Sobrefoz (Ponga) - Solafoz - Les Llampes - Mayá Maciédome - Robléu - La Roza

24 de Xunetu de 2022

Track: Sobrefoz (Ponga) - Solafoz - Les Llampes - Mayá Maciédome - Robléu - La Roza

Dempués de la ruta nel Porrón de Viañu, tocaba pasar la tarde per Sobrefoz, dándonos un refresquín nel banzáu de la entrada'l pueblu, onde dexamos les furgonetes pa sobar y fuimos al pueblu a pasar el restu la tarde, tomando daqué nes terraces de los chigres del pueblu, hasta que cenamos en Casa Severa, de manera increyible.

Al día siguiente, tocó madrugón por mor de la meteo soleyera que daben, cafetín na furgo, dalgo d'embutíu y dempués de despedinos d'Anna que tiraba pa la playa, Mario y yo, salimos del pueblu so les 9 y media la mañana, col envís de reconocer tol valle de Solafoz.

Partimos de Sobrefoz pegando la solana de bona mañana

Digo reconocer, porque n'anterior visita, baxábemos con tal pingadura de nuesa travesía dende Tarna, que nun la esfrutamos como debiera, asína que xubimos hacia'l colláu Calviáu, pasando pembaxo la cueva la Llosa y siguimos siempre per bon camín hasta topanos cola riega Solafoz, la cuál debemos siguir, abandonando'l claru camín que lleva hacia les cabañes de la Porquera.

Averámonos a Solafoz pel colláu Calviáu

La entrada per Solafoz ya d'amuesa de lo que nos espera, un llugar casi máxicu d'agua y viesca, que diremos percorriendo a la solombra, per un antiguu camín empedráu, hasta atopar delles cabañes desaniciaes pembaxo del mayáu, onde tovía se caltién vida ganadera.

Travesaremos a la solombra tol increyible fayéu

A partir de les cabañes, continuaremos a la gueta de solombra, siguiendo'l senderu al llau de la riega, hasta abandonalu a la manzorga, por mor del embarranque de la riega, saliéndonos en dellos tramos del senderu más evidente, pa nun tener que soportar los rayos de sol, esfrutando del placer de caleyar baxo unes enormes fayes ensin mayor problema qu'avanzar cuesta riba pela pindia viesca.

Les vistes hacia'l Tiatordos y la baxera del Maciédome son una pasada

Nun puntu decidimos salir de la viesca, pa que Mario conoza'l mayáu superior de Solafoz, nomáu como la Baullosa, onde pastiaben tranquilamente bien de vaques, siempre cola ablucante fastera norte del Maciédome presente. Nel intre, alcontraríemos agua pa Mia y seguiríemos ascendiendo a pinchu a la gueta del senderu que vien dende la mayada de Llagu, míticu puntu del que parte la normal al Maciédome.

 

A la solombra d'un imponente paré, xintaremos daqué, con munchu calor nel cuerpu y decidimos abandonar l'ascensu al cumal, prefiriendo conocer la mayada homónima y buscándonos la vida nuna baxada que nun conocíemos pero que diba aportanos más que'l propiu cumal.

Ascendemos hacia'l guapu colláu Les Llampes (1675 m)

Cola tranquilidá de nun tener que salvar otros 300 m más de desnivel hasta'l cumal del Maciédome, descansamos un ratín y continuamos per una canalina hacia'l colláu les Llampes, onde les vistes son de díez, col omnipresente Tiatordos y milenta montes más tanto de Redes (Cornielles, Becerrera...) como de Ponga (Recuengu, Zorru...).

 

Cuando lleves dellos años pel monte astur, ascendiendo montes ensin dexar un cumal sin pisar, acabes dándote cuenta qu'aporta más conocer un senderu, un mayáu, una canal tanto como'l propiu cumal, poro cuando vimos la mayá Maciédome dende'l colláu quedamos prendaos del sitiu y tirámonos abaxo felices por conocer tan guapu llugar.

Baxamos hacia la Mayá Maciédome... de lo más guapu de Ponga

Si disfrutáremos munchísimu de la xubida per Solafoz y de la pequeña pero pindia canal hasta Les Llampes, la canal de baxada hacia Maciédome, fue preciosa y cuando a la fín, aportamos a la mayada, quedamos alloriaos polo guapu d'esti requexu de Ponga, con unes vistes de postal hacia la peñe Recuengu y el picu Zorru.

Equí, sin tener referencies, ya que teníemos la baxada preparada per Ambenes, tirámonos del mayáu p'abaxo cruciando una pequeña riega, pal pie d'un arbolón alcontrar senderu que siguiremos nun descensu sele, hasta un hombru que baxa dende la Peña Les Llampes.

Descendemos pel monte Robléu per siendes y pistes madereres

Equí, el senderu piérdese munchísimu, pero la idega ye descender una centena de metros de desnivel pel hombru o la vallina paralela, hasta atopar de nuevu, unes envueltes del senderu que va dexanos nuna pista maderera de perbon tamañu, la cual debemos ya siguir en amplies revueltes hasta topanos penriba de la Venta la Faeda.

Tramu final per pista hasta la mecederu de la riega la Roza col rigu Ponga

Podríemos descender hasta ella pa cruciar el rigu Ponga y baxar a Sobrefoz per carretera, pero continuamos per camín paralelos al rigu, hasta aportar per camín a delles cabañes na Roza, pasando delles portielles bien cuidaes, hasta arribar a la mecederu de la riega la Roza col rigu Ponga, onde alcontraremos una ponte nun estáu llamentable, la Sota'l Trongu, la cual cruciamos nun actu de valentía, pa empatar nun pindiu ascensu cola pista que baxa de Ventaniella.

Continuamos pela pista de Ventaniella hasta Sobrefoz

Dende equí, al pié del barrancu del rigu Vallizón, tocará facer unos 2 kilómetros de pista al sol, que faense pesaos, saliéndonos nos Cantiles, per un antiguu camín pa entrar de frente a Sobrefoz, alcontrándonos casualidaes de la vida, otra vegada na terraza de Casa Severa, onde nun podemos más que tomar una cerveza y decidir meter pal cuerpu un filetón de xata astur que facía saltar les llárimes.

 

En resume, circular imprescindible pa conocer valles, mayaos, viesques pocu andaes d'esta fastera de Ponga y que tienen un valir brutal, lloñe ya de completar esta ruta xubiendo al Maciédome, a nós, súponos a gloria los 14.3 km del percorríu, los +/- 1240 m de desnivel y les 6 hores y media de patéu.

 

Camudando'l Camín na Ponga desconocida