Pues casi 5 añinos dempués, pasamos de nuevu pela Puente, una escuela pervisitada pelos escaladores asturianos y foriatos, pero pesie a quedame una vía por facer nel seutor principal de Placas y dalgún llarguín terceru o cuartu nel espolón esquierdu, nun me dió por volver, aparte de dalgún paséu pa ver el seutor de la Bóveda qu'equipóse nos últimos años.
Nun teníemos munches idegues Ana y yo pa escalar, así que diónos por
volver, pero dime cuenta, que pa Kíla ya nun ye un accesu afayaizu, ya
que'l pasu d'escaladores y lluvies ficieron l'escalón de la cuerda
afitada per alto y toca porteala muncho, ya que la vieyera ya nun-y da
pa estes xeres, asina que queda pa los díes que nun la lleve.
Aportamos con una sudada brutal de portear a Kilina tol camín hasta'l principal onde había xente, como non, escalado y siguimos hacia'l seutor a la manzorga, aposentándonos nel pie de vía y echando una güeyada a los croquis y les víes, decidiéndome a meteme a calecer nun 6b+ nomáu Sin paso atrás.
Allá que métome, xubiendo pela escalerina, asegurando dalgún peldañu y salgo hacia la repisa, tirando d'una cuerda podre y con tola repisa tomadísima per una yedra qu'envuelve tola cuerda afitada, qu'entama a tar tamién nun estáu cuanto menos revisable.
D'esti xeitu, salgo como puedo pisando'l bardial, la cuerda y tolo que pillo, pa poder entamar a escalar y a partir de que chapo la segunda, entamo relaxame, por nun cayer contra'l burdiu y escayame entero, esfrutando d'una escalada recia pero mui buena, encadenando la vía y dexándosela chapada a Ana penriba'l bardial pa que la pruebe.
Nun tien suerte y nun pasu cabrón, líase y por nun volar hacia'l bardial píllase y ya resuelve dempués, paeciéndo-y dura tamién pa 6b+ pero ensin más desmonta y aldericamos si dir a un 7a con bona pinta o tirar a un 6c+ tamién que llama l'atención dende baxo.
A la fín, tiramos a Primera Vista, entrando pola so vía de la esquierda, pero lo mesmu, toca facer una travesía penriba de tola yedra pinchuda, fiándose d'una cuerda nun estáu "revisable" hasta plantase al entamu de la vía y ya sí, que tocó esfrutar d'un llargazu increyible con una calidá y variedá d'escalada guapísima.
Llueu tocó-y a Ana que tamién la enchufó nun pegue munchu más relaxáu y centráu, anque apretando, paeciéndonos un viote 5 estrelles, quedándonos con ganes de probar más, pero l'estáu del seutor, dexa muncho que deseyar y siendo sinceros, nun sé de que manera pudiérase caltener d'otra manera.
Quiciabes, lo meyor ye nestes víes de la esquierda, meter más entraes dende'l pie de vía y dexar la escalerina pa salir a la mandrecha namás, siendo amás les víes más cencielles que de tan sólo escalales, tendríemos la repisa llimpia de broza y al menos les 5 primeres víes se podríen escalar dende'l suelu.
Facía tiempu que nun tornaba pela Puente más qu'a facer metrinos dalgún día suelto y ye que pocu más quedaba por facer nesta guapa escuela. Sicasí tovía tengo pendientes, dalgunos terceros y cuartos llargos de la Sombra del Fresno y Blanco y Negro, qu'a ver si dalgún día engaño a dalguien pa ello, porque tarán tomaos enforma.
Magar del gran trabayu de los equipadores iniciales, el paré de la manzorga'l seutor, nun diba quedar nel escaezu y ya tan manos a la obra xente p'ampliar esta escuela en graos altos y n'esguilada distinta dafechu de la placa cimera del seutor.
El casu ye, que los equipadores al igual que munchos escaladores, vimos unes clares llínees que salíen de Calvinche (6b) p'arriba, per un desplomín bien guapu. Poro, metieron un par de víes: una saliendo a metá de Calviche hacia la manzorga y la otra de la propia reunión de Calvinche al rectu.
Pude probales en 3 díes distintos y la variante a la manzorga, fícela al segundu pegue, paeciéndome un 7a sólidu pal grau de la Puente. La vía ye perguapa, con pasos físicos pa superar los techinos y un regalín plaqueru na salida final hacia reunión.
El segundu llargu de Calvinche, fuí a encadenalu al 4u pegue, llueu de tener que camudar de métodu, porque como siempre taba faciendo la vía quiciás mas dura de lo que yera. El primer día paecíame un 7a+ bien claru, pero col cambiu de métodu ya me paeció más cenciella col encadene correspondiente.
Al final, na mió opinión tarán les dos nel 7a/+ y que vaya opinando la xente, lo que ta claro, ye que de momentu son les dos víes más dures del seutor, bien penriba del restu de 6c+/7a esistentes. La única pena ye que comparten la metá de la vía pel 6b y pa probar los dos segundos llargos faise pelín abegosu.
La Puente
Croquis fechos pelos equipadores d'esta grandiosa escuelina, que prefieren remanecer nel anonimatu, que tantos bonos momentos ta dándonos a munchos escaladores de la fastera central d'Asturies
Hestoria d'escalada de la Puente
Probáblemente, si nun recuerdo mal, a entamos del branu del 2015, magar de salir de trabayar, dizme un collaciu de dir ver una vía qu'abriera n'artifical venti años atrás. Dizse prontín, pero venti años son munchos, asina qu'avérome con él hasta Morcín.
Aparcamos nel pueblu de la Puente y caleyamos un pelín per carretera hacia la Foz, hasta qu'atopamos una valla antiargayos, la cual pasamos pela mandrecha y entramos nun auténticu bardial, pel que malpenes somos a ascender... menos mal que dixera que pantalón de monte y de los fuertes.
Averamos al pié del paré, del que cuesta ser capaz de ver rastru de nenguna apertura, hasta que dizme que mire penriba d'unos 15 m onde vezse un cáncamu más vieyu que les sableres. Sacamos trastos d'artificial y metémonos nel tayu, pasando yo más mieu qu'él, demientres tira de gancheos pa dir avanzando y llimpiando la vía.
Daquella, magar del trabayu y de pasar más tensión que toa mi vida, viendo pegar saltinos sol estribu pa ver si aguantaba'l ganchu, aportamos a esi cáncamu, vieyu enforma, que valió p'afitar una cuerda y dexar montáu lo que sería l'entamu d'un trabayu descomanáu de llimpieza y de ganá-y metru a metru a un paré calizu preciosu.
La vía orixinaria, nomábase la Cabrada, a la que-y venía'l nome que nin pintáu, ya que pa xubir hasta'l pié de vía, había que ser cabres más menos. Pasó dalgún tiempu y pesie a prometer que diba siguir echando un gabitu, tuve un mesín y picu trepando duro y pa cuando volví ya tenía los dos llargos orixinales de la Cabrada llimpios ya equipaos, siendo más tarde cuando finaría la vía hasta los 4 llargos actuales.
Col pasu'l tiempu, pa finales d'Avientu del 2015 ya tuviera per ellí trepando y probando les víes, pa da-yos un grau afayaizu, cuntando col nivel de graos un pocu d'esti monte sacru, yendo un pocu en comparanza colos graos de la escuela d'Otura que yera la referencia más averada.
Tamién, fueron saliendo víes tieses como variantes a esa primer ruta orixinal que surcaba los requexos más febles d'una placa que n'aquella pa facer en llibre debía dexase protexer más bien pocu o nada. Col primer día d'artifo, ya tuviera pa una bona temporada de nervios, sicasí ver agora como'l paré convertíase nuna pequeña escuela de deportiva paecíame más brutal entá... vaya trabayu.
De primeres, escuela secretiva, yera normal tando nun llugar tan cerquino de la carretera, que la xente llevantara la tiesta y viera esguiladores na parea. El siguiente pasu, yera averase a ver aquello y si taben los equipadores per ellí, pues poquín a pocu fueron rulando croquis y el boca a boca fizo'l restu.
Pal branu del 2107, con casi toles víes esistentes anguaño, averéme un día más per ellí, cuando ya taba'l seutor Escombrera tamién abiertu y alcontréme col collaciu, arrequexáu a esti seutor y toles víes del placón principal ocupaes dafechu.
Lo primero que me dixo, fué... morrió d'ésitu. Normal, pensé... a 5 minutinos de la carretera, equipadina pa niveles baxos, ensin sartenazos y a la solombra en plenu branu... diba masificáse. Asína que cuando díxome que diba desequipala esi branu, p'acabar de trabayar les víes y a otra cosa mariposa, paecióme de lo más normal, ya yera imposible caltenela en secretu, tando al llau de la carretera que baxa d'Otura, la gran escuela morciniega.
Llueu del branu, tornóse a colocar les primeres chapes y finóse d'equipar lo que quedaba dexándola nel estáu actual, que pa munchos tendrá coses que meyorar, que si nun hai grau duru, que si ta cosida... yo digo que vengan, que llimpien un paré enteru, que faigan un pié de vía onde nun lo había, que faigan un senderu onde nun lo había... y llueu que digan lo que quieran.
Esta placa caliza nel pueblín de la Puente, fízonos y va facenos pasar munchos bonos momentos a los que nos presta esguilar cola calmina, una tarde de branu o una mañana d'iviernu al solín, paseándonos o apretando n'arba del nuesu máximu grau ensin grandes vuelos.
Por suerte, a mi mou de ver, l'espoxigue de la escuela de Figares, otra ayalga del conceyu de Morcín, que tamién entrá-y la solombra a primeres hores de la tarde, fai que la xente vaya repartiéndose, asina como n'Otura na parte alta de Nuberu y que la plaquina de la Puente, pueda ser escalada más tranquilamente, ensin xente casi penriba unos d'otros y pidiendo turnu pa probar les víes.
Tan sólo, dende equí, dicir que se cuide entre toos la escuela, que nun se dexe basoria, nin se mexe nos piés de vía, asína como minimizar el griteriu cuando axúntase muncha xente, porque'l meyor puntu d'alcuentru colos vecinos aparte d'aparcar lo meyor posible, ye que nin se nos sienta cuando paseen pela sienda pente la Puente y la Foz.
Per últimu, voi espublizar los croquis, viendo que casi tol mundiu los tien nel so móvil, al traviés d'esi guaxap volador. Como siempre, van apuntaes les víes que me queden per probar y encadenar, pero bono... eso ya ye dalgo personal, quedáivos colos graos orientativos y col gran trabayu de los equipadores.
Buenísima entrada Berto, ya ye oficial jejeje
ResponderEliminarNo tenías derecho a hacerlo público antes que los equipadores y además sin su consentimiento,te has pasado.
ResponderEliminar