L.lindes (Quirós) - Penarpín

13 d'Abril de 2014

Track: L.lindes (Quirós) - Penarpín

Son les casi les 11 de la mañana y tamos nel pueblu quirosanu de L.lindes. P'aportar a él, salimos de Xixón, garramos la AS-I o minera, hasta topanos en Mieres del Camín cola A-66 que nos dexaría en la Pola de L.lena. Ellí desayunamos como pudimos, y garramos la As-230 que nos fadrá xubir a la Col.la la Cobertoria dempués de pasar pelos pueblos l.lenizos de Palaciós, Piedracea y Armá.

Equí entraremos nel conceyu de Quirós y siguimos per esta carretera hasta Santa Marina, pasando enantes per Chanuces y Murias. Nel crucie, garraremos la Qu-4 pasando por Fresneo de Cortes, Cortes y a la fín aparcaremos el coche al llau de la Ilesia de L.lindes.

Entamamos nel pueblín de L.lindes (917 m)

La ruta que vamos facer güei, entama como munches d'elles de siguir blogues como'l de Cienfuegos, quedándome guardada na carpeta de pendientes conocer l'ascensión a la Penarpín y lo que ye más importante descubrir la Foiz Grande y la Pequena.

Ascendemos hacia'l Colléu (1283 m)

Ensin más, un grupu numerosu del GM Xuan de la Borrina, entamamos a caleyar pel camín normal hacia l'ascensión a Pena Ruea, hasta desvianos nel Caleru hacia la Maya Vieya, pasando dempués per Las Escomeras y d'ellí ascenderemos hasta'l Col.léu (1283 m).

Conocemos la increyible Foiz Grande pasín a pasu

Nel intre,  aparte de ver per primer vegada Penarpín, tendremos que baxar unos 150 ms de desnivel hasta la riega de la Foiz Grande, la cual cruciaremos con bon caudal d'agua nuna prestosa ponte de madera.

A partir d'equí, alcontrámonos con ún de los llugares más guapos qu'hai n'Asturies. Tol mundiu conoz la sienda'l Cares y nun se por qué, ver baxar a lo xole les muries dende la fastera sur de Pena Ruea, con delles canales impráuticables faime alcordame de Picos.

Salimos de la Foiz entamando l'ascensión hacia Busdongo

Ensín pallabres, avanzamos pasin a pasu, ensín parar de mirar pa los llaos, colos parés que cayen dende Penarpín a la manzorga y les "picantes" canales de la Ruea. El restu, camín perbono al llau del ríu, fai qu'esti tramu paeza hasta curtiu d'andar.

A les dos hores de camín, entama l'ascensión de Penarpín, saliéndonos per una canal herbosa a la mandrecha d'un contrafuerte calizu de la pena. Anque pindia, ascendemos cómodamente cola vista puesta nos milenta cumales qu'apaecen en direición al Puertu Güeria, hasta aportar cerquino del mayéu de Busdongu.

Perguapu ascensu hacia Penarpín coles cotes de la fastera del Puertu Güeria

En Busdongu, pasaremos a tener vistes del conxuntu del Tapinón-Siegalabá y de dalgo qu'hasta entós nun conocía entá, el nomáu L.legu, con abonda agua nesta dómina del añu. Pela cueta, dexamos un pocu de mirar pa tolos llaos y garramos la panda que tien de llevanos hasta'l cumal de Penarpín a 1677 m.

Cómoda pala final con ablucantes vistes

L'ascensión aparte de dir caún per onde nos apeteza, resulta cómoda y les vistes son de lo meyor del macizu de Penaubina, prestando muncho ver esos "güeyos del diablu" na rasa que cae nel Baxu Ruea, el cual caltien ñeve enforma.

Cume de la Penarpín (1677 m)

Con un día tan guapu, casi tamos durante una hora nel cumal, hasta que decidimos baxar hasta la base de la Penarpín, onde separámonos ya que nun sabemos como de bien o mal tará la Foiz Pequena. Poro, Pangua baxa con Rebe y Ana y los demás siguimos col envís de descubrir esa foiz más pequeña y menos conocía.

Baxamos de nuevu hasta Busdongo col envís d'empobinanos a la Foiz Pequena

Na baxada hacia la foiz, pasaremos cerca de la fonte la Gocha, travesando pelín más baxo la propia riega de la Foiz Pequena, la cual nun mos va dexar en dengún momentu, teniendo que saltala delles vegaes durante l'itinerariu.

Descubriendo la increyible Foiz Pequena

Siempre con traza de camín, unes vegaes más marcada y otres menos, vamos descendiendo esfrutando munchísimu de caún de los pasos, dándonos quiciás pena, por nun animar un pelín más a los collacios a venir con nós.

Los tramos pegaos al regatu de riba, entemécense con otros de viesca y collores verdes ablucantes del mugor de la parte baxera de la foiz. Nun hubo parte que nun mos prestase, hasta que topámonos cola mecedura d'ambes riegues, la de la Foiz Grande y la de la Pequena dando pasu al Gorbizal de la Foiz.

Siguimos baxando hasta la mecedura les riegues nel Gorbizal de la Foiz

Pocu más alantre diremos dexando'l ríu embaxo nueso, al xuntase delles riegues más la de Faya Cabornu y la del Esquil, fornando'l ríu L.lindes empozándose más nel pasu na foz de la Cándana.

Como nun sabemos si esiste pasu o no, preferimos salir hacia unos mayaos que darán pasu a travesar la riega L'Esquil, metíendonos nel monte Barral, que n'ascensu llevarános hasta la viesca de Pascuas.

Salimos del Gorbizal hacia'l monte Las Pascuas

Magar de garrar la viesca, baxaremos pente altes fayes y fondos caleyos enllenos de fueya, lo cual dificulta'l camín, hasta'l nomáu Pontón. Ellí travesaremos el ríu L.lindes y ya siempre n'ascensu xubiremos per bon camín hasta'l mesmu pueblu de L.lindes, onde esperenmos los collacios con unes cervecines.

Dicir que ye una ruta mui guapa y mui completa, que si cuídase un pocu pudiera ser una gran clásica del montañismu asturianu. Sólo faltaría, que'l pasar de xente pela Foiz Pequena, fuera dexando más marcáu'l camín, anque ye claru que les venides d'agua nesta foiz tien que ser ablucante nel desxelu.

Baxamos la viesca hasta cruciar el ríu L.lindes nel Pontón

En resume, ficimos un percorríu de pocu más de 11 kms, superando casi 1300 ms de desnivel acumuláu nunes curioses 7 hores de camín, onde'l día nun pudo acompañar meyor, al igual que la sidre casero y les fríes cerceces del chigre de L.lindes.

Mil gracies al paisanu que lu lleva, por ser tan atentu y tan agradable... asína presta pola vida llegar a un pueblu dempués de dir de monte. Un abrazu.

Camudando'l Camín nel "piquinu Cares" de la Foiz Grande