaríen a probar de nuevu un 7a (Coño Paco), que dexáranme montáu xente del grupu.

Mientres tanto, collacies como Anna y Andrea, se pegaben con un vistosu 6c del que tan bones semeyes pudimos sacar dende riba l'espolón que facía de pié de vía pa la mió vía. Llueu de ver los respeutivos pegues, pudo dar un primeru a Coño Paco, pringando nel pasu d'abaxu pa encadenala a posteriori cuando ya que quedaben poques hores de lluz... diben notándose los díes y la fuercia diba desapaeciendo.

Anna nuna ablucante vía de placa nel seutor Suizo

El cuartu día, enantes del descansu, camudaríemos de seutor, aportando hasta la Momia y Poema de Roca, onde ficiera un par de víes, enantes de meteme nun durísimu 6c, onde'l cuerpu decía a les clares que tocaba un descansu físicu y tamién mental pa los próximos díes.

Nel intre, taba claro que me quedaba colos dos díes en Desplomilandia, ya que tanto l'allugamientu a la vera'l banzáu y la agradecida escalada, ya que yendo físicamente fuerte les víes yeren cencielles de lleer y bien guapes d'escalar, con pasos físicos y casi dinámicos.

Vamos da-y ta llueu a estes escueles... porque nunca sabemos si tocará volver.

Camudando'l Camín en Málaga

El Chorro (Seutores visitaos)

Croquis modificaos por mi de la escuela d'escalada por mor de delles páxines pela rede. Gracies y col so permisu.
----------------------------------------------------