La Puente (Morcín) - El Rotellón - Figares - La Collá - La Madalena - Cuitu Rumiru - Otura - Llugar de Baxo

17 de Xunu de 2026 

Track: La Puente (Morcín) - El Rotellón - Figares - La Collá - La Madalena - Cuitu Rumiru - Otura - Llugar de Baxo

Miércoles cualesquiera col horariu de branu y somos a xuntanos, pa entrenar, tres del GM Xuan de la Borrina per Morcín. La idega yera facer la ruta al Picu Figares, que tantes vegaes fice entrenando pa les carreres y si'l tiempu permitíalo, continuar hasta'l Monsacru y facer el percorríu que más nos apeteciese, ya que teníemos avisu tormentes.

Son pocu más de les 4 la tarde, preparámonos y salimos caleyando pela sienda verde pela que discurría la vía'l tren pente'l pozu Monsacru y la Pereda en Mieres. Agora, tendremos un seliquín patéu, que tamién usamos pa dir a esguilar a los seutores de la Peña Garcilleru, teniendo que cruciar un par de túneles illuminaos, hasta'l Caliru'l Rotellón, onde aparte del caliar, tamién había llugar de crucie de trenes. 

Partimos del aparcaderu del cementeriu de La Puente (245 m)

Comentar que ta n'estudiu, recuperar la siguiente parte de la senda verde, al traviés de la cantera de Peñamiel, pa xunise a la esistente de La Pereda a Frechura, pudiendo casi unir Mieres cola Foz de Morcín, lo que daría munches posibilidaes deportives, sobretou ciclistes a estos conceyos mineros. Nós, tamién tenemos perpasáu dalgún túnel más, con "usu ganaderu" p'acceder a la fastera de Cueva Cabrera tamién na escuela de la Peña Garcilleru, pa esguilar pero dexa de ser transitable nel siguiente túnel.

El Mortiru (Morcín)

Primavera 2025

Munchu tiempu ensin espublizar nel blogue na rellacionáu cola esguilada y la verdá ye que toi un pelín más enfotáu n'equipar que n'apretar asina que tampoco ye que tea teniendo grandes resultaos trepando, poro caltengo un pocu l'atención en deprender equipando en solitariu, pasando tardes escolingáu a mi bola nos parés y cuando escalo suelo tar a un nivel más baxo, pasando'l día colos collacios.

Sicasí, tenía pendiente la entrada del Mortiru, un seutor equipáu por Sergio, Pablo y compaña, asitiáu nel Monsacru Oriental o más davezu nomáu, como Otura, del que ya qu'espublizáronse los croquis esta selmana, poro ya sabréis que vais poder alcontraros con un grau mediu-baxu perimportante, lo que va facer la delicia de tolos escaladores, poniendo mui en valor, l'increyible trabayu que ficieron pa sacar eses víes alantre, ya que'l procesu de llimpieza nesos graos ye insufrible dafechu. 

Kíla echando un gabitu pa facer pie de vía

Dígolo, porque ta pasándome a mi nun seutor nel que tamos trabayando y poro, soi cosciente del trabayu fechu, tema que la xente nun lo valora lo suficiente, lo duro que ye sanear y llimpiar graos baxos, sobretou en muries con munchu matu, lo que fai que dé a lo postreru munchu cantu, pero tamién munchísimu trabayu, asina que valoráilo y disfrutailo y si veis a los equipadores da-yos les gracies, porque meter paraboles, failo casi cualquiera, pero dexar una vía llimpia y sin peligru de romper na, ya ye otru mundu enllenu de paciencia y dedicación.

Aprovechando pa testiar munches de les víes de la fastera drecha del seutor

Nel tema deportivu, les víes que pudi probar fueron más o menos les que salen nos croquis a la mandrecha paeciéndome toes mui buenes, dalgunes bastante tieses pal grau, lo que diz a les clares el nivel de xarréu que manexen dalgunos 6a/+, metiendo metros de calidá y diversión de cantu a manos enllenes. La llargura les víes tamién engaña y muncho, ya que dalgunes aporten a los 40 metros, anque la media andará pelos 25 m, ya que munches tienen segundu llargu.

Otru murín con vistes precioses a L'Aramo

Comentar que l'añu pasáu, los equipadores tuvieron que desequipar les víes pa poder continuar colos trabayos y terminar el seutor, ya que la xente nun respeta los tiempos, poniéndose en munchos casos en peligru, ya que les víes tan pocu probaes, pueden romper cantos, nun tar terminaes de sanear o simplemente hai que dar la oportunidá a los propios equipadores a encadenar les sos víes.

Nun ye ser más o menos repunantes, ye que simplemente tenemos que respetar los tiempos de los equipadores y dexar trabayar a gustu ya ensin tar pendientes que dalguien métase en víes que nun tan entá pa esguilar y puedan tener un accidente, que lo d'equipar faise pol amor al arte, gastando perres del bolsiellu na mayor parte y que mínimu qu'agradecer y respetar el trabayu de los demás.

Mil gracies a Sergio, Pablo y el restu de collacios que llimpiaron, sanearon y equiparon esti seutor, agora tan sólo queda respetar les places nel pueblu d'Otura, que son munchos muros a esguilar pa tan poques places y averase a dar unos peguinos nes víes más nueves de la esquierda.

Otura (croquis) 

Los croquis del Monsacru Oriental (Otura) tenéislos pa consultar en papel, allugaos nel chigre MoNa en Llugar de Riba onde podéis sofitar a los equipadores de Morcín (Club Asturvertical, GM Xuan de la Borrina,...).  

Porrimán (Morcín)

Seronda 2025

Los díes de branu fueron pasando y la llegada de la Seronda, como non, trae díes más curtios y sobretou, el mió cambeu de xornada nel trabayu, fae que nun me de tiempu a averame a seutores más alloñaos y con más camín hasta'l muru, poro, unos pocos díes fuimos hasta Porrimán, quedándonos na parte baxa, onde Kíla tien un pie de vía muncho más afayaizu.

 

Javi probando la Cencerra a la entrada del seutor

Va tiempu probara un 6c a la mandrecha (Pinta en bastos) que ye un dolor de vía enllena de romos y pasos raros, que pringara porque na parte alta cayérame la intemerata de repente y colamos d'ellí, ensin poder trepar más. 

Nestos díes volví, faciéndola al pegue del día y pasámonos Alvarín y yo a montar un 7a+ (Donde esta Iapa), que tuvimos descifrando, teniendo un pasu duru de placa na parte alta. Esi día probamos tamién el Tesoro de Willy, que ta nos croquis de 7b+, sacando los pasos duros de la parte baxa y llueu navegando nel restu la vía pa nun lianos de más, ya que tamién tien un pasín finu na parta alta.

Apretando y al asegure nun par de díes d'esguilada na parte baxa

La siguiente visita, centrárame en Donde está Iapa, entrándo-y fuerte dende'l primer pegue, pero teniendo que meté-y otros dos pegues más pa poder encadenala, cayéndome nel segundu saliendo del pasu y al terceru del día pudiéndome llevala con seguridá, pero apretando, poro a mi mou de ver, el 7a+ paezme afayaizu, más que'l 7a, ya que'l pasu ye llargu y la vía tien el so puntín físicu.

 

Xavi nel pasaxe duro del Tesoro de Willy y Kíla a lo suyo

Al día siguiente nun había munches opciones pa trepar y volvimos hasta Porrimán, na Peña Garcilleru, metiéndome nesta ocasión el supuestu 7b+ (El Tesoro de Willy) que tuve probando con Tolín, mientres Anna y Javi pegábense con Donde está Iapa.

Finalmente, al tercer pegue del día, como n'anterior vía, pude encadenala, poro decidime a que nun llega a 7b+ la vía, paeciéndome más bien 7b, ya qu'esi estilu físicu d'entamu nun ye mi estilu y personalmente un 7b+, ye mi puntu de proyeutar serio y suelen llevame nel intervalo de la decena de pegues. 

 

Los croquis de la Peña Garcilleru tenéislos pa consultar, allugaos nel chigre MoNa en Llugar de Riba onde podéis collaborar colos equipadores de Morcín (Club Asturvertical, GM Xuan de la Borrina,...).  

---------------------------------------------------------

Santolaya (Morcín)

Branu 2025 en Solavilla

Dempués de visitar el branu anterior el seutor del Sidrán na parte baxa del picu La Llera, faláremos con Sergio y los sos collacios, activos equipadores na zona de Morcín y falando d'un muru superior, que siempre vimos penriba de Santolaya, díznos que tien metíes 5 víes, pero que camienta que les víes que resten per equipar, ya van tener graos más altos y que nun se diba meter nello, poro anímanos a continuar col so trabayu.

D'esti xeitu, aportamos por allí y echar una güeyada y alloriamos col muru de Solavilla, coles chorreres y col tipu de roca que tenemos delantre, mui asemeyada al seutor del Sidrán y tamién al tipu de Frechura, en cuanto a les plaques, pero esta vegada tenemos delantre chorreres y desplomes con llinees con una pinta estupenda, nel que tendremos que trabayar.

Les vistes de Santolaya  y del picu Figares dende'l camín a Solavilla

D'entrada metémonos Dani y yo, a llimpiar camín, abriendo senderu na parte alta del camín antiguu que vien dende Santolaya, animándose Fon tamién a meter dalguna vía, pero como siempre Dani ye una máquina equipando y pa cuando queremos entrar a trabayar ya tien dalguna metida nes chorreres y métome a equipar una línea que me prestaba, qu'a lo postreru quedaría nel primer octavu del seutor.

El branu fue pasando y díbemos combinando la escalada de les víes equipaes, cola apertura de nueves dexando al final del branu un total de 17 víes equipaes nel seutor. Tamién, logramos acondicionar les víes de Sergio, limpiando una repisa dende la que salien casi toes, montando un pasamanos pa subir hasta la repisa y entamar les víes sin peligru de cayida de piedres.

Los equipadores de la segunda fase de trabayu en Solavilla

Asina mesmu, tamién dexamos trabayu pa la temporada que vien, ya que tenemos oportunidá de siguir equipando víes más plaqueres a la manzorga que preferimos dexar pal branu que vien, ya que terminamos un pelín cansaos de tanto trabayar y llimpiar esti seutor qu'espero-yos preste a los que la visiten.

No deportivo, fuimos atacando vía tres vía, encadenando les víes de Sergio, demientres probábemos les nuestres, tando d'alcuerdo colos graos propuestos pol so equipu, disfrutando muncho d'elles ya que son víes llargues y bien guapes con bona continuidá en tol so percorríu, asína que mil gracies pol trabayu porque son una pasada.

 

Encadenando Chocolate Biscuit (7a) y Javi nos pegues d'encadene de la Remington Hostil (8a)

Nes nuestres, Dani, como bon equipador de la mayoría de les víes, fue faciendo les primeres, destancando la triloxía del Chakra (El Chakra-cha del Tren (7a), los Santos Chakramentos (7a+) y el Imperio contra'l Chakra (7b)), llevándonos más collacios pocu a pocu esta triloxía, continuando pela mió parte con dalgunes víes más bloqueres na fastera zorga del seutor, tocando dacuando los tres cuernos qu'equipé, tando dos tovía ensin encadenar y casi ensin probar.

Tuve la suerte de ver a Carlos Cue y Javi Solares probando la Remington Hostil, primer vía qu'equipé en Solavilla, de la que namás hai un encadene que yo sepa, la primera de Javi, que tuvo qu'esforzase más de lo normal, pa dexala con propuesta de 8a, anque según les sos pallabres, ye una vía pelín old school, poro nun va ser una vía cenciella d'encadenar, esperando que dalguien más seya a poner una muesca más.

 

Probando les víes de Sergio en Solavilla

Les otres dos víes qu'equipara, tan dafechu de proyeutu, dexándoles pal branu que bien, teniendo claro que voi mover Matar Jipis en les Tolves, un pelín más a la mandrecha viendo si dexo la variante esquierda y Cadera Perpetua, queda pendiente de probar, pa ver si sal o non y que podemos facer pa nun perder una llínea tan guapa.

Pel momentu, quédenme varíes víes per encadenar de Dani (Honey Bum, Rayas y Centollos, Licor 53) pero aportando l'iviernu va ser un pelín penoso esguilar nesti seutor, ya que veolo más pa tiempos más cálidos, al tener solombra a partir de les 2 y media de la tarde, poro nun ye mala opción pal branu.

Que vos preste!! Nós, siguiremos trabayando la prósima temporada pa sacar dalgunes víes más. Respetái l'entornu y collaborar llimpiando'l camín y la broza que vaya espoxigando nel muru. 

 

Los croquis de Santolaya tenéislos pa consultar, allugaos nel chigre MoNa en Llugar de Riba onde podéis collaborar colos equipadores de Morcín (Club Asturvertical, GM Xuan de la Borrina,...). 

-------------------------------------------------------------------

Peña Salgueiro (Morcín)

Seronda 2025

Munchos son los díes que llevo pasando delantre de la cantera la Naval, viendo milenta coches d'escaladores aparcaos y ye que la Peña Salguerio nos últimos años, na so faza inferior, diónos hasta tres sectores nuevos gracies al trabayu incansable del Puntu y dellos compañeros más. 

El primer seutor, que visité años atrás, cuando taba recién equipáu fue la Cueva, más nomáu como'l Sectorín, un pañu de roca que recordóme na so parte drecha a Cuanxú, míticu sector de Grau, pero na so manzorga, aportaba 3 víes de sestu con chorrera, que fadría les delicies pa la xente de grau mediu onde podría esfrutar de la esguilada de chorrera.

Vistes del murazu de Chorreras na Peña Salgueiro

Sicasí, nun volví, ya que l'accesu pela carretera, chupando fumo nel túnel, más daquella un espolón d'entamu a trepar con cuerdes afitaes, nun me prestó pa la mió perrina, ya mayor n'aquel momentu, na que dicir agora que ya tien 13 añinos. 

Pasó un branu, tando yo enfotáu na reequipación de Fuentescala y en mis llargos pateos al seutor, ya veía'l siguiente proyeutu del Puntu, como yera un gran seutor con víes llargues de chorrera, como pocos hai n'Asturies y menos en Morcín, viéndose'l paré bastante moyáu en toes ocasiones, poro'l trabayu tuvo que ser increyible pa sacar alantre esi murazo que se curraron.

Orlando y Silvia probando víes nel seutor Chorreras

Fai delles selmanes, tuve de vacaciones per casa y aprovechando un par de díes que nun tenía a Kilina, averéme per ellí a conocelo, alloriando cola currada nel accesu, ya con escalones nel espolón d'entamu y con tola nueva travesía hacia'l seutor de Chorreras, teniendo a mediu camín otra obra mayestra, como siempre de Fer, sacando otru seutor de Placas nel Salgueiro, nel que tovía siguen trabayando.

Esta vegada tiramos hasta Chorreras, onde'l primer día pude llevame'l primer llargu de Camino Primitivo (6b+/c), Homo Prejubilator (6c+) y La Miseria (7a) paeciéndome toes una pasada, sobretou la Miseria, un rutón de 30 y picu metros de navegada chorreril.

La segunda visita sería más esprés de tarde, antes del cambeu d'hora, subiendo a la carrera faciendo de nuevu Camino Primitivo, pero hasta'l segundu llargu que sale un 7a bien guapu, completando la tarde con otru pegue al flash a No Puedo dejar el Rock, onde apretamos enforma nel tramu final de chorrera, pa poder llevala pal bolsu. 

 

Los croquis de la Peña Salgueiro tenéislos pa consultar, allugaos nel chigre MoNa en Llugar de Riba onde podéis collaborar colos equipadores de Morcín (Club Asturvertical, GM Xuan de la Borrina,...).

------------------------------------------------------------------------------- 

Otura (Morcin) - La Canal - Granda Entrepuertes - Les Capiyes - Cuitu Rumiru - Llenu Vellar - Covarriella

4 de Setiembre de 2025

Track: Otura (Morcin) - Canal - Granda Entrepuertes - Les Capiyes - Cuitu Rumiru - Llenu Vellar - Covarriella

Aprovechando una guapa tarde d'esti final de branu, xuntámonos Carlos y yo pa dar un pateín pel Monsacru y charrar de les mierdes de la vida, asina que tiramos hasta Otura, pueblu morciniegu más que nomáu pol so allugamientu na faldera del Monsacru y trazo cola tiesta un percorríu circular que-y pueda prestar al collaciu.

Debe ser el monte pel que más vegaes anduve, ya qu'uselu munchu pa entrenar pa les carreres pel monte y pa esguilar, como non, asina que salimos en direición a la nomada Canal, pela que tantes vegaes xubí ya fuera cargáu col mochilón pa esguilar o mediu corriendo pa entrenar.   

 

Partimos d'Otura (475 m) guapu pueblu morciniegu

Tiramos canal p'arriba, dexando a la nuesa mandrecha'l camín hacia'l Cantu La Sierra y entamamos la pindia cuestona, algamando les clásiques vistes de la Foz baxo la crestería de Peña Manteca col Llusuriu detrás como fondu de pantalla. 

Vamos falando y ensin querer voi metiendo ritmu, ya que toi alcontrándome bien ya del cadril y toi con ganes d'entrenar y siento l'aliendu entrecortáu de Carlos, asina que baxamos ritmu, demientres voi contándole hestories esguilando nel seutor de la Canal.

Cualladrona (Morcín)

23, 29 Agostu, 1 Setiembre de 2025

Nesti branu 2025, como non, tuviemos dalgunos díes trepando pela Cualladrona, pero muncho menos qu'otros años, por mor d'esta meteo seca que pudimos esfrutar, dándonos posibilidá de tornar a otres escueles y seutores de Morcín.

Non sólo, tuviemos esguilando sinon que tamién trabayamos un pocu pa dexar más curioses les víes de la Fayona, añadiendo una reunión pa separar el Diedro la Fayona y el Escudo de Morcín con una reunión independiente.

Santos probando Zumo de Motivación (7b)

No que la esguilada refierse, unos pocos díes xubimos hasta la Placa d'Arriba de la que ya tenéis disponibles croquis, probando dalgún cuernu estrañu en forma de vía mui morfa (Hagende Garten), tachamos dalgún sestucu que tenía pendiente (Repetance y el Chanclas), apretones pero bonitos y metímonos a Laniakea (7a+) tolos collacios a sufrir nos sos pasos regleteros y de placa.

 

Dani plaqueando fino nel seutor Inferior de la Cualladrona

Dempués de llevanos Laniakea, non sin dar más pegues de los camentaos, tuvimos la suerte d'acompañar a los equipadores de la Cualladrona, pa prebar dalgunes víes que tan equipando nun nuevu seutor. A mou resume, pudimos tastiar y encadenar les siguientes víes:

 

Si tuviese que calificar les víes ye que la mayoría, salen derrapando dende'l suelu, con pasos a bloque o secuencies intenses na parte inferior y una parte alta más amable d'escalar. Sicasí, les víes son mui buenes, quedándome Desplumaviejas, Dios mío dame cazos y Zumo de Motivación, como les más guapes, siendo Zumo de Motivación un auténticu rompecabezas pa sacar los pasos más claves.

Mil gracies a los equipadores como siempre, por dexanos compartir pegues, comentar graos y testear y llimpiar les víes con ellos. En pocu tiempu, tarán como siempre disponibles los croquis de forma gratuita, nos llugares onde tamos espublizando la información, cuando los equipadores terminen el trabayu.

Croquis de La Cualladrona (Peña Manteca Norte) gracies al trabayu del Club Asturvertical y del GM Xuan de la Borrina. Tenéislos en papel, allugaos nel chigre MoNa en Llugar de Riba onde podéis collaborar colos equipadores de Morcín.

------------------------------------------------------------------------------- 

Covarriella (Morcín)

22, 31 d'Agostu de 2025

Continuamos esguilando pela Covarriella, centrándonos un pelín en quitame d'enmediu Inversión Térmica (7b) na Aguya la Madalena, una vía qu'atragantóseme enforma y qu'entamara a probar colos collacios Santos y Dani, pasando otros tamién por ella, llevándosela toos enantes que yo, pero bueno, siempre tuve muncha paciencia coles víes y cola mió forma d'escalar, así que seguí insistiendo día tres día.

 

Dando pegues a Inversión Térmica

Hasta que dempués de tar unos díes per Picos y más tarde per Soria descansando de la escalada, volvimos nuna selmana d'estes nes que sale too bien, hasta la aguya Madalena y nun cuartu pegue, ya pelín desesperáu cola vía, fice'l bloque al fin, llueu hasta d'intentar camudar métodos nos tres pegues anteriores, dándome cuenta de que tenía que caltener mi forma de facelo.

 

Santos probando Inversión Térmica (7b)

Cola tranquilidá de quitame esta vía d'enriba, nesti añu nel que nun tuvimos pieslle por añeramientu na fastera Este del Monsacru, darréu ya toca, poneme a probar dalgo nuevo na Madalena, pasándonos a los 7cs o volver a L'Aviru Campón, pa da-y a Camudando'l Cadril (7c+?) o simplemente equipar más víes nel Aviru o n'otru seutor que desarrollaremos en breve.

 

Shei nes placas de la Aguya Madalena

Sacante la Madalena, que por fin pude abandonar un pocu, tamién tornamos dalgún día a esguilar na Peña La Covarriella, a la que tuviera-y dando una "segunda oportunidá" nesti branu. Dempués de ver calecer deos a Sandra y Ana en Qué Chulada, tocóme mi turnu y tiré a 26 Pulgada que la tenía tocada de la última visitina al seutor.

 

Completando dellos sétimos baxos na Peña La Covarriella

Esta vegada, si que pude facela poniendo cintes pa recalecer, prestándome munchísimo la vía, dexándosela montada a Ana, que pudo probala, pegándose duro col bloque, desmontándola, ya que nun se veía con fuercia pa poder encadenala nel siguiente pegue.

 

Ana en distentes víes na Covarriella

Con dalguna cinta puesta, metíme a la siguiente, Tigre Traidor, tamién 7a como 26 Pulgadas que nun la tenía probada, pudiéndola facer a vista, disfrutándola munchísimo, non sin apretar, pero paeciéndome más d'esguilar y lleer, ensin el bloque marcáu de 26 Pulgadas.

 

Sandra esguilando de vacas por Morcín 

Recomendésela a Ana, que probóla un pocu fundida del pegue anterior a 26 Pulgadas y cola mesma ya tocó recoyer, dexándome esti seutor, casi vistu pa sentencia, quedándome 3 víes namás, que diré probando nes restantes vegaes qu'acérqueme pela Covarriella.

Croquis de La Covarriella gracies al trabayu del Club Asturvertical y del GM Xuan de la Borrina. Tenéislos en papel, allugaos nel chigre MoNa en Llugar de Riba onde podéis collaborar colos equipadores de Morcín.

-------------------------------------------------------------------------------

La Puente (Morcín)

1 d'Abril de 2025

Pues casi 5 añinos dempués, pasamos de nuevu pela Puente, una escuela pervisitada pelos escaladores asturianos y foriatos, pero pesie a quedame una vía por facer nel seutor principal de Placas y dalgún llarguín terceru o cuartu nel espolón esquierdu, nun me dió por volver, aparte de dalgún paséu pa ver el seutor de la Bóveda qu'equipóse nos últimos años.

Nun teníemos munches idegues Ana y yo pa escalar, así que diónos por volver, pero dime cuenta, que pa Kíla ya nun ye un accesu afayaizu, ya que'l pasu d'escaladores y lluvies ficieron l'escalón de la cuerda afitada per alto y toca porteala muncho, ya que la vieyera ya nun-y da pa estes xeres, asina que queda pa los díes que nun la lleve.

 

Vista del placón previu al techu en la Puente Esquierda

Aportamos con una sudada brutal de portear a Kilina tol camín hasta'l principal onde había xente, como non, escalado y siguimos hacia'l seutor a la manzorga, aposentándonos nel pie de vía y echando una güeyada a los croquis y les víes, decidiéndome a meteme a calecer nun 6b+ nomáu Sin paso atrás.

Allá que métome, xubiendo pela escalerina, asegurando dalgún peldañu y salgo hacia la repisa, tirando d'una cuerda podre y con tola repisa tomadísima per una yedra qu'envuelve tola cuerda afitada, qu'entama a tar tamién nun estáu cuanto menos revisable.

Anna solventando los pasos de Sin paso atrás (6b+)

D'esti xeitu, salgo como puedo pisando'l bardial, la cuerda y tolo que pillo, pa poder entamar a escalar y a partir de que chapo la segunda, entamo relaxame, por nun cayer contra'l burdiu y escayame entero, esfrutando d'una escalada recia pero mui buena, encadenando la vía y dexándosela chapada a Ana penriba'l bardial pa que la pruebe.

Nun tien suerte y nun pasu cabrón, líase y por nun volar hacia'l bardial píllase y ya resuelve dempués, paeciéndo-y dura tamién pa 6b+ pero ensin más desmonta y aldericamos si dir a un 7a con bona pinta o tirar a un 6c+ tamién que llama l'atención dende baxo.

 

Esfrutando d'A Primera Vista (6c+) imprescindible dafechu

A la fín, tiramos a Primera Vista, entrando pola so vía de la esquierda, pero lo mesmu, toca facer una travesía penriba de tola yedra pinchuda, fiándose d'una cuerda nun estáu "revisable" hasta plantase al entamu de la vía y ya sí, que tocó esfrutar d'un llargazu increyible con una calidá y variedá d'escalada guapísima.

Llueu tocó-y a Ana que tamién la enchufó nun pegue munchu más relaxáu y centráu, anque apretando, paeciéndonos un viote 5 estrelles, quedándonos con ganes de probar más, pero l'estáu del seutor, dexa muncho que deseyar y siendo sinceros, nun sé de que manera pudiérase caltener d'otra manera.

Quiciabes, lo meyor ye nestes víes de la esquierda, meter más entraes dende'l pie de vía y dexar la escalerina pa salir a la mandrecha namás, siendo amás les víes más cencielles que de tan sólo escalales, tendríemos la repisa llimpia de broza y al menos les 5 primeres víes se podríen escalar dende'l suelu.

----------------------------------------------------------------------------