Caseríu Riosol (Valdeburón) - Picu'l Llagu - Espinaréu - Cagüezu

16 de Xineru de 2021

Track: Caseríu Riosol (Valdeburón) - Picu'l Llagu - Espinareu - Cagüezu

Nueva salida del GM Xuan de la Borrina, al alcuentru d'un d'esos montes que vas dexando nel tinteru, porque pesie a ser un de los dosmiles cimeros del Cordal Cantábricu, esperes a alcontrar el momentu oportunu p'ascendelu, viendo que col grupín d'esquí de monte pudiera ser bona opción pa facer en conxuntu.

A la fín, plantámonos en Valdeburón llueu de xubir tol puertu Tarna, ya teniendo en cuenta que durante la selmana diba tar mui complicáu pa los esquiadores por mor del desaniciu ñival. Poro, baxaremos un pelín de Tarna hasta'l Caseríu Riosol, onde preparamos los preseos iveranales de monte ya que la ñeve esistente ta xelada enforma.

Grupu preparáu nel Caseríu Riosol (1395 m)

Con tolos charcos del camín xelaos, avanzaremos ente rises, con curiáu de nun pegar una xostrada y siguiendo valle Riosol alantre hacia'l Puertu Las Señales, vamos albidrando como a nun tardar, tendremos de sacar los crampones a pasiar con total seguridá.

Esfrutamos caleyando pel xeláu valle Riosol

 

La ruta ye cenciella, avanzando pel PR Lliónes pente Maraña y Las Señales, asina que vamos charrando demientres ganamos desnivel, pasando baxo les mines de Mercurio d'Escarlati y vamos acolumbrando cumales perconocíos y ascendíos como'l Picu Celispardi al otru llau del puertu Tarna o enfrente nuesu el Remelendi, ocupáu por dellos motivaos esquiadores.

Siguimos avanzando hacia l'arisa del Picu'l Llagu per tarrén xeláu

Con pocu más de camín, la ñeve taba perduro, asina que nun perdimos tiempu y enantes d'ascender hacia l'arista al Picu'l Llagu, ya dibemos toos preparaos con crampones y piolé, ascendiendo per una preciosa vallina a la solombra, que daba condiciones perfeutes pero munchu fríu.

Salimos al sol a la gueta d'un pelín de calor

Caún al so ritmu, vamos ganando camín hasta aportar a l'arista que vien dende'l Puertu Las Señales onde a la fín, tornamos a sentir el calorin del sol y facemos reunión pa xuntar a tol grupu. Dicir, qu'acortamos un pelín hacia l'arista, pero que'l PR siguía hasta'l puertu, pudiendo ascender peles llagunes de Valdecarrín.

Agora avanzaremos per la pala NO del Picu'l Llagu

Una vegada que tamos n'arista, aparte de ganar vistes a montes tan guapos como'l Peñón San Justo, Torres, Peña'l Vientu y los cumales de les estaciones d'esquí, vamos ver tola pala NO que tendremos qu'ascender decidiendo facelo a media lladera, ya que la propia arista ta dafechu pelada y nun queremos quitar los crampones a poder ser.

 

Facemos ascensión final hacia'l cumal del Picu'l Llagu

Siguiremos abriendo buelga en fila, esfrutando munchísimu de l'ascensión hasta aportar a la parte cimera del picu, onde ya pasaremos a ganar toles vistes hacia l'Este, alloriando colos Picos d'Europa, destacando munchísimu les Peñes Santes, tolos montes ponguetos, el cercanu Macizu'l Mampodre... una pasada de mirador.

Tol grupín nel Picu'l Llagu (2020 m)

Tirando un airín fríu nel cumal, esfrutaremos de les maraviyoses vistes y arrancamos p'abaxo ya que nun se paraba, revisando parte del grupu la baxada un pelín más al Este, pero tando meyor pela arista SE, ensin cornises, anque teniendo que baxar una pindia pala, nel que toca tirar de piolé y palos, p'afitar correutamente'l cuerpu ensin llevar sustos.

 

Prestosísima baxada na pala sur del Picu'l Llagu, con vistes hacia'l Mampodre

Ffadremos un descensu preciosu, colos esquiadores analizando la baxada pa otra vegada, quedándome mui grande particularmente, anque había traces d'envueltes pela mesma vallina de baxada hasta'l Hoyu la Campana, onde fadremos una parada a la espera de reunificar al grupu.

Baxaremos tola vallina'l Reguerón hacia'l valle Espinareo

Ya en tarrén más seguru, continuamos avanzando pela guapa vallina'l Reguerón, dexando atrás el Picu'l Llagu y tendiendo siempre enfrente la Polinosa y la Cruz del Mampodre hasta salir a una colladina que danos pasu al valle Espinareo, onde pararemos a xintar al solete y a quitarnos los crampones ya que la ñeve escosaba a partir d'esti puntu.

Continuamos agora per pista hacia Maraña col Mampodre a la nuesa mandrecha

 

Magar del pinchín continuaremos descensu per pista esta vegada, teniendo la compaña del Mampodre Occidental a la nuesa mandrecha, demientres buscamos la salida hacia Espinareo a la manzorga, abandonando'l camín que baxa a Maraña.

Facemos camín per Espinaréu p'ascender hacia'l colláu Cagüezu

Coles vistes ablucante de la Peñe Ten al frente y de la Torresanta de Llión, vamos descender toles praderíes d'Espinaréu, pa empatar cola pista que vien dende Maraña y que tien de dexanos nel colláu Cagüezu, brutal mirador del Mampodre.

 

Dende equí, ya sólo tendremos de baxar de nuevu hacia'l Caseríu Riosol, pa zarrar esta prestosa circular de 12,4 km de grandes vistes en tola redolada, nes que tendremos un desnivel de +/-725 m nun total de 5 hores y 45 min.

Camudando'l Camín dende Valdeburón