Xinestosu (Cangas del Narcea) - El Cabril - Rabu L'Asnu

24 de Xineru de 2022

Track: Xinestosu (Cangas del Narcea) - El Cabril - Rabu L'Asnu

Va munchu tiempu que nun mos averábamos hasta'l suroccidente y más en concretu, hasta'l conceyu de Cangas del Narcea. La verdá ye que col pasu los años, la fastera central y oriental d'Asturies tenémosla más que trallada, poro debemos dir pensando en conocer l'occidente astur, munchu más desconocíu pero con munchu tarrén pa esplorar y descubrir.

Nesti casu, dibemos conducir hasta Xinestosu, guapu pueblín ganaderu asitiáu nel valle del rigu Cibea y vamos facelu con unes temperatures perbaxes, dalgo davezu nesta estaya del añu y sobretou nes últimes selmanes, con contines xelaes nuecherniegues.

Partimos de Xinestosu (1162 m) nuna xelada mañana

Una vegada que tamos preparaos, entamamos a caleyar travesando la puente y atopando al pocu, col cartelu de la ruta al Cabril, monte que forma parte de los nuesos oxetivos del día. Siempre a la mandrecha'l rigu Los Corros diremos ganando desnivel y calor corporal, llibrando ente rises, los munchos charcos xelaos de la pista.

Avanzamos pel Valle Los Corros pente xelaes estampes iverniegues

Pasaremos pelos Praos del Ríu y la Veiga ensin calecer nin media y a la fín, fadremos envuelta a la mandrecha na Solana, siendo la toponimia más qu'acertada, pudiendo quitar el plumes y caleciendo un puquiñín nel nuesu avance hacia la Braña Los Corros.

Aportamos a la Braña Los Corros baxo la cubeta glaciar del Chanu los Bueyes

Bien ceo, termínase'l tramu soleyeru, metíendonos na cubeta glaciar del Chanu Los Bueyes, monte qu'atráime munchísimu nesta dómina ivernal, faciendo'l pasu pela Braña Los Corros bien guapu y fríu, de camín a un llugar más ablucante entá, como ye'l col.láu Tres L.lagunas.

Continuamos del col.láu Tres L.lagunas hacia'l Cogol.lu

 

Agora sí, salimos de la fría solombra y recibimos de continuu'l sol nesti Col.láu Tres L.lagunas, atopándoles dafechu xelaes, lo que-y da un puntu más impresionante a un llugar, nel que ya tenemos enfrente, la llínea de montes que separa Cangas del Narcea de Somiedu y a la nuesa mandrecha'l llarguísimu val.le de Oural.lu en L.laciana.

Ascendemos al Cogol.lu nun amiestu de ñeve y beriza

Saldremos del col.láu Tres L.lagunas, dixebrando'l grupu, averándose Benjamín y Carlos al Cabril con calma, demientres el restu'l grupu empobinámonos hacia'l Cogol.lu (1973 m), monte qu'ascendiera va dellos años dende Vil.lare nuna épica xornada montuna.

Pasamos pel Cogol.lu pa siguir hacia'l Cabril dando vista al Val.le Cebol.léu

 

Magar de l'alderique con Mario, cuntándo-y tola maraviyosa ascensión al Cogol.lu Cebol.léu, pasando pel L.lagu Bono y demás hestories, continuaremos descendiendo pela arista NO pa enllazar cola ascensión al Cabril (1931 m), monte bien curiosu, onde taben esperando por nós, los collacios, col envís de continuar la ruta.

Semeya de grupu nel Cabril (1931 m) de les cotes más altes de Cangas del Narcea

 

Llueu de facer un altu nel camín, acolumbramos a lo lloñe, quiciás mui lloñe, el siguiente oxetivu que nun ye otru que'l Rabu L'Asnu. Demientres, camentamos si va danos tiempu o non, continuamos crestiando en descensu con un día brutal, per claru, acolumbrando tol macizu de Penubina y hasta los Picos al fondo... una pasada.

Llarguisimu patéu per sienda ñevada hasta'l Chanu la Gobia

Engorilámonos de más, pendientes del tiempu restante d'hores de lluz y les prieses d'un compañeru pa tornar a Xixón y l'aumentu nel ritmu de caleyar, fízonos pasar a fueu pembaxo los Picos de la Fanarrionda y el Chandurrio, hasta aportar al Chanu La Gobia, onde viendo la distancia qu'entá quedábanos, Benjamín y Carlos, decidieron garrar el camín real de baxada hacia Xinestosu de nuevu.

Continuamos pel colláu la Gobia pa siguir ascensión al Rabu L'Asnu

Nel intre, picamos daqué, ya que yeren les 3 de la tarde ensin parar y el restu'l grupu siguimos alantre cola ruta, faciendo la última traviesa d'esta nomada Sienda la Culebra y aportaremos al col.láu la Gobia, onde a la fin, tendremos el llargu ascensu final hasta'l cumal del Rabu L'Asnu (1887 m).

Grupu nel cumal del Rabu L'Asnu (1887 m)

El sitiu ye una maraviya, con unes vistes increyibles de tolos montes asturianos pudiendo acolumbrar cotes de milenta conceyos pudiendo destacar dellos techos como'l Picu L'Urru en Miranda o la cercanu Pena Filera de Tinéu, anque la vista como siempre vase va tolos montes de Somiedu, Teberga, Quirós... y les vistes pal occidente son igual de xabaces pero cuesta muncho más reconocer montes quitando'l puntu más altu de Cangas del Narcea, col Cuetu d'Arbas.

Descendemos hacia la Gobia onde garraremos el camín Real que tien de baxanos a Xinestosu

 

Col oxetivu cumplíu tornamos so los nuesos pasos hasta la Gobia, llugar de ñacederu de los val.les de Mestas, qu'aporta hasta Sorrodiles a un llau y del de la Gobia, que baxaría hasta Parada la Viecha. Llueu de la paradina, garramos un senderu más baxo que'l qu'arribamos, pa nun perder ya tol camín, GR, que llevarános hasta la baxada final a Xinestosu na Carrizosa.

Baxamos en llargues envueltes de nuevu hasta Xinestosu

Dende equí, namái que queda armase de paciencia y baxar desnivel per esti ampliu, pero incómodu camín, ya que les piedres sueltes ye la tónica davezu del percorríu, que va dir pali pali, dexándonos de nuevu nel pueblu de Xinestosu, demientres repasamos tol percorríu que ficimos y albidramos nueves rutes pa conocer pente'l Chanu los Bueyes y el puertu L.leitariegos.

 

En resume, llarga ruta de 20 km y +/- 1150, m que faciéndose nun amiestu de restos de ñeve y tramos de xelu fizo tener que buscanos la vida pa nun sacar crampones, pero que regalónos un día de vistes increyibles nes casi 7 hores y cuartu de ruta, como non dando un pelín más de conocencia a este suroccidente tan montuno, pero pocu pateáu por nós.

Camudando'l Camín pelos altos de Cangas del Narcea