Branu de 2024
Morcín sigue creciendo en muros y sobretou en muros a la solombra, eso sí, pa ello toca bregar, trabayar y llimpiar parés nortiegos, así qu'imaxinaros el currazo que lleva, equipar, sanear y cepillar les víes en fasteres norte, asina que dende ya, tol agradecimientu a los equipadores, d'esti otru seutorín na escuelina de Porrimán, qu'asítiase, xusto al par de la senda verde que va hacia la cantera de Peñamiel.
Con esti seutor, podríemos dicir que tenemos tres, si contamos Peñarrubia, que ta penriba'l farayón que baxa dende la Peña Garcilleru. Nesti casu, esti seutor al que nomen Porrimán Inferior, en realidá, les víes más altes entamen na Vallina Altu, lo mesmu que Porrimán Superior, ta asitiáu enriba la Vallina Baxu, poro ye un bon enguedeyu de nomes jaja, porque indiquen lo contrariu, pero ye que si miramos la muria norte, dende la carretera, vemos cláramente como divídese por dos vallines, la baxa que sal dende'l rigu Rios y la alta penriba de les últimes víes de Porrimán Inferior.
Coses de la toponimia, aparte, vamos alcontrános con un murazu increyible, desplomáu, nel que podemos esguilar casi hasta cuando tenemos lluvia, poro fueron unos cuantos díes de meteo terrible, les que tuvimos per ellí probando les víes. Espero volver, muncho más pa sacar semeyes, porque ye una pena nun poder dar referencia del murazu que ye con más semeyes, anque eso, si tamos falando d'un muru práuticamente de sétimos medios-altos y octavos na parte alta, penriba de la sienda y de momentu, de sétimos baxos na parte baxa la sienda.
Nes poques visites que fice, pude llevame La Cencerra un 6c de primer llargu, na parte baxa de la sienda, mui guapín, perfeutu pa "calentar" y tuve la "suerte", de ser de los primeros en llimpiar y cepillar les dos víes siguientes, La Sombra del Sol (7a+) y Diedro di Manuale (7a) que nun pude encadenar, pero qu'al menos tarán ya más llimpies ya que baxé como si tuviera enyesando una paré.
Na parte alta la sienda, la primer vía (6b) nun paez mui recomendable, pero la siguiente El día menos pensado (7a) si que ye una ruta buena, con parte baxa plaquera con pasín finu de regletéu, un tramu cenciellu, nel que tenemos que tener curiáu cola roca de baxa calidá y llueu saldremos ya per desplome de cantarral hasta cadena, terminando la vía guapísima.
La otra vía de su manzorga Irati (7b) ye del palu del 7a pero más guapa entá, eso sí munchu güeyu nes tres primeres chapes que tien un bloque cabrón y debemos tar sollerte, pa siguir escalando hasta'l siguiente bloque, el más duru de la vía xustu na metá, pa salir a tarrén cenciellu onde reposaremos y tendremos al igual que nel 7a, un tramu de chorrera y xarrada física pa terminar plaqueando hasta cadena... un rutón.
Hasta equí pueu falar, ya que nun torné a tocar más víes, asina que tendremos qu'igualo... y a sacar semeyes.
--------------------------------------------------------------------------------
12 de Xunetu de 2023
Pasaron unos mesinos dende la última visita productiva a la Vallina Baxu que ye'l nome verdaderu d'esti seutor d'escalada, pero bono, como suel pasar o los equipadores enfótense en conocer los nomes tradicionales de los parés o terminen por garrar cualesquier nome estúpido, anque siendo correutos, al menos nesti casu, garróse'l nome del pueblu.
El tema ye que probara va un tiempu Alpinismo de Salón, el 7b a la manzorga'l seutor, dándo-y un bon segundu pegue n'aquel día, pero como andamos liaos pel Cantu La Sierra, nun tornáramos a la Vallina Baxu y lo más cerca que tuviera fuera na ruta que ficiéramos nesa redolada: La Puente (Morcín) - Planéu - Monte Frechura - Robles - Porrimán.
Ayeri, viendo'l día ñublu que teníemos, averámonos hasta ellí, Santos y yo, cola idega de camudar un pelín l'estilu d'escalada, metíendome yo n'Alpinismo de Salón y na so variante, Baja Temeraria, que tamién saldrá de 7b, más corta, pero quiciás dalgo más desplomada.
Por suerte, llueu de montala y dar un segundu pegue pelín raru, cayendo onde nun debía, pude encadenala al tercer pegue, pegando un bon reposu dempués del bloque más durín y garrando un ritmu d'escalada curiosu na parte de resis de la vía, quedándome con ganes de probar el prósimu día la so variante que Santos casi fae al segundu pegue.
-----------------------------------------------------------------------------------
18 d'Abril de 2023
Esti añu, colos proyeutos ya centraos pa la temporada de primavera-branu, sobretou nel Callexón d'Otura y na Cualladrona, tener un seutor nuevu como ye Porrimán, con una bayura de víes de sétimu grau enorme, ye una auténtica ayalga, tanto pa continuar xubiendo nivel, como pa confirmar y asentar el 7b/+ nun grau qu'entame a salir más cómodamente, durante esta temporada.
Tovía tuviera va unos díes col collaciu Santos, nuna tarde na que veníemos reventaos de dos día anteriores apretando y aportamos al seutor, ensin tener una idega clara de pa onde díbemos metenos. Decidímonos por un proyeutu que sabíemos que saldría 7a+, lo que nun contábemos yera colo sucio de la vía y con una equipación que nun mos prestó nin media, aportando a cadena y desmontando por mor, de nun xuganos un mal vuelu y mancanos intentando encadenala.
Morcín continúa espoxigando, en cuanto a les actividaes montañeres, tan sólo hai que ver la cantidá de coches cualesquier día na Collá, onde entama la mítica ascensión al macizu del Monsacru, tanto de montañeros como de corredores, ya que tenemos varies opciones circulares per tol macizu, según queramos facer más o menos kms o más o menos desnivel.
Asina que tenemos per un llau, un conceyu con muerte cerebral industrial, onde la mina pieslló va bona y malpenes queden negocios hosteleros, ganadería y les empreses asitiaes nel polígonu d'Argame y el restu son xubilaciones y cases vacíes, poro'l sentir de la xente morciniega ye de poca vida, siendo esti repunte deportista y montañeru pel valle de Riosa perimportante y los paisanos del llugar venlo a les clares, entrugándonos pelos pieslles d'escueles pol añeramientu.
Nós, llevantamos los hombros, camentando que si la xente los pueblos, ven con bonos güeyos a los deportes de monte que dan vida a los chigres y en particular a los escaladores, ya qu'enllenen les terraces enantes y dempués de l'actividá, paezme que debemos movilizanos y protestar por regulaciones inxustificaes como ye la de la utre, que ye la que más meses aféutanos y la que menos sentíu tién, ya qu'esti ave, nun tien dengún reparu en convivir colos escaladores y amás ta tan n'espoxigue la so población, como les escueles nueves que van abriéndose pel conceyu.
De lo pocu que probé, un par de 6c+ tan duru l'unu como l'otru y un 7a+ (Viento en Cara), quédome con esta última, la cuál pude encadenar va pocos díes, entrándome ganes de contalo per equí nuna breve reseña, dando valor al conceyu de Morcín y denunciando una vegada más, los pieslles ensin xacíu d'otres escueles morciniegues, que tan tarazando un futuru pa esti valle de Riosa, onde la escalada deportiva podría ser tou un referente turísticu.
No hay comentarios:
Publicar un comentario