8 de Mayu de 2023
Track: Tuiza Riba (L.lena) - Meicín - Picu'l Siete - Puerta L'Arcu - Senda Les Merines
Tornábemos al Macizu de Penubina dende va tiempu, cuando ficiéramos la crestería dende'l Fariñentu al Picu'l Canalón Oscuru, asina que cola idega d'echar un vistazu a la integral pente los Picos del Fontán a Penubina, averámonos hasta Tuíza Riba llueu del clásicu almuerzu en Campumanes.
Xuntámonos pa la ruta unos puquiñinos, llueu de la baxa de varios miembros durante la selmana, pero alborecemos con un día fresquino pero mui guapu, poro salimos con xeitu hacia'l Meicín, faciendo'l míticu percorrí hasta'l refuxu en pocu más de cuarenta minutinos.
La idega yera facer una versión curtia d'esta integral pente'l Picu'l Siete y la Penubina, asina que pasamos penriba'l refuxu, onde veíase que diba desperezando la xente y averámonos hacia'l valle Covarrubia, pel que ya pasáremos delles vegaes, una delles siendo l'ascensión al Prau Capón, primer ruta col grupu d'Alberto y Natalia va casi diez años.
Ascenderemos ente rises y bones alcordances per Covarrubia, hasta colláu d'accesu al Fuechu La Cabra, saliéndonos como ye vezu a la mandrecha p'averanos pembaxo los Castil.lines a la base del Picu'l Siete, echando un vistazu hacia la Pasada'l Siete, per onde pasáremos va unos añinos nuna guapísima ruta.
Ya va bona que los compañeros, punxeren cascu, siendo una bona idega, ya que vamos entrar en tarrén dalgo descompuestu y debemos trepar de terraza en terraza con procuru. Superaremos los primeros tramos, siguiendo dellos fitos y sobretou buscando la parte más débil de la fastera Este del Picu'l Siete.
Ensin mayores problemes, llueu de superar les primeres terraces, entraremos nel canalizu más pindiu, onde hai qu'andar sollerte de los agarres, pero que tando de trepar un pocu nun tien mayor problema. Hai dellos años, xubiéramos al Siete y la verdá ye que tengo la sensación, de xubir más menos pel mesmu sitiu, asina que'l tramu más complexu tan nesti canalizu, pa salir finalmente a l'arista sur, con vistes increyibles de los Castil.lines y de la norte de Penubina.
Nesti tramu final d'arista, tenemos la suerte d'alcontranos y charrar un ratín col máquina de Manu Merillas, qu'andaba con su fiel Zar d'entrenos pel macizu. Asina que nel mesmu cumal del Siete, taremos esfrutando de la conversación y del solín, demientres Manu "espera" por dos compañeros y vémoslos desapaecer baxo'l cresteríu del Pasu Malu, llueu de da-y les gracies por atender al nuesu compañeru Benjamín nel accidente que tuviera per Somiedu va unos meses.
Nesti puntu, echamos un tragu d'agua, sacamos unes semeyes y descendemos del Siete, cola vista puesta en dos posibles inconvenientes, unu al que nun-y damos importancia como ye'l borrín que ta pegándose na fastera asturiana y otru ye'l ñeveru que tapez tol corredor d'accesu al segundu Castil.lín.
Como los GPS ya toi recalculando ante esti imprevistu, anque a dicir verdá, quiciábes fuimos un pocu adelantaos a la temporada, p'andar con zapas de correr en mayu pela fastera noroeste d'esti macizu. A más de dosmil metros, yera más que posible que tovía quedasen ñeveros y nun diben tar blandos precísamente.
Averámonos hasta la base del corredorín viendo que tol ñeveru cubre tola estensión, asina que decidimos que nun paga la pena arriesgase a xubir, decidiendo conocer tola traviesa pembaxo de los Castil.lines, qu'a dicir verdá, prestónos casi tanto, como si xubiésemos a los dos cumales más cenciellos, ya que'l tercer requer d'usu de material d'escalada.
Perentreteníos, diremos navegando pasando per llugares con vistes a Somiedu y Babia, hasta llibrar del tou, les muries que caen dende los Castil.linos y alcontrar l'accesu hacia la Col.lá L'Arcu, teniendo una ascensión bien guapa, pasando primeru pel arcu más pequeñu y dempués parando a descansar baxo'l que da nome a esti guapu llugar.
Col día ya emborrináu na collada, decidimos ascender al que yera l'oxetivu cimeru del día, la Puerta L'Arcu, últimu cumal de dosmil metros importante que quedábame nel conceyu de L.lena por ascender y por supuestu, ún de los dosmiles cimeros d'Asturies de tercer categoría nesti casu. D'esti xeitu, atacamos cruciándonos con un montañeru llionés, aportando posando les manes en dalgún pasu a los 2206 metros d'esti guapu cumal.
Nel intre, con tol borrín metíu y con pinta d'emborrinase más, decidimos parar a xintar enantes decidir sola continuidá de la ruta. Col banduyu enllenu, la borrina más fonda p'Asturies y viendo'l cresteríu hacia'l Prau Capón que tenemos per delantre, decidimos que lo más sensatu ye descender a la col.lá L'Arcu y asina conocer tamién esti pasu, pente Asturies y Llión.
Pela mió parte, magar del parón, la decisión de descender fue lo meyor, ya que'l psoas y piramidal van quexándose demientres descendemos pela llerona baxo la col.lá L'Arcu hacia'l Fuechu La Cabra. Mario, nun día optimista como pocos, tovía tien la ilusión d'ascender al Cuetu Las Cabras, pero nin tan siquiera'l Nuberu dexónos pegar una intentona, zarrándose tanto que tan sólo podemos siguir les marques marielles de la Senda Les Merines.
Sicasí, tamos contentos, ya que ficimos dos montes bien guapos ya importantes del macizu Penubina y tamos completando una interesante circular, que siguiendo esti guapu senderu va dexanos na arista este de Penubina, onde oyemos a xente destrepar los so últimos metros, indicándo-yos que tan cerquina la senda Les Merines, lo que dame la sensación que-yos da ciertu aliendu.
A bon ritmu, terminamos tola traviesa Les Merines y descendemos hacia L'Altu Terreos, onde ya garramos el trilláu senderu hacia'l Meicín, onde esperábanos una xarrona de birra y un descansín d'una horina, enantes de decidinos a baxar de nuevu hacia Tuíza Riba pa completar esta circular con ciertu toque alpinu.
En resume, guapa ruta d'unes 7 hores (quito la hora de birréu nel Meicín) per tarrenes onde hai que tar d'andar pel monte, pa movese con seguridá ya que los trepes y destrepes son continuos y siempre con muncha piedra suelto, faciendo un total de 11 km y superando un desnivel de +/- 1315 m.
No hay comentarios:
Publicar un comentario