Cuaya (Grau) - Rañeces - Xerra Los Arellanes - Las Murias - Llauréu

9 de Marzu de 2024

Track: Cuaya (Grau) - Rañeces - Xerra Los Arellanes - Las Murias  - Llauréu

Continuamos investigando fasteres menos conocíes pa facer monte, siguiendo l'envís de dir tachando tolos vértices xeodésicos d'Asturies, averándonos nesti casu hasta Grau y más en concretu, hasta la parroquia de Cuaya, onde nel pueblín de Cuainxú, tenemos una escuelina mítica d'escalada onde munchísimes tardes de branu tuviemos apretando enforma.

Poro, nun yera una fastera desconocía pa min, pero sí que nunca tuviera na tiesta preparar una ruta de monte per estos llugares, asina que tocó tirar de mapa, restolar dalgo que poder tachar ya intentar que'l patéu fuera lo más atrautivu posible, llamándome l'atención poderósamente los rigos Las Varas o Menende y Busllán, por mor de lo xabaz de les sos foces.

Entamamos en Cuaya (150) caleyando un kilómetru hacia Cuainxú

Asina que, dempués del almuerzu en Trubia, tiramos hacia Cuaya per Sama de Gráu, que pa los que non conozan esta carretera, podrán conocer dellos pueblos bien guapos. En Reconcu, desviámonos hacia Cuaya, teniendo un maraviyosu aparcaderu xunto a la ilesia del pueblu, onde preparámonos pa la ruta, con un día muncho meyor de lo que la meteo quería albidrar.

Aportamos a Cuainxú onde garramos la senda del conde de Cuaya pegada al rigu Las Varas

Entamaremos caleyando carretera abaxo, hasta les cases de Cuainxú, durante un kilómetru aprosimáu pa xubir un pelín pela carretera y garrar a la manzorga, el senderu del Sanguinariu Conde de Cuaya, cruciando una portiella que llevarános pegaos al rigu Las Varas (nos mapes vien como Menende) percorriendo un cómodu camín, que sorpréndenos munchísimo polo guapo del llugar, col rigu y una viesca de gran valir paisaxísticu.

Esfrutamos d'un paséu perguapu al llau del rigu Las Varas que nun conocíemos y paga muncho la pena

Poro, esfrutaremos d'un paséu a la vera'l rigu de pocu más d'un cuartu d'hora, con tola calma, esfrutando de requexos bien curiosos hasta aportar a Menende, onde alcontraremos la ponte onde cruciar el rigu, pudiendo continuar la sienda hasta Alcubiella, pero nós, desviámonos pa conocer un camín empedráu, que va facenos xubir hacia'l pueblu de Rañeces, entrando a ésti per camín pegáu a toles bien curiaes praderíes, hasta dar cola carretera que xune col restu de pueblos de la parroquía (La Figal, Pandu, Los Llanos...)

Siguimos de Rañeces hacia'l monte Faeu que fainos xubir a la xerra Los Arellanes

Siguiremos dellos metros la carretera y desviámonos a la mandrecha per camín que va dir llevándonos pela faldera'l monte Faeu, penriba la carretera hasta que facemos una envuelta que métenos dafechu nel monte, esfrutando d'un tramín pente la fueya hasta salir hacia la parte alta del cordal, onde alcontrámonos con un pinar, llueu de pasar de tarrén de viesca asturiana, lo que sorpréndenos un pelín, anque tamién alcontramos dalgún ocalito na parte baxa'l monte, ye lo que tien repoblaciones ensin xaciu.

Atopámonos de tou nel monte Faeu (ocalitos, castañales, faya, carbayu y pino)

Llueu d'esti xaréu forestal, avanzaremos pinar alantre hasta salir a tarrén de praos, encumando en primer llugar con facilidá el picu La Espina (500 m), pa siguir hacia'l picu Cabornu (545 m) onde termínase un pocu'l placer del camín claro, ya qu'entraremos nuna fastera onde los praos caltienes sebes ya cierres y los supuestos caminos pente ellos, tan tomaos, poro nun mos queda otra que dir saltando de prau en prau, p'avanzar per esta xerra de Los Arellanes.

A la fín empobinámonos al puntu más altu los Arellanes, el Picu la Cogolla

Un pelín cansaos d'atopar tantos pilancos nel nuesu caminar, atopámonos con una paisana, con dellos mastinos un pelín gafos, qu'indícanos per onde meyor podemos alcontrar camín hacia'l nuesu oxetivu, como ye'l cumal del picu La Cogolla (594 m), al qu'aportaremos llueu de llibrar un tramín de barru y escayos, pel que tocó pinchase, pero qu'a la fín pudimos perpasar y facer cume nesti monte moscón.

Cumal del Picu La Cogolla (594 m)

Hai que dicir, que sacante de la parte alta de la Xerra los Arellanes, la ruta taba siendo per caminos bien guapos y el cumal, con bones vistes a L'Aramo, montes de Tameza, Teberga y Somiedu, anque pelín tomáu, yera la guinda perfeuta a esta primer parte de la ruta, asina que decidimos descansar picando daqué, durante unos minutinos, demientres distinguíamos tola redolada dende una visión pocu avezada.

Baxamos de la Cogolla hacia'l pueblu de Los Arellanes

Magar del descansu, saldremos direición Sur pel cordalín alantre, como siempre intentando llibrar saltos de praos, anque nesti casu, tendremos una bona pista dalgo hacia l'occidente que fadrános baxar per camín dende la Caballona hacia les cases de los Arellanes, onde si quixéramos, podríemos garrar carretera de nuevu hacia Cuaya, pasando pelos pueblos de Pandu, La Figal y Villar y pesllar una circular ya de por sí, bien curiosa.

Entamamos camín per llugares bien guapos pente praos y fasteres kárstiques

Nós, decidimos siguir ya que teníemos na tiesta conocer eses foces del rigu Busllar, asina que dende Los Arellanes, ascendemos per pista hasta la Venta Panicera y descenderemos hacia la Reguera, onde alcontramos praos increyibles y caminos bien prestosos,  atopando valles y fuexos, onde vemos como les riegues desapaecen nesti tarrén calizu, dando a pescanciar lo impresionante que debe ser la parte soterraña d'esta fastera de Gráu.

Continuamos camín esfrutando del paisaxe y de caminos de gran calidá montañera

Dempués de percorrer tolos valles fonderos de les riegues del Meiro y la Fondera, tendremos un pequeñu ascensu hasta'l pueblu de las Murias, onde teníemos afitáu otru puntu de parada, p'aldericar hasta onde queríemos allargar la ruta. Nel intre, el mió cadril diba quexándose y anque nun m'apeteciese parar la coxera, taba dándome señales que nun podía escaecer, asina qu'al pocu de salir de las Murias, tuve que tomar un ibuprofeno y decidir que nun diba allargar la ruta, anque l'aventura tuviera a los nuesos pies ya.

Dende Las Murias siguiremos per camín hacia Llauréu dexando la visita a la foz de Busllán pa otra vegada

Resignáu, siguimos descendiendo y dexamos de llau la baxada hacia la riega Busllán onde intentaríemos percorrer el xabaz calce o escapar hacia'l pueblu de Baselgas, pa garrar tarrén seguru y escapatoria per pista hacia'l pueblu de Llauréu, onde llueu de charrar con una paisana, aconséyanos baxar pela carretera hacia Cuaya.

Descendemos hacia Cuaya pasando per L'Asniella con tramos de camín y carretera

Al menos na parte alta del camín hacia Llauréu, pudimos ver un requexu dafechu xabaz como la riega Busllán, a la que pienso tornar en dalguna ocasión y ya, garraremos descensu, alcontrando una primer parte per camín al llau de la carretera pa ya garrar la parte final, hasta L'Asniella primeru y hasta'l molín de Cuaya per carretera, zarrando una circular mui interesante na ilesia de Cuaya.

En resume, fastera montañera a reconocer, ésta de les parroquies de la redolada de Cuaya, faciendo una circular de 17 km nun total de 6 hores con un desnivel de +/-745 m de desnivel acumuláu, que necesita más d'una visita p'acolumbrar les posibilidade de monte esistentes.