Cuenca (Cuenca)

23 y 24 de Marzu de 2024

Vacaciones de Selmana Santa, con munchos planes na tiesta, de primeres con idega d'escalar per Cuenca dellos díes y colar pa Soria a andar en bici, pero siempre pendiente de la meteo, ya que nun lo daben bono precísamente, poro tamién, teníemos la opción de continuar viaxe esguilador hacia'l Levante.

Al final, namái que pudimos esguilar un par de díes per Cuenca, nós que pela mañana salí a dar una vueltina en bici, viendo muches posibilidaes pa la bici monte, asina que nun sedrá la última vegada que meta la bici na furgo, nin munchos menos, ya que fai l'amestaura perfeuta salir pela mañana en bici y esguilar tola tarde.

Conociendo'l seutor del Merendero na Hoz del Huecar

 

El primer día, averámonos hasta la Foz del Huecar, onde nunca esguilar nos distintos viaxes y ficiéramoslo nel Merendero, ya que les mañanes d'almuezu estirábense y nun mos dió tiempu a conocer la cueva la Zarza, onde ya entraba'l sol pa la hora a la que llegábemos, poro echamos pie a tierra nel merenderu y centramos la vista nun par de 6c+, col envís de calecer deos nellos, pero como siempre, la vía Libertad (6c+) púsonos nel nuesu sitiu y ya vimos los graos nos que tocaba movese tol viaxe, teniendo qu'encadenala al segundu pegue.

 

Colos díes llarguinos ya, tuve tiempu a dar un pegue fuerte a vista a Imaginación, un 7a, que pa mi ronda'l 7a+, pifiando nun pasín non mui duro na metá de la vía, pero sicolóxico pegando un volátil de los guapos, pero viendo que na parte alta, tenía toles papeletes de pringar tamién, ya que tien un pasu regleteru que toca tener bien controláu. En resume, rutón que quedóme apuntáu na tiesta pal prósimu viaxe, al que-y dí un segundu pegue cayéndome na parte alta, que como dixe, hai que llevar bien controlada ya que ye fina, fina.

Probando un 7a increyible... que llamábase Imaginación

Al día siguiente, volvimos al Júcar, cola calmísima, ya que salí en bici una tiradina llarga y teníemos qu'esperar a la entrada de solombra en Juego de Bolos, el primer seutor del Júcar a la manzorga la carretera, si miramos dende Cuenca. La última vez que fuéramos, pasamos echando un vistazu a les víes, pero'l murín nel que pudimos paranos siempre taba estráu de xente.

Esta vegada, malpenes había 5 o 6 cordaes asina que pudimos escoyer vía, caleciendo en Alpi un 6c+ con un tramu de fisura bien guapu, pelín suave comparáu col seutor del día anterior y terminamos con un encadene al flash de Mirando pa Cuenca, un 7a míticu, mui guapu y tamién un pocu sele ya innecesariamente manufacturáu na parte alta, pa que llueu digan d'otros sitios, grandes adalides de la escalada llimpia.

---------------------------------------------------

Del 9 d'Abril al 14 d'Abril de 2022

Ya tenía ganes de colar cola furgo dellos díes, col envís de desconeutar del curro, entrenos nel roco y dedicase namái qu'a trepar en roca, pero les entrugues yeren munches sol mió estáu físicu, magar de llevar dos meses mancáu d'un antebrazu, tiempu nel que nun pude entrenar duro y la roca fue más menos testimonial.

D'otra miente, pesa más tar colos collacios de furgonetéu, que cualesquier posible oxetivu en forma d'encadene o de sensaciones escaladores, asina que tiramos de viaxe hasta Cuenca, con bien de ganes d'axuntanos toos y esguilar tolo que se pudiera.

Cuenca un paraisu pa la esguilada y un cascu antiguu maraviyosu

De sábadu pela mañana, axuntámonos Lau, Suco, Anna y yo, yendo lo primeru a mercar una guía y col día pelín amurniáu mediu orbayando, fuimos a lo conocíu, pudiendo trepar en Alfar, onde llevamos el primer bofetón del viaxe, en forma de pringar Al Tran Tran, míticu 6c+ que ya tenía encadenáu y nun llevame n'otros dos pegues, el Gato con Botas, un 7a, que dexara nel tinteru del viaxe anterior.

Como non, Anna que ta fortísima, enchufó Al Tran Tran al segundu pegue y ye que la verdá ye qu'esta vía ye imprescindible, pura resis, cosa que comprobé que nun tenía, al igual que yemes, ya qu'al finalizar el día taba con una pelada de pelleyu que pintaba mal pal restu de díes.

Suco y Lau apretando nos furacos de los muros de Cuenca

Al día siguiente, améstense al equipu Xabi, Nathalie e Iso, más Juan, collaciu astur de Tapia de Xavi, col que ficimos bones migues y ficinos de guía, de seutor en seutor y de vía en vía. Esti día, averámonos hasta Portero de Noche, onde siendo domingu, teníemos les víes recomendaes pillaes, poro fuimos a unes recién equipaes, más curties, llevándonos a vista Glucodependientes (6c) y pringando y desyemando más entá, con Oasis (7a), vía tamién bloquera pero mui divertida de movimientos.

Xavi e Iso a lo suyo encadenando tolo que podíen

Esi día, llueu de tres pegues a Oasis, tuviera tiempu a prebar Musculitos Girl (7a/+ según per onde faigas el bloque), vía na que metíeronse Anna e Iso, pa nun engorilase como yo en Oasis. Esti día, terminara dafechu fundíu, obligándome a dar pegues de más, por garrar dalgo de continuidá, pero viendo como collacios como Suco y Anna llevábense Oasis y Musculitos Girl, yendo de frente dafechu... perbonos pegues d'ambos.

Prebando Oasis, un guapu 7a de reciente equipación

El tercer día, averámonos hasta Piscinas, onde guiyáos por Juan, entramos toos a Monte de Venus, un 6c clásicu que pudimos facer a vista o flash ún detrás d'otru, menos Suco al que'l cuerpu dixéra-y basta. Pocu más diba facer yo, viéndome mui mal de yemes y desmotiváu por mor del mió estáu físicu, asina que La Hormiga, diérame'l toque final, pa dexar d'esguilar en tol día, demientres Anna e Iso, probando con ganes un 7b, abellugaos d'un vientu que ya taba fadiando de más.

El cuartu día, tornábemos a Alfar, con ganes d'intentar quitar víes del tinteru, metiéndome al Gato con Botas, poniendo cintes, pringando mui arriba, por equivocame de presa pa salir. Al siguiente pegue ya la encadenaba apretando a muerte, al igual que Suco e Iso, que tamién llevábensela.

Momentos de relax ya seya pasiando pel cascu antiguu o nel pié de vía

Los díes diben pasando factura y Anna que tenía otros planes, acabó dándo-y 3 bonos pegues al Gato con Botas, por cuenta de prebar otres y cansaos, decidimos dir de paséu a pel cascu antiguu de Cuenca, acompañaos por Xabi, lo que resultó en conocer dalgunos chigres peculiares y escapar de la marabunta de les procesiones, pegando un pateín curiosu hasta'l Castillo de nuevu.

El penúltimu día d'escalada, diba ser en Sombretivo, metíendose Anna en Ayahuasca, pero la vía nun-y dió bona vibra y dexamos a los collacios per ellí, yéndonos a trepar en Portero de Noche, onde coincidimos con un andaluz, Javi, asítiáu en Cuenca y collaciu de Rober y Eli, que conociéramos en Figares, que recomendónos bien de víes, a cada cual meyor, que sumaes a les qu'apuntáramos de Juan, ficieron un final de viaxe muncho más motivante. 

Más paseos y fartures de fin de viaxe

 

Esti día, tuviera mediu orbayando y asina metiérame a montar Indigente Intelectual (7a), dando un bon pegue a vista y un meyor flash pa qu'Anna destruyérala nun pegón, muertos de risa, coles entrugues del tipu, "de xuru que son cantos bonos". Llueu del encadene, tocárame a mí rematala, dalgo cansáu, pero con munches meyores sensaciones tanto de resis como de yemes que los díes anteriores.

Con otru sétimu al bolsiellu, decidiéramos que ya taba bien y tocaba dir a pegar una duchina nes piscines y tiraríemos pal Castillu con Xavi y Nathalie, pa pasar otra tarde de chigreu y paséu, hasta xuntanos toos na cena fin de viaxe, aportando a ella tola familia d'Iso y Ani y Rubén, completando l'equipu final.

Y como siempre furgonetéu post escalada y chigréu

Agora sí, quedaba'l día final o más bien la mañana final, ya que teníemos que colar tanto Anna como yo, a ver a la familia y teníemos viaxe pela tarde. Nesti día, según la recomendación de Javi, el día anterior, decidimos volver a Portero de Noche, restolando pente toles muries hasta que topamos una línea que prestábanos y que yera recomendada, Cuéncame tus Penas.

 

Esta vegada, tocába-y a Anna montar y a mí intentar el flash, pero a la fín, tuviemos que conformános con un segundu pegue caún pal encadene, eso sí, segundu pegue fanáticu, ya que la vía ye pelín de bloque con unos movimientos mui guapos de resis corta, asi que llegues a reunión con una bona inflada, como pudo comprobar tamién Rubén, que deleitónos con unos volátiles curiosos.

 

Con tol pescáu vendíu, magar de ver un ratín a los collacios esguilar y despedinos, tocaba xintar daqué y poner rumbu pa pasar el restu la selmana santa faciendo otres actividaes, ye dicir, correr un pocu y fartucase enforma.

 

Cuenca (Seutores visitaos) Croquis de Cuenca, como siempre mercái la guía xente en Cuencaclimb. Gracies y col so permisu.

---------------------------------------------------

29, 30, 31 d'Avientu del 2018 y 1, 2, 3, 4 y 5 de Xineru de 2019

Finales d'añu, planes? Ceru. Charres col collaciu, compañeru de cordada y de mil batalles nos caberos tiempos, Orlando. Dizme que tien díes y que prestaba pasar la nuechevieya esguilando perende. Piénseslo, mires calendariu y ves que con 3 díes de vacaciones coles a trepar la de mi madre de díes... pues na, avanti, pillo díes del 2019 y a matase.

Mires llugares, fálente de Cuenca, nun lo conoces, mires la meteo, fríu a retorcer pero con sol... a tomar pol culu, vamos pa Cuenca. Sábadu 29 pela mañana, garramos al tercer integrante de la cordada Nico, qu'acaba de salir de trabayar y rumbo cola calma p'allá.

Foz del Júcar colos seutores pegaínos a la carretera y al rigu

Aportamos a Cuenca y paramos nel seutor más cercano posible a la furgo y esi nun ye otru que l'Alfar, alcontrándonos con xente abondo, pero danos pa facer una vía jaja. Siempre quedará n'alcordanza ese pegue d'una hora de Nico a un 6a+... tengo que dicir que xustu ehí, descubrí mi amor a la lectura nos pies de vía.

El llibru en cuestión qu'ocupó mis tiempos de descansu ente pegues de los collacios, fue'l de Jorge Egocheaga: "Quizás vivir sea esto". Si nun lo lleístis, ye dafechu imprescindible, tanto pola narrativa como por conocer un pocu más d'esti grandísimu alpinista asturianu.

La ciudá de Cuenca y les foces del Huécar y el Júcar

Dempués de lleer un capítulu, demientres espero mi turnu pa esguilar, sólo pueu dicir qu'entraba a la vía con ceru esmolecimientu pol ésitu o pol fracasu, con ceru mieu a volar... sólo pensaba en que tar equí, arrodiáu de collacios, tomando'l sol y probando vía tres vía... ye tolo que quería facer y pocu importaba si encadenaba la vía o non.

D'esti xeitu, fuimos conociendo víes y seutores na foz del Júcar, ya que tamién tenemos la foz del Huécar o Valdecabras pa esguilar, pero nesti viaxe centrámonos nos seutores y víes que fueron recomendándonos xente llocal o tirando de guía y ye que les hores de sol y escalada yeren más bien poques, poro debíamos aprovechar al másimu enantes de qu'atapeciese y el intensu fríu nos echara pal chigre.

Orlando emplegándose a fondu nos sétimos del Sombretivo

De chigres meyor nin falamos, porque fuimos faciéndonos dende'l primer día, con un circuitu chigreru que nos ficiera pasar un tiempín agradable hasta la hora de la cena o más bien hasta la hora de metese nel conxelador que teníemos por furgoneta.

Comentar que si llegues a un aparcaderu, un sábadu, baxo dellos seutores y nun hai naide sobando... pues por dalgo sedrá, jaja. Esa mañana, alborecimos con xelu per dientru de la furgoneta y tomaríemos el café mañaneru tiritando y col termómetru baxo cero.

Felix y Nico probando delles víes

Al día siguiente, de Domingu, sumaríense al equipín astur en Cuenca, Cristina y Félix, faciendo'l quintetu definitivu del viaxe. Dende esi día, garraríemos el vezu del almuerzu na furgo, cafetín nel chigre correspondiente y dir a esguilar ya fuera en Alfar, Sombretivo o las Colmenas, que fueron los 3 seutores qu'ocuparon el total de les esguilaes.

La verdá, ye que les hores d'escalada nesta dómina del añu, quedábense un pelín curties, ya qu'antes de les 11 u 11 y media nun podíes entrar a vía, porque taba la roca xelada y a les 5 tocaba colar porque xelábeste dafechu. Lo que nun quita, qu'esfrutásemos munchísimu con cada pegue y con cada vía que probamos, encadenásemos o non... eso yera lo de menos.

Felix, Orlando y Nico nunos díes de sol brutales

Los díes fueron pasando, les víes diben cayendo y anque siempre lleves esi puntu de decisión inicial de nun dar más de tres pegues por vía pa prebar munches y nun entrar en mou proyeutu, al final, dalguna vía t'engancha y nun pares hasta encadenala.

A mí, pasóme cola Ayahuasca, un de los 7a's más guapos que fice na mió vida, una vía de 30 y picu metros, de pasinos de regletes y que como non, que pringué en cadena hasta dos vegaes, siguiendo cola mió alta capacidá de cayer siempre arriba, jeje.

Perbones les víes en Cuenca... un disfrute de furacos y pies finos

Al final cayó a la saca, anque fuera en más pegues de los deseyaos, cosa que nun pasó col Gato con Botas, otru 7a guapísimu, que pringué nel últimu día de viaxe, cuando ya ficiera tolo duro. Entemedies, fueron saliendo munchos sestos altos a vista y dalgún 7a al flash o al segundu pegue colo qu'aparte de dexar el Gato con Botas y otru 7a en Colmenas pa la prósima visita fue un bon viaxe no qu'a lo deportivu se refier.

No folixeru y nel día a día, fue un placer compartir almuerzos y cenes col grupín que ficimos, compartir cañes y rises nes post escalaes, compartir les campanaes de fin d'añu con gominoles, pa llueu conocer tolos garitos de Cuenca hasta les mil de la mañana y en definitiva esfrutar tanto la escalada como les hores de chigre y furgo.

Y ye que quiciás esto ye vivir... 

 Quiciábes... vivir si seya esto... monte, ñatura, escalar, collacios...

 

---------------------------------------------------