Venta La Faeda (Ponga) - Riega'l Cabañón - Porrón de Viañu - Miédome - Salguerosa - Ventaniella

23 de Xunetu de 2022

Track: Venta La Faeda (Ponga) - Riega'l Cabañón - Porrón de Viañu - Miédome - Salguerosa - Ventaniella

Dende la ruta Ambenes na primavera na qu'esfrutáremos como guah.es, conociendo delles fasteres nueves, ya teníemos na tiesta tornar a Ponga a pasar un finde per Ventaniella. Aprovechando que la intesidá del viaxe al Pirinéu d'esti añu, dió pasu a cancelar la nuesa mítica Travesera de Picos en Xunetu, ensin dubiar, apeteciónos a Mario y a mí facer un finde montuno y averámonos hasta'l pueblu de Sobrefoz pa ello.

A esti primer día, axuntábense Anna y Benjamín, quedando como siempre nel chigre La Huera, en Cangues d´Onís, pa siguir hasta Sobrefoz, onde continuaremos pela pista que xube hasta Ventaniella, aparcando los coches na Venta La Faeda, anque a dicir verdá, pudiéramos siguir a un bon apartaderu en Fonperi.

Partimos de la Venta La Faeda (885 m)

Una vegada que tamos preparaos, saldremos pista arriba pa facer los 2.5 km que sepártanos de Fonperi, durante dalgo más de media horina. Nesi trayeutu, dexaremos a la nuesa manzorga'l desvíu hacia la Bustariega, mayáu, onde podriemos continuar hacia la collada Obrangu pasando pelos montes de la Recabada y el Traveséu, pero nun va ser el nuesu percorríu nesti día.

Aportamos a Fonperi pa conocer la preciosa viesca de la riega'l Cabañón

En Fonperi, namás pasáu'l saltu d'agua, alcontraremos un fitu qu'amuésanos el senderu que siempre a la mandrecha la riega'l Cabañón, nos fadrá entrar nuna viesca d'ensueñu, nun llugar nel qu'ascenderemos ensin danos cuenta del desnivel, esfrutando del frescor de los árboles.

Travesamos tol valle'l Cabañón p'abandonalu enantes del desvíu hacia Zamarzanu

Nun puntu pasararemos durante dellos metros a la manzorga'l rigu, na faldera del Renal de Viañu, pa tornar a la mandrecha, pelín más alantre, pa continuar pela viesca hasta'l desvíu hacia'l valle Zamarzanu, onde tendríemos salida direuta hacia'l mayáu del Cabañón, tema que nun mos interesa demasiáu, al facer dar muncha vuelta.

 

Tramín pelín abegosu per monte baxu hasta l'ablucante arista final al Porrón de Viañu

Poro, vamos tirar pelín a pinchu, nunca meyor dicho, hacia'l nuesu destín, el Porrón de Viañu, siguiendo traza de senderu, qu'en varios puntos métese en tramos dalgo abegosos, con cotoya baxa y peña, que tendremos que sortiar como podemos, hasta aportar a l'arista que vien del Renal de Viañu, onde les vistes hacia'l Maciédome faen alloquecer.

Cumal nel Porrón de Viañu (1578 m)

Caún al so ritmu y per onde meyor vamos alcontrando pasu, algamaremos los 1578 m del Porrón de Viañu, ensin dubia, ún de los meyores miradores de Ponga y ye que tamos enmediu d'un tarrén increyiblemente guapu con montes de primer orde en tola redolada como son el Zorru, Pileñes, tolos altos de Ponga, Tiatordos... un requexín de paz, pa xintar con calma, llueu de casi 2 hores y media de camín.

 

Monte de vistes privilexaes el Porrón de Viañu

 

Magar del descansu, entamamos descensu pela fastera sur, baxando tamién per onde meyor alcontramos traza hasta'l pequeñu mayáu de Viañu, onde pastia'l ganáu con calma, pa siguir cruciando una riega, ascendiendo a una forcadina que va dexanos descender hacia'l mayáu d'El Cabañón, parando un segundín a la solombra d'una cabaña a echar otru tragu d'agua y abelluganos del calor.

 

Baxamos hacia los mayaos de Viañu y el Cabañón

Nel intre, Benjamín, nun alcuéntrase mui bien, asina que vamos sele, caleyando pel mayáu hacia'l Foxu de Viañu, onde entamaremos tendremos qu'ascender al colláu Miédome, la que va tener sufriendo de más al compañeru, parando toles vegaes que faiga falta, hasta dar vista a les camperes de Miédome, onde podremos empobinalu hacia Ventaniella pa que continúe en solitariu hacia'l coche na Venta na Faeda.

Continuamos hacia'l Foxu de Viañu pa xubir hasta la collada Miédome

Nel monte hai díes y díes, hai que saber cuando abandonar siempre que se pueda, claro está y tornar con más ganes al día siguiente. El restu del grupu, teníemos na tiesta conocer la mayada Salguerosa dende la ruta per Ambenes, asina que salimos de Miédome per L'Argañón, baxo les Pandes de Pileñes, hasta la mayada'l Xerru, onde tomaremos un traguín d'agua.

Cruciamos pel mayáu'l Xerru hacia'l monte Llobiles

Con un calor asfisiante, salimos del Xerru hacia'l monte Llobiles y viendo lo pocu atrautivu de la xerra, decidimos faldiala pela so viesca, la cual ye otra pequeña ayalga, en cuanto a caleyar fresquín y esfrutando d'un fayéu preciosu hasta salir a la fín, a la enorme mayada Salguerosa, onde paramos a la solombra d'un arbolón a xintar otru pocu y relaxar los pies.

Siguimos hacia la Salguerosa pa descender hacia Ventaniella a la vera'l rigu Ponga

Dende la Salguerosa, la que percorremos camentando l'actividá que tendría antaño, ya siguiremos camín al llau del rigu Ponga, baxando hasta Ventaniella como ficiéramos na primavera enantes de conocer l'ablucante valle d'Ambenes, pa empobinanos ensin perda per tola pista hasta la Venta La Faeda.

En resume, ruta circular dafechu encomendable, pa conocer llugares perguapos y pocu visitaos, que durante los sos 17.5 km (5 llibrables si aparcamos en Fonperi) y +/-1150 m de desnivel, sedrán un esfrute pa tolos sentíos, durante les 7 u 8 hores que pudiera llevanos percorrela.

Camudando'l Camín pela Ponga xabaz