La Perera (Tierras del Burgo) - Madruédano - San Cristóbal - Modamio

5 d'Agostu de 2022

Track: La Perera (Tierras del Burgo) - Madruédano - San Cristóbal - Modamio

Mítiques vacaciones d'Agostu per Soria, viendo a la familia y collacios, pero nun branu, nel que ties tan poques hores "actives", que nun seya tar a remoyo como los garbanzos, esta vegada nun pude dir facer monte pel Sistema Ibéricu o el Central, a malpenes una horina del pueblu.

Asina que magar, d'un par de díes de salides correnderes pela redolada de Recuerda, decidí continuar tachando dalgún vértice más de las Tierras del Burgo, que ye la comarca onde asítiase'l municipiu de Recuerda y per onde salgo a facer salidines correndero-montañeres.

Partimos de La Perera (1066 m)

Esta vegada diba tirar direición Sur, hasta La Perera, onde ya ficiéramos una guapa ruta conociendo la Hoz de Caracena. D'otra miente, llegárame a les miós oreyes, que nesti pueblu, equipáranse víes d'escalada, asina qu'antes de les 9 la mañana, taba echándo-y un vistazu a la cueva d'entrada'l pueblu onde pude ver 4 u 5 víes equipaes, qu'espero anime pa equipar dellos muros bordilleros nesti mesmu farallón rocosu.

 

El casu ye que dempués d'entreteneme un ratín cola cueva, aparqué nel pueblu y salí corriendo pela Dehesa, con tovía ciertu fresquín mañaneru, hasta la mecederu de la riega de Madrúedano y el Fuente Arenaza, onde tendré que desviarme a la mandrecha.

Percorremos la Dehesa empobinándonos al hocino del arroyu de Modamio

Al pocu tendremos dos pequeñes foces, la del arroyu Madrúedano y la del Modamio, metíendome pela de Modamio que caltién camín, a la solombra por suerte, pudiendo correr relaxádamente saliendo a la parte alta, onde asítiense las Taínas de Encima del Monte, dando vista a lo lloñe al pueblu de Madrúedano y al monte penriba d'él, el San Cristóbal.

Siguí corriendo per bon camín, hasta Madrúedano onde pude cargar agua y continué peles sos cais y caleyos pa entamar una continua y llarga ascensión hacia'l San Cristóbal, nel que por suerte, pesie a la solana, nos sos 1361 m tiraba un airín prestosu, pudiendo tar un ratín curiosu nel cumal.

 

Aportamos a Valdenebro cruciándol y ascendiendo al San Cristóbal (1361 m)

Nuna hora clavada, taba nesti montucu, con vistes hacia'l Pico Lobo, pero a les 10 de la mañana, el sol ya apretaba, dando temperatures mui altes pa güei, poro tocaba colar lo más apriesa posibles, baxando a pinchu hacia'l camín de concentración entre Madrúedano y Modamio, mi siguiente finxu del día.

Una vegada que baxamos hasta'l camín, alcontrándome como en tola ruta, con dellos curcios, va tocame salir del camín y garrar 1 km de carretera hasta Modamio, pudiendo llibrase pel camín de la Taína del Cerro baxando al Fuente Arenaza, pero col calor que ya facía, averéme hasta Modamio, pueblu ya deshabitáu, como tantos nesta España Vaciada.

Baxamos del San Cristóbal averándonos al pueblu desaniciáu de Modamio

Aprovechamos pa garrar agua y echar cuatru semeyes al pórticu de la ilesia y a la so manzorga, garraremos el camín de vuelta hacia La Perera, que nun será otru qu'una pista que percorre tol valle de la riega de Fuente Arenaza, que tan bien conocemos na so parte más guapa del Hocino, interesante ornitolóxicamente falando y bien cerquina de Recuerda.

Ensin más que dexame cayer lo más apriesa posible, con una calufa importante, pasaremos corriendo dexando a la nuesa mandrecha al Otero, pa tamién escaecer a esta mano otru posible camín, que llevaríanos hasta Nograles, continuando pela pista, siempre penriba de lo que sería'l Fuente Arenaza.

Salimos de Modamio baxando pel valle de Fuente Arenaza

Con pocu más, aportaremos de nuevu a la Dehesa de La Perera, onde tovía, alcuéntrome con más curcios y aporto a la furgo, que menos mal que la dexara a la solombra, porque ya superaben los 30 graos a les 11 la mañana.

En resume, continuamos conociendo estas Tierras del Burgo, pueblín a pueblín y monte a monte, faciendo en 2 hores, unos 15 km con +/- 345 m de desnivel, pa encumar esti vértice del monte San Cristóbal no alto del pueblu de Madrúedano.

Camudando'l Camín pelos altos sorianos