El Beyu (Ponga) - Mura - Carriá - Poana - Trechu - Yarenes - L'Arenal

22 d'Avientu de 2025

Track: El Beyu (Ponga) - Mura - Carriá - Poana - Trecho - Llarenes - L'Arenal

Continuamos coles rutes del GM Xuan de la Borrina, averándonos esta vegada hasta Ponga, onde preparamos una ruta pa volver al Picu Carriá, monte que ficiera va años dende la Vega de Cién y que ye ún de los Montes Cimeros Asturianos, que tou montañeru tien que tener na so llibreta, pola guapura del monte y poles increyibles vistes enmediu del parque de Ponga.

Como siempre, quedamos nel chigre la Huera pa tomar un cafetín, pillar unos pinchinos y de pasu felicitar les fiestes al chigreru, collaciu ya dende va munchos años de monte. Xuntaremos coches y tiramos pal desfiladeru los Beyos, saliéndonos enantes de la Ponte Bidosa, hacia'l pueblu ponguetu d'El Beyu.

Partimos del pueblu ponguetu d'El Beyu (375 m)

Durante'l viaxe na furgo, ya soi acolumbrar cierta blancura nos montes de la que paso por Nava y cuando aporto a Cangues d'Onís, alcuéntrome con un día borrinosu, orpinando y cola llínea nival perbaxa, atopando los montes ñevaos a una cota mui baxa, muncho más de lo camentáu, asina que ya tengo na tiesta que va ser un día pelín complexu pa sacar la ruta alantre.

Ensin más, preparámonos y salimos d'El Beyu, col día amurniáu, pero al menos vamos pescanciando dalgún abanciu nel cielu, lo que dame un pelín d'esperanza. Saldremos peles caleyes d'El Beyu pasando pembaxo del cementeriu, garrando un antiggu camín que va dexanos nes cases de Canisquesu, que paez anguaño abandonáu dafechu.

Vibuli (Ponga) - Seu Vibulines - Tuba - Peña Salón - Nochendi - Toyu - Baxeñu

1 d'Avientu de 2024

Track: Víboli (Ponga) - Seu Vibolines - Tuba - Peña Salón - Nochendi - Toyu - Baxeñu

Última ruta del añu col GM Xuan de la Borrina, enantes d'una inesperada por lo rápida intervención pa operame de la cadera, que llevábame machacando dende la selmana santa del 2023, pudiendo facer nestos tiempos muncha escalada y dalgo de monte pero con dolor abondo. 

Al llunes siguiente d'esta ruta per Ponga, tenía'l preoperatoriu colo que camentaba un mes mínimu de tranquilidá hasta la operación, pero esi mesmu día ufreciérenme operame al día siguiente, asina qu'ensin pensalo demasiáu fuimos p'alantre y nel mes d'Avientu quitáramos d'enriba la operación, tando nel intre, nel procesu de rehabilitación, col envis d'intentar tornar a l'actividá pa la primavera dafechu.

 

Salimos de la redolada de Vibuli nel aparcaderu de les Mesties (715 m)

Nesti primer día d'Avientu, aportábemos cola calma a Vibuli nel conceyu de Ponga, onde ya tuviéremos va dellos años ascendiendo a Sen de los Mulos y la Pica Subes y pasáremos bien cerquina na nuesa primer ascensión a la Peña Salón, dende les cercaníes de la puente Bidosa. Esta vegada la idega yera conocer los seos de Vibulines, que daquella nun yeren tan conocíos y escapáronse a la nuesa circular.

Pa ellos, almorezareos na Huera en Cangues d'Onís, pa siguir l'escobiu los Beyos alantre, que tantes rutes diónos durante estos años que llevamos faciendo monte per Asturies y más en concreto nos conceyos d'Amieva y Ponga. Xubirmeos pela foz de los Andamios en coche, lo que ya ye toa una aventura, ablucando col llugar y les parés que cayen a dambos llaos de la foz del rigu Vibuli.

Sobrefoz (Ponga) - Monte Fana - Puertu Sus - Picu Zorru - Mayáu d'Enol - Vallizón

1 de Mayu de 2023

Track: Sobrefoz (Ponga) - Fana - Sus - Picu Zorru - Enol - Vallizón

Garramos puxu cola actividá montañera, dempués de la guapa ruta per Riosa y les sos mines del Texéu y esta vegada, a petición de Mario, viaxamos hasta'l conceyu de Ponga, intentando escaecer les aberraciones d'asesinatos de llobos que salieron nos medios, dando una imaxe d'esti conceyu y los sos paisanos terrible.

Tornábemos hasta Sobrefoz, un pueblu, al que-y tenemos un ciñu especial, por munchísimes rutes que ficimos nestos años y pol tratu recibíu les vegaes que quedamos a durmir y xintar. Esta vegada, vamos decidir xubir pela pista Ventaniella hasta averanos a Fana, onde aparcamos la furgo y preparámonos pa salir a patiar.

 

Partimos penriba del pueblu de Sobrefoz en Fana (815 m)

Esperaremos media horina a que lleguen el restu de compañeros, ya que nun s'atrevieron a xubir pela pista y vinieron caleyando dende Sobrefoz, anque a dicir verdá, la pista a Ventaniella hasta onde xubimos, ta meyor que la carretera que va de Abiegos a Sobrefoz, asina que toos xuntos entraremos a la mandrecha del rigu Vallizón, penriba d'una cabaña hasta otra cabaña perbien arreglada, onde tenemos crucie de caminos hacia la Foz de Vallizón de frente o hacia'l monte Fana a la mandrecha.

Sellañu (Ponga) - Riega Salgaréu - Ruamón - Sorbeyu - La Güerfana - Cezulia - Pandiellos

 12 de Payares de 2022

Track: Sellañu (Ponga) - Riega Salgaréu - Ruamón - Sorbeyu - La Güerfana - Cezulia - Pandiellos

Dempués del día gafu que tuviéramos na ruta per Llaviana al Corbellusu, teníemos ganes de desquitanos y llueu de dar vueltes a la tiesta, Mario y yo, punximos la vista en Ponga, cola idega de conocer pela mió parte, la Foz de Salgaréu, pasu pente les peñes del Pierzu y la Güerfana, que tien bon camín pente Priesca y la collada Llomena.

Sicasí, tardamos en decidir la ruta y nun sé por qué, punxe la vista na riega Salgaréu, restolando peles redes, ensin alcontrar información, teniendo que falar con dalgún compañeru barranquista, por si taba nel catálogu d'Asturies y nun yera afayaizu pa los montañeros.

Partimos de Sellañu (245 m) en plenu parque de Ponga

Con varios planes nel tinteru, almorzaremos a les 8 la mañana na Huera en Cangues d'Onís y ellí, ente toos, decidimos probar suerte pela riega Salgaréu teniendo un par de posibles escapaes, tanto hacia la pista que xube de Priesca pela manzorga, como hacia la mandrecha hacia Pandiellos, pero siendo too una auténtica incógnita.

Sobrefoz (Ponga) - Solafoz - Les Llampes - Mayá Maciédome - Robléu - La Roza

24 de Xunetu de 2022

Track: Sobrefoz (Ponga) - Solafoz - Les Llampes - Mayá Maciédome - Robléu - La Roza

Dempués de la ruta nel Porrón de Viañu, tocaba pasar la tarde per Sobrefoz, dándonos un refresquín nel banzáu de la entrada'l pueblu, onde dexamos les furgonetes pa sobar y fuimos al pueblu a pasar el restu la tarde, tomando daqué nes terraces de los chigres del pueblu, hasta que cenamos en Casa Severa, de manera increyible.

Al día siguiente, tocó madrugón por mor de la meteo soleyera que daben, cafetín na furgo, dalgo d'embutíu y dempués de despedinos d'Anna que tiraba pa la playa, Mario y yo, salimos del pueblu so les 9 y media la mañana, col envís de reconocer tol valle de Solafoz.

Partimos de Sobrefoz pegando la solana de bona mañana

Digo reconocer, porque n'anterior visita, baxábemos con tal pingadura de nuesa travesía dende Tarna, que nun la esfrutamos como debiera, asína que xubimos hacia'l colláu Calviáu, pasando pembaxo la cueva la Llosa y siguimos siempre per bon camín hasta topanos cola riega Solafoz, la cuál debemos siguir, abandonando'l claru camín que lleva hacia les cabañes de la Porquera.

Venta La Faeda (Ponga) - Riega'l Cabañón - Porrón de Viañu - Miédome - Salguerosa - Ventaniella

23 de Xunetu de 2022

Track: Venta La Faeda (Ponga) - Riega'l Cabañón - Porrón de Viañu - Miédome - Salguerosa - Ventaniella

Dende la ruta Ambenes na primavera na qu'esfrutáremos como guah.es, conociendo delles fasteres nueves, ya teníemos na tiesta tornar a Ponga a pasar un finde per Ventaniella. Aprovechando que la intesidá del viaxe al Pirinéu d'esti añu, dió pasu a cancelar la nuesa mítica Travesera de Picos en Xunetu, ensin dubiar, apeteciónos a Mario y a mí facer un finde montuno y averámonos hasta'l pueblu de Sobrefoz pa ello.

A esti primer día, axuntábense Anna y Benjamín, quedando como siempre nel chigre La Huera, en Cangues d´Onís, pa siguir hasta Sobrefoz, onde continuaremos pela pista que xube hasta Ventaniella, aparcando los coches na Venta La Faeda, anque a dicir verdá, pudiéramos siguir a un bon apartaderu en Fonperi.

Partimos de la Venta La Faeda (885 m)

Una vegada que tamos preparaos, saldremos pista arriba pa facer los 2.5 km que sepártanos de Fonperi, durante dalgo más de media horina. Nesi trayeutu, dexaremos a la nuesa manzorga'l desvíu hacia la Bustariega, mayáu, onde podriemos continuar hacia la collada Obrangu pasando pelos montes de la Recabada y el Traveséu, pero nun va ser el nuesu percorríu nesti día.

Sellañu (Ponga) - Semeldón - Llevarda - Llagosciegos - Agüera - Tarañes (Ponga)

 7 de Mayu de 2022

Track: Sellañu (Ponga) - Semeldón - Llevarda - Llagosciegos - Agüera - Tarañes (Ponga)

Tornábemos al monte col GM Xuan de la Borrina, llueu de les vacaciones esguilaores y facíemoslo con una ruta potente, propuesta por Mario. Hai que dicir, que'l fichaxe d'esti collaciu nel grupu, ta dando los sos frutos, ya que ye del mesmu palo que los integrantes más vieyos, como Charly, Simón o yo, dexando casi de llau cumales míticos o grandes ascensiones en Picos, centrándonos en conocer y bregar per fasteres desconocíes pa nós.

D'esti xeitu, terminar la ruta, coles pates enllenes d'escayaes y pinchos de cotoya ye lo más normal y como non, ún de los nuesos tarrenes de xuegu preferíos ye'l conceyu de Ponga. La idega d'entamu yera quedar tol finde, pero nun podía Charly por temes de curro y el restu la xente, van un pocu al día, asina que decidimos tirar la travesía pela fastera del rigu Semeldón nel día.

Partimos de Sellañu (230 m) con un día soleyeru

Pegamos un madrugón terrible, pa esta dómina del añu y dempués del cafetín y pinchos na Huera en Cangues d'Onís, continuamos hacia Ponga, llevando de primeres coches a Tarañes y tornamos a Sellañu, onde a les 10 menos cuartu la mañana, entamamos a caleyar, ya camentando que diba ser tarde, pa tolo que queríemos facer.

Tarna (Casu) - La Bolera - La Salguerosa - Ventaniella (Ponga) - Valle Ambenes - Valloseru - Paréu

27 de Marzu de 2022

Track: Tarna (Casu) - La Bolera - La Salguerosa - Ventaniella - Valle Ambenes - Valloseru - Paréu

Cuando lleves dellos años faciendo monte per Asturies, munchos de los cumales cimeros, sobromanera de fasteres tan guapes y montunes como Casu o Ponga, tiéneslos toos nel llibretu de tachaos, poro prepares rutes cola idega de conocer requexos puntuales.

Na Travesera Casu-Pongueta d'esti últimu añu, Alberto y yo, conociéramos el cordal de Valloseru, descendiendo a la fastera casina, quedándonos con ganes de conocer la fastera pongueta y d'esti xeitu, preparaba una ruta circular, col envís únicu de descubrir dellos llugares.

Partimos del pueblu de Tarna (995 m)

Pelín antes de les 10 de la mañana, xustu'l día del camudu d'hora, tamos aparcaos y preparaos en Tarna, pa salir a caleyar. Fadrémoslo, siguiendo'l GR que tiraría pal Puertu Tarna, pa nun crucie indicáu con cartelu, salir a la manzorga hacia la carretera, la cual cruciaremos en Les Roces, onde garramos un camín, que métenos de plenu pel Pandu La Texera, nel ablucante y estensu monte Forcos.

Abiegos (Ponga) - Brañadosu - Mayá Tiatordos - El Xuacu - Bezanes (Casu)

13 de Xunetu de 2021

Track: Tarna (Casu) - Vega Baxu - Altu Ponga - Solafoz - Abiegos (Ponga)

Ún día más, continuamos na Travesera Casina-Pongueta de 2020-2021 quedando namái qu'Alberto y yo, pa terminar estos cuatru díes de patéu, dando final de nuevu en Bezanes. Magar del día anterior, nel que tuvimos qu'abortar pola meteo planes d'ascensión a la peñe Maciédome, quedándonos col maraviyosu descubrimientu de la fastera del valle Corralín y Solafoz.

Llevamos tres díes sofriendo l'abondosa vexetación astur, d'esti branu primaveral de lluvies y sol, poro tenemos claru, que nun podemos facer lo que teníemos en mente, sobretou, dempués del día anterior cola moyadura que pillamos.

Partimos d'Abiegos (516 m) con un día pelín murniu

D'esti xeitu, pelín cansaos de padecer nesta travesera, miramos mapa y decidimos dar la vuelta al Picu Tiatordos y continuar hacia Bezanes (Casu), ascendiendo cualesquier otru monte como la Becerrera, la Llambria o el Picu Cornielles.

 

Pa ello, salimos d'Abiegos en direición Tanda col envís d'empobinanos hacia Taranes y xubir pela foz de la Escalada, pero topámonos con unos cartelos qu'indiquen Tiatordos y por conocer per onde nos manda, los siguimos viendo pocu a pocu como van llevándonos hacia Llames.

Tarna (Casu) - Vega Baxu - Altu Ponga - Solafoz - Abiegos (Ponga)

12 de Xunetu de 2021

Track: Tarna (Casu) - Vega Baxu - Altu Ponga - Solafoz - Abiegos (Ponga)

L'homé propón y el monte o la meteo dispón. Nesti casu, esti paisanu, prepara unes travesíes y unos "tracks" con detallín, con posibles ascensiones, con planes A, B, C... y a la fín, la meteo y el monte, dicen que tiés que facer esto o aquello y nun hai más... toca tirar d'esperiencia y ver cual ye la meyor opción pa salir del enguedeyu.

Tamos na tercer estaya de la Travesera 2020 - 2021, coles patuques ya en forma y el banduyu enllenu del almuerzu, poro entamamos a caleyar peles cais de Tarna en Casu, non ensin antes despedinos y agradecer el bon tratu del Bar Nalón, dándonos abellugu y xinta pa facer estes travesíes.

Preparaos un día más en Tarna (1057 m)

 

Saldremos del pueblu y a la manzorga garraremos un camín qu'al pocu dixébrase, garrando la más direuta a la mandrecha, hasta dar con una pista nel Grayal. Equí, siguiremos comodu y guapu camín per GR, esfrutando de les vistes hacia la Peña Montobiu a la nuesa mandrecha y baxo los parés de la Xerra Tables.

Travesera Picos 2020 - 2021

10, 11, 12 y 13 Xunetu de 2021

Track: Travesera 2020 - 2021

Ya vamos más de diez años de Traveseres per Picos d'Europa (Asturies, Llión, Cantabria), Montaña Palentina... y esti añu quisimos facer un patéu de 4 díes pelos parques naturales de Redes/Reres (Casu) y Ponga. En plena pandemia, nun mos prestaba muncho dir a los refuxos de Picos, por mor de la masificación y decidimos investigar, facer loxística y preparar un percorríu novedosu.

Entamaba la Travesera 2020 - 2021 dende Bezanes

Les Bedules (Ponga) - Recuengu - Zorru - Peloñu

11 de Xunetu de 2020

Track: Les Bedules (Ponga) - Recuengu - Zorru - Peloñu

Un añu estrañu esti que tamos viviendo, tanto qu'oblíganos a dexar pa otra la nuesa tradicional travesera per Picos. La idega esti añu, yera camudar esi sen traveseru de refuxu en refuxu y tomar un campu base en Ponga pa facer varies actividaes, lo qu'al final pente pitos y flautes quedónos namái que nun día de monte por falta de participantes.
Aún así, ye d'agradecer y muncho'l tratu, la cena y l'almuerzu del día siguiente nel chigre'l Cascayu, un chigre-tienda-hospedaxe onde xíntase de primera, ñatural, verdures de casa, caza, setes recoyíes per ellos... una pasada.

Partimos de Les Bedules (1062 m) con un día borrinosu

Les Cuerries (Ponga) - La Crespa - Tarañes (Ponga)

1 Marzu de 2020

Track: Les Cuerries (Ponga) - La Crespa - Tarañes (Ponga)

Cuantayá que tenía ganes de conocer l'escobiu Les Cuerries en Ponga, cuantos reportaxes miraos, cuantes crítiques al cartelu de "ruta turística", camiento que camudáu pol "accesu y ruta mui peligroses" d'anguaño, jeje y a la fín decidime a facer la travesía pente Les Cuerries y Tarañes, camentando que diba ser una llucha xabaz colos ellementos y la ñatura.

Asina que, tamos preparaos pa caleyar pocu más allá de les 10 de la mañana nel PK 10 de la As-261, ye dicir na mecedura del rigu Les Cuerries col Ponga, onde hai un pequeñu apartaderu onde malpenes entren un par de coches. Atrás quedó, l'almuerzu en Cangues y la loxística pa mover una furgo hasta'l pueblu ponguetu de Tarañes onde daremos por finada la ruta.

Salimos dende la mecedura del rigu Les Cuerries (294 m) col Ponga

San Xuan (Ponga) - Valle del Ponga

21 d'Avientu de 2019

Track: San Xuan (Ponga) - Valle del Ponga

Ún día más, la meteo nun ye pa tirar volaores, pero toca salir a dar un patéu enantes de qu'aportare un temporal pa la fín del día. Poro, tocaba restolar pente la carpetina de rutes pendientes y cosiquines a conocer p'algamar una rutina que nos diera pa xintar un menú del día y cellebrar la fín d'añu pal grupu de monte.

Nun mos xuntamos munchos, pero fuimos hasta Ponga con bien de ganes, ya que va más de dos temporaes que nun andábemos per esti guapu conceyu montañeru. Pasaes les 10 de la mañana, aportamos a San Xuan, capital del conceyu y coles grandioses vistes del picu Tiatordos entamaremos a caleyar.

Salimos a pasiar dende San Xuan (730 m)

Altu Ventaniella (Ponga) - Les Pandes - Pileñes - Miédome

9 d'Abril de 2017

Track: Altu Ventaniella (Ponga) - Les Pandes - Pileñes - Miédome

Cuantayá que nun tornaba pel Altu Ventaniella, anque facía menos tiempu que tuve per dalguna de les sos mítiques peñes. La primer vegada, nel 2010, facíemos Ten y Pileñes y fae muncho menos tiempu, tuviéramos en Ten saliendo dende la Uña.

Esta vegada, la idega yera ascender al Pileñes y facer una circular conociendo fasteres del norte d'esta peñe. Pa ello, aportaremos al Altu Ventaniella , dempués del llarguísimu viaxe dende Xixón per Autovía'l Cantábricu y N-625 que dende Lloviu déxanos en Cangues d'Onís.

Grupu nel Altu Ventaniella (1194 m) preparaos p'andar

Pombayón (Ponga) - Picu Canellín

11 de Marzu de 2017

Track: Ponte Pombayón (Ponga) - Picu Canellín

Alcuérdome siempre del picu Canellín por varies razones. Una d'elles fué entrugame Carlos, qu'onde taba, ya que salía nel famosu llibru de los cien montes d'Asturies y nun tenía daquella mui claro onde andaba.

Llueu, tamién costaba alcontrar información amañosa p'ascendelo, hasta que los collacios de los de las Claras, sacaron una circular bien prestosa, na que sacante del propiu picu en cuestión, lo más importante como casi siempre yera'l percorríu.

Poro, cola ruta marcada na llibretina de pendientes, tocaba tener la oportunidá de facela y dempués de que na Xuntanza de la temporada pasada, na que'l tiempu nun mos dexó facer lo planiáu, tuvimos que reservala pa otra vegada y al fin tocó poder conocer el Canellín y la so redolada.

Semeya de grupu penriba nel Monte Cuevu (625 m)

Cobarcil (Sayambre) - Tolivia (Ponga) - Llué - Llaete - Ribota (Sayambre)

27 d'Agostu de 2016

Track: Cobarcil (Sayambre) - Tolivia (Ponga) - Llué - Llaete - Ribota (Sayambre)

Munches vegaes si restolamos pente'l mundiu blogueru de monte, vemos como ta entrándose nuna especie de profesionalización de los blogues de la xente. Ya nun entro si queremos sacar perres o non, si la nuesa afición acaba convirtiéndose nun trabayu o en daqué monetariu, eso ya caún tien qu'estudiar si-y renta o non.

Cuantes vegaes dixéronme, que por qué nun escribía en castellán, que diba tener milenta visites más y de xuru que yera ricu y famosu. Pues non, esti blogue ye mi pequeñu requexu pa contar lo que me peta pel alma y cuéntolo n'asturiano o al menos nel asturiano más curiosu que pueu ufrecer, que nun tuve la oportunidá d'estudialu nel cole y tampoco mamalo en casa... que mi Pa ye soriano y mi ma d'Ortigueira en Cuaña y ellí fálase l'eonaviego.

Con too esto, quiero remembrar y destacar, qu'esta ruta que ficimos el mió collaciu Charly y yo, ta clavada, calcada y copiada de la que ficieron dos de los blogues que sigo con más enfotu: Los de las Claras y Caleyando con Cienfuegos.

Tamos en momentos cafiantes pa los blogues que llevamos bien d'años (dende'l 2 de Xineru de 2009 nesta xera), con cambeos en blogger, con cierre de portales onde aloxar semeyes y con ciertu cansanciu d'escribir y nel casu del collaciu Cienfuegos ver como otros "profesionales" con llibros a cuestes, cópiente'l trabayu que'l nuesu tiempu nos lleva y nada de perres nos da.

Asina, qu'en tiempos de falta d'orixinalidá na conceición de rutes, muncha profesionalidá y llistaos de los meyores blogues en fala hispana, d'aventures o la de su madre en calzonciellos, quiero dedicá-yos y da-yos les gracies fonderes a Jonatan y Cienfuegos... porque son munches les rutes que-yos copié y llueu conté a la mió manera, pero que siempre puse d'au venía'l trabayu y búsqueda de percorríos.

Un abrazu collacios... espero conoceros dalgún día en presona, que tien coyones la cosa dempués de tantos años, a Monchu cola so biblioteca d'ascensiones que tien por blogue, ya tuvi la suerte unes cuantes vegaes... así que vémonos pronto espero.

Partimos de Cobarcil (503 m) nos Beyos