L.lamo (Riosa) - Mines de Texéu - Peña Los Bescones - Camín del Fierru - Espines - L'Argañosa

22 d'Abril de 2023

Track: L.lamo (Riosa) - Mines de Texéu - Peña Los Bescones - Camín del Fierru - L'Argañosa

Tornábemos a les rutes del GM Xuan de la Borrina, con una asignatura pendiente como yera conocer un pelín meyor la fastera riosana de cordal de L'Aramo. Pa ello, siguiendo los conseyos del compañeru de cordada riosanu, Santos y revisando delles entraes de blogues montañeros como'l de Cienfuegos y hestóricos como'l de Historia y Patrimonio de Riosa, díbemos averanos hasta'l pueblín de L.lamo.

Hai que destacar que conducir dende L'Ará hasta'l pueblu de L.lamo, ya amuesa lo que vamos alcontranos, una fastera bien guapa de L'Aramo, con viesques bien conservaes, rigos y dellos pueblinos qu'asítiense pel occidental del rigu L.lamo.

 

Entamamos la ruta dendel pueblu riosanu de L.lamo (530 m)

Aparcaremos a la entrada'l pueblu, garrando agua na guapa fonte y preparámos a salir caleyando pela pista en xubida siguiendo los cartelos del pueblu mineru de Rioseco. Venti minutinos dempués y coles pates calecíes, ya tábemos frente a los tres edificios principales, onde podemos ver un claru intentu de recuperación d'esti espaciu, a mou d'atracción turística.

 

Pasamos pel pueblu mineru de Rioseco onde caltiénense grandes estructures mineres

Percorreremos l'antigua mina y pobláu, piesllada en 1960, nun sabiendo mui bien, si siguen anguaño trabayos d'acondicionamientu o non, hasta qu'aportamos a la enorme estructura a mou de mirador, que tien fecha de 2015 lo que déxanos un pocu pillaos, ya qu'ocho años dempués, vemos poca recuperación de les mines y muncho menos, col pocu aparcamientu que tien el pueblu y la inaccesibilidá de la pista.

Abandonaremos la mina más actual y garraremos el preciosu camín que tien de llevanos hacia la Campa'l Texéu. Pa ello, tendremos que superar unos 400 metros de desnivel en decenes d'envueltes, anque sedrá un ascensu entreteníu, pudiendo observar delles bocamines y estructures para'l descensu del mineral (cobre y cobalto).

 

Facemos camín peles innumerables envueltes hacia la Campa'l Texéu

Nun sólo entretién les distintes estructures mineres, sinon que les vistes según vamos ascendiendo son una maraviya, tanto del cercanu Monsacru, Peña Manteca o Llusuriu, sinon como de tolos montes de L.lena y Ayer. Lo completu d'esta ruta, faise evidente cuando aportamos a la Campa'l Texéu o de les Mines, que dará pasu a posteriori a conocer la Cueva'l Trisquel (como la nomen dellos collacios riosanos) o la mina'l Socavón, nome más que claro, cuando los nuesos güeyos dan viste a la enorme mina.

 

Alloriamos cola enorme mina del Socavón o Cueva'l Trisquel... una pasada

Ye ablucante dafechu, nun somos a creyer lo que supón esta mina prehistórica, na que sacábase mineral fai 4500 años y pa conocelo meyor, entrar col frontal dientru ye imprescindible ya que les distintes galeríes y plantes, nun faen más que baxar, dando a entender que tola fastera oriental riosana de L'Aramo, ye un auténticu quesu gruyere xeolóxicu y mineru.

Coincidiendo toos en que ye increyible, qu'esti llugar nun seya dalgo conocío n'Asturies, pol so valir hestóricu, industrial, cultural y montañeru, ya que la ruta ye bien guapa, continuamos el nuesu camín hacia la vega L'Abeduriu, saliendo del Socavón a la manzorga alcontrando delles bocamines más, non esplotaes nos últimos tiempos, que serien les de L'Arrebolléu.

 

Tarrén d'aventura pela Cuesta Pradiella hacia L'Abeduriu

Tornamos un pocu hacia les campes penriba'l Socavón y alcontramos cierta traza de senderu que va metiéndonos per una xabaz viesca, hasta perdese y tener que buscar más o menos la meyor traza siempre en pindiu ascensu, teniendo un pocu como referencia un arcu pembaxu de la Peña Bescones, la ventana L'Abeduriu.

Con ciertu coste físicu, vamos aportando a la Vega L'Abeduriu (1400 m), onde decidimos ascender a la Peña Los Bescones, como finxu d'altor final de la nuesa ruta. L'ascensión, cenciella per otra parte, fadrános ganar perguapes vistes per un llau y alcontranos a los sos pies con una torca, datada per dalgún grupu d'espeleo, lo que fainos pensar hasta onde podría llegar esa entrada de la torca, viendo tolo que conocimos durante l'ascensión hasta Los Bescones.

 

Xubimos del colláu L'Abeduriu hasta la Peña Los Bescones

Nos 1479 m de la Peña Los Bescones, facémonos la semeya de grupu y descendemos hacia la Vega L'Abeduriu onde decidimos xintar a la vera d'un bebederu, onde tamién puede refrescase con calma Kíla. Esta vegada, tanto Kíla como yo díbemos un pocu baxos físicamente y nun contábemos aportar tan alto, pero calecemos músculos y lo guapo de la ruta animónos a siguir y completar esti plan B, ya que tenía una versión más llarga na tiesta.

 

Cumal de la Peña Los Bescones (1479 m)

Magar de recuperar fuercies, descenderemos pente les guapes vegues de L'Aramo hasta la boquera Bueyes pente'l Pontón y el picu Pradiella, descendendiendo a pinchu col envís de garrar l'increyible camín del Fierru, pel que tendremos un cómodu descensu siguiendo les sos envueltes, que tienen de llevanos hacia'l col.láu'l Cogul.lu.

 

Baxamos hacia la Vega Pradiella onde garraremos un guapísimu camín de descensu hacia'l Cogol.lu

El día, sigue amagando con ñubes que tíranos dalgo d'orpín demientres el sól calez duro a momentos, ye dicir tiempu primaveral dafechu. La baxada entretenida, echando un güeyu hacia les cueves de los Ganzos, con usu ganaderu y a la mesma vegada voi echando un güeyu a un paré mui cerquina ya de Cogol.lu y de la pista del cordal de Les Segaes.

 

Conoceremos el Mayéu d'Espines pa siguir hacia la Peña'l Col.léu

Una paradina echando un güeyu al paré, onde como non, alcuéntrome una decena de víes equipaes y continuaremos baxando al Mayéu d'Espines, ya que pa evitar tol asfaltu de la pista, decidimos descender pel valle de L.lamo, sicasí, viendo les hores de ruta que llevanos nun vamos adentranos nel Abeyón de la Foz, pa nun allargar de más la ruta.

Percorreremos tol valle siguiendo un claru senderu que crucia dacuando la riega de L.lamo, poniendo la vista nel oxetivu de la Peña'l Col.léu, onde asitiábase un castru y más en concretu nel propiu col.léu, ya que sedrá'l puntu onde empataremos cola parte baxa del cordal de Les Segaes.

 

Pasamos del Col.léu hacia L'Argañosa nel cordal de les Segaes

D'esti xeitu, llibraremos casi tol asfaltu de Les Segaes, faciendo malpenes un kilómetru de pista hasta L'Argañosa, onde vamos facer una amplia envuelta pa descender per camín hacia les cabañes de Las Mestas, pudiendo escoyer el descensu pelos praos o intentar siguir el camín, pelín perdíu hacia la riega'l Bescón, onde enllazaremos con otru camín, que tien de llevanos hacia una ponte col rigu L.lamo.

 

Baxamos de L'Argañosa hacia'l Bescón pa siguir hacia'l rigu L.lamo

Llueu d'un bañín de Kíla na poza baxo la ponte pa refrescar, xubiremos hacia la pista que vien de Rioseco y entraremos peles cais de L.lamo, con una sensación de completar una ruta bien potente y guapu, na que descubrimos un padremuñu industrial y mineru, allugáu nuna fastera de L'Aramo perguapa, too ello pol módicu preciu de 13 km de percorríu, +/-1175 m de desnivel y un total de 7 hores.

Camudando'l Camín dende la Riosa más minera