Bueida (Quirós) - Puertu Güeria - Muezca Cigacha - Ranchón - Socel.lares - Valle La Foiz

13 de Xunu de 2026 

Track: Bueida (Quirós) - Puertu Güeria - Muezca Cigacha - Ranchón - Socel.lares - Valle La Foiz

Tornamos a les rutes de calendariu del GM Xuan de la Borrina, yéndonos nesti casu hasta'l macizu de Penubina (Les Ubiñes), onde Pepa preparare una ruta p'ascender al picu Ranchón, conociendo'l pasu de monte de la Muezca Cigacha que nun conocía y tamién la baxada pel valle la Foiz, otra pequeña ayalga a descubrir.

El problema que teníemos yera'l calor que daben, teniendo que madrugar enforma y quitando de la ecuación el nuesu clásicu almuerzu de camín. Poro, plantámonos nel aparcaderu de Los Garrafes, pista alantre sol pueblu quirosanu de Bueida, pelín dempués de les 8 la mañana, pa preparanos y salir a les 8 y media en puntu.

Partimos de Los Garrafes (Bueida) (925 m) 

Caleyaremos con calma, siempre pela solombra pa dir entrando muscularmente en calor, personalmente sigue un pelín mosqueáu colos soleos, asina que nun quiero entamar fuerte, asina que voi dexándome dir al ritmu del grupu aportando a la Campa Las Infiestas (1130 m).

Pel camín tuvimos 'un agradable paséu pembaxo'l fayéu y al llau de la riega Buxalbe de la que nun achisbamos nin media d'agua nesta dómina l'añu y ye que tol paraxe de Los Garrafes ye un sumideru qu'apara nun sifón subterráneu, que sólo brota cuando enllénas, lo que tien que ser un espectáculu.

Subiremos penmediu'l fayéu hacia Las Infiestas pa siguir hacia'l L.laseiru

Dende Las Infiestas, continuaremos hacia'l L.laseiru, nun pudiendo quitar la vista del picu Ranchón y del Canalón de Rolamuela, actividá que tengo na tiesta dende va munchísimu tiempu. Caleyaremos caún al so ritmu, demientres Pepa, va contándonos hestories de la so mocedá montañera, pasando nes cabañes del L.laseiru findes enteros nel monte, faciendo actividaes o simplemente tando na ñatura tranquilamente.

El calor va notándose, pero na parte alta sentimos que un airín sur enfréscanos un pocu la sensación y anímanos muncho de cara a continuar la xornada. Tamos nun de los llugares más guapos d'Asturies, baxo toles muries que caen del Ranchón y del Güertu'l Diablu y nel nuesu maxín, nun paramos de ver llinees a conocer, anque siempre vanse los güeyos a Rolamuela, pudiendo descifrar el posible percorríu.

Continuamos hacia'l Puertu Güeria con increyibles vistes de tol macizu

Escaecemos posibles aventures y siguimos pel Chanu Los Tol.los hasta'l Pachón, una llamarga que da nome al picu'l Pachón, na so vertical munchos metros penriba, dando pasu a la Campa La Cigacha, onde acolumbramos milenta cumales del macizu y tendremos l'entamu de l'ascensión hacia la Muezca La Cigacha. 

Pararemos un ratín na campa La Cigacha a echar un tragu d'agua y de pasu nomar tolos montes que vemos, alcordándonos de rutes dende la que ficiera a L.lingleo n'ivernal, la Pena Ruea, Penarpín, Tapinón y Siegalabá, Fariñentu, la crestería del Prau L'Albu al Canalón Oscuru... la verdá ye que nun podemos quexanos de tolo qu'esti macizu lleva regalándonos nestos años.

Entamamos la entretenida ascensión a la Muezca La Cigacha

Perpasamos la entrada fitada y al pocu Vane nun s'alcuentra con moral p'acometer l'ascensión así que facemos la entrega clásica de walkies pa tar en contactu y el restu, nun perdemos tiempu en siguir les distintes trepaes, ya que tenemos na tiesta'l posible calor que vamos pasar, pero la brisa sigue dándonos vidina y quitando poner les manes en dalgún pasín y emburriar el culu de Telmo, vamos a bon ritmu nes distintes vires y pasinos.

Esfrutamos munchísimu de l'ascensión a la Muezca La Cigacha

Cuando dámonos cuenta, tamos nel canalizu final de salida a la Muezca La Cigacha, faciendo Pepa los honores de guiar la trepada, teniendo que tirar un pocu de Telmo, pero sin problemes echamos a esti perrín montañeru arriba, pa salir a la Muezca La Cigacha (1962 m) pasu preciosu de monte, unos 300 m de desnivel penriba del entamu de l'ascensión na Campa La Cigacha.

Averámonos hacia la Pena'l Ranchón con vistes hacia los Picos del Fontán

Son les 11 y media la mañana, vamos aguantando'l calor, asina que tamos contentos, pero nun paramos muncho más y empobinámonos hacia'l nuesu oxetivu del día, La Pena'l Ranchón, pa ello pasamos pente los picos de la Moyonera y el Pachón, averándonos hacia la Veiga'l Canchal, siempre pel meyor camín qu'alcontramos pa nun facer sofrir a Telmo de más pel calizu.

Facemos cume na Pena'l Ranchón (2160 m)

Salimos de la Veiga'l Canchal, entrando nel caberu tramu d'ascensión al Ranchón, siempre a bon ritmu pente rises y alloriando cola suerte de la brisina, ya que sinon diríemos amoriando de xuru. A la fín, encumamos los 2160 m de la Pena'l Ranchón, onde alcontramos a munchos montañeros xintando, qu'amáblemente nos faen la semeya de cume y despedímonos ya que camentamos meyor xintar nel Picu'l Güertu'l Diablu, onde nun vemos a naide.

Encumamos tamién el Picu'l Güertu'l Diablu (2142 m)

Asina que baxamos de la Pena'l Ranchón, hacia la Boca Rolamuela, desfaciendo un pedazu de camín y aína alcontrámonos de nuevu ascendiendo, ya baxo una calufa un pocu cafiante, hasta aportar a los 2142 m del Picu'l Güertu'l Diablu, otru clásicu cumal mui ascendíu nel macizu Penubina, que facía bien d'años que nun visitaba.

Baxamos del picu'l Güertu'l Diablu hacia la Veiga Socel.lares

Demientres xintamos, el sol aprieta y ya vemos que la tarde va ponese dura, asina que decidimos que nun vamos facer más cumales, porque cuanto más al norte vamos menos nótase la brisina sur. D'esti xeitu, bordiamos la Pena Socel.lares pela manzorga y empobinámonos a la enorme Veiga Socel.lares, onde la calufa golpéanos con tola fuercia, poro caleyamos lo más apriesa posible pa salir d'esti fornu.

Travesamos la Veiga Socel.lares hacia la Veiga'l Bustio

Travesaremos la Veiga Socel.lares, perguapa, pero nun cuerre l'aire nin media y pasando al llau de la cabaña, vamos salir hacia una colladina, onde acolumbramos tol cordal de L'Aramo, al fondu asina como los pueblos de Bueida y Ricao embaxo nuesa. Nós, solo podemos pensar en tirar hacia'l Valle La Foiz, onde naguamos por metenos nel fayéu a la solombra, pero enantes tendremos una pindia baxada, ensin senderu claru, hacia la Veiga'l Bustio, onde tomaremos senderu claru, que va dexanos na fonte La Escamplá, parando a recoyer agua y a sentanos na solombra.

Garramos con allegría la solombra baxo'l fayéu del valle La Foiz

Magar d'enfrescar un pelín, continuamos baxada baxo'l sol p'adientranos a la fin, baxo'l fayéu onde vamos poder esfrutar d'ún de los paseos más guapos nos últimos tiempos. Nun tengo muncho que comentar, más que ye una pasada de fayéu, con exemplares ablucantes y dellos enormes bloques de caliza blanca colos que quedamos ensin pallabres.

Siguimos descendiendo tol valle la Foiz, llargu pero preciosu

Pesei a lo llarga de la baxada (3 km y 1 hora y media) vamos tan entreteníos charrando y esfrutando de cada requexu de la viesca que faísenos curtia y más cuando vamos aportando a la riega la Foiz, onde toca dir travesando los esbarrumbaes pontes, que ya tuvieron nun meyor estáu, aportando a la parte final del valle, onde la Foiz estréchase pa salir al fayéu de Pará, más ampliu pero perguapu, empatando nel intre cola vista que xube hacia Torbaniel.lu.

Descensu pela pista de Torbaniel.lu hacia Los Garrafes

Nesti puntu, alcontrámonos con Vane, que venía na nuesa búsqueda y ya baxamos tol grupu hacia l'aparcaderu de Los Garrafes, onde arribamos xustu a les 4 la tarde, nel puntu de máximu calor, completando'l percorríu de 15,3 km nun total de 7 hores y media, superando un desnivel acumuláu de +/- 1435 m.

Momentu de refrixeriu nos chigres quirosanos del valle

Como non, mudámonos de ropa y tiramos a tomar algo nes terraces del valle de Quirós, onde nun se para de calor, superando los 35 graos con amplitú, quedándonos a les clares que pegamos una llibrada de monte perfeuta, gracies a la brisina que corría nos altores y tando mui satisfechos cola ruta propuesta por Pepa.

Camudando'l Camín nel Puertu Güeria una vegada más