Puebla de Liyo (Porma) - Susarón

10 de Xineru de 2014

Track: Puebla de Liyo (Porma) - Picu Susarón

Dende que fuéramos a esguilar a la escuela de Redipollos a Pau y a mí, prestáranos muncho la presencia del Susarón, poro pal añu siguiente Pau decidió poner esti monte pente les sos rutes a escoyer nel GM Xuan de la Borrina.

Con esti xacíu, plantarémonos na Puebla de Liyo en Llión, magar d'un viaxe al traviés de l'autovía minera hasta Mieres, onde garramos la autovía A66 saliéndonos na salida de Morea, pa percorrer la As 112, hasta Cabanaquinta onde magar del almuerzu, siguimos hacia'l Puirtu Braña pa baxar hasta'l conceyu llionés de Liyo perpasando per Isoba enantes d'aportar a la Puebla.

Partimos de la Puebla de Liyo (1147 m) col Susarón al fondu

Con fríu abondo y les cais casi xelaes na Puebla, preparámonos intentando calecer col sol de mañana y cruciamos el ríu Silvan, empobinándonos per una pista cabo'l llau del riegu de Celorno. Los nueso pasos penriba de tramos de ñeve xelada y casi xelu puro llevaránmos hacia'l camín que xube pela riega la Patina.

Caleyamos a la vera'l ríu del Celorno per una pista xelada coles vistes atrás del Mampodre

Según vamos xubiendo, dexamos atrás guapes vistes del macizu de Mampodre, alcordándonos del finde tan divertíu que pasamos ascendiendo cumales como la Polinosa, La Cruz,... Pocu más lloñe del crucie hacia la riega la Patina, saldrémonos hacia una evidente canal que sal de la Tejera.

Desviámonos al pocu de la riega la Patina per guapu canalizu penriba la Tejera

Percorreremos la canal, superando tramos nos que tenemos qu'andar sollertes por mor de lo xelao de la ñeve, ya inclusu del xelu qu'hai enriba les peñes. Pali, pali diremos saliendo de la xelada solombra y garraremos temperatura otra vegada nel Pradico, onde aparte de reuninos, sedrá onde entamemos l'ascensión al picu Susarón.

Nel Pradico entamaremos el llargu ascensu pela pala del Susarón

Ensín querer, diremos separtándonos en dos grupinos ya que nun puntu si sigues el senderu d'aniciu siguirás camín hacia l'arista noroeste, mientres qu'otros fuimos hacia la llarga pala oeste del Susarón. Unos más aína y otros más sele, diremos ascendiendo hacia'l cumal del Susarón.

Según xubimos diremos ganando vistes a guapos montes d'Asturies y Llión

Ensín denguna dificultá nel ascensu, esfrutaremos de les vistes hacia los montes de la rodiada del Puirtu Braña, pa los montes de Palencia, pal banzáu del Porma y al aportar a los 1878 m del Susarón, pal macizu occidental de Picos, coles Peñes Santes como mayor atrautivu.

Cumal del Picu Susarón (1879 m)

Pocos díes tendremos una ruta tan cenciella y con un día tan espeyáu y soleyeru pa tar nel cumal hasta l'aburrición. Asína qu'aprovechamos el bon tiempu y cuando cansamos de xintar, decidimos entamar el descensu pela arista noroeste que los nuesos collacios usaron na xubida.

Baxaremos agora pela cenciella y más entretenida arista noroeste

Con muncha tranquilidá tamién, baxaremos pela arista, teniendo qu'usar bien pocu les manes, hasta aportar al Pradico, onde viendo la hora preferimos allargar un pocu'l paséu descendiendo per un fayéu hacia la pista de la riega la Patina.

Ceo baxaremos desnivel hacia'l Pradico pa xubir al colláu col Piñuelo

D'esta miente, dende'l Pradico diremos hasta'l colláu col picu Piñuelo (1441 m) y ellí baxaremos al fayéu onde esfrutaremos d'un toque serondiegu tardíu, caleyando tranquilamente pente la fueya cayío, demientres aldericamos de cualesquier cosa.

Fadremos un pelín de camín más conociendo'l fayéu de Barbadillo

Llegaremos casi hasta l'altor del colláu Barbadillo y nel intre entainaremos a descender hacia la riega la Patina, pembaxo de la Peña La Solana, nuna amplia curva, que tien d'empobinanos al tramu de pista asoleyáu pela que xubiéramos xeláu dafechu unes hores enantes.

Darréu namái quedará descender pela pista ñevada de la riega la Patina

Como pocu más que dexase dir pela ñeve, aportaremos a la Puebla casi 6 hores dempués de que saliéramos, anque cuntando cola xinta relaxada y el paséu final, qu'aumentó'l percorríu hasta 10,65 km y el desnivel a 840 m.

En resume, bona ascensión que col minimu esfuerzu va llevanos a tener, nun día tan guapu como'l que tuviemos, un máximu de vistes hacia fasteres como Picos, Montes Palentinos, cordal Cantábricu, Reres, Ponga...

Que vos preste!

Camudando'l Camín dende'l Susarón