Cuanxú (Grau)

20 Xunetu de 2021 

Facía tiempu que nun volvía per Cuanxú, onde ta asitiada la escuelina nomada de Cuaya en Gráu y munchu más tiempu que nun me llevaba pal bolsiellu denguna vía, ya que los graos que me queden, ya requieren de visites davezu y non de xemes en cuando.

El casu ye, que dixérame Anna, qu'equiparen los collacios de Gráu otru 7a cortín col nome de Asgaya a la manzorga del 6b/nin se sabe, míticu de nin metese a calentar nella. El llunes tuviera probándola con Andrea y pringué nel tercer pegue por cagaprieses nun dinámicu.

Prebando la Sin Nombre de Cuanxú

Al día siguiente, tornamos al seutor Anna y yo, sorprendiéndonos de tar solos per segunda vegada, cuando en branu pesie al calor, un Cuaya más o menos, puédese trepar bien. Volví a montar la vía y al segundu pegue del día, ya la fice chapando la cuarta chapa pasáu, en quiciás el pasín, que más respetu da, ya que nun s'alcuentra chapaxe cómodu.

El restu del día, dediquéme a asegurar a Anna, que tuviera tamién dándo-y pegues a Asgaya, entrando en modu fanáticu cola vía, anque non pudo ser esta vegada. El próximu día, de xuru que llévasela tamién, porque quedóse a un movimientu nun par de pegues, cuando ya paecía que salía.

Cuanxú
Croquis de Cuanxú por mor de  Piratas Free. Gracies y col so permisu.

---------------------------------------------------

1 Marzu de 2019

Munchísimos fueron los pegues a la Het Kapittel, tanto que quiciabes hasta perdí la cuenta, pero de xuru que llegaron a los 15, la mayoría d'ellos cola compi Vane el branu pasáu. La pena fue que cuando la encadené, nun pudimos compartir birra como ficiéramos cuando ficimos la Judas el mesmu día los dos.

Esta vegada, Vane tuvo que parar obligatóriamente d'escalar por mor d'una lesión y tuve que buscamos otros compañeros motivaos pa dir hasta esta escuelina de Grau, na que siempre alcontramos un proyeutín que nos lleva a dalo too.

Nomes de cerveza pa les víes... como nun me va gustar

A la fín, cayera la Het Kappitel y ya tamos metíos n'otru fregáu como ye la Sin Nombre, que vien merez tener un plus más de dificultá y na que vamos progresando adecuándamente (PA+) y qu'espero enchufar cola llegada del horariu de branu.
Ver veremos si ye así y podemos acompañala con delles semeyes prestoses, ya que la Het Kappitel nun tuvo la suerte de ser retratada y quedámonos namás cola so simboloxía como señal de da-y preste a esta vía tan bloquera.

---------------------------------------------------

Branu del 2017

Esti branu, nun tuviera la suerti de tener fotógrafos brutales como va un par d'añinos, pero a la escontra, el nuesu nivel de motivación yera tan grande qu'echaríemos unes cuantes tardes en Cuanxú, apretando principalmente nuna vía... la Judas (7a).

Y un 7a pues nun podrá paecer gran cosa, pero personalmente, esta vía acabó siendo un amor-odiu brutal, ya que si sumamos un par de pegues que ya gastaba de va dos años, tuve que da-y durante cuatru díes, un total de 13 pegues.

Agora, echándo la vista atrás... alcuérdome que diba col envís, d'enchufar Hoegarden (6c) que la tenía pendiente tamién y la Judas nel mesmu día, pa entamar a trabayar en seriu Het Kapittel dende'l primer momentu.

Dos semeyacas de Mariño bien guapes de va dos años

Pero de lo que quies, a lo que suel salir... va un mundiu. Pa entamar Hoegarden, esi primer día llevóme tres pegues, montando la vía, dando un segundu pegue demasiáu confiáu nel que pringué y teniendo que da-y un terceru más centradín pa enchufala.

Con esi desgaste, sólo tuve la oportunidá de da-y un pegue de reconocimientu a la Judas, pringándola nun par de pasos con una petada perimportante. Como non, tornaríemos siempre una vegada a la selmana Vane y yo, pa volver a da-y duro ya intentar encadenar pero diba dir resistiéndose día tres día.

Hasta qu'un día, dempués de montar la vía nel primer pegue, dar un segundu nel que ya salía de lo duro y pringar... ya casi ensin esperances pela mió parte, primeru Vane y al siguiente pegue yo, encadenábemos d'una vegada la Judas, magar d'una llucha con una vía, que nun ye que s'adapte mui allá a mi estilu d'escalada, pero que supuso ún d'esos retos que tanto presta superar.

20 y 26 d'Agostu de 2015

Siguimos apurando los últimos díes de xornada de branu del 2015, alcordándome de lo ceo que pasa la xornada continua lo cual dame muncha pena, anque agora nel nuevu trabayu tendré casi 3 meses lo cual faime feliz enforma y dame un toque d'esperanza pa tener un branu tan bono como'l del 2013.

Aquel branu, fué'l de xubir grau a base de confianza na Manzanea, algamando hasta mi primer 6c a vista lo cual fízome muncha ilusión. Siempre, ye muncho más cenciello xubir nivel cuando muéveste en sestos baxos, pero de sestos altos a los sétimos, ya toca venir con tola motivación y ganes d'apretar del mundiu cada día.

Conociendo Judas... quiciás el meyor 7a d'Asturies según munchos esguiladores

Por embargu, van dos branos con discontinuidá nes miós esguilaes, con dalgún picu d'emoción con bonos encadenes, más 6c a vista, dalgún sétimu sueltu, inclusu un 7b y otru que ye mui posible que lu ronde pero... fáltame dar el pasu y esti branu... faltóme ganes d'apretar y sufrir dafechu.

En delles intentones de meyorar motivación y nivel busqué la compañía de collacios que trepen más que yo, más motivaos y con una vida y ganes de vivir alrodiu la escalada, que nótesla nel ambiente y los ánimos y el bon rollu faente apretar anque nun seya nin tu estilu nin tu meyor puntu de forma.

Dellos momentos trepando... trabayando la continuidá en víes desplomaes

Poro, tuve un par de visitines a Cuanxú con Orlando y Mariño, el cual sacóme un book de semeyes impresionantes dafechu. La vía cola que tuve pegándome un par d'intentones fué Judas, que tol mundiu diz que ye'l 7a más guapu d'Asturies.

Nun digo yo que nun lo sea, pero a mí lo únicu que me paez difícil d'esta vía ye tener la resistencia al desplome, ya que los movimientos por separáu son cenciellos, con bonos agarres y sáquense ensin dengún problema.

La vía ye guapa enforma d'eso nun hai dubia

Pero ehí ta la gracia del desplome ya qu'anque les preses seyan impresionantes los músculos van dexando de tener fuercia abriéndose les manes anque teas agarráu del mayor cazu del mundiu. Tamién, esta vía tien 3 llances que pa la mió estatura supón un plus de dificultá, pero nun ye escusa denguna ya que debería salir.

Neso pensaba'l día que volví con Alberto y con tranquilidá tamién-y metí otru pegue de calentamientu poniendo les cintes y un segundu a muerte, nel que como siempre fallé nel llance clave y quitáronseme les ganes de siguir probando.

Reposando y.... a esnalar

Ensín ganes de más pegues, metíme nuna vieya conocida que tamién tengo por encadenar, Hoegergarden, un 6c con un pasu durete xusto penriba d'una chorrera que desploma de coyones y que la verdá anque nun me gustaba la vía cuando la probé, marché con bones sensaciones pa enchufar inclusu les dos víes nuna próxima visita.

A ver cuando sedrá... esperemos que nun seya pal branu como tolos años jeje

 ---------------------------------------------------

18 d'Agostu de 2014

Pol branu, seguía intentando algamar un ascensu de nivel o más bien un cambéu d'estilu d'escalada. Los míos puntos febles son la resistencia en víes verticales o desplomaes con cierta llargura de percorríu, poro había que trabayar nesti sen y pa ello una bona escuela ye la de Cuanxú en Gráu.

Na mió primer visita, trabayara Babaria faciéndola tres varios pegues y tamién la so compañera Hoegarde, la cuál prestónos muncho anque tampoco-y diéramos un pegue curiosu pal encadene.

Nesti día, con Alberto de compañía trabayé Leffe sacándola al segundu pegue me paez, quedándome tiempu pa facer un par d'ellos a Hoegarden, anque tampoco-y metí con toles ganes... viendo amás como'l baxón físicu qu'esperimentara nos siguientes meses ya taba golpiando na puerte.

---------------------------------------------------

24 de Febreru de 2014

Davezu dir a esguilar ye una aventura, pero nesti casu la mayor aventura del día fue alcontrar la escuela de Cuanxú en Grau, jajaja. Tuviemos dando vueltes en coche per mediu Grau y casi Yernes y Tameza, vaya llocura.

Poro, tuviemos el tiempu que tuviemos y la mañana diónos pa lo xustu, conocer una escuela ablucante pol sitiu, pol paré nel que tan les víes, pero con graos que práuticamente déxanos pa facer 3 o 4 víes.

Paré de la escuela d'esguilada de Cuanxú (Grau)

La esguilada ye dafechu a la escontra del nuesu xeitu, ya que tamos nun paré desplomáu con cantos grandes, cuando nós tamos avezaos a la plaquina ñapera y adherente. Pero bono, anovar o morrer y nel deporte de la escalada, namái que pasemos de los sextos baxos hacia'l sétimu grau, lleguen los desplomes y un xeitu más físicu d'esguilada.

Nesta mañana, pudimos da-y unos cuantos pegues pal encadene de Bavaria (6b). Vicen necesitó un par d'ellos y yo hasta tres pa encadenar una vía guapa de pasos llargos a cazos y bonos agarres, que camuda'l sen nuesu nel trepar al cien por cien.

Vicen encadenando Bavaria (6b)

Tamién tuvimos probando Hoegarden (6c), qu'entama per una chorrera pa tener so tramu más duru nun bloquéu a un cazu, saliendo mui continua hasta la cadena. Nun tuvimos más tiempu pal encadene, pero vímos-y collor con un pegue caún, asína que'l próximu día de xuru que cayerá nel sacu.

En resume, escuelina pequeña pero mui tranquila. Eso sí, los graos son duros, al menos pa nós, anque hasta la vía más cenciella paga la pena intentala y más cuando toles víes tienen nome de marca de cerveza, jeje.