Cofría (Saja - Nansa)

24 de Xunetu de 2021

Finde braniegu, nel que tenemos ganes de movernos un pelín d'Asturies, poro miramos pa La Hermida, pero nesta dómina del añu, suel tar petáu en tolos sentíos. Asína que mirando la nueva guía de la Hermida de Roca Verde, vemos que pal valle del Nansa tenemos un par de seutores que poder visitar.

Perguapu'l rigu Nansa pel llugar de Cofría

Pal sábadu, decidimos conocer el seutor de Cofría, qu'anque tenga sol de tarde, el pie de vía ye a la solombra y col rigu al llau, nun se tará tan mal de xuru. Aportamos al valle del Nansa, apacando les furgonetes cerca la senda fluvial del Nansa y nun agradable paséu, nel que los perros gócenlu en forma, pente la viesca y el rigu Nansa, aportamos al seutor, pegáu a la sienda y al rigu.

Guapu paséu pela senda fluvial hasta'l seutor de Cofría

Tenemos hasta un bancu, onde los senderistes paren a echar un güeyu a lo que facemos y tol seutor pa nós, poro sólo toca revisar croquis y les víes, decidiendo centranos na fastera central de la escuela onde les víes tan más recientes n'equipación y los graos, anque baxos son más variaos.

Andrea y Anna faciendo cordada a la solombra

La verdá ye que nun sedrá la última visita, porque'l sitiu ye guapu enforma, pudiéndonos bañar en cualesquier momentu nel rigu, esguilar víes cencielles de cuartu y quintu grau, apretar un pocu más nos sestos o ponese seriu probando dalgún sétimu.

Apretando un pelín y esfrutando de Jinete Pálido (6c)

 

Vamos como diría un collaciu, coles maraques de finde, así que por mi parte, caliento un pocu nun quintín mui guapu y siguiendo hacia la manzorga, continuamos con Druidas (6a de primer llargu y 6b de segundu) prestosu y pelín apretón y finamos el día con Jinete Pálido, otra vía de dos llarguetes, con 6b plaqueru de primeru y 6c de navegar de segundu que salen a vista, esfrutando un montón de la escalada.

Kíla garrando'l so abellugu

 

Magar de la escalada, tocaba buscar apalanque pela rodiada, non sin antes alcontrar el chigre perfeutu pa conocer la fauna llocal, nun se salvaba nin unu, jaja, alcontrándolu en Muñorrodrigo, nel area recreativa del Nansa, onde pasamos una tarde nueche cenando en compañía más furgoneteros y autocaravanistes con mui bon rollu y un ambiente mui tranquilu.

Cofría
Croquis por mor de El Paso Clave. Gracies y col so permisu.

---------------------------------------------------