1 de Mayu de 2023
Track: Sobrefoz (Ponga) - Fana - Sus - Picu Zorru - Enol - Vallizón
Garramos puxu cola actividá montañera, dempués de la guapa ruta per Riosa y les sos mines del Texéu y esta vegada, a petición de Mario, viaxamos hasta'l conceyu de Ponga, intentando escaecer les aberraciones d'asesinatos de llobos que salieron nos medios, dando una imaxe d'esti conceyu y los sos paisanos terrible.
Tornábemos hasta Sobrefoz, un pueblu, al que-y tenemos un ciñu especial, por munchísimes rutes que ficimos nestos años y pol tratu recibíu les vegaes que quedamos a durmir y xintar. Esta vegada, vamos decidir xubir pela pista Ventaniella hasta averanos a Fana, onde aparcamos la furgo y preparámonos pa salir a patiar.
Esperaremos media horina a que lleguen el restu de compañeros, ya que nun s'atrevieron a xubir pela pista y vinieron caleyando dende Sobrefoz, anque a dicir verdá, la pista a Ventaniella hasta onde xubimos, ta meyor que la carretera que va de Abiegos a Sobrefoz, asina que toos xuntos entraremos a la mandrecha del rigu Vallizón, penriba d'una cabaña hasta otra cabaña perbien arreglada, onde tenemos crucie de caminos hacia la Foz de Vallizón de frente o hacia'l monte Fana a la mandrecha.
Nós, tendremos que salir a la mandrecha, descubriendo ún de los montes más bonitos nos que pateara nos últimos tiempos, aparte tamos col espoxigue primaveral y los colores verdes, son perintensos y lo meyor de tou, fue comprobar como'l camín, que va dir llevándonos nun preciosu trazáu, caltiense perllimpiu siendo un auténticu placer caminar.
Sicasí, lo nuevu de la ruta pa mín, yera esti tramu, ya que ye la tercer vegada qu'asciendo al Picu Zorru y por suerte, tol camín que facemos pel monte Fana fue preciosu y mui disfrutón. El grupu, la gran mayoría ayeno a les nueses andaces, así lo vé tamién y l'alderique animosu, entemécese con parar a echar milenta semeyes, parar a ver les vistes hacia'l Recuengu y en definitivu esfrutar d'esta maraviya de ruta.
Ensin danos cuenta, a un ritmu curiosín, aportamos primeru al colláu Charcu y a la mayada de Fana (1300 m) dempués, llueu de pocu más d'una hora de patéu. Esta mayada, ya con pocu usu ganaderu en cuanto a cabañes en pie, asítiase nun preciosu llugar, nel que tocará parar a echar un tragu y decidimos continuar hacia los puertos de Sus, saliendo ya del abellugu de les fayes de Fana y pasando a monte baxu, conociendo dellos collaos como'l del Potru y Piesca, onde diremos ganando viste de tolo conceyu ponguetu.
Alcordámonos nel nuesu caminar de rutes per Ventaniella, pela redolada'l del Altu Ponga, pel valle Solafoz y mayá Maciédome... ye dicir, munches alcordances y munchu amor por esti conceyu tan montañeru, poro les últimes imáxenes de llobos decapitaos, de perros envelenaos déxanos con un tastu amargu, pa colos sos habitantes.
A la fín, aportaremos al colláu Chozu (1685 m) onde ganamos les ansiaes vistes a los Picos d'Europa y pa munchos del grupu, entamaba l'ascensión final hacia'l momento de la xinta, ye dicir, el cumal del Picu Zorru jaja, que ye lo que tien dir de monte con xente del crossfit, que siempre tan pensando en comer hidratos y proteínes.
Lloñe de les rises por fame, encumaremos el picu Zorru, ún de los montes más guapos ya importantes d'Asturies, al que siendo sinceros, nunca se cansa unu d'ascender y más nun día como'l que nos tocó esfrutar. Sicasí, la xinta calmada con vistes a tola redolada oriental asturiana, dexóme coles ganes de conocer la fastera d'Arcenoriu y el colláu Guaranga, tamién dando alcordanza de mi pasu per Llué y tola circular alrodiu'l Niah.u.
Llueu del descansu, tocará entamar el descensu hacia'l colláu Zorru, bordiando'l picu Lluengu pela manzorga, pasando dellos tramos de playes pindies, llegando a pescanciar por qué n'iviernu, esta fastera noroccidental ye pelín abegosa pa los montañeros. Dempués d'esti pasu, aportaremos al colláu Pomerín, onde continuase per senderu mui marcáu hasta'l colláu Caldes, anque nós, preferimos conocer la viesca del monte Cepos, que baxaría a pinchu hasta la mayada d'Enol.
Esta viesca, lloñe de tener senderu, sedrá mui divertida de percorrer, navegando pente les sos fayes, pelos tarrenes menos pindios teniendo que travesar delles riegues, que depende la nómina del añu, sedríen auténticos barrancos. Ensin mayores problemes, traveseramos tola viesca en baxada, alcontrándonos de frente cola cabaña del mayáu d'Enol, onde ya, garraríemos camín conocíu, de la nuesa primer ascensión a la Peñe Recuengu.
Dando la última vista al Picu Zorru y el monte los Cepos a les nueses espaldes y baxo les ablucantes muries que caen pel Renal de les Cabriteres dende'l Recuengu, vamos dir al alcuentru del camín que baxa pela Foz del Vallizón, pela que xubiéramos va dellos años, per tarrén amestáu de roca moyada, ñeve y agua enforma.
Esta vegada, los collores sedrán bien distintos, tamos el primeru de Mayu y malpenes baxa agua curioso, lo que ta diciéndonos que pinta un branu complexu, pero al menos, les milenta tonalidaes de verdes y dalguna qu'otra poza y tabayón con agua, refréscanos la vista y tamién la tiesta, nestos caberos metros enantes d'aportar a la pista de Ventaniella de nuevu.
En resume, la nuesa sensación de la ruta de 6 hores que ficimos, fue la meyor y más guapa circular al Picu Zorru, qu'en tán sólo 11 km y 1050 m de desnivel, va facenos conocer la maraviya del monte Fana, más tolos puertos de Sus hasta'l cumal, pa descender pela foz del Vallizón, que pudimos comprobar que nun ta tan caminada como pensaba va dellos años.
No hay comentarios:
Publicar un comentario