Sotres (Cabrales) - Cabezas d'Obesón

8 de Marzu de 2014

Track: Sotres (Cabrales) - Cabezas d'Obesón

Nun too, nel pequeñu mundiu que ye Picos d'Europa, ye intentar los cumales más altos y andar peles fasteres más xabaces. Quiciás, desconocemos dellos llugares... mayaos, cordales, canales más baxos que les altes cotes pero nes que la guapura más fonda de Picos caltiense si cabe tan fuerte como nos altores.

Ún d'estos llugares, que son un ablucante mirador de los tres macizos, son los pequeños cordales penriba del pueblu cabraliegu de Sotres. Ellí, hai un cordal pente Cabrales y el Valle Altu de Peñamellera, que más qu'un cordal ye un continuu de cabeces... son les que podríen nomase del Obesón.

Salimos del pueblu cabraliegu de Sotres (1049 m)

Como ye vezu, salimos un abundante grupu del GM Xuan de la Borrina, al alcuentru n'Arenas d'un almuerzu y de Fernan, Bittor, Iñaki y Carlos. La ruta en coche ye la normal Xixón-Posada pela autovía del Cantábricu, pa garrar direición l'Altu Ortigueru y d'ehí ya en Cabrales, pasar pelos pueblos de Canales, Carreña, Poo y Arenas.

Magar del cafetín y pinchu de turnu, tiramos pa Sotres, onde xubiremos dende la metá del pueblu hasta l'aparcaderu, pa preparanos pa la ruta. Dende'l primer momentu, tendremos unes vistes xeniales del macizu central col cordal de Juan de la Cuadra, el de la Peñe Castil y los Albos y Areneras más a la mandrecha entá.

Xubimos per pista hacia la Caballar

Ensín más qu'esfrutar de les vistes y del día guapu que tenemos, xubiremos per pista hacia los ivernales de la Caballar. Al aportar a la Caballar (1242 m), aparte de les bien conservaes cabañes, toparémonos cola amplitú de vistes hacia'l macizu oriental tamién, destacando'l picu Deboru, asina como'l Neverón d'Urriellu nel central.

Baxamos un pelín de la Caballar hacia la fonte de Viés

En pocu menos de 45 minutinos de caleyar sele, baxaremos agora hacia'l H.ugu los Probes p'ascender dempués hacia'l bebederu y fonte de Viés, onde ya tenemos bona vista de los nuesos oxetivos: las cabezas del Obesón.

Ante nós tenemos les distintes cabeces del Obesón

El camín nun tien perda denguna, avanzando hacia'l xerru del Obesón, pelos H.elgueres de Viés, upándonos pela Teyera al collaín de Cárabu. Dende equí, baxaremos un puquiñín pela Posá Pirué hasta l'ampliu colláu Pirué (1239 m).

Avanzamos hacia elles coles vistes del Oriental y del Central

Nel nuesu camín hacia Pirué, fuimos dando vista al nuesu rei de Picos: L'Urriellu, anque tamién la vista desvíasenos a cumales más orientales como'l Samelar y Mancondiu. En pocu más d'una hora y media de camín tamos ya dimpuestos a atacar la primer cabeza del día y nun ye otra que'l Cabecinón del Agua.

Entamamos l'ascensión al primer cumal... el Cabecinón del Agua

Esti cumal tien vértice xeodésicu col nome d'Obesón, pero al mi entender la Cabeza Obesón ye xustu la cota contraria al occidente, siendo'l nome d'esta cume Cabecinón del Agua, al qu'acompañen delles cabecines del Agua al oriente.

Perguapu tramu final con travieses al Cabecinón del Agua (1147 m)

Dicir que magar d'un ascensu per una canalina de yerba, tendremos un par de travesíes con un toque aéreu con vistes a la xerra'l Cocón y a la so cota más alta: el Cuetu La Cerralosa. Nun m'esperaba que xubir al Cabecinón del Agua, fuera tan entreteníu y nun sólo poles vistes de Picos, sinon poles travieses y pequeños trepes hacia'l so cumal.

Semeya de grupu na primer cota del Valle Altu de Peñamellera

Son les doce y media, poro decidimos siguir con tranquilidá tola xerra alantre. Baxaremos del Cabecinón y alcontrarémonos con ún de los pequeños cumales que formen la cabeza Las Caretas, pa llueu siguir per un tarrén más caóticu pasando pela H.orcada La Gobia.

Crestiamos al traviés de la Cabeza Las Caretas hasta la Cabeza Obesón

Encumando cualesquier cota qu'alcontramos y esfrutando de les cayíes que Las Caretas presenten al norte, plantámonos nel colláu col caberu oxetivu del día: La Cabeza Obesón, la cual fadremos con menos dificultaes que'l tramu anterior, tan caóticu y típicu del calizu nortizu d'Asturies.

Grupu na Cabeza Obesón (1424 m)

Agora sí, colos 1424 m de la Cabeza Obesón, damos preste a tolo que llevamos nes mochiles. Ye la una y venti, pero paeznos un llugar afayaizu pa xintar con calma y tomar un bon ratu esti sol casi primaveral.

Llueu de fartase bien, equivocámonos na baxada del Obesón. Por esbillar la baxada que paecía más cómoda, metímonos nuna vallina de faya vieya y ñeve, que fízonos perder munchu tiempu baxando al sur, hasta aportar al colláu Obesón.

Baxamos hacia'l colláu Obesón y d'ellí a l'Entreh.anu

Lo meyor, sería baxar direutos dende l'Obesón pel hombru occidental, llibrando el Cuetu los H.orcaos pela manzorga, aportando a la Vega Espeyas, anque d'esa forma, esaniciamos la visita a la mah.ada l'Entreh.anu, que caltien una bona cabaña y munches ganes de siguir el cursu del ríu L'Entreh.anu hacia abismos sol ríu Cares.

Despedímonos del Picu na cruz de l'Entreh.anu

Les vistes son inmeyorables na cruz de L'Entreh.anu, poro una semeya de despedida del Urriellu, y de los sos collacios de semeya: Castil, Neverón y Albos. Despedímonos d'esta parte del central y xubimos un pelín a la Vega Espeyas pa baxar pela H.uncal y el campu Cimbraña hacia'l valle de Camba.

Baxamos hacia los collaos de Camba

Nos collaos de Camba alcontrarémonos con un prestosu camín, que baxo la solombra del Cuetu Negru travesará pente les viesques del monte Sanllanu y el Cárabu. Siempre en xubida, tornaremos pela cruz de Camba y la puerte de Camba a la cabaña de Viés, que darános pasu de nuevu a la guapa fonte na qu'enllenar les cantimplores y refrescanos un pelín.

Ascendemos pel valle Camba hacia Viés

Dende equí, el camín ye conocíu, teniendo que xubir de nuevu hasta la Caballar, pa garrar la baxada hacia'l pueblu de Sotres, anque equivocámonos un pelín y tuviemos que baxar pela Ería del pueblu, a cuchillu travesando dellos praos.

Finamos la ruta pasando pela Caballar pa baxar a Sotres

En resume, ruta mui entretenida poles vistes y pol percorríu que llevaranos durante les rebaxables 7 hores, per una fastera de Picos quiciás dalgo escaecida. Como pagu por conocer estes xerra del Obesón, caleyaremos unos 13 kms y tendremos que superar unos 800 m de desnivel acumuláu... bien paga la pena.

Camudando'l Camín col Rei y la Reina de Picos

Nesta ruta ficimos: Cabecinón del Agua (1147m) primer cota del Valle Altu de Peñamellera y vértice xeodésicu

Ver progresos en: Retos montañeros