Recuerda (Tierras del Burgo) - Otero de Mosarejos

13 d'Abril de 2014

Track: Recuerda (Soria) - Otero de Mosarejos

Paez mentira que tantos años corriendo y yendo en bici pel pueblu mió pa en Soria, y nun fuera a poner una rutina que partiera d'él, faciendo un percorríu bien curiosu. En selmana santa, Pau y yo, ficimos quiciás el camín que más me presta correr ampliándolu un pelín más con una ascensión.

Partimos de Recuerda pel camín de la Dehesa hacia'l hocino de Fuente Arenaza

Pocu dempués de les 9 de la mañana, garramos a los perros que llevaben lladrando un ratín y col envís de correr a ratos, salimos pel camín de la Dehesa, que comparte tramu col míticu GR-186. Esti camín, perbono de correr, tien unes vistes bien guapes pal Castillo de Gormaz, anque pa velu, dacuando tengamos que parar y dar la vuelta.

Al final, el camín ábrese nun par de ramales claros. Ún d'ellos xube hacia la mandrecha y anque paeza menos claro, debemos siguir el que va de frente, metíendonos un pelín per un tarrén semáu aportando a la foz (hocino) de la riega de Fuente Arenaza.

Travesamos esta guapa foz topándonos colos llugareños de picu y pluma

Equí ensin pérdida, tendremos un tramu guapu d'andar y mui entreteníu de correr, pero siempre en silenciu si ye que queremos esfrutar de los grandes habitantes d'esti allugamientu... les utres, toes elles d'un tamañu ablucante.

Corremos a tramos, ya qu'al dír al frescu de la solombra anima a ello, hasta topanos col crucie de siendes. La más marcada, asciende siguiendo les marques del GR pel Alto hasta la carretera SO-160 siguiendo hacia Galapagares.

Nun siguimos el GR-186 garrando'l ramal drechu que sigue la riega de Fuente Arenaza

Per equí, fadríemos lo que sería la ruta corta, enllazando más aína cola baxada que fadremos hores dempués. Nós, siguimos lo que sería la foz que sigue del Arenaza, el cual a tramos mui tomáu de broza llimpiamos va unos añinos y caltiénse en bones condiciones.

Ye una pena que nun seya más conocíu esti tramu de hocino, ya que tien delles formaciones nos parés ablucantes y llévanos a conocer otru pueblu más del municipiu de Recuerda... Mosarejos, onde namái queda un paisanu viviendo tol añu.

Aportando a la salida del hocino travesando la dehesa de Mosarejos hasta'l pueblu

Saldremos del hocino, pasando los últimos metros superando sebes del ganáu, pa salir a campu abiertu, nel que sin saber mui bien per onde ye meyor, travesaremos los semaos hasta aportar a la carretera (SO-P-4129) que baxa al pueblu.

Magar de refrescar nel bebederu a los perros, onde Kíla como siempre fué a metese del too y Bobi qu'aguanta abondo meyor el calor contentóse con beber, siguimos hacia un altu onde nunca tuviera y nos mapes apaez con un vértice xeodésicu.

Xubiendo con bones vistes hacia l'Otero

Dende la mesma fonte, ascendemos a una llomba, que llueu fadrános baxar al llau d'unos corrales hasta un camín que lleva a lo que nómase como la Salegar, anque enantes d'aportar ellí, meterémonos monte al travíes, lluchando un pelín colas "aliagas" que son una especie de pequeña cotolla, igual de gafa que l'asturiana, jaja.

Cumal del Otero de Mosarejos (1147 m)

De la que vamos xubiendo, tendremos guapes vistes col boquerón de la foz pela que venimos embaxo de la fortaleza de Gormaz y col agasayu al fondu de Picos d'Urbión ñevaos, al igual que si miramos al sur, col Pico Lobo.

Son les once y media y entama a apretar el calor, poro baxamos rápidamente como meyor podemos, ya que venir en pantalón curtiu pa correr, nun fué una gran idea pa metenos nesti monte. Dexamos los malos pensamientos, por mor de los pinchazos y toparémonos cola carretera So-160 que baxa dende la llende con Guadalajara.

Baxando al pueblu de Galapagares hasta'l hocino del Estepar

Caleyaremos per ella unos 300 ms y saldremos hacia Galapagares pela So-P-1430 durante otros tantos, desviándonos a la fín a la manzorga per un camín, que tien de llevanos hasta'l que vien del GR-186 qu'enantes comentamos.

Pasaremos d'esti últimu y siguiremos hacia baxo hasta una vallina que nun ye otra que la de la riega del Estepar. Equí, alcontrarémonos con otra foz, pocu conocida per caminantes y anque menos espeutacular que la de xubida, personalmente préstame muncho pa correr siendo mui tranquila y relaxada siempre en descensu.

Menos conocíu que l'anterior pero perguapu de caleyar

El final d'esta foz del Estepar, zárrase nun pequeñu beyu con un champán d'agua estancao, qu'al menes val pa que los perros refrésquense de nuevu. Enantes d'enzarrase'l camín, tenemos que salir a la manzorga per un senderu hacia un altu, onde verémonos a lo lloñe'l pueblu de Recuerda.

Namái, tendremos qu'alcanzar la carretera, siguiéndola durante casi un kilómetru, el cual faise pesáu enforma, pudiendo siguir carretera hasta'l pueblu o metese pel camín de Las Cabeceras, llibrando el pasu de los coches al llau nueso.

Recuerda en Soria (905 m)

En resume, percorríu de 15,6 kms y 400 ms de desnivel positivu, fechos a tramos corriendo y otros con muncha tranquilidá, llevándonos dalgo más de 4 hores y media. Perbona ruta, pa conocer esti requexu sorianu y como non, entrenar n'altor ya que taremos casi siempre penriba los mil metros y eso nótase y muncho.

Camudando'l Camín con Bobi y Kíla