La Puente (Morcín) - Planéu - Monte Frechura - Robles - Porrimán

4 de Xunu de 2023

Track: La Puente (Morcín) - Planéu - Monte Frechura - Robles - Porrimán

Dos meses facemos ya, dende que lesionárame por sobrecarga de carreres na pierna derecha, nel psoas, piramidal o nin idega ya, porque dempués de descargar esos músculos, parar de correr, facer un puquiñín de monte y tán sólo caminar a los sectores a esguilar, esto nun acaba de meyorar.

Sicasí, tenía ganes de patear un pocu con Carlos, asina qu'a falta de más xente del grupu, fuimos cerquina casa a mi tan queríu Morcín, onde faigo casi vida diaria escalando y entrenando, col envís de conocer dalgo más d'esti conceyu tan montañeru y guapu.

 

Partimos dende La Puente na senda minera a Peñamiel

Aparcaremos nel cementeriu de la Puente, llugar d'aparcaderu cómodu tanto pa la escalada en Cualladrona como de quedada pa mover coches hacia Porrimán. Equí, penriba'l cementeriu sal una antigua senda minera hacia la cantera de Peñamiel, pela que diremos caleciendo músculos pasando per un par de túneles, perbien iluminaos con sensores, hasta cruciar una valla a mou de cierre ganaderu, viendo a la nuesa mandrecha, un guapu valle, el de Planéu, pel que tenemos la idega d'ascender y conocer.

 

Caleyamos seliquino pela sienda minera hasta'l valle Planéu

A la par d'un prau, garraremos puntu d'ascensu, viendo ceo que lo más cómodu pa evitar los felechos diba ser empobinanos hacia la mandrecha'l valle Planéu. Nun sólo alcontraremos un tarrén más llimpiu pel que caleyar, al traviés de delles siendes mediu perdíes, sinon que vamos poder esfrutar de dellos exemplares de castañu centenarios, que pagan munchísimu la pena de conocer.

 

Salimos maraviyaos de la viesca hacia la parte alta de Planéu

Pesie a lo modestu del plantegamientu que teníemos pa esta ruta, tamos esfrutando munchísimu, asina que'l dolor de la mió pierna, nun fai siguir animosu hacia la parte alta del valle Planéu. Carlos y Kíla, tamién van encantaos, anque sudorosos pol chornazu de día que tenemos, hasta que perdemos la solombra la viesca y tócanos ya, restolar senderos que nos faigan llibrar la vexetación de monte baxu que tenemos per delantre.

 

Tócanos navegar de senderu en senderu ganaderu hasta'l Monte Frechura

A plenu sol, vamos metíendonos pel centru'l valle, llibrando malpenes dos pasos pente felechos y alcontraremos siendes ganaderes, que van dir dexándonos ascender y avanzar hacia lo más alto del Monte Frechura. Pa ello, vamos dir en diagonal hacia'l colláu de Reconcos, pa pelín antes d'aportar, facer una envuelta que va llevanos hasta la cresta norte y a posteriori al cumal norte del Monte Frechura. 

 

Nel cumal del Monte Frechura (732 m)

Nos 732 m del Monte Frechura, sentarémonos, beberemos agua y esfrutaremos de les vistes d'esta montaña central astur, bono de toles vistes non, ya que'l polígonu industrial de Lloreo les maten un pelín jeje. Pero les vistes importantes, col Monsacru y L'Aramo enfrente, ya incluso, esa xerra de Llagos, que tanto costónos conocer el branu pasáu, tomen mayor protagonismu que l'Asturies Industrial.

 

Baxamos crestiando hacia Reconocos onde queda dalgo de vida ganadera

Nel descansu nel cumal, ente'l calor y el dolor de la pata drecha, decidimos descender hacia'l mayáu de Reconcos onde alcontramos ganáu caballar y los restos d'una cabaña, que van danos pasu hacia'l colláu Robles, otru llugar que paga munchísimu conocer montañeramente y pelos que pasé n'entrenos de carreres quedando pendiente, amosalos nel blogue cola calma que merez nuna ruta de monte.

 

Vamos reconocer el valle Robles onde alcuéntrense llugares bien guapos

Nes cercaníes del colláu Robles, alcontrarémonos con otra ayalga en forma de camín empedráu, que xube dende'l pueblu de Porrimán. La primer vegada que pasé per equí corriendo, allorié colo guapu del camín, coles muries, les fayes, los castaños y colos bloques calizos, que dieron pasu a que dellos collacios alcontraran esi pequeñu llugar d'escalada bloquera que llevaben tanto tiempu buscando.

 

Esfrutaremos del valle Robles hacia'l pueblu de Porrimán

Lloñe d'estes hestories nes distintes visites pel valle Robles, Carlos va tamién esfrutando munchísimu del valle, paeciéndo-y increyible, qu'esta pequeña circular que tamos zarrando, nun seya más conocida, nun seya un pequeñu percorríu de Morcín, marcáu y visitáu dientro'l llugar y que danos a pensar qu'esti pequeñu conceyu nun ta lo suficiéntemente valoráu montañerámente falando.

 

Zarramos la circular de vuelta a la Puente

Travesaremos les cais de Porrimán, dando vista a les poques cases que queden en pié y baxaremos hacia la sienda minera pa tornar hacia La Puente, col sol apretando al máximu y personalmente con una coxera, que fai que me plantegue una revisión en condiciones de la lesión.

En resume, ruta mañanera mui recomendable, qu'en malpenes 3 hores, 6 km de percorríu y +/- 500 m de desnivel, van amosanos esi Morcín montañeru que tanto tien d'ufrecer a los amantes del deporte al aire llibre, ya seya esguilando, corriendo pel monte, faciendo monte xabaz o senderismu más seliquino. 

Camudando'l Camín per Morcín