Bueida (Quirós) - Puertu Güeria - Muezca Cigacha - Ranchón - Socel.lares - Valle La Foiz

13 de Xunu de 2026 

Track: Bueida (Quirós) - Puertu Güeria - Muezca Cigacha - Ranchón - Socel.lares - Valle La Foiz

Tornamos a les rutes de calendariu del GM Xuan de la Borrina, yéndonos nesti casu hasta'l macizu de Penubina (Les Ubiñes), onde Pepa preparare una ruta p'ascender al picu Ranchón, conociendo'l pasu de monte de la Muezca Cigacha que nun conocía y tamién la baxada pel valle la Foiz, otra pequeña ayalga a descubrir.

El problema que teníemos yera'l calor que daben, teniendo que madrugar enforma y quitando de la ecuación el nuesu clásicu almuerzu de camín. Poro, plantámonos nel aparcaderu de Los Garrafes, pista alantre sol pueblu quirosanu de Bueida, pelín dempués de les 8 la mañana, pa preparanos y salir a les 8 y media en puntu.

Partimos de Los Garrafes (Bueida) (925 m) 

Caleyaremos con calma, siempre pela solombra pa dir entrando muscularmente en calor, personalmente sigue un pelín mosqueáu colos soleos, asina que nun quiero entamar fuerte, asina que voi dexándome dir al ritmu del grupu aportando a la Campa Las Infiestas (1130 m).

Pel camín tuvimos 'un agradable paséu pembaxo'l fayéu y al llau de la riega Buxalbe de la que nun achisbamos nin media d'agua nesta dómina l'añu y ye que tol paraxe de Los Garrafes ye un sumideru qu'apara nun sifón subterráneu, que sólo brota cuando enllénas, lo que tien que ser un espectáculu.

Las Xanas (Santu Adrianu) - Pedroveya (Quirós) - Peñarréi - Valdolayés

26 de Setiembre de 2021

Track: Las Xanas (Santu Adrianu) - Pedroveya (Quirós) - Peñarréi - Valdolayés

Entamamos temporada de monte 2021-2022 y había que facelo con ruta-fartura, asina que púnxeme a mirar que facer pela fastera central asturiana, dándome cuenta que dempués de la revisión de los Techos d'Asturies, quedárame pendiente l'ascensión a la Peñarréi en Santu Adrianu.

Partimos del aparcader de Las Xanas (182 m)

Ensín más, facemos quedada nel aparcaderu de Las Xanas, sobre les 9 la mañana, poro, vamos tener que reconocer l'escobiu Las Xanas p'acometer el nuesu oxetivu. Nun ta de más, ya que ya lloviera de la última vegada que lu ficiera, p'ascender a la Mostayal.

L.lano (Quirós)

15 d'Agostu de 2021

Tornamos magar d'un añu, pela escuela de Quirós, nel L.lano, col envís de pasar el finde relaxaos, facer un pocu de bautismu escalador pa una collacia gallega y de pasu, ver si podíes apretar un pocu en dalgún regalín que me quedaba pendiente en forma de vía plaquera.

Bautismos esguiladores pel L.lano

Dempués d'una mañanina, de víes cencielles nel Escambelláu Inferior, vamos tornar al refuxu a tomar una cervecina y xubiremos de tarde hasta la Candela, onde vamos metenos Ruben y yo a Utopia, que la tenía pendiente dende cuantayá.

Kíla n'estáu de relax máximu na Candela

Esta vegada, tuve la suerte de dá-y un pegue coles cintes puestes por Rubén, lo cual sicolóxicamente aída enforma y pude llevámela al primer pegue, tachando una d'eses cosines que tenía pendiente dende visites d'antaño con Vane a Quirós.

L.lano (Seutores visitaos)

Croquis de la escuela d'escalada en: L.lano (Quirós) por mor de Mariño que m'empobinó a visitar la páxina de Piratas Free. Gracies y col so permisu.

----------------------------------------------------

Bermiego (Quirós) - L.lampaza - Pelitrón

21 de Xineru de 2017

Track: Bermiego (Quirós) - L.lampaza - Pelitrón

Estrenamos l'añu 2017 col GM Xuan de la Borrina con una ruta cenciella, pa qu'esos cuerpos vayan espulsando tola morralla de fartures de les fiestes navidiegues. Pa ello, ya andaba yo con ganes d'entamar daqué dende'l pueblu quirosanu de Bermiego.

Nomáu, pol so texu milenariu, aportamos a esti pueblu pel camín davezu dende Xixón, garrando l'autovía Y griega hasta Uviéu, onde siguimos pela A-64 hasta'l desvíu de los valles del Trubia, que tantes vegaes garré na mió vida pa dir esguilar y de monte.

Partimos de Bermiego (764 m)

Bueida (Quirós) - Puertu Güeria - La Cigacha - Puertu Ventana - Torbaniel.lu

11 d'Avientu de 2016

Track: Bueida (Quirós) - Puertu Güeria - Cigal.la - Puertu Ventana - Torbaniel.lu

Última ruta del añu 2016 del GM Xuan de la Borrina, pero por dalgún motivu cayóse de la convocatoria mediu mundiu y pensándolo bien, pa esta ruta qu'escoyimos en cuestión, casi que nos xuntamos muncha más xente... nun sé como podría acabar la cosa.

A la fín, allá que fuímos Haritz y yo, más Pepa y Jóse que tan finando tolos dosmiles del macizu de Penubina y venía-yos al pelo acompañamos a esta ruta. Ye más, Pepa posiblemente seya la primer muyer que faiga los 58 dosmiles lo que presta más tovía.

Digo que salimos de Bueida en Quirós, pero na realidá xubiremos colos coches dos kms alantre pela pista qu'aporta al Puertu Ventana pasando per Torbaniel.lu, hasta una curva a la mandrecha onde hai bon sitiu p'aparcar y que nómase Les Garrafes.

Salimos dende Les Garrafes (922 m) cerquina de Bueida

L.lindes (Quirós) - Pena Ruea - Foiz Grande

31 de Xineru de 2016

Track: L.lindes (Quirós) - Pena Ruea - Foiz Grande

Quinta vegada, que se diz aína, que voi intentar la Pena Ruea, teniendo namái qu'un triste porcentaxe d'aciertu d'un cumal, pero bono como dicen per ehí, ye'l camín lo importante y non la cume, anque seyamos sinceros lo que nos presta a los montañeros ye facer cume, sentanos y alcordanos de caún de los pasos llevaos hasta riba y non dándonos la vuelta a metá de camín.

Son les 10 menos venti de la mañana y tamos nel pueblu quirosanu de L.lindes. P'aportar a él, salimos de Xixón y garramos la AS-I hasta topanos en Mieres del Camín cola A-66 que nos dexaría en la Pola de L.lena. Ellí garramos la As-230 que nos fadrá xubir a la Col.la la Cobertoria dempués de pasar pelos pueblos l.lenizos de Palaciós, Piedracea y Armá.

Entamu de ruta en L.lindes (923 m)

L.lindes (Quirós) - Penarpín

13 d'Abril de 2014

Track: L.lindes (Quirós) - Penarpín

Son les casi les 11 de la mañana y tamos nel pueblu quirosanu de L.lindes. P'aportar a él, salimos de Xixón, garramos la AS-I o minera, hasta topanos en Mieres del Camín cola A-66 que nos dexaría en la Pola de L.lena. Ellí desayunamos como pudimos, y garramos la As-230 que nos fadrá xubir a la Col.la la Cobertoria dempués de pasar pelos pueblos l.lenizos de Palaciós, Piedracea y Armá.

Equí entraremos nel conceyu de Quirós y siguimos per esta carretera hasta Santa Marina, pasando enantes per Chanuces y Murias. Nel crucie, garraremos la Qu-4 pasando por Fresneo de Cortes, Cortes y a la fín aparcaremos el coche al llau de la Ilesia de L.lindes.

Entamamos nel pueblín de L.lindes (917 m)

Valdemurio (Quirós) - Xerra'l Gurrión

22 d'Avientu de 2013 y 26 de Xineru de 2014

Track: Valdemurio (Quirós) - Xerra'l Gurrión

Tol que me conoz, sabe que nun soi mui de repetir cumales, sobretou cola bayura montes qu'hai n'Asturies, pero esta vegada, en pocu más d'un mes tuve la suerte de facer cume nel Picu Gurrión, en dos díes, mui, pero que mui asemeyaos nes condiciones meteorolóxiques.

Como siempre p'aportar a Quirós, salimos de Xixón pela Y griega, pa enllazar n'Uviéu cola A-63, saliéndonos pal Valle'l Trubia como ye vezu, en munches de les nueses rutes. Travesaremos, los conceyos de Santu Adrianu y Proaza, garrando direición Quirós en Caranga Riba, pa namái cruciar el túnel, salirnos al aparcaderu del banzáu de Valdemurio.

Partimos del banzáu de Valdemurio (345 m)

Bueida (Quirós) - Puertu Güeria

9 de Payares de 2013

Track: Bueida (Quirós) - Puertu Güeria

Un vienres, asina a lo llocu, magar de la primer ñevadona del iviernu, decidimos garrar bien trastos y averanos hasta'l Puertu Güeria, col envís d'intentar la Pena Ruea o al menos dar una vueltina y pasar el día tan guapamente.

Como ya conozo, l'ascensión dende L.lindes y la baxada a Cortes, decidimos anque más llargo, xubir dende Ricao, conociendo por mor, el Puertu Güeria en condiciones, ún de los llugares más increyibles d'Asturies con diferencia.

Partimos de Buieda (784 ms)

Fresneo (Quirós) - Pena Xerragallos

23 de Payares de 2013

Track: Fresneo (Quirós) - Pena Xerragallos

Dalgo avezáu nesti añu, ye xuntanos un bon garrapiellu nes salides del GM Xuan de la Borrina y na programada por Pangua nun diba ser distintu. Tocábanos dir hasta'l pueblu de Fresneo en Quirós, onde díbemos intentar una llarga ruta hasta'l Picu Barzanalgas.

Esti picu quedáranos nel tinteru va un par d'años (como pasa'l tiempu) cuando ficimos la Pena Sobia y la Siel.la y por mor del fuerte vientu, decidiéramos nun tentar a la suerte dexando esti cumal pa otra vegada dende la fastera quirosana envede la del conceyu Teberga.

Partimos del pueblu de Fresneo (574 m)

Tene (Quirós) - L'Airúa

22 de Setiembre de 2013

Track: Tene (Quirós) - L'Airúa

Primer ruta de la temporada 2013-2014 del GM Xuan de la Borrina, y como les que teníemos dientro del calendariu pa esti añu, al final nun podíen facese, por faltar dellos miembros del grupu, hubo qu'echar un vistazu a la bloguería montañera astur.

Y como non, ún de los referentes, ye'l collaciu Cienfuegos, que púsome a güevu una rutina, lo xusto pa dempués dir a xintar per ehí... L'Airúa nel cordal de Tene. Pa ello, vamos xuntanos esta vegada un grupu raro polo nuevo, ya que de los miembros del Xuan de la Borrina, tan sólo tamos Pau y yo.

Salimos de Tene (659 ms)

Salceo (Quirós) - Peña L'Alba

11 de Xineru de 2013

Track: Salceo (Quirós) - Peña L'Alba

Siguimos coles actividaes vacacionales, apurando hasta l'últimu día, p'aprovechar el bon tiempu. Poro, vamos averanos hasta Quirós y siguiendo los conseyos d'un llibru, vamos conocer la guapa Peña L'Alba coles sos increyible vistes.

Como ye una ruta mañanera, nun vamos madrugar res y vamos aprovechar que ta'l collaciu Berto, cola so perrina Leya, pa facer una ruta pelín perruna. Saldremos de Xixón, bien tarde y magar del tramu de minera y enllace cola A-66, saldrémonos na Pola L.lena, pa metenos nel puertu (As-230) de la Cobertoria hacia Quirós.

Partimos de Salceo (776 ms) en llucha continua perruna

Foi un viaxe bien entreteníu, nel nuesu descensu de la Cobertoria pasaremos per pueblos como Chanuces, Murias, Santa Marina, Pontonga y la capital de Quirós, Bárzana, pero tamién tuviemos que parar a llimpiar la manta de Kíla, porque potó tol desayunu la probe, jeje.

Con Kíla más blanquina de lo normal, siguimos travesando Bárzana, pa llueu garrar una carreterina a la mandrecha que xube a Vil.lar de Salceo y al nuesu destín, Salceo, onde dexaremos los coches pente los barrios de Las Val.linas y la Vil.la.

Enmediu, d'una incasable llucha pol dominiu d'ambes perres, somos a salir del pueblu, cruciándolo y desviándonos per un caleyu hacia'l barriu altu del pueblu, Eros, onde fadremos una fadremos una travesía penriba una riega hacia los praos de la Pandiel.la.

Preciosos caminos pasando pela Pandiel.la hacia la Lichuela

El camín, ye una pasada, empedrau y nos tiempos que cuerren, bien curiáu, y más si vamos dafechu concentraos na griesca pente les dos perres. Ye increyible l'instintu animal, como fai a los perros intentar prevalecer ún sol otru ya intentando amosar quien ye'l que manda.

La verdá ye, que dende'l primer día, que viéronse, lleven peleando de continuu, pero aún así, nun pierden comba y van bon ritmu pel camín. Eso sí, solo de veles pente la fueya una enriba la otra y andando y desandando'l camín, cansa dafechu.

Abrimos vistes pela Cogolla col Gamoniteiro, el Gurrión y la Sobia 

El casu ye, que siguimos alantre pela cuesta la Cogolla y poquín a pocu, vamos ganando vistes pente los árboles al Gamoniteiro pela mandrecha y al hermosu picu Gurrión cola peña Sobia detrás. La verdá ye que'l día ta bien guapu y los caminos que tamos faciendo son mui prestosos.

Topámonos cola pista asfaltada y cola Peña L'Alba y so capiya

 Finaremos esti tramu, aportando a la pista asfaltao, que vien pa los coches dende'l pueblu, onde ya podemos ver la capiya, que da llugar a la propia pista y a una romería que faise a mediaos d'agostu. Estes coses relixoses como que dame igual, poro camiento que como siempre, dalgún pastor creyó ver a la virxen (l'espectru de Broken, suel ser bona desplicación pa tales visiones y la bota vinu, tamién) y acabaron montando un edificiu a 1200 ms d'altor.

Ascendemos direutos hacia la Techera

Ensín parar muncho, siguimos alantre per otru ampliu camín, que n'ascensu too tiesu, va facenos aportar a la braña de la Techera, onde hai abondes cabañes, perbien conservaes y les vistes de parte de L'Aramo, son bien guapes, poro nun m'importaría res, tener la suerte de tener una, jeje.

Arrodiamos la Capiya L'Alba pa encaramanos a la cresta la Peña

Saldremos de la Techera, pel final de la pista asfaltao, echando-y una güeyada embaxo nuesa a la guapa area recreativa d'Alba, y aportaremos a una cabaña, pa xusto delantre d'ella, garrar un camín, que ta peslláu, per una especie de portiella-barricada, jeje.

Lo meyor será, salise enantes del camín, pocu dempués de la casa, o saltar esa barricada como se pueda, pa garrar un senderu, que nuna llarga envuelta pondrános per detrás de la capiya, o meyor xubir a güevu per un sender pente la caliza, que dempués de bordiar una llarga muria, dexarános nun ablucante mirador sol macizu d'Ubina.

Xubimos pela cresta col Pelitrón y l'Airúa de frente

Dende equí, esfrutaremos d'un crestéu cenciellu, nel que la caliza toma protagonismu nel nuesu andar y la vista desviaráse a cumales menos conocíos del Aramo, como'l Pelitrón o l'Airúa, o al guapu Gurrión y la peña Caranga, onde tuviera va bien de tiempu, Berto tamién de monte.

La peña Caranga, el Gurrión y el macizu d'Ubina ablucantes

En total, dos horines llevarános facer esta peña de 1307 ms, na que sobretou destaquen les vistes del macizu d'Ubina, cola Pena Ruea en mediu la semeya, pero nes demás direiciones, nun son a quedase atrás. D'otra miente, si queremos da-y un pocu al diente, en Bárzana, ye perfeuta ya que nun agradable paséu taremos a la hora la xinta abaxo.

Perguapu cumal la Peña L'Alba (1307 ms)

Nel nuesu casu, como salimos tan tarde, baxamos tranquilamente, hasta la Capiya, onde paramos a xintar el bocata unos y el piensu les otres dos. La verdá, ye qu'enriba la peña l'Alba tiraba un airín, que fízonos preferir baxar a protexenos y tar agustu.

Baxamos de la Peña hacia la Techera

Asina foi y tuviemos media horina sentaos, pa baxar llueu tranquilamente hasta la Techera, onde esta vegada decidimos baxar peña pista asfaltao. El tema foi, que como en parte, de la xubida pelos caminos, había barru abondu y taba empedráu, decidimos nun xuganos el culu con un resbarión.

Baxamos per pista asfaltao hasta Salceo con guapes vistes

Per un llau, caltuvimos les vistes durante tola baxada y conocemos guapos praos, na L.lampa y Salgueros, pero vuelta tras envuelta, foi faciéndose más pesau y más pesau l'asfaltu y les rodielles resiéntense nestos casos. Poro, foi un aliviu arribar al barriu de las Val.linas, onde empobinámonos nuna recta final hasta'l coche en Salceo.

Aportando a Salceo de nuevu

En resume, rutina perguapa pa una mañana con xinta a posteriori, na que caléyense poco más de 7 kms, durante 4 hores y cuartu, anque faise en menos. L'ascensu acumuláu son 540 ms, asína que ye bien llevadera pa tol mundiu y perfeuta pa sacar fame pa una fartura.

Camudando'l Camín con Kíla y Leya