viernes, 17 de abril de 2015

Puertu Ventana (Teberga) - Pena'l Ranchón

21 d'Avientu de 2014

Track: Puertu Ventana (Teberga) - Pena'l Ranchón


Son les diez menos venti de la mañana y tamos nel Puertu Ventana, na llende de los conceyos de Teberga y Quirós y del llionés Santumil.lanu. Magar d'unos díes de ñevaes continuaes, plantámonos nesti puertu de casi 1600 m d'altor pa da-y un intentu a la Pena'l Ranchón.

Atrás quedaron km de carretera dende Xixón, garrando l'autovía a Grau, pa salir hacia'l valle del Trubia y travesar los conceyos de Santu Adrianu, Proaza y nel pueblu de Caranga Baxu, tomar direición a Teberga entrando n'él pol pueblu d'Entragu, hasta parar na capital tebergana de La Plaza.

Magar de llenar l'estómagu, pondrémonos en marcha hacia'l puertu Ventana pasando pelos pueblos teberganos de Las Veigas, Riel.lu, El L.lanu y Parmu antes d'atacar la parte final del puertu, onde nes sos caberes ramples alcontraremos xelu, amosando lo frío d'estos díes.

Semeya de grupu nel Puertu Ventana (1582 m)

Tamos defechu nel día más curtiu l'añu y el sol alluma a estes hores, pero casi como si acabara d'alborecer. Normalmente, solemos calecer pates pela pista qu'arrodia'l Penón Ventana pero esta vegada tiramos tieso bordiándolu un pelín pela mandrecha... perdiendo más tiempu de lo camentao por mor de la ñeve xelao y d'un tramu d'amiestu de peña y yerba pelín gafu na parte alta.

Nun paga la pena y valiónos p'albidrar que los crampones y el piolé diben ser más que necesarios nel día de güei. Perpasaremos les mines a cielu abiertu y siguimos el camín que tien de llevanos a bordiar el val.le'l Campu Formosa.

Bordiamos tol val.le'l Campu Formosa

Esti camín, tresformaráse en sienda y ya lu usáremos nel descensu dende la fastera del Güertu'l Diablu, cuando xubiéramos al so picu y a la Pena Socel.lares. Anque paeza aburríu y llargu, llueu d'esta ruta quédanos claru que p'averase a la fastera de la Vega'l Robezu y la Cigacha ye'l camín más direutu.

Sele, facemos tol camín, travesando un par de ceyes con ñeve perduro, hasta aportar a un collaín (1717 m) de yerba verde, penriba de lo que queda de la veiga L'Arca. Equí, tenemos tola canal que xube hacia la Muezca La Cigacha delantre nuesa.

Ascensión hacia la Mueza La Cigacha

Dende'l mesmu collaín, diremos xubiendo pela fastera esquierda de la canal, alcontrándonos cola ñeve nun estáu perfeutu pa los crampones. Poro, tol mundiu decide ponelos ún a ún, dexando yo los dos pares que llevaba a Raúl y Dani, quedándome coles botes namái.

Llevo unes botes de ñeve bones y eso nótase... onde otros necesiten los pinchos, yo voi cómodu faciendo buelga col filu la suela y tien que tar la cosa percomplicada pa necesitar los crampones, anque con too siempre hai que dir sollerte y nun tener un resbarión.

De la Mueza la Cigacha pasamos a la veiga'l Robezu

Aportaremos a la Muezca La Cigacha (1910 m) que va danos pasu a la Veiga'l Robezu, llugar increyible pente la Pena'l Robezu, el picu Colines y la Pena La Moyonera. Equí, quedamos ablucaos cola belleza que nos arrodia... ye la primer vegada que tamos nesti llugar y cuesta facer cábales de cumal ye caún.

Da un pocu igual... son toos increyibles y apetez ascendelos toos, aún así, centrámonos y miro un puquiñín el GPS, centrándonos nel nuesu oxetivu: el Ranchón, qu'inda nun somos a ver. Pa ello, dexaremos el picu Colines a la mandrecha y entamaremos l'ascensu per una val.lina pente La Moyonera y el Panchón.

Ascendemos hacia la Veiga'l Canchal pente La Moyonera y el Panchón

La ñeve pali pali va fundiendo pero sigue nun estáu xenial pa cramponiar, aportando toos al collaín y tomándonos un merecíu descansu agora que tenemos pasu hacia la Veiga'l Canchal y vemos el nuesu picu: La Pena'l Ranchón.

Per un momentu, saco de la tiesta la enorme mole del Ranchón y mientres descansen faigo una escapada hacia La Moyonera la cuál albidro más cenciella de xubir que'l Panchón, que decido dexar pa otra aventura col Picu Colines.

Cume y vistes dende la Moyonera (2100 m)

Dexo la mochila y xubo corriendo pendiente arriba faciendo buelga pela ñeve duro, hasta aportar a la cumera'l picu onde tengo que dar unes bones pataes al xelu p'abrir buelga. Kíla me sigue de cerca, pasando como puede tres de mí, hasta que doi cola arista pente l'antecume y la cume cimera.

Ye un tarrén delicáu y hai bona cayida hacia'l canal pel que xubimos, asína qu'intento que Kíla nun me siga y garro'l filu l'arista intentando nun pisar los trozos de xelu qu'hai apegaos a la roca hasta aportar a los 2100 m de la Moyonera.

Pela Veiga'l Canchal ascendemos hacia'l Ranchón

Bona ascensión y mui prestosa en solitariu, pero ya toca baxar, asína qu'intento una baxada alternativa hasta qu'alcuéntrome con una placa de xelu qu'ensín crampones faise imposible. Toca ascender y garrar l'arista hasta l'antecume, onde pocu más abaxo Kíla recíbeme con un llinguetazu na cara.

Xuntos baxamos corriendo hasta garrar a los collacios que van abriendo buelga como si tuviéramos nun monte del Himalaya. Les cares de la xente dícenlo too, poques vegaes tuviemos con un día tan soleyeru, guapu, espeyáu y nun llugar tan maraviyosu como'l macizu de Penaubina.

Abrimos buelga hasta'l cumal de la Pena'l Ranchón

Pasu a pasu voi garrando collacios y pasándolos, pa entretenem sacándo-yos les meyores semeyes posibles, con vistes hacia los picos del Fontán nel nuesu ascensu o abriendo la buelga hasta'l trabe final de l'arista cimera.

La parte final de l'ascensión ponse más pindia de lo que paecía, pero ensín nengún problema facémonos con esta preciosa pena que va danos un de los díes más guapos de monte de les nueses vides y ún de les vistes más guapes d'Asturies.

Les cares de la xente lo dicen too... Pena'l Ranchón (2155 m)

La semeya d'enriba reflexa a les clares la sensación de felicidá qu'un montañeru, con más o menos nivel, pue algamar cuando esfruta d'un día con estes condiciones de ñeve, temperatura, paisaxes.... tamos encantaos.

Llevamos 4 hores pa facer cume pero son 2 menos cuartu, asína que decidimos tar nel Ranchón un bon ratín esfrutando de vistes pa la fastera'l Güertu'l Diablu, Pena Ruea, Fontán, Puertu Güeria.... casi que cansamos de mirar tanta belleza.

Entamamos el descensu direutos hacia la Pena L'Arca

Tampoco podemos escaecer que los díes duren mui pocu y dalgo más importante, nun tenemos munches ganes de fozar de más na ñeve cuando'l sol vaya faciendo efeutu ablandándola. Aldericamos per onde sería meyor baxar y decidimos facer variante, baxando pente la Pena L'Arca y la Moyonera.

Magar de baxar con munchu curiáu pela parte más pindia del Ranchón, entaino a facer buelga en baxada hacia L'Arca, col envís de xubila tamién demientres los collacios baxen con más calma... dalgún d'ellos ye la primer vegada que lleva crampones y hai que dir seliquino.

Vistes del Canalón de Rolamuela dende la Pena L'Arca (2078 m)

Pa cuando aporten al pequeñu colláu de L'Arca, ya toi de vuelta con ellos magar de pisar el cumal de 2078 m y baxamos xuntos al alcuentru de la buelga que ficiéramos de xubida hacia la Muezca la Cigacha.

Fadremos tol descensu como meyor vamos viendo, coles envueltes necesaries y llibrando los tramos más pindios hasta empatar cola buelga y tiraremos a fueu hasta'l collaín de prau verde onde dexaremos les mochiles y xintaremos merecídamente descansando tamién un ratu llargu.

Fadremos la llarga vuelta acolumbrando agora sí, cada cumal desconocíu hasta'l día de güei y vieyos conocíos

La vuelta sedrá igual de llarga arrodiando'l val.le'l Campu Formosa, pero esta vegada nun perderemos res el senderu y esfrutaremos d'una lluz meyor pa sacar semeyes a los cumales que conocimos güei y a vieyos conocíos como los Picos del Fontán, la gran Penubina o el picu La Ferreirúa.

En resume... atrévome a dicir que nesti día ficimos ún de les meyores rutes ivernales de mió vida, percorriendo 12 km pela ñeve durante pocu más de 7 hores, superando un desnivel de 850 m p'algamar nel mió casu tres dos miles del macizu de Penaubina a cuál más guapu.

Camudando'l Camín dende'l Picu Ranchón

2 comentarios:

  1. Guapu percorriu. El Ranchón yo siempre lu fice llegando dende Socel.lares o dende los Puertos de Güeria. Ese camín a mitá ladera parez prestosu. La Boca de la Canal de Rolamuela ye una maravieya. Peazu semeya.
    Un saludu

    ResponderEliminar
    Respuestas
    1. Gracies Cienfuegos... ties que probalo... ye pelín pesáu'l senderu... pero mui bona forma d'aportar a esa fastera del macizu. Paga la pena.

      Un saludu

      Eliminar