Caranga Riba (Proaza) - Picu Barzanalgas

30 de Marzu de 2014

Track: Caranga Riba (Proaza) - Picu Barzanalgas

Segunda vegada que vamos intentar esti cumal nesti añu montañeru. Nel anterior intentu, la llargura de la ruta y sobretou, la llegada d'un frente fízonos quedar na Pena Xerragallos. Pa dar preste a la ruta propuesta por Pangua, decidimos camudar de valle, partiendo dende Proaza, envede del conceyu Quirós.

Como siempre que visitamos el valle del Trubia, salimos dende Xixón pela autovía hasta Uviéu, onde magar de percorrer el tramu de A-63, salímonos hacia'l valle, travesando Santu Adrianu y parando na capital de Proaza p'almorzar.

Entamamos en Caranga Riba (288 m)

Llueu, siguiremos carretera pela As-228 hasta Caranga Baxu, pa siguir pela As-229 hasta'l siguiente pueblu, Caranga Riba, onde a les diez en puntu taremos preparaos pa entamar la ruta travesando les guapes cases d'esti pueblín.

Alcontraremos la ponte que crucia'l ríu Trubia y al momentu taremos xubiendo con xeitu per una pista paralela al regatu Zarameo. El valle de les riegues de Zarameo y Mingoyo, ye una auténtica pasada, con viesca autóutono nel so entamu, pasando per un pinar plantáu y tornando a viesca astur na so parte cimera.

Xubiremos per una entretenida pista al llau del regatu Zarameo

En tol tramu de camín, pente los árboles vamos acolumbrando montes bien prestosos, como'l cordal de Caranga, l'Airúa, l'Aramo ñeváu, Gurrión... toos ellos conocíos, pero tamién vemos per primer vegada una cota modesta, pero mui gayolera... la Pena Collada.

Serán 4 kms y 500 ms de desnivel, los que superaremos pela pista hasta'l colláin de Mingoyo, ganamos toles vistes anteriores ensín vexetación y veremos per primer vegada la llende d'entamu de la ñeve, que por suerte, anque na Pena Xerragallos ye más baxa, nel nuesu camín, más soleyeru, ye muncho más alta.

Les vistes dirán abriéndose hasta aportar al collaín Mingoyo

La pista ye durina, pero na so parte final alcontramos delles buelgues d'osu, qu'entretuviéronmos muncho, suañando con ver dalguno a lo lloñe si puede ser, jeje. Del collaín, con un vientu frescu pelín molestu, vamos siguir xubiendo hacia la braña de Zarameo, travesando pa ello una molesta viesca de carrascos.

Siguiremos l'ascensu viendo les primeres ñeves nel Xerragallos

De Zarameo, con más de dos hores de ruta, facemos camín hacia un colláon, el de Zana, nel que tendremos la primer vista del nuesu oxetivu, el picu Barzanalgas. Tamién, echaremos un vistazu tranquilu hacia toles cotes del puertu Marabiu, col Caldoveiru destacando so les demás.

Aportaremos a la Braña Zarameo y siguiremos xubiendo hacia la Zana viendo'l Barzanalgas

Nesti afán observador, vamos quedanos pillaos mirando hacia la viesca d'embaxo'l Barzanalgas, onde creyemos ver dos osos paraos enmediu d'ella. Taremos bon ratu, queriendo saber si múevense o non, anque finalmente tenemos que siguir camín y quedamos ensin saber si yeren o non dos bardiones.

De Zana, vamos garrar una pequeña xerra, col so puntu más altu nel picu Tueracaváu (1272 m), del que baxaremos hasta'l col.láu de Mil.ladorio, onde falamos con Ana y Zori, que nun saben si intentar l'ascensu o non, ya que'l tarrén al que vamos enfrentanos paez pelín complexu.

Percorremos una pequeña xerra pa baxar al colláu Mil.ladorio y conocer l'Acebeo

Al final, deciden continuar un pocu más, baxando toos hasta l'Acebeo, que como'l so nome indica ye una viesca de carrascos o acebos, na que pisamos per primer vegada la ñeve y nun l'abandonaremos hasta pasaes bien d'hores.

El tramu del Acebeo nun tien mayor problema que siguir l'arista pente'l colláu y la muria del Barzanalgas, siguiendo como meyor se pueda, les distintes traces de camín qu'alcontramos. Será un tramu mui prestosu y perguapu, pero bien ceo, entamarán les dificultaes.

Del Acebeo metémonos nun tarrén d'amestáu mui malu y abegosu hacia la cresta

Entraremos n'ascensión hacia la cresta del Barzanalgas, con un amiestu de caliza, vexetación y ñeve, nada cenciello. Hai que tar sollertes, pa saber onde pisamos a cada momentu y el tarrén va poniéndose pindiu a cada pasu.

Con munchu güeyu y tranquilidá, voi trazando la ruta más segura, que nun entamu va acompañada de h.itos, pero piérdense cuando pior pinta la cosa. Finalmente, salimos de los pasos más pindios y anque paeza que les dificultaes van aselar, hasta que metémonos na mesma cresta nun vamos tar medianamente seguros.

Ablucantes vistes dende'l Barzanalgas hacia Somiedu

Dende riba, camuda'l xeitu dafechu, ya que veremos tola Pena Sobia y munchísimos montes de Somiedu y Teberga ñevaos, escaeciendo un pelín, tol esmolecimientu que llevabemos na última hora.

Con cuidadín, avanzamos pel calizu, hasta aportar al puntu más altu d'esti Picu Barzanalgas o la Violona, con 1488 m y llende de los conceyos de Teberga, Quirós y Proaza, siendo d'esti últimu la so cota más alta.

Cumal del picu Barzanalgas (1488 m)

Dende va tiempu, ya tenía decidío que nun díbemos baxar per ellí por mor de lo peligrosu, ya que siguir la nuesa propia buelga nesi amiestu d'ellementos, diba convertise nuna xera abegosa cuanto menos.

Así que decidimos baxar hasta las veigas de Sobia, onde intentaremos abelluganos detrás de dalguna corra y xintar con tranquilidá. Na baxada, Canta, pegóse un fostión contra una peña y tuviemos que facer una especie de xinta y cura, onde nun faltaron les rises como siempre.

Decidimos baxar a la Veigas de Sobia pa xintar y baxar per un llugar más cómodu

Magar de la xinta, travesaremos las Veigas, primeru les de Dientru y llueu les de Fuera, empobinándonos hacia'l colláu más cenciellu pa salir pel oriente de la Sobia, el d'Oliz.

Saliéndonos de la Sobia, entama la nuesa pequeña aventura pa tornar hacia la braña de Zarameo. Hai que dicir, que la decisión de nun baxar per la vía d'ascensu, va llevanos a aumentar les hores y kilómetros de ruta abondo.

Colamos de la Sobia per Oliz p'alcontrar camín hacia la Braña La Espina

Voi baxando yo con Kíla, demientres los demás xuben hasta Oliz pela buelga con muncha ñeve, alcontrándome con dellos ciervos, los cuales Kíla escorre hasta bien lloñe jaja y toos xuntos restolamos pente la viesca'l senderu que tien de llevanos hasta la Braña la Espina.

Orientándonos cola vista de la Pena Xerragallos pente los árboles, alcontramos un senderín, que pocu a pocu déxanos na braña la Espina, onde xintáremos nel anterior intentu al Barzanalgas. Dende equí, xubimos al colláu de Bustremundi y pasando del cumal del Xerragallos, metémonos nun llargu bordéu pembaxo de los parés que caen de Sobia.

Xubimos al colláu Bustremundi pa bordiar penriba'l regatu hacia les brañes de Zarameo

A cachinos vamos viendo los espolones que baxen dende Tueracaváu hasta la riega Zarameo y mirando los mapes, sabemos qu'hai un senderu que traviésenlos hasta Zana. Tan sólo tenemos que xunir el que llevamos dende Bustremundi hasta ese otru.

Pero lo que paez cenciello, siempre ye muncho más difícil. En tol bordéu de la cabecera del regatu Zarameo, vamos perder y alcontrar lo que paecen bones siendes, como diez u quince vegaes jaja. Asína que como bonamente pudimos, fuimos navegando pela viesca hasta alcontrar esi senderín xustu nos espolones que baxen de Tueracaváu.

Navegamos pela viesca hasta aportar a un senderín que déxanos en Zana

Col senderu ganáu, vamos dir casi relaxaos hasta Zana y d'ehí, baxaremos sucesívamente a la Braña Zarameo y el collaín Mingoyo, onde taba esperándonos paciéntemente esa pista que nuna llarguísima baxada, llevarános a Caranga Riba de nuevu.

Por dar un exemplu de lo complexu d'esti tramu, cola ñeve, les milentes siendes perdíes y la viesca, dicir que dende Olíz hasta La Zana, tardamos casi dos hores pa facer pocu más de 3 kms, poro da pa camentar si la baxada con calma pela vía d'ascensu nun sería más rápida, anque como siempre na montaña la seguridá ye lo primeru.

Cola semeya de Pena Collada baxamos pel mesmu camín hasta Caranga Riba

En resume, ruta perllarga de casi 18 kms y un desnivel acumuláu de 1570 ms. Con estos datos, les casi 10 hores de camín, tan más que xustificaes, anque como siempre la belleza de los llugares conocíos y la satisfacción de facer les coses bien y de mui bon humor, faen que pague la pena y muncho lo cansáu de la ruta.

Camudando'l Camín en tierra d'osos

Nesta ruta ficimos: Picu Barzanalgas (1488 m) monte prestosu astur y primer cota de Proaza

Ver progresos en: Retos montañeros