El Pumar (Cangas de Narcea) - Cazarnosa - Orúa - Liebres - Val.le Pumar

29 de Marzu de 2025

Track: El Pumar (Cangas de Narcea) - Carzanosa - Orúa - Las Llebres - Braniegu

Día de ruta del GM Xuan de la Borrina y como siempre, tuvimos restolando pa conocer un pocu más de la nuesa Asturies, yéndonos hasta Cangas del Narcea, onde teníemos pendiente rutes ya preparaes, Mario y yo, que somos un pelín más namoraos del suroccidente, que'l restu la xente montañero astur.

Pa ello, saldremos direción Cangas del Narcea, parando a almorzar en La Barca, pa siguir hacia la capital desviándonos na ponte L'Infiernu, pa siguir al traviés de Llinares hacia Bisuyu, onde garraremos la "pista de tierra" que tien de llevanos hasta'l Pumar, na parroquia de las Montañas.

Partimos d'El Pumar (593 m) na comarca Las Montañas

Dicir que la pista de 3,5 km ye guapa de caleyar, pero la circular dende Bisuyu, diba facésenos escesívamente llarga, asina qu'aparcaremos onde l'hotel rural d'El Pumar, recibiendo'l saludu de Pastor, un mastín mozu que tuvo pendiente de nós demientres preparámonos pa caleyar.

A la vera'l rigu Pumar, facemos semeya de rigor y entamamos a caleyar rigu arriba, hasta garrar al pocu un desvíu marcáu a la mandrecha. Digo marcáu, porque la xente del hotel rural, tien marcaos tres percorríos circulares pel val.le Pumar, anque dengún dellos llega a lo que nós teníemos na tiesta facer.

Entamamos la llarga y cansina pista n'envueltes hacia la xerra de Carzanosa

Garraremos entós esta llarguísima envuelta, siempre cola compañía de Pastor, hasta'l Regomal, onde tornamos a facer otra llarga envuelta hasta'l Colláu, onde alcontrámonos col dueñu del mastín, que taba cortando lleña y dexónos ensin la so bona compaña. Dende equí, siguiremos hasta'l Mosqueiru pa garrar la envuelta más guapa, pente altísimos pinos primeru y fayes dempués, hasta aportar a la fin a la cimera'l cordal de Cazarnosa, al altor del Penón del Pumar.

Paga la pena comentar, que nel Regomal, pudiéramos siguir pista pela fastera norte del monte que diba lleganos con menos distancia hasta'l Penón del Pumar, pero, nos mapes nun salía'l camín, cosa que sí que pude ver a posteriori per semeyes satelitales, una pena porque díbemos restar lo menos un par de kilómetros innecesarios, ya que toles envueltes per pista, nun fuera na guapes, sacando la cabera hasta'l Penón.

A la fín garramos llomba y llera final hacia'l picu Cazarnosu (1383 m)

Dende equí, ya por senderu, diremos primeru hasta la Peña'l Castru (1249 m) y siguiremos restolando senderu pente la beriza, hasta aportar a la llerona final, que va danos pasu a los 1383 m del picu Cazarnosu, puntu mal altu del cordal de Cazarnosa.

El día, entáu nun mos amuesa demasiaes vistes, ya que los albancios tovía tarden n'apaecer teniendo hacia l'oriente un horizonte borrinosu. Amás, tira un airín nordés cafiante, poro continuamos camín descendiendo per un enorme cortafueos, que paez tar preparáu pa continuar el parque eólicu que vien dende la xerra Los Lagos.

Descendemos xerra alantre hacia la braña y campa de Cazarnosa

Descenderemos a la vega Cazarnosa, guapa campa con llaguna y vistes hacia'l picu Tunón, que conociéramos va dellos años. Como digo, por suerte, tenemos tol nuesu percorríu llibre d'eólicos pero nun podemos parar de mirar hacia'l Panl.lón, puntu de más altor de Lagos, que bones alcordances me trae con Kíla siendo un cachorru. 

De la vega siguiremos camín alantre hasta'l Mosqueiru'l Toral, onde atopamos un sitiu afayaizu pa tomar el sol y xintar el pinchín, cola solombra d'un pequeñu pinar, ya que llevamos 4 hores de patéu ensin parar y necesitamos un descansu enantes de siguir hacia'l cordal d'Ouria/Orúa y la posterior baxada, que sedrá de xuru más aventurera.

Empatamos cola xerra y cumal d'Ouria (1370 m) onde les vistes ampliénse hasta l'infinitu

Magar del reposu, empatamos cordales de Cazarnosa y Orúa nel altu del Toural, viendo demasíau cerca los eólicos, dándonos cuenta que'n dalgún momentu hubo intención de siguir parque eólicu alantre, asina que damos gracies a poder percorrer tol cordal d'Orúa ensin los xigantes de fierru enriba les nueses tiestes.

Con un llargu y sele, en desnivel, ascensu, aportaremos al picu Orúa (1370 m) onde tenemos una vista de 360º increyible, con tola llende somedana-canguesa ñevada dende'l Rabu L'Asnu al Cabril pa siguir hasta'l Cornón y Moscosu, con unes ñevaes mui curioses, pasando dempués pol Muxivén, Cuetu d'Arbas, Caniel.las y sobretou cola cordelera pente Degaña ya L.laciana (Miru, Miravalles) y sobretou con Os Ancares con un paquetón de ñeve sorprendente.

Descendemos pel Mosqueiro Robléu hacia'l val.le Liebres

Descenderemos del Orúa/Ouria goliendo a recién quemáu, hasta'l Mosqueiru Robléu, onde atopamos cabaña y un prau bien curiáu, saliéndonos pela so manzorga, p'aprovechar descensu per tierra quemada, hacia'l colláu penriba de Braña Ladrada, siguiendo hasta un evidente colláu con portiella que da pasu a una viesca que baxa hacia la Vachina las Liebres.

Dicir, qu'alcontraemos esti valle recién quemáu y fízosenos cenciella la baxada, primeru per un terracéu estrañu, como d'una replantación de pinos supusimos, sinon, sería meyor siguir pel cordal hasta'l picu Quemáu, onde sal una pista que baxaría hacia la Vachina Las Liebres dando dalgo más de vuelta.

Restolamos descensu per un fayéu preciosu hasta Brañafanar

Nós pudimos descender hasta la pista acortando pela vallina, pa salir pela pista a la mandrecha, a la gueta del camín principal de las Liebres, pero alcontrámoslo dafechu tomáu d'escobes y preferimos siguir más a la mandrecha, pa garrar otru senderu camín, na vallina contigua, que faciendo envueltes per una viesca preciosa y al llau d'una riega poerguapa, dexónos descender hasta Braña Fanar, onde atopamos una ponte de formigón pa cruciar l'amestaura les riegues de Las Liebres y Braniegu.  

La verdá ye que como camuden los paisaxes de los valles o a los altos nel suroccidente, ya que d'unos cumales non demasiáu atrautivos, con muncha reforestación mal plantegada de pinos, empócestes nos valles alcontrando fayeos enllenos de vida y agua, que bien pudieran ser de conceyos orientales. Dende Fanar ya diremos esfrutando de tol valle del rigu Pumar, per camín de gran valir antaño, anque bastante en desuso anguaño. 

Comentar que tola baxada ye una delicia, per un camín colgáu sol rigu Pumar, qu'en delles ocasiones garra gran altor sol rigu, pudiendo acolumbrar pequeños tabayones y poces en tol percorríu y una foz de cuarcita con pinares a dambes fasteres que paez tresportanos a cualesquier otru sistema montañosu .

Descendemos tol val.le Pumar esfrutando munchísimu del paséu al llau del rigu

Col atapecer llamando a la puerta, facemos la parte final del val.le Pumar, hasta aportar a la baxera'l rigu, entrando per un mayáu preciosu con molín y pequeñu banzáu con poza pa bañase que paez tan recuperando la xente del hotel, asina como una area recreativa con ponte colgante "priváu", enantes d'entrar al pueblu de nuevu, onde taba esperándonos Pastor, con ciertu resquemor dexalo col so dueñu envede llevalu de monte.

Dellos mimos dempués ya perdonónos, dexándonos dir a la más que merecida cerveza en Bisuyu, ya que'l bar del hotel taba piesllao, cosa que fadiónos un pelín ya que diba prestános conocer un pelín meyor esti complexu rural tan guapo.

En resume, ruta suroccidental total, con montes non mui atrautivos pero con unes vistes de 5 estrelles y col valle del rigu Pumar, que paga la pena munchísimo. En total, saliéronomos unes 8 hores y 20 minutos, pa percorrer un total de 23 km, superando un desnivel acumuláu de +/-1035 m.

Camudando'l Camín na comarca Las Montañas del Narcea